Aoaoga a Peresitene
Mataupu 9: Gauai Atu i le Avefeau Moni a Iesu Keriso

Mataupu 9

Gauai Atu i le Avefeau Moni a Iesu Keriso

E mafai faapefea ona tatou mulimuli ma le faamaoni i le perofeta soifua?

Faatomuaga

Sa avea Harold B. Lee ma Peresitene lona sefulutasi o le Ekalesia ina ua maliu Peresitene Iosefa Filitia Samita ia Iulai 1972. I se taimi puupuu mulimuli ane, sa asiasi atu ai Peresitene Lee i se potu i totonu o le Malumalu i Sate Leki i le vaega o lo’o tautau ai ata o le au perofeta e toasefulu na muamua atu i a te ia. “O ina, i le agaga tatalo ma le mafaufau loloto,” sa ia toe manatua, “Sa ou vaai ai i ata o na tagata o le Atua—tagata tonu, mama atoatoa, o tagata paia o le Atua—o e sa muamua atu ia te au i lenei valaauga.” Sa ia mafaufau i uiga lelei ma mea sa ausia e nei perofeta taitoatasi o lenei tisipenisione mulimuli ma faaiu ai i le ata mulimuli. “O Peresitene Iosefa Filitia Samita sa i ai ona foliga fiafia, o lo’u perofeta-taitai pele o le na te le fesiligia le mea moni … Na Ia foliga mai i lena taimi puupuu ua ia tuuina mai ia te au, e faapei, o se tootoo o le amiotonu ma faapea mai ia te au, ‘Ina alu ia ma ia e faapea ona fai,’ …

“Ou te iloa, faatasi ma se molimau e sili ona malosi nai lo o le vaai, e pei ona faaali mai e le Alii, ‘Ua tuuina atu ki o le malo o le Atua i le tagata i le lalolagi [mai le Perofeta o Iosefa Samita ma e na suitulaga ia te ia seia oo mai i le taimi nei], ma o le a alualu pea i luma le talalelei i tuluiga o le lalolagi.’”[MFF 65:2]1

O le Peresitene o le Ekalesia ona pau lea o le tagata i le lalolagi ua faataga e faaogaina ki uma o le perisitua. Sa aoao mai e se perofeta o aso e gata ai: “A gasegase le Peresitene o le Ekalesia pe ua le mafai ona ia faia o tiute uma o lona tofi, o ona fesoasoani e toalua, faatasi ma ia, o le Korama lea a le Au Peresitene Sili, la te tauavea le galuega a le Au Peresitene Sili. A i ai ni fesili tetele, aiaiga, polokalama, po o mataupu e tulai mai, e talanoaina ma le agaga tatalo i le fono e fesoasoani i le Au Peresitene Sili ma le Korama a le Au Aposetolo e Toasefululua. E leai se tonu e sau mai le Au Peresitene Sili ma le Korama a le Toasefululua e faia e aunoa ma le autasi i ai o i latou uma. O le mulimuli i lenei ala musuia, o le a faapea ai lava ona agai pea i luma le Ekalesia e aunoa ma le faalavelavea.”2

I le avea ai ma tagata o le Ekalesia a le Alii, e mafai ona tatou maua le faatuatuaga atoatoa i le taitaiga a le perofeta soifua, lea sa taua e Peresitene Lee o le “avefeau moni” a le Alii. Sa aoao mai Peresitene Lee “afai o le fanau a le Alii, lea e aofia ai tagata uma o i luga o le fogaeleele, tusa lava poo le a le ituaiga, lanu, poo le talitonuga faalelotu, o le a faalogo i le valaau a le avefeau moni o le talalelei a Iesu Keriso, …o le a i ai se taimi e vaai ai tagata taitoatasi i le Alii ma iloa ai o loo soifua o Ia.”3

O le mulimuli i le perofeta a le Alii, o le a mafai ai ona tatou taunuu saogalemu i lo tatou taunuuga sili - - -le afioaga o lo tatou Tama i le Lagi.

