Mataupu 10

Auaunaga Alofa ma le Faamaoni Faale-Perisitua

E faapefea ona faamanuiaina tagata uma o le Ekalesia ona o auaunaga alofa ma le faamaoni faale perisitua?

Faatomuaga

Sa faamatala mai e Peresitene Harold B. Lee le tala lenei e uiga i le Malumalu i Sate Leki: “Ao fuafua le fausiaina o le malumalu tele i Sate Leki, sa talosagaina Truman O. Angell, le tusiata, e tusia se faamatalaga …e faailoa atu ai i tagata o le Ekalesia sina ata faalemafaufau o foliga o le malumalu o le a i ai pe a maea…O isi mea uma na ia taua, sa ia faamatala ai le mea o le a e maua i le pito i sisifo o le malumalu …O lalo ifo o le tumutumu ogatotonu i le pito i sisifo o le malumalu, i tafatafa o le tapeneko, o le a e maua ai le fetu lea e ta’ua i le faatulagaina o fetu o le fetu o le Aniva. O le a e vaaia le vaega maamaai o le fetu o le Aniva o faasaga i luga i se fetu pupula lea e masani ona tatou faaigoaina o le Fetu i Matu. Ina ua faamatalaina e Truman O. Angell le mea o le a maua i lea vaega o le malumalu, sa ia faapea mai, ‘O le mea lenei e faailoga ai, o le a maua e i latou na sē lo latou auala, e ala lea i le perisitua.’”

Ona faamamafa mai lea e Peresitene Lee, “E ala i le perisitua ma ua na o le perisitua lava e mafai ai e i tatou, o atalii ma afafine o le Atua, ona toe maua lo tatou ala i lo tatou aiga moni.”¹

Aoaoga a Harold B. Lee

O le a le perisitua?

E lua ni mataupu sa faamatala ai le uiga o le perisitua i le tele o tausaga. O le tasi o le perisitua o le pule lea ua tuuina mai e le Tama Faalelagi i tagata e faatagaina ai i latou e galulue i soo se mea e faatatau i le faaolataga o tagata i le lalolagi. O le isi mataupu o loo faamatala i se tasi manatu faapea o le perisitua o le mana lea e galue ai le Atua e ala mai i tagata.²

O loo iai iinei le perisitua a le Atua ma sa tuu faasolo mai talu le toefuataiga o le Ekalesia e ala i avefeau sa auina mai e toefuatai mai lena pule ina ia mafai ai ona faia sauniga o le faaolataga mo tagata faatuatua uma o le lalolagi. O le perisitua a le Atua o loo umia ki o le faaolataga.³

Sa tau atu e le Matai i a Peteru ma isi aposetolo se mana e sili atu nai lo le tagata e taua o “ki o le malo o le lagi,” ma e ala i lenei mana, sa ia faapea mai, “E soo se mea e faamauina i le lalolagi o le a faamauina i le lagi.” (Mataio 16:19). O lena mana ma le pule, o loo pulea ai sauniga paia, ua taua o le perisitua paia ma e i ai lava i le Ekalesia a Iesu Keriso i tisipenisione uma o le talalelei i le lalolagi.⁴

[O le perisitua] o le pule e pulea ai sauniga e tusa ai ma le faatulagaga ua faaali mai e le [Alii]. O le mana …o le aia tatau lea ua tuuina mai i tagata e le Alii e galulue ai i Lona suafa mo le faaolataga o agaga o tagatau. …

O le tasi o faamoemoega o [le] perisitua maualuga e pulea ai sauniga, e tuuina atu ai i tagata lena malamalama o le Atua lea na faaali mai e le Matai e manaomia, ma sa taua e le Aposetolo o Paulo, a o talanoa e uiga i le faatulagaga o le Ekalesia, e tatau ona “iloa lelei o le Alo o le Atua, ina ia fai ma tagata matua,” [Efeso 4:13.] E i ai foi le pule o le perisitua maualalo e taitai ai isi sauniga, e faapei o nei alii talavou sa latou faamanuia ma tufaina le faamanutuga i se tulaga matagofie i lenei lava afiafi. O le Perisitua Arona, sa faapea mai le Alii, o le perisitua “o loo i ai ki o asiasiga a agelu, ma le talalelei o le salamo, ma le papatisoga i le faatofuina mo le faamagaloina o agasala,” [MFF 13:1] ma le tulafono o poloaiga faaletino. Ma o lea la … o le perisitua [e] tatau mo le faamoemoega o le tuuina atu o le mana i e ua valaauina e pulea sauniga e tatau ai mo le mauaina o le faaolataga sa fuafuaina e le Alii mo Lona faamoemoe.⁵

