O le Soifua Auauna o Harold B. Lee

O le faamatalaga o loo mulimuli mai i le soifuaga o Peresitene Harold B. Lee sa tusia e Elder Gordon B. Hinkley o le na avea ma se tasi o le Korama a le Toasefululua, sa lomia i le Liahona ia Novema 1972 (“O se Faamalo ia Peresitene Harold B. Lee” 2–10). Na fesoasoani le faamatalaga i tagata o le Ekalesia e faamasani atili ma Peresitene Lee, o le ua faatoa avea nei ma Peresitene o le Ekalesia.

“O le tala ia Harold B. Lee, o le Peresitene o le Ekalesia, e mafai ona faamatalaina i ni nai fuaiupu: Na soifua mai i le aso 28 Mati, 1899 i Clifton, Idaho, o le alo o Samuelu Mariona ma Luisa Emeline Bingham Lee, o se tasi o le fanau e toaono. Na aoaoina i se aoga o le lotoifale, o le Oneida Academy e latalata i Preston, o le Aoga a Albion State Normal i Albion, Idaho, ma mulimuli ane i le Iunivesite o Iuta. Na amataina se galuega faafaiaoga i le 17 o ona tausaga, na avea o se puleaoga i le 18 o ona tausaga, ma mulimuli ane sa avea ma se puleaoga o ni aoga se lua i le Itumalo o Sate Leki, Iuta. Na faaipoipo ia Fern Lucinda Tanner i le aso 14 o Novema 1923. Na maliu o ia [Fern Lucinda] i le aso 24 o Setema 1962. Na toe faaipoipo ia Freda Joan Jensen i le aso 17 o Iuni, 1963.

“Na pulea le Foundation Press, Inc. i le 1928–33. Na galue o se Komesina mo le Aai o Sate Leki i le 1933—37, ina ua avea o ia ma pule faatonu o le polokalama o le uelefea a le Ekalesia. Na tofia o se tasi o le Aufono a le Toasefululua ia Aperila 6, 1941, ma o le Peresitene o le Aufono a le Toasefululua ma le fesoasoani muamua i le Au Peresitene Sili i le 23 Ianuari, 1970 ma na faauuina ma faamanuiaina e avea ma Peresitene o le Ekalesia i le aso 7 Iulai, 1972.

“O nai motuga ‘afa na o lona soifua. Peitai o lena olaga ua agavaa lea mo se faamatalaga auiliili sili atu.

“Pe a faatusatusa atu i le tele o taulaga ma aai, e matua laitiiti lava Clifton, ma e mamao ese mai le aualatele. Ae peitai a o faagasolo pea tausaga, o le a lauiloa lenei nuu o le nuu na soifua mai ai le Peresitene lona sefulutasi o le Ekalesia.

“Na malaga mai Samuelu Mariona, le tama o Peresitene Lee i Clifton mai se isi taulaga, o Panaca i Nevada i Saute. Na maliu le tina o Samuelu (le tinamatua o Peresitene Lee) a o valu aso o lona matua, ma sa vave fanau mai le pepe ae lei oo i le taimi e tatau ai, ma o lona laitiiti tele sa mafai ai ona faaofiina se mama tuulima i lona lima ma faasolo atu ai i lona ogalima. Sa faaaogaina se tama’i faagaau tuluimata e fafagaina ai o ia. Sa nofo le uso o lona tina i Clifton, ma i le 18 o ona tausaga, sa alu atu ai le taulealea agai i matu e nofo ai ma lona aiga.

“O iina na la feiloai ai ma Luisa Bingham o se tamaitai e lanu uliuli lona lauao ma ona fofoga. Na faaipoipo i laua i le Malumalu i Logan. O le fale sa la faatuina ma fanauina ai le la fanau e toaono, sa tu i luma o le auala pe tolu maila i matu o le faleoloa. O lea faleoloa, sa na o le pau lea o le pisinisi i totonu o le taulaga. O le auala o se auala palapala, sa pefua i le taumafanafana, na faatumuliaina i le kiona i le taumalulu, ma palapala i le tautotogo ma le tautoulu.

