Aoaoga a Peresitene
Mataupu 23: O Le Toetu, o se Taula o le Agaga

Mataupu 23

O Le Toetu, o se Taula o le Agaga

E faamalolosia faapefea i tatou i o tatou puapuaga i le olaga nei, ona o se molimau i le Toetu o Iesu Keriso ma lo tatou foi toetutu?

Faatomuaga

Sa i ai ia Peresitene Harold B. Lee se molimau mautu i le Toetu o Iesu Keriso, lea sa saga faamalosia atili ina ua maea ona valaauina o ia i le Korama a Aposetolo e Toasefululua ia Aperila 1941. Na ia toe ta’ua: “Na sau se tasi o le Toasefululua ma faapea mai ia te au, ‘Matou te mananao e avea oe ma failauga i le sauniga lotu i le po o le Aso Sa. O le Aso Sa o le Eseta. I le avea ai o oe ma se aposetolo ua faauuina, o lea ua avea ai oe ma se molimau faapitoa o le misiona ma le toetu o le Alii ma le Faaola o Iesu Keriso.’ Na ou manatu, o se mea na matua faate’ia ai a’u, o se mea na aupito lofituina ai au ma umi se taimi o manatunatu loloto i ai nai lo mea uma na tutupu.

“Sa ou lokaina a’u i se potu o le Fale e i ai Ofisa o le Ekalesia ae tago i le Tusi Paia. Sa ou faitauina tusi e fa o le Talalelei, aemaise lava o mau e faatatau i le maliu, faasatauroga, ma le toetu o le Alii, ma a’o ou faitauina, sa faafuasei ona ou iloa se mea uiga ese na tupu. Ua lē na o se tala sa ou faitauina, aua ua foliga mai o mea ia ou te faitauina e matua moni lava e pei o loo ou aofia ai i totonu o na aafiaga. I le po o le Aso Sa, sa ou tuuina atu ai la’u savali ma le lotomaualalo ma faapea atu, ‘Ma o lenei, o a’u, o se tasi o aposetolo aupito faatauvaa o i ai i luga o le fogaeleele i le taimi nei, ou te tuuina atu la’u molimau ua ou iloa foi ma lo’u loto atoa, o Iesu o le Faaola o le lalolagi ma sa soifua o ia ma maliu ma ua toetu mo i tatou.’

“Sa ou iloaina ona o se ituaiga molimau faapitoa na oo mai ia te au i le vaiaso na mavae nei. Ona fesili mai ai lea o se tagata, ‘E faapefea ona e iloa? Na e vaai i ai?’ E mafai ona ou fai atu e sili atu ona malosi nai lo le vaai o mata, le molimau e maua mai i le mana o le Agaga Paia e molimau mai ai i o tatou agaga o Iesu o le Keriso, o le Faaola o le lalolagi.”1

Aoaoga a Harold B. Lee

E faapefea ona avea le moni o le toetu ma se “folafolaga faafiafia loto”?

“O le uluai aso o le vaisapati, ua o atu ai fafine i le tuugamau i le tafa o ata. … Ua iloa e i latou ua fulieseina le maa nai le tuugamau. Ona latou ulu atu lea i totonu, a e lei iloa le tino o le Alii o Iesu. Ua fememeai i latou i lenei mea, faauta foi, ua tutu mai ia te i latou tagata e toalua ua oofu i ofu pupula! Ua matatau i latou, ua punou foi o latou mata i le eleele, ona la fai mai lea ia te i latou, Se a le mea tou te saili ai le ua soifua i e ua oti? Aua lua te matatau oulua; aua ua ou iloa ua oulua sailia mai Iesu le Nasareta, lea na faasatauroina.

“E le o iinei o Ia, aua ua toe tu mai o Ia, pei ona fetalai atu ai o Ia. O mai, ina matamata i le mea na tuu ai le Alii—le mea na latou faataoto ai o Ia.

