Mataupu 3

O le Tamai Mamoe na Fasia Talu Ona Faavaeina le Lalolagi

E faapefea ona faatoilaloina e le Togiola a Iesu Keriso le Pau o Atamu ma mafai ai ona tatou toe foi atu i le afioaga o le Tama?

Faatomuaga

Sa aoao mai Peresitene Harold B. Lee e tatau ona tatou malamalama i le Pau o le tagata ina ia mafai ai ona malamalama i le Togiola a le Faaola, lea na faatoilaloina aafiaga o le Pau ma mafai ai ona maua le ola e faavavau. Sa ia faapea mai, “E matua taua tele… le malamalama i le Pau, ma ua manaomia ai le Togiola— o le misiona lea a le Alii o Iesu Keriso”.¹

E masani ona molimau mai Peresitene Lee i le misiona paia a le Faaola, pe ana le seanoa o ia semanu e le mafai ona laveaiina i tatou mai le maliu ma le agasala. Na ia faailoa mai “O le alo o le Atua…e ia te ia le mana e faia ai lalolagi, ma faatonutonu ai. Na afio mai o Ia iinei, o le Alo e Toatasi e faataunuuina se misiona, e avea ma se Tamai Mamoe na fasia talu ona faavaeina le lalolagi, ina ia aumaia le faaolataga i tagata uma. Na Ia tatalaina le faitotoa i le toetutu, e ala i le tuuina atu o Lona soifua ma aoao mai le ala tatou te maua ai le ola e faavavau, o lona uiga o lo tatou toe foi atu lea i le afioaga o le Tama ma le Alo. O ia lena o Iesu i Lona matagofie uma.”²

O lenei mataupu o loo talanoaina ai le Pau o Atamu ma Eva, o le Togiola a le Faaola na faatoilaloina ai aafiaga o le Pau, ma o tatou tiutetauave pe afai tatou te mauaina le atoatoaga o faamanuiaga o le Togiola.

O Aoaoga a Harold B. Lee

Sa mafai faapefea ona aumaia e le Pau o Atamu ma Eva faamanuiaga o le olaga faitino?

O Atamu ma Eva… sa faaaogaina lo la’ua saolotoga ma i lo laua lava maliliega na laua aia ai le fua, o le laau na faatonuina i laua e aua le aai ai, peitai ua gauai atu i laua i le tulafono a Satani. I lena le usiusitai na faatagaina ai le Atua e asiasia i laua i le faamasinoga. Ina ia laua aoaoina e ui o le Atua o se Tama alofa, ae o ia foi o se Tama Amiotonu, ma ina ua laua solia le tulafono, o lea sa tuuina ai i laua ina ia faasalaina, ma sa tulia ese mai i laua i lena faatoaga matagofie. Sa asiasia i laua i le tele o suiga eseese o le olaga talu mai lena taimi, ma amata mai i lena taimi, ona aafia ai tagata uma. Ina ia laua aoaoina e ala mai i lo laua le usiusitai ua la maua ai se faasalaga o se faamasinoga amiotonu. Sa faamalosia i laua e galulue mo le mauaina o a laua meaai ma le afu o o laua mata, aua ua avea nei i laua ma tagata ola.

… O le tiga, pagatia, (faanoanoa) oti, na mafua uma mai ia i laua, a e faatasi ma lena tiga, e faapei lava o mea na tatou aoaoina mai i lena taimi e oo mai i le taimi nei, na maua mai ai se tomai ma se malamalamaaga semanu e le mafai ona ausia sei vagana ua tigaina. …

… Faatasi ai ma le aafiaga o Atamu ma Eva i le Pau, na mafua ai ona oo mai se suiga i o laua luga; o lena lava suiga na aafia uma ai le natura faaletagata, ma le natura uma o le foafoaga, le foafoaga uma o meaola, laau—o mea uma e i ai le ola ua suia. O le lalolagi lava ia ua oo i ai le oti.. … Pe faapefea ona tupu, e le mafai e se tasi ona faamatalaina, ma soo se tasi na te taumafai e faamalamalamaina, o le a oo atu i se mamao ese nai lo le mea na tau mai e le Alii ia i tatou. Peitai sa oo mai se suiga tele i le foafoaga ma e oo atu i lena lava taimi sa le mafai ona oo i ai le oti. E amata mai i lena taimi, o le natura atoa o mea na oo i se tulaga o le oti malie atu seia oo i le taimi e oo mai ai le oti faaletino, ma pe a maea lena o le a manaomia le toefuataiina mai i se tulaga toetutu… ..

