Mataupu 19

Faaavanoa se Taimi e Faapaia Ai

E mafai faapefea ona tatou galulue i aso taitasi e fafagaina i tatou faaleagaga?

Faatomuaga

E masani ona aoao mai e Peresitene Harold B. Lee le taua o le fafagaina o i tatou lava faaleagaga. Fai mai a ia o o tatou tino e mafai ona faatusa i papuipui e tatau ona vaaia i taimi uma ina ia mafai ona tumau lona malosi i taimi e osofa’ia ai e se fili.

“O fili lava o outou ‘papuipui’ faaletagata e le gata ina faaletino ae faaleagaga foi,” na ia faamatala ai. E mafai ona aofia ai “se faanoanoaga e lē i fuafuaina, o se faalumaluma aiga, o se tulaga faate’ia i mea tautupe, o le [le faamaoni] o se uo, po o se agasala faalilolilo i poloaiga a le Atua.” A tutupu mai ia ituaiga mea i o tatou olaga, tatou te manaomia “se faaopoopoga mai sosia faaleagaga. …Afai ua motusia a outou fesootaiga ma le Ekalesia ona o le faatamala ma ua leai so outou faatuatua i le Atua, afai tou tou te le’i malamalama e ala i le suesue ma le aoao i le ala o le faamagaloga o a outou solitulafono, pe afai foi tou te le’i mauaina e ala i le agaga tatalo le malamalama i se taui mautinoa o taulaga ma tiga, o lona uiga ua e motusia au laina e sapalai mai ai lou faaleagaga ma le malosi ma o le mea lena ua matuā vaivai ai lou agaga. …Ua lamatia ai lou papuipui i mailei a ‘au a Satani. Ona avea ai lea o oe e faapei o le tagata valea na fau lona fale i luga o le oneone, ma ina ua agi malosi mai le matagi ona pa’° ai lea (Tagai Mataio 7:24–27.]

“Ma o lea ou te aioi atu ai…ia outou ola i aso taitasi ina ia mafai ona outou maua mai le punavai o le malamalama [o] meaai e fafagaina ai ina ia lava le malosi mo mea e manaomia i aso taitasi. Ia faaavanoa se taimi e faapaiaina ai outou i aso taitasi o outou olaga.”¹

O Aoaoga a Harold B. Lee

E mafai faapefea ona tatou fafagaina faaleagaga i tatou lava?

O loo i ai i totonu o tagata uma se agaga ma o se faatusa moni lava o lou tino atoa faitino. Ina ia tausisia la le malosi ma le maloloina o lou tino faitino, o lea e tatau ai ona fafagaina pea lava pea i meaai ma vaiinu. O sela faavae taitasi o o outou tino e tatau ona i ai se sootaga ma neura ina ia mafai ai ona faatumauina le faagasologa taua o le olaga. O le lē mafai ona tausisia ma faatumauina nei sootaga faaneura po o le lē maua foi o nei mea e manaomia e fafaga ai, o le a oo mai ai le pala, lē aoga, ma’i ma i’u ai lava ina oti le tino faitino.

E manaomia pea lava pea e lou tino faaleagaga le fafagaina ina ia mautinoa ai lona maloloina ma le malosi. E lē faamalieina i meaai faalelalolagi lenei tulaga manaomia. O meaai e faamalieina ai ou manaoga faaleagaga e tatau ona aumaia i sosia faaleagaga. O mataupu faavae o le upumoni e faavavau, e pei ona i ai i le talalelei, ma le faaaogaina lelei e ala i le auai pea lava i gaoioiga faaleagaga, e taua mo le faamalieina o o tatou lava ola faaleagaga. O le taulimaina taua o le agaga e faapena foi ona faatumauina i le na o le sootaga poto faatasi ai ma punavai faaleagaga o le upumoni. O le ma’i ma le oti faaleagaga, o lona uiga o le vavaeeseina mai lea i le punavai o le malamalama faaleagaga, o le a oo mai pe a motusia lau sootaga ma le nofoaga tutotonu faaleagaga o neura, o le Ekalesia lea a Iesu Keriso.²