O loo afio le Alii i le lotolotoi o lana Au Paia e ala i lana perisitua, lea ua ia faamatuu mai i le tagata.⁶

E faapefea ona faaaogaina le perisitua?

I se tasi o faaaliga taua tele e pei ona tusia i le vaega 121 o le Mataupu Faavae ma Feagaiga, e ala mai i musumusuga mai le Alii ia Iosefa Samita, sa tau mai ai e le Alii ni mea taua tele. Sa ia fetalai mai o le perisitua e na o luga lava o mataupu faavae o le amiotonu e mafai ona faatonutonu ma pulea ai, ma pe afai e faaaoga ma le amioletonu lo tatou tofi o le perisitua “e tau ufiufi ai a tatou agasala, pe faamalie ai lo tatou loto maualuga, lo tatou fia sili le aoga, pe faatonuina pe pulea pe faamalosia i agaga o le fanau a tagata …e tiga le agaga o le Atua.” (tagai MFF 121:37.)…

O le faasalaga pe afai o le a tatou faaaogaina ma le amioletonu o tatou perisitua, o le a punitia le lagi ma o le a tiga le Agaga o le Alii. Pe a aveesea le Agaga mai ia i tatou, ua aveesea le mana o le perisitua ma ua tuua ai i tatou ia i tatou lava e “a’a i tui,” pe afai o faasoesa mai ia i tatou aoaiga ma faatonuga a o tatou taitai. Ona amata lea ona tatou faasaua i tagata o le au paia, o lona uiga o le a muimui, ma oo ai ina faasaga tau i le Atua, ma o le a manumalo le mana o le tiapolo ia i tatou pe afai tatou te le salamo ma liliu ese mai i le ala o le tiapolo. [tagai MFF 121:37–38.]

O uiga lelei manaomia o le taitaiga faaleperisitua o loo faamatalaina foi i lenei faaaliga. O se tasi e ao ona pulefaamalumalu i le Ekalesia ma le onosai ma le faapalepale, i le agalelei ma le agamalu, ma le alofa faamaoni. Afai e tatau ona faia e se tasi se aoaiga pe faatonu ma le malosi se isi, e tatau ona ia faia pe a musuia e le Agaga Paia ma faaali atu mulimuli le alofa faateleina, ina nei fai oe mona fili. [tagai MFF 121:41–43.] I o tatou valaauga faale perisitua uma, ia aua nei galo ia i tatou o le faamoemoe o le galuega a le ekalesia ma le malo o le Atua o le laveaiina lea o agaga, ma o i latou uma o loo avea ai i tatou ma taitai o fanau a lo tatou Tama, ma o le a Ia faaauupegaina foi i tatou i soo se mea tatou te faia mo le laveaiina o agaga taitasi.

E i ai se faataitaiga lelei lava o le ala e finagalo lo tatou Alii tatou te auauna atu ai i e o loo manaomia la tatou fesoasoaniga. E pei ona tusia i le tusi o Galuega a Aposetolo, ina ua tau atu Peteru ma Ioane i se tagata e lei savali muamua lava ma sa nofo i le faitotoa o le malumalu ma aisi mo ni meaalofa, la te le’i tuuina i ai se tupe, ae tou te manatua sa faapea atu i ai le aposetolo o Peteru, “E leai sa’u ario po o sa’u auro, a o le mea o ia te au, ou te avatu lea ia te oe, o le suafa o Iesu Keriso le Nasareta, ina tu ai ia i luga, ina savali.” (Galuega 3:6.)

