Mataupu 21

Taumafai ina ia Faaatoatoaina

E mafai faapefea ona tatou taumafai e faataunuuina le poloaiga “O lenei, ia atoatoa ona lelei o la outou amio”?

Faatomuaga

Ua aoao mai e Peresitene Harold B. Lee le taua o le mulimuli i le faaa’oa’oga a leFaaola a’o tatou taumafai ina ia faaatoatoa:

“Ua faatalitonuina a’u sa le’i na ona mafaufau faatusatusa le Matai ina ua ia fetalai, ‘O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.’ [Mataio 5:48.] … Pe tou te manatu ea sa fautuaina mai e le Faaola se sini e le mafai ona ausia ma ‘amu’amu mai ia tatou taumafaiga e ola ina ia maua lena tulaga faaatoatoaina? E le mafai e i tatou i lenei olaga ona oo i lena tulaga o le faaatoatoaina na fetalai i ai le Matai, ae o le olaga lenei tatou te faataatia ai le faavae tatou te fausiaina ai le faavavau; o le mea lea, e tatau ona tatou mautinoa ua faataatia lo tatou faavae i le upumoni, amiotonu, ma le faatuatua. Ina ia mafai la ona tatou ausia lena sini, e tatau ona tatou tausia poloaiga a le Atua ma ia faamaoni e oo i le iuga o o tatou olaga iinei, ona faaauau ai lea i luga atu o le tuugamau i le amiotonu ma le malamalama seia oo ina tatou avea e faapei o lo tatou Tama oi le Lagi. …

“… [O le Aposetolo o Paulo] na faasino i le ala e maua ai le atoatoa. Na saunoa o ia e uiga ia Iesu, ma faapea mai, ‘E ui lava o ia o le Alo, a o mea s atiga ai o ia na aoaoina ai o ia ia usiusitai, ua faaatoatoaina foi o ia, ona avea ai lea o ia ma tupuga o le ola e faavavau ia ilaotu uma o e usiusitai ia te ia.’ (Eperu 5:8–9.)…

“… O lea aua ne’i i ai se aso e alu e aunoa ma le aoaoina mai le tusi lesona sili o le soifuaga lea o [Keriso], o ona ala i se olaga faaatoatoaina ma ia tatou savavali ai i la tatou sini e faavavau.”¹

Aoaoga a Harold B. Lee

E faapefea ona fesoasoani lo tatou malamalama i mea ua tatou vaivai ai i le faaatoatoaina o i tatou?

[O loo i ai] ni mea taua se tolu e tatau ona musuia ai se tagata ina ia ola i se olaga faa- Keriso—pe, i le gagana faatusipaia, ia ola faaatoatoaina atili e faapei ona soifua ai le Matai. O le mea taua muamua ou te faaigoaina ina ia agavaa ai: E tatau ona fāgua tagata taitoatasi ia mananao e aoaoina pe ola faatoatoaina, se malamalama i mea na te manaomia.

E le’i manaomia e le alii mauoa ona aoao atu i ai le salamo mai le fasioti tagata po o ni mafaufauga fasioti tagata. E le’i manaomia foi le aoaoina o ia i le ala e salamo ai mai le mulilua, po o le gaoi, pepelo, taufaasese, po o le lē ava i lona tina. Na fai mai a ia, na ia tausia nei mea uma a’o laitiiti; ae o le fesili, “O le a le mea ou te le i faia?” [Tagai Mataio 19:16–22.]

Na silafia lelei e le Matai, i Lona malamalama manino ma le mana o se Faiaoga Sili, le tulaga o lea taulealea. O le ma sa ia manaomia ma na te le o faia, o le faatoilaloina lea o lona tuinanau i mea o le lalolagi, o lona faamoemoe e faatuatua i oa. Ona tuuina atu lea e Iesu o le vaifofo lelei: “Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi: i le e sau ai ma mulimuli mai ia te au.” (Mataio 19:21.)

