Mataupu 5

Savali i le Malamalama o le Molimau

E faapefea e le malamalama o a tatou molimau ona tuputupu e avea ma se “malamalama o le mautinoa”?

Faatomuaga

E sili atu i le 32 tausaga, na avea ai Harold B. Lee ma se molimau faapitoa o le Faaola o Iesu Keriso. Na ia tautino mai, “Ma le mamalu uma ma le paia, ma lo’u agaga atoa, ou te tuuina atu ai la’u molimau ou te iloa o loo soifua Iesu, o Ia o le Faaola o le lalolagi.”¹

Ina ua ia saunoa pe faapefea ona maua se molimau, na ia ta’ua:

“Sa i ai se aso na asiasi mai ai ia te au se alii talavou o se faifeau Katoliko ma se faifeautalai faalesiteki mai Colorado. Sa ou fesili atu ia te ia pe aisea ua sau ai o ia, ma sa ia tali mai, ‘na ou sau e vaai oe’.

“ ‘Aisea?’ o lau fesili lea.

“ ‘Vaai oe,’ sa ia faapea mai, ‘Sa ou sailiili i nisi o mataupu ou te le mafai ona ou mauaina. Ae ou te manatu ua ou mauaina nei i le faapotopotoga a tagata Mamona.’

“Na afa itula le umi o le talanoaga. Sa ou faapea atu ia te ia, ‘Tama, pe a amata ona ta’u atu e lou loto mea e le iloa e lou mafaufau, o lona uiga ua e maua le Agaga o le Alii.’

“Na ia ataata ma faapea mai, ‘Ou te manatu ua amata ona tupu lena mea ia te au.’

“‘Aua la e te faatali umi,’ o la’u tala lea ia te ia.

“I ni nai vaiaso mulimuli ane, na ou maua ai se telefoni. Na ia faapea mai, ‘O le aso Toonai a sau nei o le a ou papatiso ai e avea ma se tagata o le Ekalesia, aua sa ta’u mai e lo’u loto ni mea e lē iloa e lo’u mafaufau.’

“Sa faaliliuina o ia. Na ia vaai i mea sa tatau ona ia vaai i ai. Na ia faalogo i mea sa tatau ona ia faalogoina. Na ia malamalama i se mea e tatau ona ia malamalama i ai, ma sa ia faia i ai se mea. Sa ia te ia se molimau.”²

Aoaoga a Harold B. Lee

O le a le molimau?

E mafai ona faamatalaina le molimau o se faaaliga paia mo le tagata faatuatua. Sa faaleoina e le faisalamo le manatu lava lea e tasi:” … o le molimau i le Alii ua mautinoa. … ”(Salamo 19:7.) Na faailoa mai e le Aposetolo o Paulo, “e leai foi se tagata na te mafaia ona ta’ua [pe iloa] o Iesu o le Alii, pe a na le seanoa le Agaga Paia.” (1 Korinito 12:3.) Sa aoao atili mai e le au perofeta afai e te “ole atu ai ma le loto faamaoni ma le manatu tonu i ai, ma le faatuatua ia Keriso, na te faaalia le tonu ia te outou i le mana o le Agaga Paia tou te iloa ai le tonu i mea uma lava.” (Moronae 10:4–5.)…

O loo soifua le Atua! O Iesu o le Faaola o le lalolagi! O le talalelei a Iesu Keriso e pei ona i ai i le atoatoa i tusitusiga paia o aso anamua ma mau o aso nei, ua moni ia. Ua ou iloa nei mea i le molimau mai o le Agaga i lo’u agaga.³