Ona mulimuli ane ai lea, o loo i ai se faamatalaga taua o loo i totonu o lena lava mea na tupu. Sa tago atu Peteru i lona lima taumatau ma faatu ia te ia i luga. [tagai Galuega 3:7] Manatua e lei lava ia Peteru le na ona faatonu ia te ia e savali, ae sa ia tago i lona lima ma faatu ia te ia i luga.

O lea e tatau foi ona faapena i tatou, i a tatou fegalegaleaiga ma o tatou uso ua tau vaivai, ia lē o ni uso o le perisitua e faamasino atu, otegia, ma faasala. Ia faapei o le aposetolo o Peteru, e tatau ona tatou taitai i latou, faamalosiau ia te i latou, ma tuuina atu ia i latou se lagona o le saogalemu ma le faaaloalo ia i latou lava seia oo ina mafai ona latou manumalo i o latou faafitauli ma mafai ona tutu i o latou lava vae.

O le ala lena e mafai ai e le perisitua a le Atua ona aumaia le faaolataga ma faaaumea mai i latou ua vaivai, ina ia latou toe malolosi.⁷

O lo tatou manumalo…o le a fuaina i se vaega o lo tatou tulaga o le alofa ia i latou o loo tatou saili e taitai ma auauna i ai. Pe a tatou alolofa moni i isi o le a mafai ona tineia lagona leaga e masani ona manumalo i fesootaiga faaletagata. Pe a tatou alolofa moni i isi o le a tatou galulue i mea e maua ai lo latou ola e faavavau ae le na o le faia o mea tatou te manaomia ma maua ai so tatou lava viiga.⁸

Pe faapefea e i latou o umia le perisitua ona “i ai i le galuega a [lo latou] Tama”?

I le sefululua o tausaga, o Iesu, ina ua mavae ona maua o ia i totonu o le malumalu e Iosefa ma Maria, sa ia tali atu ai i lo laua fia iloa o le mea sa i ai e ala i se fesili taua tele: “Lua te le iloa ea e tatau ona ou i ai i le fale o lou tama?.” (Luka 2:49.) O le a le uiga o le i ai i le fale o Lona Tama?

I se tasi faaaliga sa tuuina mai e le Alii le uiga o le fesili a lena alii talavou. I toeaina o le Ekalesia sa faapotopoto i Katelani, Ohio, sa Ia faamamafa atu ai ia te i latou le matafaioi tele o le avea ai ma nisi e umia le perisitua paia i le tofi o le toeaina. “O le mea lea,” sa fetalai mai ai o ia, “ona o oulua o sui,ua oulua i ai i le feau a le Alii, ma soo se mea lua te fai e tusa ma le loto o le Alii o le galuega lava lea a le Alii.” (MFF 64:29.)

Pe a umia e se tasi le perisitua, ua avea o ia ma sui o le Alii. E ao ona ia mafaufau i lona valaauga o lo’o iai o ia i le feau a le Alii. O le uiga lena o le faalautele o le perisitua. Mafaufau o lo’o fesili mai le Matai ia te oe, e pei ona fesili ai lenei alii talavou ia Iosefa ma Maria, lua te le iloa ea e tatau ona ou iai i le fale [galuega] a lou Tama? Soo se mea e te faia i le finagalo o le Alii o le galuega lena a le Alii.⁹

Pe a tatou galulue i le suafa o le Alii, o e ua umia le perisitua, o loo tatou faia lea mea i le suafa ma avea ma sui o lo tatou Tama Faalelagi. O le Perisitua o le mana lea e galue ai lo tatou Tama Faalelagi e ala mai i tagata.

. …Ou te popole aua o nisi o o tatou toeaina e le o malamalama i lenei mea, pe afai latou te taitai o ni toeaina o le Ekalesia. … pe o faitaulaga sili, ia faia e faapei lava ona latou faatinoina sauniga, o le Alii e ala mai ia i latou o loo galue i luga o ulu o i latou o loo tatou auauna i ai. E masani ona ou manatu o le tasi o mafuaaga e le o mafai ai ona faalauteleina o tatou perisitua ona tatou te le o malamalama e tusa o tagata o umia le perisitua, o loo Ia galue e ala atu ia i tatou i le mana o le perisitua paia, ma ou te moomoo e mafai ona maua uma e i tatou lena lagona, ma faapena ona tatou aoao o tatou talavou i le uiga o le umia ma le faalauteleina o le perisitua.¹⁰