“Ina o atu ia ia vave ma ta’u atu i ona soo, ua toe tu mai o Ia nai e ua oti—faauta foi, e muamua atuia te outou i Kalilaia; tou te iloa ai o Ia i lea mea. Ia outou manatu i lona fetalai atu ia te outou, ina o i ai o Ia i Kalialia, ua faapea atu: e tatau ona tuuina atu o le Atalii o le tagata i lima o tagata agasala, ma ia faasatauroina, ma toe tu mai i le aso tolu. Faauta, ua ou fai atu ai.” [Tagai Luka 24:1–7; Mataio 28:5–7; Mareko 16:5–7.]

O lea na tusia ai e tusitala o le talalelei a Mataio, Mareko, ma Luka, le mea aupito sili na tupu i le talafaasolopito o le lalolagi, o le toetu moni mai o le Alii o Iesu Keriso, le faaola o tagata. I se faiga malie na faaalia ai le aupito silisili o mana paia uma o se Alo moni o le Atua. Na Ia tautino atu i le [tamaitai] faanoanoa o Mareta, i le taimi o le oti o lona tuagane o Lasalo: “O au nei o le toetu, ma le ola: o lē faatuatua mai ia te au, e ui lava ina oti, ae ola lava ia.” (Ioane 11:25.)

I tagata Iutaia ma o latou faamoemoega e fasioti, sa sili ona manino ma ‘anoa Lona faasilasilaina atu o Lona mana paia. “E moni, e moni ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou.

“Aua faapei o le Tama e i totonu ia te ia lava le ola; e faapea foi ona foai mai e ia i le Atalii, ia i totonu ia te ia lava le ola,

“Ma … ia fai e ia le faamasinoga, aua o ia o le Alo o le [Atua].” [Ioane 5:25–27.]

Ina ua mavae Lona lava toetu, sa oo mai foi se faamaoniga o se isi mana e maualuga atu e toe faatu mai ai i le tuugamau, e lē gata ia te Ia lava, a o isi “e ui ina ua oti, ae ua talitonu ia te Ia.” Na tusia e Mataio se faamaumauga faigofie, ma le manino o le toetu ofoofogia o ē faamaoni, mai le oti faaletino, “Ua avanoa foi tuugamau, ua toe tutu mai tino o tagata paia e toatele na momoe, na mavae foi lona toe tu mai, ona latou o mai ai lea nai tuugamau, ma latou o atu i le aai paia, ua iloa i latou e tagata e toatele.” [Mataio 27:52–53.]

E le o le mutaaga foi lea o mana togiola o lenei Alo lauiloa o le Atua. I le gasologa o tausaga i augatupulaga uma, o loo aumaia ai pea le folafolaga faafiafia loto. “Aua faapei ona oti uma ia Atamu, e faapea foi ona faaolaina uma ia Keriso,” (1 Kori 15:22), “…o e na amio lelei, e toe tutu i le ola; a o e na amio leaga, e toe tutu i le faasala.” (Ioane 5:29). Ua vave agai atu le taimi i se taunuuga atoatoa o Lana misiona paia.

A na fai e malamalama i le taua atoatoa o nei mea maoae na tutupu i lea taimi, e faapei ona muai tau mai e perofeta: O loo sauniuni e amioleaga e fasioti ē amioleaga; ma “o le a oo mai le mata’u i tagata uma” (MFF 63:33), o lenei malamalama o le a aveesea ai le tele o le mata’u ma le atuatuvale lea ua aafia ai tagata ma malo. E moni afai tatou te “matatau i le Atua ma ava i le tupu” [tagai 1 Peteru 2:17], ona mafai lea ona tatou maua le folafolaga matagofie a le Matai: “Afai tou te tuu ese le losilosivale ma le atuatuvale, o le a outou vaai mai ia te Au” [tagai MFF 67:10].2

O le faamoemoega o le olaga, o le aumaia lea o le tino ola pea ma le ola faavavau [tagai Mose 1:39]. O lona uiga, o le tino ola pea, e i ai le taimi e maua ai se tino e lē toe oo i ai tiga o le olaga nei, e lē toe oti, ma lē toe suia, ua mavae na tulaga uma.3

E lagolagoina faapefea i tatou i taimi o puapuaga po o le oti, e se malamalama e uiga i le toetu?