Sei ou faamatalaina atu ia te oe se mea na tupu ia te au ma se tasi o le matou pulega faapisinisi. O lona toalua ma lana fanau o ni tagata o le Ekalesia ae lē auai o ia. Na ia faapea mai ia te au, “E le mafai ona ou auai i le Ekalesia seiloga ua i ai sa’u molimau.” Sa ou faapea atu ia te ia, “A e toe sau i Sate Leki, ona e sau lea ta te talanoa.” I ni vaiaso mulimuli ane ina ua maea la matou fonotaga faapisinisi sa ma talanoa ma ou faapea atu ia te ia, “Ou te le iloa po ua e iloaina e i ai sau molimau pe leai foi; po o e malamalama foi i le mea e ta’u o le molimau.” Ma sa ia manao e fia iloa po o le a le molimau. Sa ou tali atu ia te ia e faapea, “Pe a oo mai le taimi e ta’u atu ai e lou loto mea e lei iloaina e lou mafaufau, o le Agaga lena o le Alii o loo talanoa atu ia te oe.” Ona ou faapea tu lea, “E pei ona ou iloa oe, o loo i ai mea ua e iloaina i totonu o lou loto e moni ia. E leai se agelu o le a popoina lou tauau ma ta’u atu ia te oe o le mea lea e moni.” O le agaga o le Alii e pei ona fetalai mai le Matai: “E agi le matagi i le mea e loto i ai o ia, e te faalogo foi i lona agi, e te le iloa le mea na sau ai, ma le mea e alu atu i ai, e faapena i latou ua fanauina i le Agaga.” (Ioane 3:8). Ona ou faapea atu lea i la’u uo, o se tasi o le pulega faapisinisi: “Ia manatua o lau molimau e le ala mai i se auala matautia ae afai e oo mai, o loimata o le fiafia o le a faasusuina ai lou aluga i le po. O le a e iloa, la’u uo pelē, pe a oo mai lena molimau”.⁴

Ou te tuuina atu la’u molimau ou te iloa o loo soifua le Faaola o le molimau aupito malosi e mafai ona e maua o loo soifua o ia, e maua lea pe a molimau mai le mana o le Agaga Paia i lou agaga, o loo soifua o Ia. E sili atu le malosi nai lo o le vaai, e sili atu le malosi nai lo le savavali ma talatalanoa faatasi ma Ia, o le molimau lena a le Agaga Paia e faamasinoina ai oe pe afai e te liliu ese mai ia te Ia. Ae o le tiutetauave lena o outou uma, o lou tiutetauave foi lea ina ia faavaeina lena molimau. Ua fesiligia pea i tatou, pe faapefea ona maua e se tasi faaaliga? Sa fetalai atu le Alii i se faaaliga i taitai na i ai muamua, “O le a ou faaali atu ia te oe i lou mafuafau ma lou loto i le Agaga Paia. O le a nofo i totonu ia te oe. O le faaaliga lena na taitaiina ai e Mose le fanauga a Isaraelu i le Sami ulaula ma sopoia ai.” (Tagai MFF 8:2–3) Pe a molimau mai lena Agaga i o tatou agaga, o le faaaliga lena mai le Atua Silisiliese.⁵

[Ina ua oti Lasalo, na faailoa atu e le Faaola ia Mareta,] “O au nei o le toetu ma le ola: o le faatuatua mai ia te au, e ui lava ina oti ia, a e ola lava ia. O tagata ola uma o e faatuatua mai ia te au, e le oti lava e oo i le faavavau.” Ona ia silasila atu lea ia Mareta ma ia fetalai atu, “Po ua e talitonu mai ea i lena mea?” Ma ona o le lotomaualalo tele o lena tamaitai, na fagua mai ai se mea ma sa ia faapea ane ai e pei o la Peteru. “Ioe le Alii e, ua ou talitonu lava, o oe o le Keriso le Alo o le Atua, o le maliu mai i le lalolagi.“ [Ioane 11:25–27.]