O le a le uiga o le faaee atu o lima i luga o lou ulu? Sei ou aveina oe i le vaega e tolusefulu-ono o le Mataupu Faavae ma Feagaiga ma faitau atu ia te oe le fuaiupu lea atonu na ona e faitau ai lava ae le iloa le taua o loo i ai. O se faaaliga lenei na ala mai ia Iosefa Samita le Perofeta mo Edward Partridge, le uluai Epikopo Pulefaamalumalu. O le saunoaga lenei a le Alii: “O le a ou faaee atu lo’u lima i ou luga ai le lima o la’u auauna o Sidney Rigdon, o le a e maua foi lo’u Agaga, o le Agaga Paia, o le Fesoasoani lea o le a aoaoina oe i mataupu tau le filemu o le malo” (MFF 36:2).

Po o e iloa ea le me o loo Ia fetalai mai ai—soo se taimi lava e te faatino ai se auaunaga i le pule o lou perisitua ua tusa lava o le Alii o loo faaee ona aao i luga o lena tagata e ala i lou lima ina ia e tuuina atu faamanuiaga o le ola, o le soifua maloloina, o le perisitua, poo le a lava. Ma soo se taimi lava e tatou te faagaoioi ai o tatou perisitua, o loo tatou faia e pei lava o loo i ai faatasi le Alii ma i tatou, ma e ala ia i tatou, na te fesoasoani mai ia i tatou e faatino lena sauniga.¹¹

O lenei, mo outou tama tane o le Ekalesia: O loo i ai ia te outou le aia tatau e umia ai le perisitua a le Atua. …O nisi ua uma ona faaee lima i luga o latou ulu e maua le mana ma lenei pule, ae peitai e lei mauaina lava. Ma aisea ua latou le maua ai? Ua tau mai e le Alii ia i tatou ni mea se lua: aua ua faapea ona manumanu o latou loto i mea o le lalolagi, ma lona lua, ua manao tele i viiga mai tagata (MFF 121:35). Sei e mafaufau lava i tua i nisi sa outou faifai mea faatasi ma iloilo pe aisea na toe faavaivai ai nisi o i latou i mea faaleagaga, ma o le a outou maua le tali i se tasi o na mea e lua. Ona o o latou loto ua pupu tele i mea o lenei lalolagi- - -pe o tupe? pe o o latou tulaga faaletagata? pe o ni mea i o latou lalolagi faaleaoaoga? - - -pe ua latou mananao tele i viiga mai tagata ua le mafai ai ona faalavelaveina i latou i mea o le Ekalesia. Ioe, pe afai o le a outou avea ma taitai i totonu o le Ekalesia ma umia nei tofi. …e tatau ona outou totogiina le tau.¹²

Uso e, ua tuuina atu i o outou lima se faatuatuaga paia e le gata i le umia o le pule e galue ai i le suafa o le Alii, ae ia saunia outou ia mama outou e tauave ipu a le Alii ina ia faailoaina mai ia te outou le mana o le Atua Silisili Ese e ala i sauniga paia o le perisitua o loo outou taitaiina. Aua lava nei avea lou perisitua i nofoaga o le a e maasiasi ai pe a vaaia ai oe e le Peresitene o le Ekalesia.¹³

E ao ona tatou faapea, “Ona o loo ou umia le perisitua a le Atua soifua, o au o se sui vaaia o lo tatou Tama Faalelagi ma ou te umia le perisitua lea e galue ai o Ia e ala ia te au; e le mafai ona ou faamaasiasiina au i le faia lea o ni mea e le tatau ona ou faia, ona o la’u mafutaga ma le perisitua a le Atua.”. …