“O i, sa tuputupua ae ai Harold, e leai ni seevae, ma na ofuina ni ovalola, o se tamaitiiti faatasi ma isi tamaiti o le nuu. Sa faia taelega i le Vaituloto o Tatelio [Dudley’s Pond], ae sa le faia i le aso Sa. O lona tama sa i ai i le Au Epikopo, o lona tina sa i ai i le [faalapotopotoga a Tamaitai Talavou]—ma sa avea le Aso Sa ma aso paia. E faapena foi se vaituloto i le faatoaga o Bybees, sa papatisoina ai Harold B. Lee.

“Sa matua itiiti lava tupe i na aso. Sa maua fua o faatoaga peitai e laitiiti se tupe na maua mai i le saito ma le pateta. Sa faaopoopoina e tamā le tupe maua o le aiga e ala lea i le faia o sana konekarate e tipiina le saito, eliina vaieli ma fauina ala vai. Ae sa lei iloa e fanau a Lee sa matitiva i latou. Sa sauniaina e le aiga ma le Ekalesia ni avanoa mo faafiafiaga. O le mea sa pito faapelepeleina i totonu o le fale, o le piano. O se tamaitai mai Sikotilani sa ia sasaina le tamaitiiti ta piano pe a sese lona taina o se nota, sa aoaoina o ia [Harold] e taina le piano.

“Sa pito lelei lava le tātā piano a Harold. O se mea sa maitauina o le fiafia i le musika, sa totoina i na aso, sa aliali mulimuli ane a o avea o ia ma Taitaifono o le Komiti o Musika a le Ekalesia.

“O se taavale solofanua, sa masani ona aveina e lona tina, sa feaveaiina ai le fanau i maila e lua i le aoga ma le toe foi mai. E laitiiti lava le faapaologa sa maua mai i lea taavale a o agi malosi mai matagi mai matu ia Ianuari, ma o le palapala sa avea ma se faafitauli ina ua liu suavai le aisa i luga o le ala. Peitai o le olaga lava lea i Clifton. E pei ona fai mai Peresitene Lee sa ia te i matou mea uma e le mafai e tupe ona faatauina. Ma i nei mea sa ia te i latou sa mafai ona suitulaga mo mea e lei mafai ona maua. Sa mama ma manino le ea ma sa toeitiiti suamalie i le tofo. Sa peiseai o se tioata faasolo le manino o le vai, ma sa faigofie ona iloa atu le iila mai o maa i le taele o le vai. O fetu o le po sa tutu mai e peiseai o ni tagata—ma o mafaufauga o tamaiti na faamatalaina mea sa vaaia i le lagi. O timuga i le tauvevela sa peiseai o se manai sa pa’u i lena vaomatua, ma aumaia le ola i le eleele. Na oo mai le tautotogo i le aumaia o le lanu meamata i vaega o le eleele sa alu i ai le palau ma le fili saito. O enesini patapatatu, ma le asu sa fafaga atu ai le paoa e ala i pa’u tetele agai i masini sa gaosia le saito i lea taga ma lea taga o saito, sana vao ma le karite…

“Ina ua faamaeaina vasega o le aoga i le latou nuu, na ‘tuua [e tama] le aiga’ ina ia auai atu i le Oneida Academy, o se aoga faaitumalo a le Ekalesia i Preston e 15 maila lona mamao. Sa 13 tausaga o Harold i le taimi lea ma o iina na ia uluai feiloai atu ai ia Ezra Taft Benson [o lē sa avea ma Peresitene lona sefulutolu o le Ekalesia). Ona sosoo ai lea ma le Aoga a Albion State Normal i le isi itu o Idaho. O ina i le 17 o ona tausaga, na maua ai e Harold B. Lee lona tusipasi faafaiaoga. O se aso fiafia lea mo ia ma lona aiga. Sa ofoina atu e le Komiti o Aoga a le itumalo ia te ia se galuega e avea ma faiaoga i le Aoga laitiiti e tasi le potuaoga a Silver Star e i le va o Dayton ma Weston, i lalo mai o Clifton. E onosefulu tālā le totogi i le masina. E tausavali o ia i le sefulu maila i le solofanua i faaiuga o vaiaso.