Tatou te atina’eina o tatou lava tagata i la le agaga i le ola ai…E tatau ona tatou aoaoina i tatou lava i la le agaga, i le tulaga lava lea e tasi, pe afai tatou te mananao ina ia atoatoa, e faapei foi ona tatou aoaoina o tatou tino faitino. E tatau ona faia a tatou faamalositino i aso taitasi i o tatou agaga e ala i le tatalo, o le faia o galuega lelei i aso taitasi, ma le fetufaai atu i isi. E ao ona tatou fafagaina o tatou agaga i aso taitasi e ala i le suesue i tusitusiga paia i aso uma, o le [faia o afiafi faaleaiga], o le auai i sauniga, ma le aai ma feinu i le faamanatuga. E tatau ona tatou aloese mai aafiaga faatama’i e oo mai pe a tatou solia se poloaiga a le Atua. E tutusa lava ma le faa’onaina o o tatou tino faaleagaga. …

O taimi e suesueina ai i tatou faaleagaga, o taimi ia tatou te faafesaga’i ai ma foma’i faalagaga a le Atua—o o tatou epikopo ia, o o tatou peresitene o siteki, ma o nisi foi taimi o le Au Pulega Aoao i faatalanoaga ia e faia e lē aunoa ona o le faamoemoe e fesoasoani ai mo le sauniaina o i tatou mo le siitia faaleagaga. O nisi taimi, ona o mea e tulai mai i nei faatalanoaga, e tele se galuega e tatau ona faia mo o tatou tagata faaleagaga.³

O mea uma lava e ese mai le finagalo o le Atua, o se mea oona lea i lou olaga faaleagaga ma e tatau ona lafoa’ia e faapei ona e lē tago lava i vaioona oi lau kapoti o vailaau i le fale.⁴

O le tagata amiotonu e taumafai mo le faaleleia atili o ia lava ma na te iloaina lava na te manaomia le salamo i aso taiasi ona o ona masei po o mea foi na te le o faia. E lē popole tele i mea e mafai ona ia maua ae pe o le a le tele o mea e mafai ona ia tuuina atu i isi, ma lona iloa foi o lea tulaga e na o le fiafia moni na te maua mai ai. Na te taumafai foi e fai le mea aupito silisili, ina ia oo mai le po ua mafai ona ia molimau i lona agaga ma lona Atua, pe o le a lava le mea na ia faia i lena aso, na ia faia lava i le mea sili na te mafaia.⁵

E fafagaina faapefea le agaga pe a tausia ma faapaia le aso Sapati?

O le Aso Sa e sili atu i le na o se aso e malolo ai mai galuega masani o le vaiaso. E le tatau ona manatu i ai faapea ua na o se aso e ivavā ai ma tafafaovale ai, pe faamalie ai foi tuinanau ma fiafiaga faaletino. O se aso o taumafa mo o outou tino agaga. O le nofoaga mo taumafa faaleagaga o le fale lea mo taupuaiga. O iina tou te faaaumea ai ma i latou e faapei foi o outou o ē o saili atu i meaai faaleagaga. Tou te faatasitasi ai e vivii ma tatalo ma tapuai atu ai i le Silisili Ese, ma aai ma feinu i le faamanatuga e fai ma faamantuga o a outou matafaioi o ni atalii ma ni afafine o le Atua i lenei olaga, ma manatua ai le togiola a le Faaola ma toe folafola atu ai lou faamaoni i lona suafa. …