Uso e, o loo matou faamoemoe ia te outou e tauavea le fu’a o le perisitua paia a le Atua. …Ia tumau i o tatou mata le taua e faavavau o mea, ma le manatu tasi i le mamalu o le Atua, ma faapea ifo le tagata ia te ia lava, “amata atu nei, ma le fesoasoani mai o le Atua, o le a ou le auai i soo se gaoioiga vagana o lea gaoioiga e fesoasoani e uunaia au agai i luma i le sini o le olaga e faavavau, seia oo mai le taimi ou te toe foi atu ai i le maota o lo’u Tama Faalelagi.”¹⁴

Uso e, o le perisitua, pe a valaauina outou i se tofiga, outou tama i totonu o aiga, o loo ia te outou le aia tatau e maua ai faamanuiaga o le perisitua, ma o loo i ai ia te outou le aia tatau e maua ai faaaliga o le Agaga e taitai ma faasino ai oe pe afai o loo e ola ina ia mafai ona tatalaina mai e le Alii pupuni o le lagi mo outou ma tuuina atu ia te outou taitaiga e tusa ai ma le valaauga patino ua tofia i ai outou. Uso e, ina ia maua e outou na mea, e ao ona outou ola e tusa ai mo ia mea. E tatau ona outou agavaa.¹⁵

Ia manatua na folafolaga ofoofogia a le Alii mo outou pe afai o le a faatumuina outou i le alofa i tagata uma ma “teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, ao lou tootoo ma tootoo le feliuliuai o le amiotonu ma le upumoni; o lou malo foi o le a faia ma malo e faavavau, e aunoa foi ma faiga faamalosi o le a tafe ia te oe e faavavau faavavau lava.” (MFF 121:45–46.)

O na upu musuia e mai le Alii, ma ua ou toe tautalagia e fai ma faamanatu ia te outou taitoatasi i a outou matafaioi o e ua umia le perisitua ma faamanuiaga sili o le a outou maua pe afai e faalautele o outou valaauga o auauna a le Atua Silisili Ese.¹⁶

E faapefea ona faamanuiaina tagata uma o le Ekalesia pe a auauna i le amiotonu i latou o e umia le perisitua?

O i latou o umia le perisitua o leoleo moni i luga o olo o Siona. O outou o i latou ia ua faatulaga e pulefaamalumalu i soo se paranesi o le Ekalesia ma ia mataalia mo mea matautia o loo osofaia ai le lalolagi, o fili vaaia ma fili le vaaia. O outou o se vaega itiiti o i latou o umia le perisitua ua fai ma leoleo mamoe o le lafu, o lafu mamoe o tagata o le Ekalesia i soo se mea. O a outou matafaioi e tele. E tatau ona outou faaaumea mai tagata fou faatoa o mai i le Ekalesia; saili i latou o loo saili ma le faamaoni i le mea moni ma faailoa atu i latou i faifeautalai; ia mafaufau e le aunoa i manaoga o e ua matua oti ma fafine ua oti a latou tane. Aemaise lava, ia faia lea mea ma ia le pisia mai outou i le lalolagi, e pei ona fai mai ai le aposetolo o Iakopo, o le “amioatua ma le faamaoni i luma o le Atua.” (Iakopo 1:27.) E ao ona outou vaai ua le faateteleina le amioleaga ma ia vaai o i ai se naunautaiga i tagata uma e malolosi i le Ekalesia. E tatau ona outou aoao atu mataupu faavae moni ina ia iloa e tagata o le ekalesia, taitai, ma faiaoga ona pulea i latou lava. …

O outou o e o loo pulefaamalumalu ua tuuina atu ia te outou le matafaioi i le lafu, poo le paranesi, itu, uarota, poo siteki o loo outou pulefaamalumalu ai. E ao ona avea outou e pei o tamā, e aoaoina e lē aunoa ma le faaeteete tamā e uiga i le tiutetauave o le tausia lelei ma aoao o latou lava aiga ma faalautele atu i latou lava e pei ona valaauina ai i tiutetauave eseese i le Ekalesia, e fai ma puipuiga o le faatuatua.¹⁷

O le malosiaga moni lava o lenei ekalesia o loo taoto i totonu o le mana ma le pule o le perisitua paia ua tuuina mai e lo tatou Tama Faalelagi ia i tatou i lenei aso. Afai tatou te faaaogaina tonu lea mana ma faalautele o tatou valaauga i le perisitua, o le a tatou vaaia le alualu i luma o le galuega a faifeautalai, o le a totogi le sefuluai, o le a olaola le fuafuaga o le uelefea, o le a malu puipuia o tatou aiga, ma o le a malu puipuia le ola mama o tupulaga talavou a Isaraelu.¹⁸