… O se tasi o lauga sili, ou te manatu o le lauga pito puupuu lava lea na laugaina e se tagata, o le lauga sa fofogaina mai e le Tina o Eva… ..

“Ana le seanoa la ta solitulafono, semanu ta te le maua ni fanau, ma le iloa le lelei mai le leaga, ma le olioli o le togiolaina o i taua, ma le ola faavavau e tuuina mai e le Atua ia i latou uma o e usiusitai.” [Mose 5:11.]

O lea e tatau ai ia i tatou, faatasi ma Eva, ona olioli i le Pau, lea na faatagaina ai le aumaia o le malamalama o le lelei ma le leaga, lea na faatagaina ai le aumaia o fanau i lenei olaga faaletino, lea na faatagaina ai le mauaina o le olioli o le togiolaina ma le ola e faavavau e tuuina e le Atua i tagata uma.

E faapena foi Atamu, sa faamanuiaina i le meaalofa o le Agaga Paia. “Ma sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua o lau soligatulafono ua pupula ai ou mata, ma o le a ou maua le olioli i le olaga nei, ma o le a ou toe vaai i le Atua i le tino.” [Mose 5:11.]

Tau ina ia tuuina mai e le Alii Lona malamalama e uiga i lena faamanuiaga sili ua oo mai ia i tatou, ma e tatau ona tatou faamamaluina i o tatou mafaufau ma a tatou aoaoga i lena meaalofa sili na tuuina mai ia i tatou e Atamu ma Eva, e ala i le faaaogaina o lo la’ua saolotoga, na la aia ai le fua ma maua ai e i laua fanau i le olaga faaletino ma aumaia ia i tatou, o e tupuga mai ia laua i le tuufaasologa mai o augatupulaga o taimi, lena faamanuiaga sili e mafai ai ona tatou maua le olioli i le togiolaina o i tatou, ma o le a tatou toe vaai atu ai i le Atua i le tino ma maua le ola e faavavau.³

E faapefea ona faatoilaloina e le Togiola a le Faaola aafiaga o le Pau?

Na tulia ese e le Atua Atamu mai le Faatoaga o Etena ona o lona le usiusitai. Sa ia puapuagatia i le oti faaleagaga… Ae peitai, faauta, ou te fai atu ia te outou o le Alii o le Atua, na tuuina atu ia Atamu le folafolaga e le oti lava o ia i le oti faaletino, seia vagana ua ia auina atu agelu e folafola ia i latou le salamo i le suafa o lona Alo pele e toatasi ma o lona maliu e mafai ai ona toe faatuina mai i le ola e faavavau (tagai MFF 29:41–43)… Ina ua tulia Atamu mai le Faatoaga o Etena, sa ia puapuagatia i le oti faaleagaga, o le tuueseeseina lea o se mafutaga vavalalata ma le afioaga o le Alii.⁴

Pe aisea na auina mai ai le Faaola i le lalolagi? O le Matai lava ia na ia tali i lena fesili ao i ai o ia i lana talaiga ina ua Ia fetalai: “Aua e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.” (Ioane 3:17). …

E faasaoina mai i le a? Ina ia faaolaina mai i le a? Muamua o le faasaoina lea mai le oti faaletino e ala mai i le toe tutu mai o e ua oti. Ma i se isi tulaga, ua faasaoina i tatou e ala mai i lana taulaga togiola. Ua faasaoina i tatou mai le agasala.⁵

[O le uiga o lea mea] i se tagata o le Au Paia o Aso e Gata Ai, o le faaolataga, o le tuufaasaolotoina lea mai le nofo pologa ma le iuga o agasala e ala mai i le filifiliga saoloto mai le lagi, le laveaiina mai le agasala ma le faasalaga e faavavau e ala mai i le Togiola a Keriso.