Aoaoga a Harold B. Lee

E avea faapefea le Peresitene o le Ekalesia ma leoleo o le malo o le Alii?

Ia manatua o le ao o lenei ekalesia e le o le Peresitene o le Ekalesia. O le ao o lenei ekalesia o le Alii ma le Matai, o Iesu Keriso, ia o loo pulea ma taitai … E mafai ona tatou mautinoa i nei toatuga uma, o loo taitai o Ia, nei galo ia te i tatou. 4

“[O Iesu] o le ao o le tino, o le Ekalesia: o ia o le amataga, o le ulumatua mai e ua oti; ina ia fai o ia ma faasilisili i mea uma lava.” (Kolose 1:18.) E moni lava, ae peitai, o tisipensione uma taitasi ao i ai lana talalelei i le lalolagi ma ao faatuina lana Ekalesia, e filifilia lava e le Alii ma tuuina atu le pule i lea tagata e toatasi i lea taimi i nei tisipenisione taitasi, o ia lea ua umia le tofi o le peresitene o le Ekalesia, poo le perofeta, tagata vaai ma tali faaaliga i le Ekalesia. O nei tofi, poo le tuuina atu o lenei pule, e le avea ai lea tagata ma “Ulu o le Ekalesia,” o lona igoa e ā Iesu Keriso ia. Ae peitai e avea o ia ma fofoga o le Atua, ma o ia o le sui o le Atua, ma e fetalai mai le Atua i Lona nuu e ala mai ia te ia, e tusa ma faatonuga e tuuina mai pe taofia foi mataupu faavae ma sauniga, pe lapataiina foi i latou e uiga i faamasinoga. …

… O le persitene o le Ekalesia o le leoleo o le Maota po o le Malo o le Atua. Ua tuuina atu ki i vaega uma i ona lima. E tusa ai ma le taitaiga a le Alii na te tuuina atu ki o mana i isi tagata o le Ekalesia e papatiso ai, e talai le talalelei, e faaee atu lima i e ua mamai, e pule faamalumalu pe aoao atu ai i isi valaauga eseese. Ua ia tuuina atu i nai tagata toaitiiti le pule e pulea ai sauniga o le malumalu pe faatino ai foi le faiga o faaipoipoga “ina ia fusifusia i le lalolagi ma le lagi.”5

O le perofeta o se tali faaaliga ma se faamatala upu musuia ma le paia o le mafaufau ma le finagalo o le Atua. O loo ia umia ki o le malo o le Atua i o tatou aso, e pei o ki na tuuina atu i a Peteru e avea ai o ia ma āo o le Ekalesia i le lalolagi i ona aso.6

Sei ou faitau atu se mea na tusia [e Peresitene J. Reuben Clark Jr.] mo se tasi faatasiga: “E tatau ona manatua … e na o le Peresitene o le Ekalesia, o le Faitaulaga Sili Pulefaamalumalu,… e i ai le aia tatau e maua ai faaaliga mo le Ekalesia, pe fou pe toe teuteu, pe tuuina mai se faauigaga faatagaina o tusitusiga paia lea e ao ona fusifusia i le Ekalesia. …Ua na o ia le fofoga o le Atua i le lalolagi mo le Ekalesia a Iesu Keriso o le Au Paia o Aso e Gata Ai, le Ekalesia moni e tasi. O ia e toatasi e mafai ona ia faaali le mafaufau ma le finagalo o le Alii i ona tagata. E leai se taitai o se isi lava Ekalesia i le lalolagi o i ai lenei aia tatau maualuga ma le tofi sili.” [Church News, 31 Iulai 1954, 10.]7

O le Peresitene o le Ekalesia ua na o ia lava ua faatagaina e na te tuuina mai se mataupu faavae fou, o ia lea, pe a ia tuuina mai, o le a tautino maia o se faaaliga mai le Atua, ma o le a taliaina e le Au Fono a le Toasefululua ma lagolagoina ai e tagata o le Ekalesia.8

E faapefea ona filifilia le Peresitene o le Ekalesia?