I le liua maoae o le Aposetolo o Paulo, ina ua faatauasoina o ia i le malamalama a’o agai atu i le ala i Tamaseko …, sa ia faalogoina se leo o fetalai atu ia te ia: “Saulo, Saulo e, se a le mea ua e saua mai ai ia te au?” [Galuega 9:4.] Ma mai le ta’ele o le loto ua faamaualaloina o Saulo na oo mai ai se fesili e masani ona fesili ai se tasi ua na lagona e i ai se mea e tatau ona ia faia: “Le Alii e, se a le mea e te finagalo i ai ou te faia?” [Galuega 9:6.] …

Na faamatala e Enosa, le atalii o le atalii o Liae, ana tauiviga i luma o le Atua, a o le’i mauaina e ia le faamagaloga o ana agasala. E le o ta’ua mai pe o a ana agasala, ae na ia matua faailoa atu ma le loto. Ona ia faapea mai lea, “Sa matelaina lo’u agaga. … ” [Enosa 1:4.] Ua outou iloa la, o le malamalama lena ma le lagona i mea e matua manaomia, ma o lena sailiiliga o’o-o’o i le loto, na faafesagai lelei ai ma mea e vaivai ai ma mea foi o loo ia manaomia.

O lenei tulaga maualuga o lagonaina o mea e manaomia e se tasi, sa faaalia lea i le Lauga maoae i luga o le Mauga ina ua fetalai le Matai, “Amuia e lotomaualalo: aua e o latou le malo o le lagi.” (Mataio 5:3.) O e lotomaualalo, e moni, o lona uiga o i latou e manaomia le faaleagaga, o ē lagona le matitiva i la le agaga ma o le ala lea e aapa atu ai ma le faanaunau mo se fesoasoani. …

E tatau ia i tatou uma lava, pe afai tatou te mananao e taunuu i le tulaga faaatoatoaina, ona fesili i se taimi i lenei fesili, “O le a ea le mea ou te le’i faia?” pe afai tatou te fia fe’a’ei i luga i le faaatoatoaina.. …

E fesoasoani faapefea le toe fanauina e faaatoatoaina ai?

O le mea taua lona lua mo le faaatoatoaina ou te fia ta’ua o loo maua lea i le talanoaga a le Matai ma Nikotemo. Na Ia silafia lelei ina ua sau Nikotemo ia te Ia, o loo saili o ia [Nikotemo] i le tali na fesili ai foi le toatele ia te Ia: “O le a se mea e tatau ona ou faia ina ia faaolaina ai?” Ma sa tali atu le Matai, “E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua.” Ona fai atu ai lea o Nikotemo, “E mafai ea faapefea ona fanau o le tagata ua toeaina? … ” Sa tali atu Iesu, “E moni, e moni, ou te fai atuia te oe, afai e le fanau se tasi i le vai ma le Agaga, e le mafai ona sao o ia i le malo o le Atua.” (Ioane 3:3–5.)

E tatau ona “toe fanau” le tagata pe afai e manao e faaatoatoaina, ina ia mafai ai ona vaai pe ulufale atu foi i le malo o le Atua. Ma e faapefea ona toe fanau le tagata? O le fesili lava lenei e tasi na fesili ai Enosa. Ma tou te manatua le tali na aumai: “Ona o lou faatuatua ia Keriso, o Lē ua e faatoa faalogoina ma iloa. E mavae tausaga e tele a o lei faailoa mai o ia i le tino, o lenei, alu ia, ua e ola i lou faatuatua.” [Enosa 1:8.]

Sa ma nofonofo ma Uso Marion G. Romney i le ofisa i se tasi aso, ae sau se taulealea i totonu. O loo sauniuni o ia e alu i se misiona, ma sa faatalanoaina o ia i le faiga masani ma sa ia faaalia ma ta’uta’u mai ni ana solitulafono patino a’o laitiiti. Ae na ia fai mai ia te i ma’ua, “E le faamalieina lava a’u i le na o le ta’uta’u atu. E mafai faapefea ona ou iloa ua faamagaloina a’u?” I se isi faaupuga, “Ou te iloa faapefea ua toe fanauina a’u?” Na ia lagona e le mafai ona alu i se misiona i le tulaga o loo i ai nei o ia.