Pe o e i ai i le fale po o le lotu, e tatau ona ogatasi ou mafaufauga ma lau amio ma le agaga ma le faamoemoega o le Sapati. O nofoaga e talie ma faafiafia ai, e ui lava ina i ai taimi talafeagai e manaomia ai, e lē aoga mo le tuputupu a’e faaleagaga ma o ia nofoaga o le a lē “mama [ai] nai le lalolagi” ae o le a e lē mauaina ai le “atoatoa o le lalolagi” ua folafola atu ia i latou e tausia le tulafono o le Sapati. [Tagai MFF 59:9, 16.] O outou na ua fai ma masani le soli o le Sapati, e ala i le lē “tausia ma faapaia,” ua outou lafoai se agaga e tumu i le olioli ona o si matāua itiiti o le fiafia. Ua tele naua lo outou gaua’i atu i faanaunauga faaletino ae afaina ai lo outou soifua maloloina faaleagaga. O le tagata soli Sapati o se faailoga vave lea o le vaivai o lona faatuatua ona o le lē faia o tatalo faaleaiga i aso taitasi, o le vaavaai masei, o le lē totogiina o ana sefuluai ma taulaga anapogi, ma o lea tagata ua amata ona faapogisaina le mafaufau ona o le matelaina faaleagaga ma lē pine ae i ai le faaletonu ma le atuatuvale e lē agavaa ai mo le aoaoina faaleagaga po o le siitia i le amiotonu. O faailoga ia o le palagia faaleagaga ma ma’i faaleagaga ia e na o le fafagaina lelei faaleagaga e mafai ona foia ai.

Talosia aua nei o tatou faamoemoe faapea e le gata i a tatou gaoioiga e tapuai ai i le Aso o le Alii, ae mafai foi ona tatou faaitiitia ai galuega masani i le fale, ma faia foi feau talafeagai i fafo o le fale. Ia avea lenei aso ma aso tatalo, o suesuega loloto o tusitusiga paia ma isi tusi lelei. A’o faatumuina i le olioli ona o le Sapati, ia tusi se tusi i lau pele po o se tasi e pele e lē o i ai po o se uo atonu o manaomia lou malosi faaleagaga. Ia avea lou fale ma nofoaga e lagiina ai ma tata musika matagofie e ogatasi ma le agaga o le aso. Pe a malu ifo le afiafi ma outou faapotopoto ma lo outou aiga po o uo, ia talatalanoa i upumoni taua o le talalelei ma faai’u i se faamanuiaga o le tatalo faaleaiga. Sa aoaoina a’u i mea na ou oo i ai, o uuna’iga a le mafaufau i se tagata faamaoni o le Ekalesia, o se faailoga aupito saogalemu lea mo mea e ese mai le agaga o le tapuai i le Aso Sapati.

… Ae aua nei faapea o le tausisia a’ia’i o le tulafono o le Sapati ua lava lena e maloloina ai o outou tino faaleagaga. O aso taitasi o le vaiaso e tatau ona fafagaina ai o outou ola faaleagaga. O lotu faaleaiga, o le faitauina o tusitusiga paia, alofa i totonu o outou aiga ma le tautua po o le auaunaga ma le le manatu faapito i aso taitasi, o manai ia mai le lagi e fafaga ai o outou agaga. O le faia Afiafi Faaleaiga i vaiaso taitasi o se tasi lea malosiaga tele mo le amiotonu i totonu o le aiga. …

Ma o le mea la lea ou te aioi atu ai ia aua nei outou faoa mai o outou tino faaleagaga le malosi e tatau ai e ala i le solia o le Aso Sapati, ae ole atu ma le loto faamaoni ina ia outou ola i aso taitasi ina ia mafai ona outou mauaina mai le punavai o le malamalama, meaai ma le malosi e tatau ai mo aso taitasi.⁶

E faapefea ona faamanuiaina faaleagaga i tatou i le anapogi ma le totogiina o taulaga anapogi?

Sa ou fesili ifo ia te a’u lava ia, “O le a le tulafono o le anapogi?” ma sa ou mauaina ai le faauigaina e Peresitene Iosefa Samita i upu nei sa ou manatu o se faaliliuga maoae:

“O le mea lea, e tatau ai i tagata uma o le Au Paia o Aso e Gata Ai ona tuuina atu i lona epikopo, i le aso anapogi, o meaai semanu e faaaogaina e lona aiga i lena aso, ina ia mafai ai ona tuuina atu i e tausia ai ma faamanuiaina e matitiva; a lē o lena foi, po o meaai, ia tutusa ma lena aofaiga, pe, afai foi e tele le tamaoaiga o le tagata, ia faapena foi ona foa’i atu ma le matamau i se tino i tupe, ma faaputuputu ma faapaiaina mo e matitiva.”[Gospel Doctrine, 5th ed. (1939), 243.]