O fea na ia maua mai ai lena tali? E lei mauaina mai i le faitauina o tusi. E lei mauaina mai i le suesueina o mataupu tau lotu po o le faasaienitisi, poo le faafilosifia. Sa ia maua se molimau i lona loto, e pei lava ona maua e Peteru. Pe ana fai e tali mai le Matai, semanu ua Ia fetalai mai: “Amuia oe Mareta, aua e lei faailoa atu e aano ma le toto ia te oe, a o lo’u Tama o i le lagi”… O le mea e aupito sili ona anagata o mea uma e mafai ona e maua, o le mauaina lea o se molimau i lou loto e moni nei mea.⁶

E le toatele nisi ua faafesagai ma le Faaola i lenei olaga faaletino, ae o i tatou uma taitoatasi ua faamanuiaina ia maua le meaalofa o le Agaga Paia ina ua maea ona papatisoina, e mafai ona maua le tulaga mautinoa atoatoa o loo soifua o Ia. E moni, afai e ia i tatou le faatuatua i le moni o loo soifua Ia, e ui ina tatou le vaaia, e pei ona faamamafa atu e le Matai i Lana fetalaiga ia Toma, e sili le manuia o i latou “o e le vaai mai, a e talitonu mai pea”(Ioane 20:29), aua “o le faatuatua ua matou savavali ai, ae le o le tino mai o mea” (2 Korinito 5:7). E ui ina le o vaaia, ae o loo faatuatua ia te ia tatou te olioli ai ma le fiafia e le matalatalaina, e silisili ese lava; i le mauaina foi o le iuga o lo tatou faatuatua, o le faaolaina lea o o tatou agaga (tagai 1 Peteru 1:8–9).⁷

Pe mafai ona tatou tuufaatasia nei mea ma faapea ane, o soo se tagata ua mauaina se molimau faamaoni, ua ia mauaina se faaaliga mai le Atua soifua, pe semanu ua leai sana molimau? O soo se tasi ua ia te ia se molimau, ua olioli i le meaalofa o valoaga, ua ia te ia le agaga o faaaliga. Ua ia te ia le meaalofa lea ua mafai ai e perofeta ona tautala i mea e faatatau i o latou tiute.

Ia fesoasoani le Alii ia i tatou uma ia taumafai e maua lena molimau sili ona taua i le tatou sauniuniga mo le iloa. Mulimuli ane ina ua tatou maua lena manatu paia e tasi o Iosefa Samita sa avea ma perofeta, ma o ia lava o se perofeta, ma e moni le talalelei, o isi faafitauli uma e faafoliga mai e liu suavai atu e pei o le kiona mamafa ae le i oo ina oso a’e le la.⁸

E faapefea ona tatou saunia i tatou lava ia maua se molimau?

Na ta’ua faapea [o le Faaola] na fetalai mai “ … ua i ai lava ia te outou le malo o le Atua.”(Luka 17:21.) O se faaliliuga e sili atu ona tonu e tatau ona faapea, “O le malo o le Atua, ua ia te outou, po o i totonu o lo outou lotolotoi,” ae ao ou mafaufau atu i le isi faamatalaga lena, “Ua i ai lava ia te outou le malo o Atua.” Ou te toe manatunatu i se mea na tupu ia te i matou ma se faalaotopotoga o tamaiti aoga mai le Iunivesite o Polika Iaga le fale sa nofo muamua ai Polika Iaga, ma o iina e toasefuluono, na fai ma sui o atunuu e sefuluono mai fafo, na faatonu e tutulai ma faamatala mai pe na faapefea ona latou iloa e uiga i le talalelei ma latou taliaina, … ma tuuina atu a latou molimau. O se afiafi sa sili ona faatupu manatu. Sa matou faalogologo atu i ni alii ma tamaitai talavou mai Mekisiko, Atenitina, Pasila, o atunuu mai Scandinavia, Farani, ma Egelani. E tutusa lelei le tala. Ina ua amata ona latou faamatalaina mai le ala na latou maua ai le talalelei, na faapea: Sa latou fia maua le mea moni. Sa latou sailia le malamalama. Sa le faamalieina i latou ma i le taulotoaiga o la latou sailiiliga, na sau ai ia i latou se tasi ma le upumoni o le talalelei. Sa latou tatalo e uiga i nei mea ma saili atu ma le naunautai i le Alii, ma le faamoemoega, ma o latou loto atoa, ma sa latou maua ai se molimau paia lea na latou iloa ai o le talalelei lenei a Iesu Keriso. … Ma i totonu o agaga o tagata uma, o i latou uma o e saili ma le faamaoni i le mea moni, pe afai e ia te ia le manao e iloa, ma suesue ma le manatu moni ma le faatuatua i le Alii o Iesu Keriso, ua i ai lava ia te ia le Malo o le Atua pe i se isi foi faaupuga, ua ia te ia le mana e maua mai ai.⁹