E i ai ea se taimi ua e lagonaina ai lou faataumaoiina faaleagaga i se faanoanoaga lē mafaamafanafanaina?

Se’i oui aveina outou i se vaaiga paia o loo faaalia mai ai se tagata na foliga mai e lē mafai ona tatalia, ma ia outou lagona ai lona malosi i se itula taua tele! O lalo o le satauro, sa tutu faapupuu ma le lē leoa se tina lalelei faamatuā tagata, ma lona pulupulu ua pulutaai ai lona ulu ma ona tauau. O ona luga a’e sa soona faataugā ai lana ulumatua i luga o le satauro. E mafai ona malamalama se tasi, ae itiiti lava, i le tele naua o le mafatia o le loto o Maria. Ua feagai tonu nei o ia ma le uiga o le valoaga faamomoiloto a le toeaina o Simeona a’o ia faamanuiaina lana tama i lona pepe meamea, “E fai [o Ia] ma faailoga e tauleagaina; Ioe e tuia foi lou lava loto ia ati i le pelu.” [Tagai Luka 2:34–35.]

O le a le mea na fesoasoani ma lagolagoina o ia i lona puapuaga matautia? Sa ia iloa le moni o le ola i tua atu o lenei olaga. Pe la te le’i talanoa ea ma se agelu, o se avefeau mai le Atua? E le’i faaluafesasi lona faalogoina o le toe tatalo o loo tusia a lana tama a o le’i faalataina o Ia e pei ona tusia ai e Ioane: “O lenei foi, lo’u Tama e, ia e tuu mai ia te au le manuia faatasi ma oe, o le manuia lava sa ia te i taua maoe, a o lei faia le lalolagi.” (Ioane 17:5) O lenei lava foi tina paia, a o punou lona ao, sa ia faafofogaina foi Lana toe tatalo na memumemu mai ai ona laufofoga mafatia i luga o le satauro: “Lo’u Tama e, ou te tuuina atu lo’u nei agaga i ou aao,” (Luka 23:46) ma o lea sa musuia ai lona tina i le agaga maualalo ma se molimau, e faamautinoa ai se toe faatasiga ma Ia ma le Atua lona Tama Faalelagi. E le o mamao ese le lagi mai le tagata o loo vaavaai atu ma le talitonu i se aso mamalu o le toetutu, e ui i le loloto o le faanoanoa.4

Pe o i ai ea se tulaga mautinoa o se toe faatasiga ma se faataunuuina o o tatou moomooga pe a mavae le oti? O le tagi lena a se tina faanoanoa a’o faataoto ese atu lana tama ua oti. O le fesili musumusu lena ae lē lagona a tagata mamai ma ua pulapula lagoto le soifua pe a ua vave ona oo mai le toe taimi. O le a le malosiaga ma le faamafanafanaga e tatau ona maua e le tagata ua faalogo i le folafolaga matagofie a le Alii, i soo se tasi o nei tulaga,:

“E toe ola mai ou tagata oti, olaotu tino oti e toe tutu mai. Ina ala mai ia, ma alalaga fiafia outou e ononofo i le efuefu; aua o lou sau e pei o le sau o le vao iti ia, e lafo atu foi e le eleele e ua oti.” (Isaia 26:19.)

O le mamafatu o le oti ua faamāmāina, o le ie paauli foi o le faanoanoa ua saeia, ma ua faamafanafanaina manu’a tuga a’o siitia a’e e le faatuatua i tatou i luga a’e o tofotofoga mataga ma faanoanoaga o le olaga faitino, ma aumaia ai se vaaiga o aso sili atu ma avanoa e sili atu ona olioli, e pei ona faaalia mai, pe a “soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga: aua ua mavae atu mea muamua” (Faaaliga 21:4) e ala i le togiola a le Alii o Iesu Keriso. Faatasi ai ma lea faatuatua ma le malamalama o oe lena atonu o le a oo i ai le faanoanoa, ua mafai nei ona e pese aua ua tusia, “Ua faaumatia le oti i le manumalo. Le oti e, o fea o i ai lou tui? Le tuugamau e, o fea o i ai lou manumalo?” (1 Kori. 15:54–55.)5