A o matou talanoa, sa saunoa atu Uso Romney: “Atalii, o e manatua le saunoaga a le Tupu o Peniamina? Sa ia aoao atu i nisi ‘sa tuia o latou loto ona o o latou lava tuinanau, ua le tusa i latou ma le efuefu o le eleele. Ua alalaga i latou uma ma le leo e tasi, ua faapea atu: Auē, ia alofa ma faaaoga le toto o Keriso ina ia matou maua le faamagaloina o a matou agasala, ma ia faamamaina o matou loto; auā ua matou faatuatua ia Iesu Keriso, le Alo o le Atua, o Lē na faia le lagi ma le lalolagi, atoa mamea uma, o Lē foi e afio mai i le fanauga a tagata. Ma ua oo ina ua uma ona latou fai atu nei upu, ua oo mai le Agaga o leAtua ia te i latou, ma ua faatumuina i latou i le olioli, ona ua maua le faamagaloina o a latou agasala, ma ua filemu i o latou loto fuatiaifo ona o lo latou faatuatua tele ia Iesu Keriso. … ’”(Mosaea 4:2–3.)

Sa saunoa atu Uso Romney ia te ia, “Lo’u atalii e, ia e faatali-tali ma tatalo seia iu ina e maua le filemu o lou mafaufau ona o lou faatuatua i le togiola a Iesu Keriso, ona e iloa lea ua faamagaloina au agasala.” Se’i vagana lena tulaga, e faapei ona faamatala mai e Elder Romney, e soo se tasi lava o i tatou e manaomia lea tulaga, ma o loo tatou feofeoa’i i se puaoa sei vagana ua tatou maua lena toe fanaufouina. …

E le mafai ona e maua se olaga faa-Keriso … e aunoa ma le toe fanaufouina. O le a le fiafia lava se tasi i le afioaga o Lē Paia o Isaraelu e aunoa pe a lē faamamaina ma faaatoatoa. …

E faapefea ona fesoasoani lo tatou ola ai i poloaiga i le faaatoatoaina o i tatou?

Ma le mea taua lona tolu: ia fesoasoani i le tagata suesue ia iloa le talalelei e ala i le ola ai i le talalelei. O le mautinoa faaleagaga e tatau ai mo le faaolataga, e tatau ona anoanoai ni taumafaiga a le tagata e mua’i faia. O le alofa tunoa, po o le mea foaifua mai o le mana o le togiola a le Alii, e tatau foi ona mua’i galue i ai le tagata. E toe faamanatu atu le saunoaga a Nifae, “O le alofa tunoa. … ua faaolaina ai i tatou, pe a uma ona faia mea uma tatou te mafaia.” [2 Nifae 25:23.] …

… O lea, o se tasi [lenei] o mea taua pe afai e te manao e ola i se olaga e faaatoatoaina. E tatau i le tagata ona “tonu i lona mafaufau” e ola ai i poloaiga.

Sa taliina e le Matai se fesili a tagata Iutaia pe faapefea ona latou talitonu o Lana misiona e mai le Atua pe ua na o Ia foi o se isi tagata soifua. Na Ia fetalai: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.” (Ioane 7:17.)

E lē mafai ona oo mai le molimau o le upumoni i le tagata e lē mama lona loto. E lē mafai ona afio faatasi le Agaga o le Alii ma mea eleelea i se tagata. “Ua noatia a’u le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga.” (MFF 82:10.) “ … E le mafai ona e maua lenei mamalu, sei iloga e te usitai i la’u tulafono.” (MFF 132:21.) O loo saga ta’u mai pea lava pea lena mea moni i tusitusiga paia.

O mataupu faavae ma sauniga uma o le talalelei ua na o ni valaaulia i le aoaoina o le talalelei e ala i le faataunuuina o ona aoaoga. E leai se tagata na te iloa le mataupu faavae o le sefuluai sei vagana ua na totogiina le sefuluai. E leai se tagata na te iloa le mataupu faavae o le Upu o le Poto sei vagana ua ia tausia le Upu o le Poto. O lena mataupu, e le mafai e fanau iti, po o tagata matutua foi ona talitonu i le sefuluai, o le Upu o le Poto, tausia o le paia o le aso Sapati, po o le tatalo e ala lea i le faalogo atu i se tasi o talanoa e uiga i nei mataupu faavae. Tatou te aoao ma iloa le talalelei i le ola ai. …