I le faavae o le molimau a le tagata lava ia e tatau ona faamaoni, ola mama, a le o lena e le mafai ona molimau atu le Agaga i le paia o le misiona a le Faaola poo lenei galuega i o tatou aso.¹⁰

O le mea muamua e matua manaomia … i le mauaina o se molimau o le faamautinoa lea o loo sologa lelei le “tulaga” faaleagaga o le tagata. E tatau ona mama lona tino ma le mafaufau pe afai ua ia olioli i le mafutaga o le meaalofa a le Agaga Paia lea e mafai ai ona ia iloa le tulaga mautinoa o mea faaleagaga.¹¹

O le liliu mai e tatau ona sili atu lona uiga nai lo le na ona avea ma tagata o le Ekalesia e “feaveaiina se pepa”o se lisiti o le sefuluai, o se pepa faamaumau, o se pepa faataga o le malumalu, ma isi. O lona uiga o le faatoilaloina lea o uiga faitio po o le faipona ma taumafai pea e faaleleia o tatou vaivaiga i totonu ae le na o foliga vaaia i fafo.¹²

Pe malaga atu a tatou faifeautalai, tatou te faapea atu i e o loo galulue i ai, “Matou te le o valaau atu ina ia outou auai mai i le Ekalesia e tau ina tusia o outou igoa i luga o pepa faamaumau. E le o le matou popolega lena. Ua matou o mai ia te outou e ofoina atu le meaalofa sili e mafai ona tuuina atu e le lalolagi, o le meaalofa lea o le malo o le Atua. O loo iinei mo oe pe afai na o lou taliaina ma talitonu.” Ma o le matou lui lena mo le lalolagi. “E mafai ona matou aoao atu ia te outou mataupu faavae o le Ekalesia a Iesu Keriso ma molimau atu i le paia o le galuega, ae o le molimau o le moni o mea matou te aoaoina atu e tatau ona maua mai i au lava sailiiliga.”

Matou te faapea atu i tagata o loo matou aoaoina, “O lea, ia e fesili atu i le Alii. Suesue, galue ma tatalo.” O le faagasologa lena o loo aumai ai tagata i le Ekalesia, ma o le auala lava lena e tutusa mai le amataga na aumaia ai i le Ekalesia e sa faamaoni i le agaga mai soo se mea.¹³

A o tepa ae i luga fofoga o Iesu i lana tatalo “ua lata lona taimi,” [tagai Ioane 17:1] na ia faaalia se mea moni loloto lea e tatau ai ona matua taua i tagata uma. “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3.) E ui ina loloto atu le taua o lenei manatu faaalia i lo le mea o le a ou talanoaina, ou te fia aumaia se manatu se tasi mai lenei mau. E faapefea ona e iloa le Tama ma le Alo?. … E amata ona tatou mauaina lena atamai e ala i le suesue. Na fautua mai le Faaola ia i tatou “E suesue outou i Tusi, aua ua outou manatu tou te maua ai le ola e faavavau; o tusi foi ia o loo molimau ia te au.” (Ioane 5:39.) O totonu iina o le a mauaina ai le talafaasolopito o fegalegaleaiga a le Atua ma tagata uma i tisipenisione uma, ma galuega ma upu a le au perofeta e faapena foi galuega ma afioga a le Faaola lava ia ua tuuina mai “musumusuga a le Atua,” e pei ona faapea mai le Aposetolo o Paulo “e aoga foi ia e aoao ai, e aoai ai, e faatonu ai, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (II Timoteo 3:16–17.) E le tatau ona e tuua se aso e aunoa ma le faitau mai ni tusi e paia.