Ou te manatu e leai se isi nofoaga e sili atu tatou te maua ai se faamalamalamaaga lelei e uiga i le fuafuaga o le Togiola nai lo tusitusiga a Iakopo, o loo maua lea i le Tusi a Mamona, i le 2 Nifae, ao lona mataupu e 9. O lea ou te tuuina atu mo lo outou silafia, ma uunaia outou e faitau ma le faaeteete ma saga faitau i ai ma le faautauta i lena faamalamalamaaga aupito i taua…

“E! O le silisiliese o le alofa o lo tatou Atua, o Le Paia o Isaraelu! Aua na te laveai ona tagata paia ai lena faaiteite matautia, o le tiapolo lea ma le oti ma seoli ma lena lepa afi ma le teio, o le tiga lea e le iu lava.

“E! O le silisiliese o le paia o lo tatou Atua! Aua ua silafia e ia mea uma, ua leai se mea ua le silafia e ia.

“E afio mai foi o ia i le lalolagi ina ia faaolaina e ia tagata uma, pe afai latou te faalogo atu i lona siufofoga, aua faauta, e onosai o ia i tiga o tagata uma, e moni, o tiga o tagata ola uma, o tane ma fafine, atoa ma le fanau i le aiga o Atamu.”

“Ua onosai o ia i nei mea uma ina ia oo le toetu mai i tagata uma lava, ina ia latou tutu mai i ona luma i le aso tele ma le faamasinoga.

“Ua ia poloai mai foi i tagata uma, e ao ina latou salamo ma ia papatisoina i lona suafa, ia atoatoa lo latou faatuatua i Le Paia o Isaraelu, a leai e le mafai ona faaolaina i latou i le malo o le Atua.

“Afai foi latou te le salamo ma faatuatua i lona suafa ma papatisoina i lona suafa ma tumau e oo i le iuga, e faasalaina i latou, aua ua fetalai mai ai le Alii le Atua, o Le Paia o Isaraelu.” [2 Nifae 9:19–24.]. …

Ua faamalamalamaina faapea…o le faaolataga o le tagata lava ia, lea e maua e tagata taitoatasi e faalagolago lea i ana lava amioga ma lona lava olaga. Ae peitai e i ai (foi) le mea ua tatou maua ua taua o le (faaolataga) “lautele” e oo mai lea i tagata uma, e tusa pe latou te lelei pe leaga, mauoa pe mativa, ao latou ola ai, e leai sona eseesega. E maua e tagata uma le faamanuiaga o le Togiola ma le Toetutu e tuuina atu ia i latou se meaalofa foai fua ona o le taulaga a le Faaola…

O le mea lea, o nei aoaoga faavae, ua faataatia manino mai e faapea ona o le mana o le togiola, o lea e faasaoina ai tagata uma aua e pei ona oti uma ia Atamu, e faapena foi ona ola uma ia Keriso, e aunoa ma se tasi e sao mai ai. E faapena foi atalii o le malaia o e faia le agasala e le mafaamagaloina, o le a toe tutu faatasi mai ma isi o le fanau uma a Atamu…Ua tatou maua lena folafolaga i le Mataupu Faavae o le Faatuatua, “Matou te talitonu e faaolaina tagata uma lava i le togisala a Keriso pe a tausia poloaiga ma sauniga o le Talalelei.” [Mataupu Faavae o le Faatuauta 1:3.]⁶

E mafai faapefea ona tatou maua faamanuiaga atoatoa o le Togiola pe a tatou faatuatua ma usiusitai ia Iesu Keriso?