O oe foi ia, e mafai ona e iloa o loo soifua lou Togiola, e faapei o Iopu i le totonugalemu o ona tofotofoga e “faifai ia i le Atua, ma oti ai,” [tagai Iopu 2:9; 19:25] ma ia e iloa, e te mafaia foi ona tatala le faitotoa ae valaaulia o Ia “e tali sua ma oe.” [Tagai Faaaliga 3:20.] Vaai atu foi ia te outou lava e i ai se aso e avea o ni tagata ua toetutu, ma maua le sootaga ma Ia o lē na tuuina mai Lona soifua ina ia avea ma taui o tauiviga ma aafiaga o tagata i le lalolagi, ia fua o le ola faavavau tusa lava pe o fua faa tatauina i tulaga faale-tagata soifua ana galuega i le olaga e pei ua faatoilaloina.6

E faapefea ona avea le malamalama i le toetutu ma se taula mo o tatou agaga?

Sei o tatou vaavaai atu i le faataitaiga a Peteru, [o lē]. … na faafitia faatolu le Matai i le po na faalataina ai. Ia faatusatusa lenei Peteru ua mafatia i le fefe ma lona lototoa i luma o na lava tagata lolotu ae faasausili sa poloaiina ia fasiotia Iesu. Sa ia ta’uleagaina i latou o ni fasioti tagata ma ia ta’u atu ia te i latou ia salamo, sa pagatia i le falepuipui, ma sa ia talia e aunoa ma le fefe lona faamaturoina.

O le a le mea na suia ai o ia? Sa avea o ia ma molimau patino i le suiga e oo mai i le tino ua momomo, ma mafatia i le satauro, i se tino toetu mamalu. O le tali manino ma le faatauvaa, o Peteru o se tagata na suia aua sa ia iloaina le mana o le Alii ua toe tu. Ua le toe tuulafoaiina i apitagalu o Kalilaia, po o le falepuipui, po o le oti foi. O le a i ai lona Alii faatasi ma ia.7

Ua ou iloa. … le uiga o le matua matautia o le tuulafoaiina po o le tuua toatasi ona o le aveeseina faatopetope o sē e pele ia te oe. I le gasologa o tausaga o lo’u ola, sa tofia au ou te taumafai e faamafanafana i latou e faanoanoa, ae a na ou lē faia faafia na mea sa ou ta’uina atu i isi mo au lava ia, ou te le iloaina se mea sa sili atu i lo na o upu, o se mea e tatau ona pa’i ifo i le ta’ele o le loto a o le’i mafai e se tasi ona tuuina atu se faamafanafanaga moni. E tatau ona e vaai i se vaega o oe lava ia o tanumia i le tuugamau. E tatau ona e vaai i le pele ua maliu ona e fesili ifo lea ia te oe lava-Pe e te talitonu ea i mea o loo e aoaoina atu i isi? Pe e te talitonu moni ea o loo soifua le Atua? Pe e te talitonu ea i le Togiola a leAlii ma le Matai-na Ia tatalaina faitotoa i le toetutu i le olaga e sili atu lona mamalu? E i ai nisi taimi pe a tatou tutu i le laolao na o i tatou, o iina e tatau ai ona oo ifo i le loloto a tatou molimau, pe afai tatou te le mananao e malili ma toulu i le ala.