“… O le tausaga na sosoo ai, na tofia ai o ia e le komiti e avea ma puleaoga o le aoga a Oxford e fa ona potuaoga. O se avanoa sili lea mo se alii e 18 tausaga le matua. Sa malaga o ia i le solofanua mo le fa maila i le alu ma le toe foi mai i aso taitasi tusa lava pe timu, pe la, pe lelei le tau, pe leaga foi. Ona o ona tomai i le atiaeina o le taleni i musika ma le taaloga o le pasiketipolo, o lea ia aofia ai i gaoioiga faaalaalafaga i ona taimi avanoa. O aso ia a o avea lona tama ma epikopo, na faatoa tagai ai Harold i le polokalama o le uelefea a le Ekalesia, e pei ona sa ta’ua ai mulimuli ane. I lena taimi e pei ona i ai nei, o le Epikopo sa i ai le matafaioi o le tausia lea o i latou o e na manaomia le fesoasoani. Sa faagaoioia e Epikopo Lee lona lava fale teuoloa, o oloa na aumaia mai lona lava potu teuoloa. I le po na vaaia e lona aiga o ia aveina se taga falaoamata, latou te le i iloaina pe o fea e ave i ai, talu ai ona sa matua tausisia tulaga o le le faalaua’iteleina o i latou o e na puapuagatia, ina nei talanoa i ai nisi ma tupu mai ai le maasiasi o i latou oe na manaomia le fesoasoani.

“I lena taimi e pei ona i ai nei, o le aia tatau ma le tiutetauave o le Epikopo o le fautuaina lea o alii talavou mo ni misiona. Ua 21 nei tausaga o Harold ma ua fa tausaga talu ona faiaoga. Na oo mai se valaauga mai ia Peresitene Heber J. Grant ina ia galue i le Misiona a Setete i Sisifo.

“I totonu o faila o loo lokaina a le Matagaluega o Faifeautalai a le Ekalesia, o loo i ai se lipoti i le Au Peresitene Sili e uiga ia Elder Lee. O loo tusia ai le aso 30 o Tesema, 1922 ma na sainia e Peresitene John M. Knight. O loo tuuina mai ai le umi o lana auaunaga— mai le aso 11 o Novema, 1920, i le aso 18 o Tesema, 1922. Ona taliina lea o ni fesili eseese: ‘O lona agavaa—O se failauga “Lelei Tele.” O se tagata pulefaamalumalu, “ Lelei.” E i ai sona malamalamaaga lelei e uiga i le Talalelei? “Lelei Tele.” Pe sa malosi o ia? “Lelei Tele.” Pe sa lava le tofa ma le uta ma pe na ia faia ni faatosinaga lelei? “Ioe”. Nisi faamatalaga: “Sa pulefaamalumalu Elder Lee i le Konafesi a Denver i se tulaga maoae mai ia 8 Aokuso, 1921 e oo atu i le 18 Tesema, 1922. O se faifeautalai tulaga ese.”’

“Sa i ai i lena misiona i le taimi lava lea se tamaitai talavou mai le Aai o Sate Leki, o Fern Lucinda Tanner. Sa lausilafia o ia e e na masani ia te ia, o se tamaitai atamai, lalelei ma o se tamaitai sa i ai sona atamai tulaga ese i tusitusiga paia. Ina ua faamaloloina mai Elder Lee, na toe foi o ia i Clifton mo sina taimi puupuu ona toe alu ai lea i le Aai o Sate Leki e saili ma faauo atu i le tamaitai na ia maitauina ma mataiina i le misiona. Na faaipoipo i laua i le Malumalu i Sate Leki pe tusa ma le sefulutasi masina talu ona toe foi mai o ia.

“Na fananau mai ni o la alo teine lalelei se toalua, o Elena (o Mrs. L. Brent Goates mulimuli ane) ma Molini (o Mrs. Ernest J. Wilkins mulimuli ane). O le fale o Lee na avea ma se nofoaga e potopoto i ai tupulaga talavou i lena eria. O uiga tauagafau ma le tomai o le Faletua o Lee i le taulimaina o tulaga faigata na maitauina ma mata’ina e i latou o e na iloaina o ia. I se tasi mea na tupu sa faafilemuina ai e ia ni alii iloga se toalua na faitioina se tasi o tagata na latou fegalegaleai, ma faapea atu “Aua nei galo ona agalelei, i a oulua taumafaiga e faia le mea sa’o.”