O le matua manaomia o le malamalamaaga e uiga i le Faaola ma lana misiona paia, na faamamafaina lea e le matai i se tasi o taimi ina ua ia fetalai atu i le Au Faresaio o e sa siomia o ia, o le latou masani o le taumafai lea e faamaasiasi pe tau maileia o ia, “Se a so outou taofi i le Keriso?”(Mataio 22:42). …

I le taimi o lana misiona sa i ai nisi o i latou sa leai se faatuatua, o e na fai a latou tautinoga e uiga Matai. I lona nuu o Nasareta na latou faapea atu ma le faatauemu:

“E le o le atalii ea lenei o le tufuga? E le o Maria ea le igoa o lona tina? O ona uso foi o Iakopo ma Iose, ma Simona, ma Iuta?…Ona latou tausuai ai lea ia te ia.” [Mataio 13: 55, 57.]…

Pe a faatusatusa i le eseesega,. …o ona soo faatuatua e pei o Peteru o ia o le taitai o le au aposetolo na ia tautino mai: “O oe o le Keriso, o le Alo o le Atua soifua.” (Mataio 16:16—ma sa faapea mai foi Mareta, o le na faatuatua ia te Ia, “Ioe, le Alii e, ua ou talitonu lava, o oe o le Keriso le Alo o le Atua, o le maliu mai i le lalolagi.” (Ioane 11:27.) Ma mai se isi o ona soo, ina ua ia vaai ma tagotago i le Faaola toetu, na faamamafaina mai e Toma i lana molimau i upu faigofie nei, “Lou Alii e, ma lou Atua e”! [Ioane 20:28.]…

O loo ou mafaufau nei i ni mea eseese se lua na tutupu. Na maua e se uo pele se tasi o na savali faamomoiloto: “Matou te faanoanoa e faailoa atu le fasiotia o lou atalii i le taua.” Na ou malaga i lona fale ma vaaia ai le aiga ua nutimomoia loto, sa latou maua mea uma e mafai e tupe ona faatau—o le tamaoaiga, o tulaga [faale soifuaga nei], o mea e ta’u e le lalolagi o le mamalu, ae o lenei ua nutimomoia o latou faamoemoega ma o latou moomooga, ua latou taofimauina nei se mea latou te le i ola ina ia maua, ma sa foliga mai latou te le i mauaina mai lea taimi i lea taimi. Sa lē i i ai iina le faamafanafanaga semanu e mafai ona latou maua.

Na ou faatusatusaina lena vaaiga ma se mea na ou molimauina i luga i le Falemai AAG pe tusa o le ono masina talu ai mai le aso lenei, a o i ai se tasi o o tatou Peresitene faatuatua o le misiona sa faasolosolo malie atu ai lona soifua. Sa matua tigaina o ia, ae sa i ai le olioli i lona loto aua na ia iloa o mafatiaga i le tele o taimi e aoao ai e tagata le usiusitai, ma le sootaga ma lē na sili atu ona mafatiaga nai lo le mea e mafai e se isi o i tatou ona onosaia. Na ia iloaina foi, le mana o le Alii toetu. .

O le aso lenei e tatau ai ona tatou fesili ifo ia i tatou lava i le fesili e tali ai le fesili a le Matai ia te i latou i ona po na, “Se a lo outou taofi i le Keriso?” E ao ona tatou fesili e pei ona tatou faia i le aso nei, “Se a so tatou taofi i le Keriso?” Ona tuutuu mai lea o le fesili i le tagata lava ia ma fesili ifo, “O le a so’u taofi i le Keriso?” Pe ou te mafaufau ia te ia o le Faaola o lou agaga?” Pe ou te mafaufau ia te ia e aunoa ma le masalosalo i lou mafaufau o ia lea na faaali i le Perofeta o Iosefa Samita? Pe ou te talitonu o ia lea na faavaeina lenei Ekalesia i luga o lenei fogaeleele? Pe ou te talia o ia o le Faaola o le lalolagi? Pe o ou faamaoni ea i au feagaiga i le vai o le papatisoga, pe na ou malamalama ea, o lona uiga o le a ou tu e avea ma molimau ia te ia i taimi uma, ma mea uma, ma nofoaga uma, ma soo se mea ou te i ai, seia oo lava i le oti?⁷

O le a faamanuiaina i tatou e le Alii e tusa ma le maualuga tatou te tausia ai ana poloaiga. Sa faapea mai Nifae:

“Aua ua matou galulue ma le maelega ina ia tusitusi e faaoleole i a matou fanau, atoa ma o matou uso, ia talitonu ia Keriso, ma ia lelei ma le Atua, aua ua matou iloa e faaolaina i tatou i le alofa tunoa pe a uma ona faia mea uma tatou te mafaia.”[2 Nifae 25:23.]