I nai tausaga ua mavae sa ou alu ai i le konafesi a se siteki i le mea o loo tu ai le Malumalu o Manti i le itu i Saute o Iuta. O se po pogisa, ma matagi ma sa to’a le kiona. Ina ua tuua a matou fonotaga ma malaga atu i le fale o le peresitene o le siteki, sa tu le matou taavale ma matou tilotilo atu i luga o le malumalu o loo tu mai i luga o se mauga. Ao matou nonofo ma le ofo i le vaaiga matagofie o le malamalama o lena malumalu i le to’a o le kiona ma le pogisa o le po, sa fai mai le tala a le peresitene sa ou manatu e taua tele. Sa ia faapea mai, “O lena malumalu, susulu pei ona i ai, e le sili atu lona matagofie nai lo le taimi o se afa poo le mafiafia foi o le puao.” Ia malamalama i le taua o lena manatu, e mafai ona ou faapea atu e leai se taimi e taua tele ai le talalelei a Iesu Keriso ia te oe nai lo le taimi o afa poo le taimi ua e feagai ai ma ni faafitauli faigata. E leai se mea e sili ona taua ai le mana o le perisitua o loo outou umia, nai lo le taimi e i ai se toatuga i lou aiga, se mai tigaina, poo ni faaiuga ogaoga e tatau ona faia, pe afai e oo mai ni lologa, poo se afi, poo se ituaiga oge. O loo i ai i le mana o le perisitua, le mana lea o le Atua Silisili Ese, le mana e faatino ai vavega pe a finagalo i ai le Alii, ae peitai ina ia mafai ona tatou faaaoga lena perisitua, e tatau ona tatou agavaa e faaaogaina. O le lē malamalama i lenei mataupu faavae, o le lē mauaina foi lea o faamanuiaga o le umiaina o lena perisitua sili.¹⁹

Fautuaga mo Suesuega ma Talanoaga

E faapefea ona fesoasoani le perisitua ia i tatou e “toe maua lo tatou ala i lo tatou aiga” i lo tatou Tama Faalelagi?
Aisea e taua ai i e o umia le perisitua ona manatua o le perisitua e ao ona faaaoga e laveai ai agaga ma auauna ai ia i latou o loo manaomia le fesoasoani? I le tala o loo faamauina i le Galuega 3:1–9, sa faapefea ona faatulaga e Peteru ma Ioane se faataitaiga o le faaaogaina i le amiotonu o le mana o le perisitua?
O le a se mea tatou te aoaoina mai i le Mataupu Faavae ma Feagaiga 121:41–44 e uiga i le ala e faaaogaina ai le perisitua e i latou o umia le perisitua?
Aisea e tatau ai i e o umia le perisitua ona amiotonu pe afai latou te tuuina atu auaunaga faamaoni faaleperisitua? E tusa ai ma le saunoaga a Peresitene Lee, o le a le faasalaga o le faaaogaina ma le amioletonu o le perisitua?
E tusa ai o se tasi o umia le perisitua, e faapefea ona fesoasoani le iloa o loo e iai i le feau a le Alii i le faalauteleina o lou valaauga faaleperisitua?
E faapefea ona fesoasoani tuafafine i le perisitua mo le faalauteleina o o latou valaauga faaleperisitua?
O a ni ala patino sa faamanuiaina ai lou olaga e ala i le mana o le perisitua?

Sa fautuaina e Peresitene Harold B. Lee e o umia le perisitua, “Ia saunia outou ia pei o ipu e mama ma atoatoa ina ia faaalia ai le mana o le Atua Silisiliese e ala atu ia te outou a o outou taitai i sauniga paia o le perisitua.”

E ao ia i latou taitoatasi o umia le perisitua ona “mafaufau i lona valaauga e pei o loo i ai o ia i le feau a le Alii. O le uiga lena o le faalautele o le perisitua.”