E faapei ona fai mai. … le ava a Iopu, “Aisea e te le faifai ai i le Atua ma oti ai.” [Tagai Iopu 2:9.] Ae peitai, i le mamalu o puapuaga o Iopu, na ia saunoa ai i se mea ou te manatu afai e lē ta- ’ua i se sauniga o se falelauasiga, o lona uiga ua le atoatoa. Na ia fai mai, “Ua ou iloa o loo soifua le na te togiolaina au, o aso amuli foi e tulai mai ai o ia i luga o le eleele: e ui lava foi ina faaumatia lenei tino pe a mavae atu lo’u pa’u, ae ou te iloa atu le Atua i lo’u tino: ou te iloa atu o ia mo a’u lava, … ae le o se tasi, … pe a le toe i ai o’u manao i totonu ia te au.” [Iopu 19:25–27.] O outou na i le asō, afai ua outou iloa ua taula o outou loto i lena molimau paia o loo soifua o Ia, ma o le a tu o Ia i lenei eleele i aso amuli, ma o le a outou fetaia’i faafesagai ma Ia—afai ua outou iloa lena mea, tusa lava pe o a faigata, po o a foi tiute ma mafatiaga—afai ua fausia lou fale i luga o le papa, o le a e lē manatu afaivaivai lava. Ioe, o le a e oo i aafiaga matautia o le faanoanoa pe a oti se tasi e pele ia te oe, ae e te lē faavaivai ai lava; e iu lava ina faateleina atili lou faatuatua nai lo le mea sa i ai muamua.8

O le faateleina o le faigata o o tatou olaga ma tulaga o le a i ai le lalolagi, o le tele foi lena o le taua o lo tatou tausia manino o faamoemoega ma mataupu faavae o le talalelei a Iesu Keriso. E le se galuega a le lotu le taliina o fesili uma e uiga i le pulea o le atulaulau e le Atua, ae ia tuuina atu i le tagata le lototele, e ala i le faatuatua, e faaauau ai pea e ui ina i ai fesili e le mafai ona ia maua le tali i le tulaga o i ai nei.9

O le vaitaimi nei i le faamanatuina o le manumalo aupito sili i le lalolagi [le toetu o Keriso ma le faatoilaloina o le oti], ou te valaau atu ma le lotomaualalo naua i ē ua faamaoni o latou loto i soo se mea, ina ia tulai mai i luga atu o o latou tulaga atuatuvale ma mafatiaga faaletaga soifua, ma ia alalaga fiafia e faapei o aposetolo i Nuu Ese “Faafetai i le Atua, ole na te foaiina mai le manumalo ia te i tatou talu lo tatou Alii o Iesu Keriso.” (1 Kori. 15:57.)10

Fautuaga mo Suesuega ma Talanoaga

  • O le a le uiga o le fetalaiga a le Faaola, “O au nei le toetu, ma le ola”? (Ioane 11:25). O le a sou lagona pe a mafaufau e uiga i le Toetu o le Faaola?

  • O aafia faapefea lou olaga i aso taitasi ona o lou malamalama e moni le toetu?

  • E faapefea ona fesoasoani ia i tatou se molimau i le toetu pe a oti se tasi tatou te alolofa i ai? O a isi tulaga tatou te maua ai le faamafanafanaga mai se molimau i le toetu, ma fesoasoani foi tatou te faatoilaloina ai le atuatuvale?

  • O le a se mea e mafai ona tatou faia ina ia maua ai se malamalama sili atu ma se molimau i le toetu?

Faamatalaga

  1. Ye Are the Light of the World (1974), 26–27.

  2. CBS “Church of the Air” broadcast, in Conference Report, Apr. 1958, 133–34.

  3. The Teachings of Harold B. Lee, ed. Clyde J. Williams (1996), 30.

  4. CBS “Church of the Air” broadcast, 134–35.

  5. Decisions for Successful Living (1973), 179–80.

  6. In Conference Report, Ape. 1958, 136.

  7. The Teachings of Harold B. Lee, 63.

  8. Lauga i le falelauasiga o David H. Cannon, 29 Ian. 1968, Historical Department Archives, O Le Ekalesia a Iesu Keriso o le Au Paia o Aso e Gata Ai, 5–6.

  9. In Conference Report, Oct. 1963, 108; po o le Improvement Era, Dec. 1963, 1103.

  10. In Conference Report, Ape. 1958, 136.

Na faaali le Faaola toetu ia Maria i le tuugamau. O le molimau a le Agaga Paia, e mafai ai ona tatou tofu maua le faamafanafanaga mautinoa ua toetu le Faaola mai le oti, ma ua motusia ai noataga o le oti mo tagata uma.