Sei ou fai atu i le aotelega: Tatou te lē iloa moni lava se mea e uiga i aoaoga o le talalelei sei vagana ua tatou oo i faamanuiaga e maua mai le ola ai i mataupu faavae taitasi. Na fai mai se tasi tagata, “O aoaoga lava latou o le ola mama, ua na o se mea noa i le agaga sei vagana ua lagolagoina i faatinoga.” O le aupito taua o tulafono uma i le talalelei ia te oe ma au, o le poloaiga faapi-toa lea ua manaomia ai e i tatou taitoatasi se iloiloga faamaoni ina ia usita’ia. E tatau ona tofu suesue ifo e le tagata lava ia le tulaga o loo ia manaomia ma amata nei loa ona faatoilalo, aua seiloga ua tatou manumalo ona tatou maua lea o se nofoaga i le malo o le Tama.²

E avea faapefea Faaamuia “ma faavae mo se olaga faaatoatoaina”?

E te fia manao e iloa “laasaga” e mafai ai e se tagata ona faatu-laga lona olaga i lena tulaga faaatoatoaina e avea ai ma tagatanuu agavaa po o se “tagata paia” i le malo o le Atua. E mafai ona maua le tali aupito sili i se suesuega o le soifuaga o Iesu i tusitusiga paia. … E le’i na ona afio mai Keriso i le lalolagi ina ia faia se togiola mo agasala a tagata, ae ia tuuina mai i le lalolagi se faa-taitaiga o le tulaga o le faaatoatoaina o tulafono a le Atua ma le usiusitai i le Tama. I lana Lauga i luga o le Mauga, sa tuuina mai ai e le Matai se faaaliga o ona lava uiga, o se tulaga atoatoa lelei, … ma o lea na tatou maua mai ai se ata faataatia mo o tatou lava olaga. …

I lena Lauga e lē mafaatusalia i luga o le Mauga, sa tuuina mai ai e Iesu ia i tatou ni auala eseese se valu e mafai ai ona tatou maua le … olioli. O ana tautinoga taitasi o loo amata i le upu “Amuia.”… O nei tautinoga a le Matai ua lauiloa i tusitusiga a le lalolagi Kerisiano o Faaamuia. … Ua faatino mai ai le faavae o se olaga lelei atoatoa.

Se’i o tatou mafaufau lava i ai mo sina taimi. O le fa [o ia Faaamuia] e faasino i o tatou tagata taitoatasi, o le ola ai o tatou tagata i totonu, o o tatou lava olaga taitoatasi, pe afai tatou te atoatoa ma maua faamanauiaga o lena olioli i totonu.

Amuia e loto maulalo.

Amuia i latou o e faanoanoa.

Amuia i latou o e fia aai ma fia inu i le amiotonu.

Amuia e loto mama. [Tagai Mataio 5:3–4, 6, 8.]

O le loto maulalo

O le loto maulalo o le lagoaina lea e outou lava e manaomia le faaleagaga, e faalagolago i le Alii mo o outou lavalava, o au meaai ma le ea o loo e manavaina, o lou soifua maloloina, o lou ola; e te iloa lelei e le tatau ona alu se aso e aunoa ma se tatalo faamaoni o le faafetai, mo le taitaiga ma le faamagaloina ma mo le malosi e manaomia mo le aso. Afai e iloa e se talavou lona tulaga manaomia faaleagaga, ma afai e oo i se nofoaga mata’utia e lamatia ai lona ola, e mafai ona tosina atu o ia i le punavai o le upumoni ma uunaia o ia e le Agaga o le Alii i le taimi o lona puapuaga tele. O se tulaga e faanoanoa ai se tasi, ona o le tamaoaiga po o tulaga faaleaoaoga po o le lalolagi foi, pe a mafaufau faapea na te le manaomia lenei tulaga faaleagaga. [O le loto maulalo] o le faafeagai lea o le faamaualuga po o le manatu faasausili ia te oe lava. … Afai e te lagonaina i lou lotomaualalo le tulaga e te manaomia faaleagaga, o lona uiga ua saunia oe mo le taliaina i le “Ekalesia a le Ulumatua, ma avea ai ma le au filifili a le Atua.” [Tagai MFF 76:54; 84:34.]