Ona ou fesili ifo ai foi lea, “O a faamanuiaga ua folafola mai e le Alii tatou te maua mai le anapogi ma le totiogiina o taulaga anapogi?” O se saunoaga a Peresitene [Heber J.] Grant o loo tusia, na ou maua ai tali nei: muamua, o faamanuiaga tau tupe ma le isi, o le faaleagaga. O lana saunoaga lenei, efaatatau i faamanuiaga tau tupe:

“Ou te fia folafola atu ia te outou o i ai iinei i le asō, afai o le a tausisia ma le faamaoni ma le maelega e le Au Paia o Aso e Gata Ai e amata atu i lenei aso, o se nuu, le anapogi i masina taitasi ma totogi i aao o o latou epikopo le aofaiga sa’o semanu latou te faaaluina mo meaai mo ‘aiga e lua ia ua latou lē aai ai…o le a lava tupe e manaomia e tausia ai ē le tagolima ma ē matitiva.” [Gospel Standards, comp. G. Homer Durham (1941), 123.]

Na ia saunoa foi e uiga i faamanuiaga faaleagaga e faapea:

“O tagata soifua uma lava o le Au Paia o Aso e Gata Ai e anapogi mo ‘aiga e lua i masina taitasi, o le a faamanuiaina faaleagaga ma faateleina le faatuatua i le talalelei a le Alii o Iesu Keriso—e faamanuiaina faaleagaga i se ala matagofie.” [Gospel Standards, 123.]

Ina ua ou faitauina lena saunoaga, sa ou toe manatunatu i le mea na tautino mai e le Perofeta o Isaia e faatatau i faamanuiaga o le a oo mai i le tagata e anapogi ma tofitofi ana mea e ‘ai mo e ua fiaaai. … O folafolaga faaleagaga maoae ma matagofie nei na tuuina mai e le Alii mo i latou e anapopogi ma tofitofi pe faasafua atu a latou mea e ‘ai i ē o fiaaai; e pei ona tusia i le Isaia, ma o le folafolaga muamua:

“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo: e alu atu foi lau amiotonu i ou luma, e muli’au mai le pupula o Ieova ia te oe.”

Ona folafola mai foi lea o le Alii:

“Ona e valaau lea, ae tali mai ai Ieova; e te alaga atu ae fetalai mai o ia, O a’u lenei:”

Ma sa toe folafola mai foi le Alii:

“Afai foi e te alofa atu i le ua fia’ai, ma e fafaga ia ma’ona le ua tiga; ona alu ae lea o lou malamalama i le pouliuli, ma lou pogisa e pei o le aoauli ia.”

Ma, le toe folafolaga lenei:

“E taiitaiina foi oe e le aunoa e Ieova; e faamalie foi o ia ia te oe pe a oge vai, ma faamalosia ou ivi; e avea foi oe e pei o se fanua ua faasusuina, e pei o le punavai foi e le mate ona suavai.” [Isaia 58:8–11.]

O faamanuiaga pe a faaliliu mai i mea tutupu ma faafitauli o le olaga, e manino lelei lava i se mea na tupu na faamatalaina e se tasi o peresitene o se misiona i le Au Pulega Aoao i ni nai tausaga ua mavae. A’o matou ola i na aso o le lē mautonu i vaitaimi o taua, sa faamatalaina e lenei tamā lenei mea na tupu:

O le aso anapogi. Sa alapo lava o ia i le taeao, ma sa faia ana galuega i le faatoaga, ma sa ia faaaluina ni nai minute i le faatoaga a’o le i usu i le sauniga faale-Perisitua sa ala faia i le taeao. …

O le taeao lea, a’o savali atu i lana faatoaga, e le’i matuai gauai atu lona mafaufau i ona atalii e toalua sa i ai i le taua, ae, na faafuasei ona taofi o ia e se lagona mata’utia na oo ane ia te ia, a’o ia kolosia le faatoaga, ma e faapea ua i ai se mea ua tupu i se tasi o ona atalii. Na ia liliu e toe foi i le fale. Na fai mai a ia, “E le i faapea sa na ona ou savali, ae sa ou tamoe, ma sa ou tauvalaau i le matou aiga e o mai i le potu i luma, ma sa ou fai atu i ai, ‘Ia, ou te le manao e ‘ai sina meaai e se tasi o lo’u aiga i le aso. Ou te manao ia outou anapopogi, ma ou te manao ia outou tatalo, ma ou te manao tou te tootutuli faatasi ma a’u e fai le tatou tatalo faaleaiga, aua ua ou lagona o loo i ai se mea ua tupu i le tatou tama o loo i le taua.’”