Mo i latou e fesili: E faapefea ona filifili pe tofia le Peresitene o le Ekalesia? o le tali sao ma le faigofie o le ta’u atu lea i ai o le mataupu faavae o le faatuatua lona lima: “Matou te talitonu e valaauina le tagata e le Atua, i le valoaga, ma le faaee atu o lima o e o i ai le pule, e talai atu ai le talalelei ma faia sauniga o i ai.”

O le amataga o le valaauina o se tasi e avea ma Peresitene o le Ekalesia e amata tonu lava i le taimi e valaau ai, faauu, ma faamanuia e avea ma uso o le Korama a Aposetolo e Toasefululua. O lenei valaauga i le valoaga, po o se foi isi faaupuga, e ala i musumusuga a le Alii i e o umia ki o le au peresitene, ma o le faauuga ma le faamanuiaga e sosoo mai ai e ala i le faaee atu o lima o lena lava pule e tasi, ua tuuina ai Aposetolo taitoatasi i se korama faale- perisitua o alii e toasefululua o loo umia le tofi faa-aposetolo.

O Aposetolo taitoatasi ua faauuina i lalo o aao o le Peresitene o le Ekalesia, o le o loo umia ki o le malo o le Atua e o gatasi ma isi Aposetolo faauuina, ua tuuina atu i a i latou le pule o le perisitua e tatau ai e umia ai tulaga uma i totonu o le Ekalesia, e oo lava i se tofiga o le au peresitene o le Ekalesia pe afai o le a valaauina ai o ia e le pulega pule faamalumalu ma lagolagoina e ala i se palota a le faalapotopotoga o tagata o le ekalesia.

… I le taimi lava e maliu ai se Peresitene o le Ekalesia, o le tulaga tino o lo’o sosoo ai, le Korama e Toasefululua a Aposetolo, ua avea ma pulega pule faamalumalu, faatasi ai ma le Peresitene a le Toasefululua e otomeki lava ona avea ma peresitene le tumau o le Ekalesia seia faauuina ma lagolagoina aloaia se Peresitene o le Ekalesia i lona tofiga …

O sui uma o le Au Peresitene Sili ma le Toasefulua e masani lava ona lagolagoina o ni “perofeta, tagata vaai, ma tali faaaliga.” … O le uiga o lenei mea o so’o se Aposetolo lava, ua filifilia ma faauuina, e mafai ona pule faamalumalu i le Ekalesia pe afai o le a “filifilia e le faalapotopotoga [lea e faauigaina o le vaega atoa a le Korama e Toasefululua], ma tofia ma faauuina i lea tofiga, ma talisapaia le talitonuga, faatuatua, ma le tatalo a le Ekalesia.” e sii sao mai i se faaaliga i lenei mataupu, i se tuutuuga e tasi, ma o lena tuutuuga pe a o ia o se uso sinia, poo se Peresitene, o lena faalapotopotoga (tagai MFF 107:22).9

Ao ou nofo ai o se uso fou o le Aufono a le Toasefululua, o le taimi muamua na ou auai i le toe faatulagaina o le Ekalesia, o le taimi lea ina ua maliu Peresitene [Heber J.] Grant. … Ao faalau mai suafa o fesoasoani o le Peresitene [fou] ma ao nofoia o laua nofoa i le pito i luma o le potu, sa i ai ia te au se molimau o alii nei ua finagalo le Alii e avea ma Au Peresitene o le Ekalesia. Sa oo mai foi ia te au se talitonuga maumautu e peiseai o lena mea moni sa iliina e pei o se pu i ou taliga.