“Sa toe aloaia foi uiga lelei na avea ai [Harold B. Lee] ma puleaoga o aoga e lua ina ua 18 ona tausaga. Ina ua toe faaauau lana aoga i le Iunivesite o Iuta, sa filifilia o ia e avea ma puleaoga, muamua i le Aoga a Whitter, ona sosoo ai lea ma le Aoga a Woodrow Wilson i le Itumalo o Sate Leki. …

“Sa nofo o ia i le Siteki a Paionia ina ua maea lana faaipoipoga, ma sa faalausosoo ona maua e ia lea tofiga ma lea tofiga i le Ekalesia. Ma i le 1929, sa filifilia ai o ia o se fesoasoani i le au peresitene o le siteki. O le tausaga na sosoo ai na valaauina ai o ia e avea ma peresitene o le siteki. Sa 31 ona tausaga i le taimi lea, o le peresitene o le siteki pito laitiiti lea i le Ekalesia.

“Sa pagatia le atunuu ma le lalolagi i le tulaga pau o le tamaoaiga. Sa matuai vave le pau o tau o oloa e pei o le pauu i lalo o poloka laau pei ni fagu i faataavalega polo. Sa le toe mafai ona nonoina mai ni tupe mai faletupe. Na tapunia faletupe ma ua leiloloa ma le toe maua mai le miliona o tupe teu. Na matua faateleina le leai o ni galuega. Sa pule tamaloloa i o latou ola, ina ua faaleaogaina penefiti sa latou gapatia ai e faigaluega i tausaga e tele. Sa i ai ni fale e maua ai supo mo e manaomia, faapea foi ma laina uumi o tagata mo ni falaoa maua fua. Sa i ai le lagona faavaivai ma le faanoanoa. E silia ma le afa o tagata o le Siteki o Paionia sa leai ni galuega.

“O se luitau lea, o se luitau faigata mo le peresitene talavou o le siteki. Na popole, na tagi, na tatalo o ia, a o vaai atu o ia i alii sa femitai ma faatamaoaigaina i le taimi muamua, ae ua solomuli ona o le le maua o ni galuega ma oo atu ai i se tulaga ua le mafai ona latou fafagaina o latou aiga. Ona oo mai ai lea o se musumusuga ina ia faatuina se fale teuoloa e mafai ona faaputuina ai meaai ma oloa ma tufatufaina atu i e matitiva. Sa faia ni galuega tuufaatasi, e le gata ina ia faaleleia le alaalafaga, aemaise ai lava, ina ia mafai ai e alii ona maua le avanoa e galulue ai mo mea na tuuina atu i ai. Na talepeina se fale tuai na faia ai se pisinisi ae faaaoga mea e fausia ai se faletaalo o le siteki mo mafutaga ma gaoioiga faafiafia mo tagata.

“Sa faia foi ni galuega tuufaatasi faapea a isi siteki, ma ia Aperila 1936, sa faatulagaina ma tuufaatasia i se polokalama na uluai ta’ua e Peresitene Heber J. Grant o le polokalama mo le saogalemu, ua ta’ua nei o le polokalama o le uelefea a le Ekalesia.

“Sa valaauina Harold B. Lee, o se taitai talavou a le Siteki o Paionia, na te faata’ita’ia pe faafoe le sā fou [polokalama o le uelefea] lea ua faatoa tuuina ifo i vasa sousou o na aso faigata ma le mativa. Sa matua ogaoga faafitauli. Sa matua faigata tele ona tuufaatasia faatoaga ina ia maua mai ai meaai ma fausia ni fale mo le gaosiga ma le teuina. Na sili atu foi le faigata o le taulimaina o uiga o tagata na faitio i le mea sa faia e le E kalesia ma ē na manatu sa tatau ona faatautaia e le malo le uelefea.

“Ae peitai, o le tatalo ma le faatauanau, o le galulue malosi ma loimata, atoa ai ma faamanuiaga a lē na ia ta’ua o le perofeta, na femalagaai solo ai o ia i siteki uma o Siona, ma i’u ina tulai, ma faatupulaia ma faamanuiaina le polokalama.