Ae e le lava lo tatou tau ina ia aoao e uiga i lona soifuaga ma ana galuega i le na o le suesue. O le Matai lava na tali atu i le fesili i le ala e mafai ai e se tasi ona iloa o ia ma lana mataupu: “Ai se tasi e fia fai lona finagalo, e iloa ai e ia.” (Ioane 7:17.) Pe e te manatu ea o se e pulea mataupu faasaienitisi o se na te lei faia lava ni ana suesuega i totonu o le potu suesue? Pe e te matua gauai atu i ni manatu faitio o se tagata faitio i mea tau musika ae leai sona malamalama tau musika, poo se tagata faitio i tagata tusi ata ae le tusi ata? E faapena foi, se tasi e pei o oe lava o le a “iloa le Atua” e tatau ona avea ma se tasi e faia lona finagalo ma tausia ana poloaiga ma faataitaia uiga lelei sa soifua ai Iesu.¹⁴

O le mauaina o le malamalama e ala i le faatuatua e le o se auala faigofie i le aoaoina. E manaomia le matua taumafai malosi ma le tauivi pea e ala i le faatuatua… ..

I lona aotelega, o le aoao e ala i le faatuatua e le o se galuega lea mo se tagata paie. Ma sa faapea mai se tasi, i se isi faaupuga, o se faagasologa faapena e manaomia ai le gagauina o le loto atoa, o le tuu faatasia o lagona loloto ma mafaufauga loloto ma faafesootai atu ma le Atua … e tatau ona faatulagaina le fesootaiga sao. Ona pau lena o le ala e maua ai le “malamalama e ala i le faatuatua.”¹⁵

O le a se mea e mafai ona tatou faia e faamalolosia ai a tatou molimau?

[Sa fetalai atu le Alii ia Peteru,] “Ua manao tele Satani ia te outou, ia lulu ia te outou e pei o le saito; a ua ou faatoga mo oe, ina nei mavae lo’u faatuatua a o oe foi pe a liua mai oe, ona e faamalosi ai lea i ou uso.” (Luka 22:31–32). Ia maitau mai la, o loo ia fetalai atu nei mea i le taitai o le Toasefululua. Ua ou faatoga mo oe; ia alu atu ma liua mai oe, ma pe a liua mai oe, ona e alu lea e faamalosi i lou uso. O lona uiga (e mafai ona) lē liua i tatou e pei lava foi ona mafai ona tatou liua. O lau molimau o se mea e mafai ona e mauaina nei ae e mafai foi ona le tumau ai.¹⁶

O le molimau o se mea e faigata ona pueina mai e pei o se ave o le masina; e ma’ale’ale e pei o se oketi; e tatau ona e tapueina mai i taeao uma o lou olaga. E tatau ona faatumauina e ala i le suesue, ma le faatuatua, ma le tatalo. Afai e te faatagaina oe ina ia e ita, afai e te faatagaina oe e auai atu i se faapotopotoga sese, e te faalogologo i tala sese, o loo e aoaoina mataupu sese, o loo e auai atu i ni gaoioiga faasolitulafono, e leai se mea e sili atu ona mate, e pei o le aveesea o le Agaga o le Alii mai ia te oe seia pei lava ua e savali mai i se potu ua faamalamalamaina pe a e ulufafo atu mai lenei fale, e pei lava ua e agai atu i totonu o le pogisa.¹⁷