. … A lē i ai i tagata o lenei Ekalesia lena talitonuga o loo taitaiina i latou i le ala sao, ma i ai se talitonuga o nei auauna a le Atua o alii ua musuia ma ua faauuina i le ala sao e ala i le aao o le Atua, e lei liua moni i latou.10

E faaali mai e le [Alii] le tulafono ma o Ia e fuafuaina, filifilia pe tofia au ofisa ma umia le aia tatau e aoai ai, faasao, e oo lava i le aveesea o i latou i Lana faitalia. Ma e manaomia ai se [fesootaiga] le motusia e ala i faaaliga tuusao i le va o le Alii ma Lana Ekalesia. Mo se faamaoniga o mea moni muamua atu, e tatou te taulai i faataitaiga o augatupulaga uma e pei ona tusia i totonu o tusitusiga paia. O lenei faatulagaga o le malo sa amata mai i totonu o Etena. Sa tofia e le Atua Atamu e pulea le lalolagi ma sa tuuina atu ia te ia tulafono. Sa fuafuaina se faasologa e masani ai mai ia Atamu ia Noa ma mai ia Noa ia Mekisateko, Aperaamo, Isaako, Iakopo, Iosefa, Mose, Samuelu le perofeta, Ioane, Iesu, ma Ana Aposetolo, o i latou uma taitoatasi sa filifilia e le Alii ae le o tagata.

E moni e i ai le leo o tagata i le puleaina o le malo o le Atua, ae o le mea muamua latou te lē faaeeina atu le pule, e lē mafai foi ona latou aveesea [lea pule]. Mo se faataitaiga: E le i filifilia e tagata Aposetolo e toasefululua a Iesu Keriso, ma e le mafai foi i se latou palota faitele ona aveesea mai i o latou tofi aposetolo. E faapei ona sa i ai i le puleaina o le malo anamua, ua faapea foi ona toefuataiina mai. E lei filifilia e tagata le Perofeta sili ma le Aposetolo o ona po nei o Iosefa Samita, ao le Atua sa filifilia o ia, i le auala masani sa Ia filifilia ai isi sa muamua atu ia te ia—e ala i faaaliga vaaia ma Lona lava siufofoga mai le lagi.11

Ua ia te au se malamalamaaga ao ou mafaufau e uiga i lenei matafaioi [o se perofeta] ma ua lava foi lo’u latalata i le Usoga i le tele o tausaga, o se tasi e i lenei tofiga e i lalo o le vaavaaiga tumau a Ia e ona lenei galuega o loo tatou faia. E le mafai ona Ia faatagaina se tasi i lenei tofiga e taitai seseina lenei ekalesia. E mafai ona outou mautinoa lena mea. Pe a ou mafaufau i le auala e sau ai se tasi i se tulaga faataitai i le Ekalesia, ou te mafaufau i mea na tutupu i le tolusefulu tasi ma le afa tausaga, ma mea uma na tutupu i lou lava olaga—o se polokalama maoae faaleaoaoga lenei! Ina ua faia le suiga i le Au Peresitene Sili, sa ou faatusatusaina le eseese o le auala e sailia ai e vaega faaupufai se peresitene o le Iunaite Setete i le tofi, po o le faauuina foi o se tupu, ina ia iloa pe faapefea, e ala i le fuafuaga a le Alii, ona faia nei suiga e aunoa ma se vevesi, e aunoa foi ma le tauaimisa. Ua i ai le fuafuaga ma e le mafai ona sese le Alii, ma ua uma ona Ia ta’u mai ia te i tatou.12

Aisea e tatau ai ona tatou mulimuli i le perofeta?