Ma sa latou potopoto ma faia le latou tatalo i le taeao. Sa latou anapogi, ma e le’i faaumaina le latou anapogi, ae na faaauau pea ona latou anapopogi ina ua mavae lena aso. Na mavae aso e sefulu o le fā’atu ma le popolevale, ona oo mai ai lea e ala mai i le Koluse Mumu, o se tala i lena taeao (ma ina ua latou fua faatatauina le eseesega o taimi, o le taimi tonu lava lea na maua ai e le tamā lea lena lagona), sa lavevea lona atalii ma lana uo i se “fanafanua” ma sa matuā masofa ai lana uo, ae sa tugā le manu’a o lona atalii na toetoe a oti.

Anapogi ma tatalo—“Ona e valaau lea, ae tali mai ai Ieova; e te alaga atu, ae fetalai mai oia, O a’u lenei.”⁷

Tatou te latalata atili faapefea i le Alii ona o le manatunatu loloto?

Na saunoa Peresitene [Tavita O.] Makei, “E le o lava le taimi tatou te manatunatu loloto ai.” Ou te alapo i le taeao…, i le lima i le taeao, a’o manino ma to’alelei lo’u mafaufau ma lo’u agaga. Ona ou manatunatu loloto ai lea. E mafai ona outou latalata atili i le Alii nai lo le mea ua outou mafaufau i ai pe a outou aoao e manatunatu loloto. Tuu atu i o outou agaga e aoao e le Agaga.⁸

E le vave galo i le Toasefululua le apoapoaiga a Peresitene Tavita O. Makei i la matou fonotaga faaaufono i se tasi taeao ina ua ia faailoa mai le matua taua o le faaaluina o se taimi e manatunatu loloto ai ina ia maua le agaga. …” O se tulaga maoae le tali atu i musumusuga a le Agaga, ma ua tatou iloa a oo mai nei musumusuga, o se meaalofa ma faamanuiaga lo tatou mauaina. E oo mai pe a tatou toafimalie lelei ma lē gaogaosā mea tatou te pisi ai.”

Sa faamatalaina foi e le Peresitene se aafiaga i le soifua o Epikopo John Wells, o se tasi na i ai i le Au Epikopo Pulefaamalumalu i lena taimi. Sa maliu se atalii o Epikopo Wells i le Emigration Canyon i se ala o nofoaafi. …Sa solia lona atalii i se nofoaafi la’u uta. Sa lē mafai ona faanā le Faletua o Wells. Sa tagiauē o ia i aso e tolu a’o lumanai le falelauasiga, sa lē maua se toafilemu i le taimi o le falelauasiga, ma sa mata’utia se tulaga na oo i ai lona mafaufau. I se tasi aso ina ua faatoa mae’a sauniga o le falelauasiga, a o taotooto i luga o lona moega e malolo, ae o la lava foi e faanoanoa, na fai mai a ia, sa oo mai lana tama ia te ia ma faapea mai, “Tina, aua e te faanoanoa. Aua e te tagi. O lea ou te manuia.” Na ia faamatala atu i ia te ia e lē iloa e lona tina pe na faapefea ona tupu le faalavelave. Na ia faamatala ane lea, na ia faailoilo atu i le enisinia e alu le nofoaafi, ma sa ia taumafai e pu’e ‘au o le pa faalagolago o nofoaafi la’u uta, ae peitai a’o ia taumafai e oso i luga, sa lāvea lona vae i se a’a laau ma sa le mafai ai ona maua le ‘au o le pa faalagolago ma pau atu ai lona tino i lalo o le nofoaafi. O se faalavelave faafuasei moni lava. Na fai mai lana tama, o le taimi lava na ia iloa ai ua i ai o ia i se isi siosiomaga, na ia taumafai e tilotilo atu i lona tamā ae sa le mafai ona oo atu i ai. Sa pisi tele lona tamā i ona tiute i le ofisa ma sa le mafai ai ona tali mai i lana valaau [a le atalii]; o le mea la lea ua sau ai i lona tina ma fai atu i ai, “Ta’u atu i lo’u Tamā o loo ou manuia. Ou te manao ia aua nei e toe faanoanoa.”