“O le tele o mea o loo faaaogaina i le polokalama o le uelefea i le asõ— o faatoaga ua faatupulaiaina le fuainumera, o nofoaga e gaosia ma tuuapaina ai meaai, o fale tetele mo le teuina o fatu meaai ma nofoaga e faamalūina ai, atoa ai ma isi galuega tuufaatasi o loo salalau solo i Amerika—o le faauauina lea o taumafaiga umi ma le maoae na faia i le amataga. E ui ina osofaiaina pea tulaga o polokalama o fesoasoaniga a le malo, ae o loo faaauau pea ona maua e polokalama a le Ekalesia le faamalo ma le faafetai mai tagata o le lalolagi atoa. Ua faasaoina ai le faitau miliona o tupe a tagata totogi lafoga ona o le laveai ua faia e le uelefea a le Ekalesia. Ua maua galuega aogā mo le faitau afe o alii ma tamaitai, e aofia ai i latou e le atoatoa le malosi o le tino ma le mafaufau o e e mafai ona maua avanoa e galulue ai mo mea latou te manaomia. O i latou o e na taliaina mea mai i lenei polokalama ua laveaiina mai ‘i le fetuu lea o le ola paie ma le leaga o le maua fua o se mea e aunoa ma se galuega.’ Na faatupulaiaina lo latou ola i le faamaoni ma le faaaloalo. Ma o le toatele o alii ma tamaitai o e na auai i le totoina ma le gaosiaina o meaai, ma isi galuega e tele, na molimauina le olioli e maua mai i le auauna atu i isi ma le le manatu faapito.

“E leai se tasi na molimauina aafiaga o’oo’o ma taunuuga matagofie o lenei polokalama e mafai ona lē faamaoniaina le agaga o faaaliga na mafai ai ona faataunuuina lea mea ma faateleina ai lona malosiaga mo le lelei. E tatau ona tuuina atu le faamalo ma le faafetai ia Peresitene Harold B. Lee, o lona uluai pule faatonu ma o se taitaifono i se taimi umi i le Komiti o le Uelefea a le Ekalesia, ona o le taitaiga musuia. I lona agaga maualalo na te teena ai lena mea, ma e sa’o lava, aua o le a ia tuuina tonu atu le faafetai ma le faamalo i le Alii. Ua silafia e le Alii, i le faamamaluina o lana auauna, lona naunautai ma lona faatuatua. …

“Ina ua maea ona tofotofoina i le afi o na aso o le faigata o le faatoa amatalia o le polokalama o le uelefea a le Ekalesia, sa tofia loa e Peresitene Heber J. Grant ia Elder Lee e avea ma aposetolo, ma sa lagolagoina e avea ma se tasi o le Aufono a le Toasefululua i le aso 6 Aperila, 1941.

“I lena mea na tofiaina ai, na tusia e Elder John A. Widstoe i se mekasini e uiga i lona uso fou: ‘E tumu o ia i le faatuatua i le Alii; e faatumulia o ia i le alofa i ona uso a tagata, e faamaoni i le Ekalesia ma le Setete; na te faagalo o ia lava ona o lona naunauta’i i le Talalelei; ua faamanuiaina o ia i le atamai, malosi ma le sogasoga; ma ua faamanuiaina foi o ia i le mana faafailauga e aoao atu ai le afioga ma le finagalo o le Atua. O le Alii o lē na te alu i ai mo le fesoasoani o le a faia o ia ma tufuga aao malosi i le tauaveina i luma o le fuafuaga e faavavau o le faaolataga o tagata. … O le a foaiina ia te ia le malosi e sili atu nai lo se malosi ua ia iloa, a o tatalo tagata i le Alii mo ia.’ (Improvement Era, Me 1941, 288.)

“O upu moni lava nei e faamatalaina ai, ma o upu foi o valoaga.

“O lana tala … o se tala faamaoni i le paia tele o le faatuatuaina o se aposetolo, o lona valaauga patino o le avea lea ma se molimau faapitoa ‘o le igoa o Keriso i le lalolagi atoa.’ [MFF 107:23.]

“I le faataunuuina o lena tiutetauave, na malaga atu ai o ia i le faatonuga a le Au Peresitene Sili i vaega e tele o le lalolagi, ma sii a’e ai lona siufofoga faafailauga, e folafola atu le paia o le Togiola o tagata.