O le mea e te mauaina i lau molimau i le aso lenei, o le a le avea lea mo oe a taeao seiloga e te faia i ai se mea. O lau molimau e foliga mai o le a faatuputeleina, po o le faaitiitia foi, e faalagolago lava ia te oe. Pe o le a e manatuaina la lau matafaioi? Ua fetalai atu le Alii, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua au.” (Ioane 7:17).¹⁸

E leai se tagata o le Au Paia o Aso e Gata Ai ua liua moni e mafai ona ola le mama. E leai se tagata o le Au Paia o aso e Gata Ai ua liua moni, e mafai ona le faamaoni, pe pepelo, pe gaoi. O lona uiga e mafai ona mauaina e se tasi sana molimau i le aso lenei, ae afai na te faata’uvalea ia te ia lava ma faia mea e feteenai ma tulafono a le Atua, o lona uiga ua leai sana molimau ma e tatau ona toe tauivi ina ia toe maua mai. O le molimau e le o se mea e mafai ona e mauaina nei ma mauaina pea. O le molimau e mafai ona tupu ma saga tupu pea e oo atu i le malamalama o le mautinoa, po o le a faaitiitia e oo atu i le leai o se mea, e faalagolago lea i lau mea o le a fai i ai. Ou te faapea atu, o le molimau tatou te mauaina i lea aso ma lea aso o le mea lea e faasaoina mai ai i tatou i mailei a le tiapolo.¹⁹

E faapefea ona avea se molimau ma taula o le agaga?

Sa i ai se taimi a o faia le galuega talai a le Keriso na faailoa atu ai e Lana aposetolo sinia, o Peteru, lona faatuatua ma lana molimau i le paia o le misiona a le Matai: “O oe o le Keriso le Alo o le Atua soifua.” Ua tali atu le Alii ia Peteru e ala i le tautino atu, “ … aua e le se tagata na ia faailoa atu ai ia te oe, a o lou Tama o i le Lagi.” Ma i luga o “lenei papa” … poo se isi faaupuga, o le molimau faaalia a le Agaga Paia, le faaalia mai o Iesu o le Keriso … Ua faavaeina Lana Ekalesia, ma o le a le mafaia foi “e faitotoa o seoli ona manumalo i ai.” (Mataio 16:16–18.)²⁰

Ua oo i le taimi ma ua faafesagai nei ma oe … ae seiloga ua ia te oe le molimau o le mautinoa o nei mea [le talalelei, le Ekalesia ma isi mea] ua moni o le a le mafai ona e onosaia taimi faigata poo tofotofoga lea o le a pesi i ou luga ma taumafai e saeia oe mai le malupuipuia o lou nofoaga i le aso nei. Ae afai e te iloa ma lou loto atoa ua moni nei mea …, o le a e iloa poo ai Iesu lou Faaola, ma poo ai foi le Atua lou Tama; o le a e iloa foi le uuna iga a le Agaga Paia. Afai e te iloa na mea o le a e tu e avea ma se taula e faasagatau atu i matagi o le a pesi mai i lou fale, e e pei ona faamatalaina i le faataoto a le Matai. O le e faalogo i ana upu ma tausia ana poloaiga e avea e pei o le fale na fausia i luga o le papa, ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, ae lei pau lava ia; aua na faavaeina i luga o le papa. “Ai se faalogo foi i au upu nei, a e le faia, e faatusaina o ia i le tagata valea, na na faia lona fale i luga o le oneone, ona to mai lea o uaga, ua oo mai foi tafega, ua agai mai foi o matagi, ua pesi mai i lea fale, ona pau ai lea, ua nutipalaina lava” (Mataio 7:26–27).