O lenei, ia avea lenei aso ma aso tatou te mafaufau loloto ai, ia manatua le mea na tau mai muamua e le Alii ia i tatou. O loo i ai Lana perofeta i le lalolagi i ona po nei, ma pe a e fia iloa le faaaliga mulimuli ua oo mai i tagata, ia maua sau kopi o le konafesi mulimuli ma faitau auiliili aemaise lava i mea o loo tauina mai e le Au Peresitene Sili … O le a e maua ai upu e aupito sili ma upu mulimuli ua tuuina mai e lo tatou Tama Faalelagi. E le tatau ona tatou faalagolago tasi i mea o i totonu o tusitusiga faavae o le Ekalesia. E faaopoopo i mea ua tau mai ia i tatou e tusitusiga paia, ua i ai ia i tatou mea o loo tau mai e perofeta iinei ma le taimi nei, ma e mo i tatou pe afai tatou te mananao e faasaoina i tatou i mauga o Siona, pe a oo mai nei tulaga matautia, ia faalogo ma usitai.13

E masani ona tupu i nei aso pe a saunoa atu le usoga i le pule e tatau ai, ae i ai nisi ua tulai mai e faasagatau ma faapea mai, “O lenei, o fea e mafai ona ou maua ai se pule e mafai ai ona e fai mai i lena mea. …” E faaosoosoina i tatou e faapea atu, “Toe alu ma toe faitau le tautalaga a le taitai o le Ekalesia e uiga i lenei mataupu, ma o le a e maua ai le pule uma o loo e sailia, aua o le auala lea a le Alii. O loo iinei Lana perofeta, ma e manaomia tele faaaliga i le avea ai ma faamaoniga e pei ona sa iai i soo se taimi i soo se tisipenisione o le talalelei i le lalolagi.”14

O lenei, na pau lava le saogalemu o loo iai ia i tatou i le avea ai ma tagata o le ekalesia o le faia o lea o mea sa fetalai ai le Alii i lena aso ina ua faatuina le Ekalesia. E ao ona tatou aoao e gauai i upu ma poloaiga o le a tuuina mai e le Alii e ala mai i Lana perofeta, “e pei ona ia maua, ma savavali i ou luma i le paia atoatoa; …e pei lava o loo alu atu mai ia te au, i le onosai uma ma le faatuatua.” (MFF 21:4-5). E i ai mea o le a manaomia ai le onosai ma le faatuatua. Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faale-olaga nei. E ono faalavelave i le ituaiga olaga o loo e ola ai. Ae afai e te faalogo i nei mea, e pei o loo tuuina mai i le fofoga o le Alii Lava Ia, faatasi ma le onosai, ma le faatuatua, o le folafolaga e faapea “o le a le manumalo faitotoa o seoli i a te outou; ioe, a e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa” (MFF 21:6).15

Mo outou le Au Paia o Aso e Gata Ai i soo se mea, o lena folafolaga [i le MFF 21:4–6] o le a fai mo outou pe afai o le a outou mulimuli i taitaiga a le Alii ua faatulagaina i totonu o le Ekalesia, e ala i le usitai i a latou fautuaga i le onosai ma le faatuatua.16

Ia faalagolago i le Peresitene o le Ekalesia mo o outou faatonuga po o aoaoga. Afai e i ai se feteenaiga, ia vaai ma mulimuli i le Peresitene pe afai e te fia savali i le malamalama.17

Afai e mananao o tatou tagata ina ia taitaiina saogalemu i nei taimi [faigata] o le taufaasese ma tala fatu sese, e tatau ona mulimuli i o latou taitai ma saili mo taitaiga a le Agaga o le Alii ina ia aloese mai le pau atu i mailei poto faatogafiti a tagata, o e, faatasi ai ma le poto e taufaasese, ua latou saili e faagauai mai ma maua ai se faaiuga e auauna i o latou lava manatu ma o nisi taimi o manatu faatiapolo.18

O lenei e toatele naua i latou i le vaitaimi o le Matai sa latou le taliaina o Ia o le Alo o le Atua. Sa i ai nisi sa faapea mai, “Oi, o Ia ua nao se atalii o Iosefa, le kamuta.” Sa faapea mai nisi, “O Ia o le Aloalii o Pelesepulo,” o lona uiga o le atalii o le tiapolo. Ina ua ia faatinoina nisi o nei mea faavavega sa latou fai mai, “O Ia o se tagata inu uaina,” o lona uiga sa inu i le uaina malosi. E toaitiiti lava sa mafai ona latou faapea mai, “O oe o le Keriso, o le Alo o le Atua soifua.” (Mataio 16:16) Aisea na le mafai ai ona iloa e tagata o Ia o le Alo o le Atua?