“E masani ona ia ta’ua upu a Paulo i le au paia i Korinito: ‘Aua foi a faaletonu le leo o le pu, o ai ea se na te sauni e tau?’ (1 Korinito 14:8.) E leai se mea sa faaluafesasi i le savali a Harold B. Lee. Sa ia tuuina atu lana molimau i e maualuluga tulaga ma e foi e maualalalo, e aunoa ma lona faaaogaina o ni upu faauigalua e punitia ai le mea moni, faatasi ai ma lona mautinoa e maua mai i lona talitonuga maumaututu. E lei tausolomuli lava mai i lona tiutetauave o se auauna a le Atua i le tuuina atu o le molimau i le mea moni. Na faaosofia le galulue punouai o faifeautalai, o tagata o le Ekalesia ua faateleina lo latou faamoemoe ia ola ai i le talalelei, na tuia foi loto o tagata sailiili ao ia fofogaina lana molimau. Sa le i manumanu ia te ia lava ma sa ia tausisia se faatulagana maoti o ana mea e faia, e oo lava i taimi o le tulaga lamatia o lona soifua maloloina. Na iloaina e i latou na latalata ia te ia se vaitaimi umi sa aunoa ai o ia ma ni tiga. … O lona feagai ai ma ma’i ua faatupulaiaina ai lona lagona alofa mo puapuaga o isi. Sa avea o ia ma se tasi e malaga atu i atunuu mamao ma latalata foi e faamalosiau ma faamanuia i le Au Paia. O loo i ai i latou mai atunuu eseese ua molimauina ma le loto faafetai le ofoofogia o le mana faavavega o le perisitua sa faaaogaina e lenei auauna a le Alii mo i latou.

“Sa faapea foi ona ia lagona le popole mo e ua tuua toatasi, o e atuatuvale, faapea foi luitau o loo feagai ma alii o loo auauna i vaegaau. I tausaga o le Taua lona II a le lalolagi, o le Taua i Korea, ma le taua i [Vietnam], na ia faatonutonuina ai le polokalama o alii fitafita a le Ekalesia. Ua atulasi ona faaalia ona lagona i le usoga i le manaomia o le tuuina atu ia i latou o loo auauna i vaegaau, le polokalama atoa a le Ekalesia, faatasi ma faamanuiaga ma avanoa uma o loo maua mai ai. Na malaga atu o ia i le laueleele ma le vasa ina ia feiloai ma tagata o le Ekalesia o loo auauna i vaegaau. I le 1955 na ia asiasi ai i Korea ao avea ma se nofoaga tele o le vaegaau ma na latou laeiina ni ofu malo mo galuega mamafa. … O le a le faagaloina lava e i latou na feiloai i ai lona agalelei, lona popolega, poo lana molimau i le pule silisili a le Atua i fuafuaga a tagata. Sa ia faamafanafana atu ia i latou, sa ia apoapoai atu ia i latou, sa ia laveaiina le toatele mai le pauu atu i tulaga matautia.

“Sa ia faamafanafana ia i latou o e ua loto faavauvau. Mai mea na tutupu ia te ia ua ia iloa ai le tiga o le toesea o e pele. Na tuua e ia le Aai o Sate Leki ina ia auai i se konafesi a le siteki a o taufao le mai ma le magalo i le soifua o lana soa faapelepele. Sa malaga atu o ia i le po atoa, a o faanatinati atu i le mea o loo taoto ai o ia, e taunuu atu ua maliu. O i latou na latalata ia te ia i aso o le pogisa ina ua mavae lona maliu, sa lagonaina se faalogona loloto o le faanoanoa na oo i ai o ia. Na tupu lena mea i le 1962. I le 1965 sa maliu ai foi lona afafine faapelepele o Maurine a o i ai Elder Lee i Hawaii i se tofiga o le Ekalesia. Sa tuua e ia lana fanau e toafa.

“O nei aafiaga tiga na oo i ai o ia, e faigata ona onosaia, na faatupulaiaina ai lona lagona alofa i mafatiaga o isi. O i latou ua i ai foi i tulaga o le motusia o mafutaga ona o le oti ua latou mauaina se uo faamalosiau ma o se tasi ua tofotofoina lona lava faatuatua ma ua avea lea ma puna o le malosi ia i latou.

“I le 1963 na ia faaipoipo ai ia Freda Joan Jensen, o lē sa faaatoatoaina ai lona soifua i se tulaga ofoofogia. O ia [Freda] o se tagata atamai faaleaoaoga ma maoae, ae ua nofo i le fale i le sosaiete e aupito sili. O ia o se tamaitai e tulaga ese ni mea na ia ausiaina i lana lava aia tatau. Na aoaoina o ia e avea ma faiaoga, ma sa faiaoga i aoga, ona siitia lea i tulaga eseese tau i le pulega ma avea ma supavaisa o aoga tulagalua i le Itu Faaleaoaoga o Ionatana i le Itumalo o Sate Leki. Na galue foi o ia i le au faatonu aoao a le Faalapotopotoga a le Peraimeri. O le aiga sa ia faatautaia sa avea o se nofoaga filemu mo lana tane ma o se nofoaga sa talia ai ma le agalelei i latou uma sa mafai ona ulufale atu i ai.