Ona saunoa mai lea o Peresitene Makei, o le mea sa mafaufau i ai, pe a tatou mapu i se potu patino e sili atu le tulaga tatou te ‘apoina ai mea faapena, ma e pei ona ia saunoa i ai, o ona mafaufauga sili e oo mai pe a ala a’e i le taeao ma o loo toafimalie lelei ma manatunatu i tiute o le aso, ma e manino le oo mai o manatu e faapei o loo faalogo i se leo ma e sa’o lava na manatu po o faalogona. Afai tatou te popole ma lē fiafia o tatou lagona, e lē oo mai musumusuga. Afai tatou te ola ina ia sa’oloto o tatou mafaufau mai le popole ma manino ma o sa’o foi o tatou lagona o le tasi i le isi, o le galuega a le agaga o le Alii i o tatou agaga e moni lava faapei ona tatou sii i luga le telefoni; peitai pe a oo mai, ia outou manatua lenei mea, e tatau ona lava lo tatou lotototoa e talia le mea ua fautuaina mai e fai. …

Ia avea lena ma mea e manatua—ia faapena foi ona fai. Ia faaalu se taimi e manatunatu loloto ai. O le tele o taimi o le a e tauivi ai ma faafitauli, o ala e foia ai e mafai ona iloatino i la le agaga.⁹

Aua ne’i e soona pisi na’uā ma faapea ai ua leai sou taimi e te manatunatu loloto ai. Ia faaavanoa se taimi. O le molimau aupito taua e lē sau faaaliali, ae o le molimau i totonu. E mafai ona latalata tele mai Keriso nai lo se mea ua tatou malamalama i ai. “O loo ou i totonu ia te outou ae lē mafai ona outou vaaia a’u. O le Agaga Paia e tuuina atu le molimau faamaoni. O loo vaai o’u mata ia te outou. E oo mai le aso o le a outou vaai mai ai ia te au.” [tagai MFF 38:7–8.]¹⁰

Fautuaga mo Suesuega ma Talanoaga

Aisea e tatau ai ona tatou faaalu le taimi e fafagaina ai pe faafaileleina i tatou lava i la le agaga? O a mea e mafai ona tatou faia i aso taitasi e atinaeina ai lo tatou ola faaleagaga?
O a ni mea e mafai ona faalavelave i a tatou taumafaiga e fafaga i tatou lava i la le agaga?
E mafai faapefea ona fai o tatou aiga ma nofoaga e fafagaina ai pe faafaileleina tagata taitoatasi o le aiga i la le agaga?
Ua fesoasoani faapefea lou faamamaluina o le aso Sapati e te tuputupu a’e ai faaleagaga? O a gaoioiga i le Sapati e fesoasoani ia te oe ma lou aiga e tausisia ai se agaga tapuai i le aso atoa? Pe a tatou solia le Sapati, aisea ua tatou “lafoaia ai se agaga e tumu i le olioli ona o si matāua itiiti o le fiafia”?
O a faamanuiaga e maua e i latou e anapopogi? (Tagai Isaia 58:8–11.) O faapefea ona e vaaia nei faamanuiaga ua faataunuuina?
O le a se mea ua tatou aoaoina mai le tala ia Epikopo John Wells e uiga i le taua o le faaavanoaina o se taimi e manatunatu loloto ai i mea faaleagaga? O a ni auala ua mafai ona e faaaogaina le manatunatu loloto i mea faaleagaga i lou olaga?

Ua aoao mai e Peresitene Harold B. Lee: “Ia outou ola i aso taitasi ina ia mafai ona outou maua mai le punavai o le malamalama [o] meaai e fafagaina ai ina ia lava le malosi mo mea e manaomia i aso taitasi. Ia faaavanoa se taimi e faapaiaina ai outou i aso taitasi o outou olaga.”