Tatou pepese, “Maimau pe ana mafai ona ou faatasi ma Ia i lena taimi, ina ua Ia siiina tamaiti i Ona aao.” [Tagai “I Think When I Read That Sweet Story,” Children’s Songbook, 56.] O le toatele o o tatou tagata o le a le mafai ona latou taliaina o Ia i lena taimi e sili atu nai le mafai ona latou taliaina mataupu faavae ia e tuuina mai e faiaoga o le amiotonu e pei ona musuia e lena lava Faaola e tasi. Pe a le mafai ona tatou taliaina i latou o loo fai ma Ona sui iinei, o le a le faigofie ona taliaina le Matai lava Ia, pe a faapea o le a faaali mai o Ia …

Ao ou i ai i le misiona, sa matou malaga ma nisi o faifeautalai ma le peresitene o le matou misiona i le Falepuipui o Karefasi. Ona o le lagona ootia i le nofoaga lea sa tagatavaleina ai le Perofeta ma lona uso o Ailama, o lea sa matou talosaga atu ia te ia e toe faamatala mai le mea na tupu seia oo atu lava i le tagatavaleina. Sa matua ootia lava au ina ua faapea mai le peresitene o le misiona: “Ina ua maliu le Perofeta o Iosefa Samita, e toatele i latou sa maliliu faaleagaga faatasi ma ia. Ma sa faapea lava i suiga uma o le taitaiga o le malo o le Atua. Ina ua maliu Polika Iaga, e toatele sa maliliu faatasi ma ia faaleagaga, ma sa faapea foi Ioane Teila, ma le maliu o Peresitene uma o le Ekalesia”…

O nisi taimi tatou te oti faaleagaga ai ma momotu ese mai ai lava i tatou mai le malamalama manino faaleagaga ma galo ai o le aso, iinei ma le taimi lava lenei, o loo i ai ia i tatou se perofeta.19

O le tulaga o nei avefeau sa tofia i le lagi o loo fai ma sui o le Alii i tisipenisione taitasi o le talalelei i luga o le fogaeleele e mafai ona faapupula mai i se mea sa tupu e pei ona faamatalaina e se tasi o tagata faimalaga i Europa i matu. Sa tuua e le tagata faimalaga lea i se vaa mai Stockholm, i Suetena, e malaga atu i le Sami Patika. Ina ia taunuu i lea nofoaga, e tatau ona pasia e le vaa le afe pe sili atu o motu. Ao tu o ia i le pito i luma o le vaa, sa lagona e le tagata faimalaga ua le lava onosai aua ua foliga mai ia te ia o se alavaa faatamala lea. Aisea ua ou le malaga ai i se ala e latalata i lenei motu pe o se tasi poo se isi ala sili ona manaia nai lo le ala ua filifilia e le pailate? I le osooso ae o lona ita tele sa ia faapea ifo ai ia te ia lava, “O le a le mea ua tupu i le toeaina pailate? Pe ua na le iloa ea le mea e agai i ai?’ Sa faafuasei ona ia iloa atu pine o loo maka faasolosolo i le ala sa foliga mai e pei o ni ‘au salu o loo lala ae i luga o le vai. Sa asaina ma le faaeteete e se tagata lenei alavaa ma faailogaina le ala sili ona saogalemu e folau ai nei vaa. E faapea le ala o le olaga agai i le tino ola pea ma le ola e faavavau: “O inisinia a le Atua,” na latou faataatia se alafua mo se malaga sili ona saogalemu ma fiafia ma sa latou muai lapataia i tatou e uiga i vaega matautia, e ala lea i lo latou mulimuli i se ata ua uma ona fuafuaina.20