“Ina ua silafia e Peresitene Tavita O. Makei le atamai tele o Elder Lee i polokalama a le Ekalesia, ma le faamaonia o ona tomai i mea tau pulega, o lea na tofia ai loa o ia e avea ma taitaifono i le komiti faamaopoopo a le Ekalesia. O iina na afua mai ai se iloiloga tele o mataupu o aoaoga sa faaaogaina mo ni tausaga se tele, faatasi ai ma se suesuega auiliili o faalapotopotoga uma ma mea e fai ai aoaoga. O le taumafaiga tele sa faia i lalo o lana taitaiga na mafua ai ona maua le maopoopoga o mataupu e aoaoina ia ua fuafuaina e faasafua atu ai le malamalama e uiga i vaipanoa uma o gaoioiga ma aoaoga faavae o le Ekalesia, ma galueaina ai le ola faaleagaga o tagata auai. Sa maitauina le malosi o lana taitaiga i lenei galuega. Sa tumau o ia i le naunautai ma le le faagaeetia, sa manino foi le faaupuina o ona faamoemoega. Ua aeae le Ekalesia atoa i lana auaunaga.

“O le maliu o Peresitene Makei, ma le suitulaga atu ai o Iosefa Filitia Samita e avea ma Peresitene, sa avea ai le susuga a Lee ma Peresitene o le Aufono a le Toasefululua, ma sa filifilia e Peresitene Samita e avea o ia e fai ma ona fesoasoani muamua. Ona o nei tulaga manaomia, sa faamalolo mai ai loa o ia mai le avea ai ma taitaifono i nisi o gaoioiga sa ia tauaveina muamua, ae o faamoemoega lava e tasi na tulimataia i lalo o lana taitaiga aoao. Sa faatulagaina polokalama ina ia faaleleia atili ai tulaga o faiaoga i le Ekalesia. Sa faagaioia se polokalama e aoao ai epikopo. Sa faamalosia le polokalama faafaifeautalai i le lalolagi atoa.

“Ina ua toesea filemu Peresitene Iosefa Filitia Samita mai lenei olaga ina ua maliu i le afiafi o le aso 2 Iulai, 1972. Sa leai se faaletonu i mafaufau o le Aufono a le Toasefululua poo ai o le sui e avea ma Peresitene o le Ekalesia. I le taeao o le aso Fraraile, 7 Iulai, na latou potopoto faatasi ai i le potu faapitoa paia o le malumalu i Sate Leki. I lena nofoaga filemu ma le paia, faatasi ai ma loto faamaulalo, na latou saili atu ai i musumusuga a le Agaga. Sa foliga ua tasi o latou loto e tali atu ai i na musumusuga. O Harold Bingham Lee, ua filifilia e le Alii, sa aoaoina mai lona laitiiti i mataupu faavae o le talalelei toefuataiina, sa polesiina ma faaleleia mo tausaga e tolusefulutasi i lana auaunaga faaaposetolo, sa avea ma Peresitene o le Ekalesia a Iesu Keriso o le Au Paia o Aso e Gata ai, perofeta, tagata vaai ma tali faaaliga. Sa faaee aao o i latou uma sa aofia ai, i luga o lona ulu, ma sa faauuina ai o ia e avea ma lē ua faauuina e le Alii i lea valaauga mamalu ma le le mafaatusalia.

“Sa tulai o ia o le faitaulaga sili pulefaamalumalu i le malo o le Atua i le lalolagi, a o lagolagoina e ala i le faatuatua ma tatalo a le Au Paia i le lalolagi atoa.

E 17 masina ma aso e 19 sa galue auauna ai le susuga a Persitene Harold B. Lee o le perofeta a le Alii. I lea taimi o suiga ma le faatuputeleina, sa faafoeina e Peresitene Lee le faatuina o uluai siteki i Chile ma Asia i Korea. Sa pulefaamalumalu o ia i uluai konafesi faaeria i le Aai o Mekisiko, i Mekisiko, ma Munich, i Siamani. Na ia faalauteleina le auaunaga a le polokalama faauelefea i le lalolagi atoa. Na maliu o ia i le Aso 26 Tesema 1973 ina ua 74 tausaga o lona.

O le susuga a Peresitene Harold B. Lee