Sa faapea mai le Matai, ma ua ou fai atu ia te outou i le aso nei, o uaga o faaumatiaga, o uaga o faigata, o tafega ma matagi o tofotofoga ogaoga o le a pesi mai i o outou fale uma taitoatasi. O le a i ai le faaosoosoina i le agasala, o le a i ai puapuaga, o le a i ai faigata e faafeagai ma outou i o outou olaga. Ma o i latou e le pauu pea oo mai tofotofoga, o i latou ia sa fausia o latou fale i luga o le papa o le molimau. Tou te iloa tusa lava poo le a le mea e oo mai, o le a le mafai ona e tumau i se malamalama e te nonoina mai. E na o le malamalama lava ua e maua mai le molimau a le Agaga, lea ua ia te outou uma le aia tatau e mauaina ai, e mafai ai ona outou tumau.²¹

E le lava mo i tatou le na o le avea na Au Paia o Aso e Gata Ai e mulimuli i o tatou taitai ma taliaina a latou fautuaga, ae ua ia i tatou se matafaioi sili atu e mauaina ai e i tatou lava se molimau e le faamaluelueina o le tofiga paia o nei alii, ma le molimau o mea ua latou ta’uina mai ia te i tatou o le finagalo lava lea o lo tatou Tama Faalelagi.²²

Ua ou sau ia te outou i le aso nei o se molimau faapitoa ua i ai le tiutetauave o le tauina atu o lena molimau, i luga atu o isi mea uma. Sa i ai ni taimi vavalalata sa ou iloa ai ma le mautinoa. A o ou saili mo le Agaga e tuuina atu ai se tautalaga i le autu o le Eseta, le toetu mai o le Alii, sa na o au lava i totonu o se potu, ma sa ou faitauina ai tusi a Mataio, Mareko, Luka ma Ioane e patino i i le faasatauroga, ma le toetu, ma sa i ai se mea na tupu ia te au. A o ou faitau, sa peiseai lava o loo ou i ai iina i lena taimi, i le mea moni na tupu, ae lē na o se tala. Ona ou tuuina atu lea o la’u savali, ma tuuina atu la’u molimau o lenei, o se tasi o e au pito i itiiti o ou uso nei, o au foi na ou maua se molimau faaletagata lava ia e uiga i le maliu ma le toetu mai o lo tatou Alii ma lo tatou Matai. Aisea? Aua sa i ai se mea sa mu i totonu o lo’u loto na mafai ai ona ou tautala ma le mautinoa ma tuua uma lafoai uma ai le masalosalo. E mafai foi e oe. Ma o le mea ua sili ona faamalieloto i le lalolagi, o le taula sili i lou agaga, i taimi o faafitauli, i taimi o faaosoosoga, o faigata ma galuega [o lea] e mafai ona e iloa ma le mautinoa e tetee atu ai i le masalosalo uma, o loo soifua le Atua.²³

Fautuaga mo Suesuega ma Talanoaga

Aisea e avea ai faaaliga mai le Agaga Paia “o se molimau e sili atu ona malosi e mafai ona e maua” o loo soifua le Faaola?
O le a le fautuaga na tuuina mai e Peresitene Lee e uiga i le ala e maua ai se molimau o le talalelei? O le a se mea na fesoasoani ia te oe i le mauaina o lau molimau?
E faapefea ona aumaia i tatou ina ia iloa le Tama o i le lagi ma Iesu Keriso?
O le a sou mafaufau i le uiga o le faamatalaga a Peresitene Lee ina ua ia foi mai “O le molimau o se mea e faigata ona pueina e pei o se ave o le masina; … e tatau ona e tapueina i taeao uma o lou olaga?”
O le a se mafuaaga e faaitiitia ai pe mate a tatou molimau? O le a se mea e tatau ona tatou faia ina ia mafai e le malamalama o a tatou molimau ona “tuputupu i le malamalama o le mautinoa?”
I le taimi lava tatou te maua ai se molimau, e faapefea ona tatou fesoasoani i isi e faamalosia a latou molimau?
O a ni auala e avea ai le malamalamaaga o loo soifua le Atua ma taula i o tatou agaga i taimi o faafitauli? O anafea na avea ai lau molimau i le Faaola ma puna o malosiaga ia te oe?