E faasaoina i tatou i le toto o le Faaola, ma Lana togiola, ae sei vagana ua tatou faia mea uma tatou te mafai ina ia faasaoina ai i tatou e ala i le tausia o ana poloaiga. O mataupu faavae uma o le talalelei, o mataupu faavae ia o folafolaga, o loo tatalaina mai ai ia te i tatou fuafuaga a le Silisiliese.⁸

E tatau i tagata taitoatasi uma ona faia mea uma e faasaoina mai ai o ia i le agasala; ona mafai lea ona ia maua faamanuiaga o le togiolaina e ala mai i Le Paia o Isaraelu, ina ia faaolaina tagata uma i le usiusitai i tulafono ma sauniga o le talalelei.

E le na o le agasala a Atamu na togiolaina e Iesu, ae faapena foi agasala a tagata uma. Ae o le faaolataga o le tagata lava ia mai le agasala, e faalagolago lea i ana lava taumafaiga, ma e faamasinoina le tagata lava ia e tusa ma ana galuega.

Ua faamanino mai e Tusitusiga Paia i le taimi e oo mai ai le toetutu i tagata uma, e na o i latou lava o e usiusitai i le Keriso o le a maua le lautele o faamanuiaga o le faaolataga e faavavau. Sa faamalamalama mai e Paulo i tagata Eperu e uiga ia Iesu, “ona avea ai lea o ia ma tupuga o le ola e faavavau ia i latou uma o e usiusitai ia te ia.” (Eperu 5:9.)

O la’u tatalo ma le lotomaualalo, ia malamalama atili tagata uma i soo se mea i le taua o le togiola a le Faaola mo tagata uma, o le na tuuina mai ia i tatou le ata o le faaolataga e taitaiina atu ai i tatou i le ola e faavavau, i le mea o loo afifio ai le Atua ma Keriso.⁹

Fautuaga mo Suesuega ma Talanoaga

E faapefea ona e talia le fesili lenei “Po o le a sou taofi e uiga i le Keriso?”
Aisea ua taua ai le Faaola o le “Tamai mamoe e fasia ae lei faavaeina lenei lalolagi?” (Faaaliga 13:8).
O a ni auala na avea ai le Pau ma se faamanuiaga faapea foi ma se tofotofoga mo Atamu ma Eva? E faapefea foi ona avea ma se puna o le olioli ma le faanoanoa mo i tatou?
O a ituaiga tomai ma malamalamaaga e mafai ona maua mai i le na o le onosaia o tofotofoga ma faafitauli o le olaga nei?
O le a le oti faaleagaga? E faapefea ona faatoilaloina le oti faaleagaga?
O a faamanuiaga o le Togiola e oo mai i tagata uma o se meaalofa maua fua? O a ni mea e tatau ona tatou faia ina ia olioli ai le tagata lava ia i faamanuiaga o le Togiola?
O le a se aoaoga o le taua o le faatuatua ia Iesu Keriso na aoaoina mai i tala e lua o ni tagata ua feagai ma le oti sa faamatalaina e Peresitene Lee?
O a ni mea na oo i lou olaga ua faamalosia ai lau molimau e uiga i le Togiola a le Faaola?
E mafai faapefea e le Togiola ona “taitaiina atu i tatou i le ola e faavavau, i le mea e afifio ai le Atua ma Keriso?”

O lenei ata vali o le Faaola na avea o se ata e sili ona fiafia i ai Peresitene Harold B. Lee ma sa tautau i totonu o lona ofisa.