O le Alii o le a ia musuia Ana auauna e taitai Lana ekalesia i le ala sao. O Ana perofeta o le a maua musumusuga a le Alii e saunoa atu ai i tagata o le Ekalesia, “O le ala lava lenei, ia outou savavali ai” (Isaia 30:21). E oo lava i taimi o faigata lea e oo mai i aso o loo tatou ola ai, e pei ona valoia i faaaliga o ona po nei, o le ata e finagalo le Alii tatou te vaai i ai o le ata tumau ma le mautu. E te manatua sa Ia fetalai atu i Ona soo, “A e tutu pea ou soo i mea paia, ma e le faagaeetia” (MFF 45:32).21

Manatu mo Suesuega ma Talanoaga

  • O ai lava le ao moni o le Ekalesia? O ai e tuuina mai i ai e le Alii faatonuga ma taitaiga i Lana Ekalesia?

  • E faapefea ona tuuina mai se mataupu faavae fou i luma o le Ekalesia?

  • E faapefea ona saunia le Peresitene o le Ekalesia mo ana matafaioi sili? E faapefea ona taitai e le Alii le filifiliina o le Peresitene o Lana Ekalesia?

  • O le a se fautuaga ua tuuina mai e se perofeta soifua ua faamanuiaina ai faapitoa lou olaga?

  • Aisea e te manatu ai o nisi tagata ua latou faamamaluina perofeta o anamua ae latou te le faamamaluina le perofeta soifua? O a ni taunuuga o le le gauai i upu a le perofeta soifua poo le luiina foi o lana pule?

  • O a folafolaga ua faia mo i latou o e gauai i upu ma poloaiga a le perofeta soifua?

Faamatalaga

  1. In Conference Report, Oke. 1972, 18–20; po o le Liahona, Me 1973, 25–26.

  2. Howard W. Hunter, in Conference Report, Oke. 1994, 6–7; po o le Liahona, Ian. 1994, 7.

  3. The Teachings of Harold B. Lee, ed. Clyde J. Williams (1996), 522.

  4. The Teachings of Harold B. Lee, 527.

  5. Decisions for Successful Living (1973), 103, 105.

  6. The Teachings of Harold B. Lee, 531.

  7. Lauga i le Konofesi ma le Inisititiuti a Cambridge, 10 Me 1970, Faila a le Faletusi o Talafaasolopito, O Le Ekalesia a Iesu Keriso o le Au Paia o Aso e Gata Ai,8

  8. The Teachings of Harold B. Lee, 543–44.

  9. The Teachings of Harold B. Lee, 534–35.

  10. The Teachings of Harold B. Lee, 542–43.

  11. The Teachings of Harold B. Lee, 547–48; paragraphing added.

  12. The Teachings of Harold B. Lee, 535–36.

  13. The Teachings of Harold B. Lee, 471.

  14. The Teachings of Harold B. Lee, 428–29.

  15. The Teachings of Harold B. Lee, 525–26.

  16. The Teachings of Harold B. Lee, 529.

  17. The Teachings of Harold B. Lee, 532.

  18. The Teachings of Harold B. Lee, 437.

  19. Ye Are the Light of the World (1974), 31, 34–35.

  20. The Teachings of Harold B. Lee, 534.

  21. The Teachings of Harold B. Lee, 545.

O loo faaali mai i lenei ata le Au Peresitene Sili o loo lagolagoina Peresitene Harold B. Lee o le Peresitene o le Ekalesia i se faapotopotoga paia i le aso 6 Oketopa 1972. O Peresitene N. Eldon Tanner o loo i le pulelaa, ma Peresitene Marion G. Romney o loo i le itu taumatau o Peresitene Lee.