O le faanoanoa

O le faanoanoa, e pei ona aoaoina i le lesona lea a le Matai, e tatau i le tagata ona faaalia lena “tiga e tusa i le Atua e tupu ai le salamo” ma maua ai e le tagata ua salamoas se faamagaloga o agasala lē toe faatagaina ona toe foi i amioga ua ia faanoanoa ai. [Tagai 2 Korinito 7:10.] O le vaai lea, e faapei foi ona vaaia e Paulo, le “mitamita i puapuaga…: ina ua tatou iloa o le pua-puaga e tupu ai le onosai; o le onosai e tupu ai le mautinoa; o le mautinoa foi e tupu ai le faamoemoe.” (Roma 5:3–4.) E tatau ona e naunau e “fesui i a outou avega, ina ia mama ia.” E tatau ona outou naunau e faanoanoa faatasi ma ē faanoanoa ma faamafa-nafana ia i latou e manaomia le faamafanafanaga. (Mosaea 18:8–9.) Afai e faanoanoa se tina na o ia ona o le toe foi mai o sana tama teine faalogogata, o oe lena e alofa e lē tatau ona e faa-tagaina se tasi e lua’i faia se faitioga. … O lou faanoanoa faatasi ma ē ua afu le soifua, o le fafine ua oti lana tane ma le tamaitiiti matuaoti, e tatau ona taitai atu ai oe e aumaia le fesoasoani o loo latou manaomia. A faaupuina, e tatau ona avea oe e faapei o le telona ae lē o le Faresaio. “Le Atua e, ia e alofa mai ia te au le tagata agasala.” [Tagai Luka 18:10–13.] O lou taui mo le faia [o lenei] o le olioli sili lea i le faamafanafanaina o lou lava agaga e ala i le faamagaloina o au agasala.

O le fia aai ma fia inu

Pe i ai ea se taimi ua e fia ‘ai ai i se meaai pe fia inu foi i se vai ae na o se pa’u falaoa mafu pe na o sina miti o se vai mafanafana e tau faate’a ai lagona tiga o loo mamafa ia e oe, ae na foliga mai o ni mea aupito taugata [lena fasi falaoa po o sinā vai] nai lo mea uma o ia te oe? Afai la na e matuā fia ‘ai, ona mafai lea ona e amata malamalama i le uiga o le fetalaiga a le Matai e tatau ona tatou fia aai ma fia inu i le amiotonu. O le tulaga lena o le fia aai ma le fia inu e taitai ese atu ai i latou mai o latou fale ina ia saili e faaaumea ma le au paia i sauniga āfua ai ona tapuai i le Aso o le Alii i soo se mea tatou te i ai. O le mea foi lena e uunaia ai le tatalo faatauanau ma taitai atu ai o tatou vae i malumalu paia ma uunaia ai i tatou ina ia faaaloalo iina. O le tagata na te tausisia le paia o le Aso Sapati o le a sili atu ona faatumulia i le olioli tumau e manaomia nai lo fiafiaga e lē tumau e maua mai gaoioiga e tau ina faamalie ai le loto ae lē ogatasi ma poloaiga a le Atua. Afai e te ole atu ma “le loto faamaoni, ma le manatu tonu i ai, male faatuatua ia Keriso, na te faaalia le … tonu … ia te outou, i le mana o le Agaga Paia,” ma o lona mana foi “tou te iloa ai le tonu i mea uma lava.” (Moronae 10:4–5.) …

Ina ia loto mama

Afai e te fia manao e vaai i le Atua, e tatau ona e mama atoatoa. … E i ai nisi sa mafuta ma Iesu, sa latou vaai ia te ia ua na o se atalii o Iosefa le kamuta. O nisi sa latou manatu o se tagata inu uaina po o se tagata ‘onā ona o ana upu. O isi foi sa mafaufau ua uluitinoina o ia e agaga leaga. Ua na o tagata amiotonu lava na vaai ia te ia o le Alo o le Atua. Seiloga lava e mama lou loto ona mafai lea ona e vaai i le Atua, ma i se isi tulaga e itiiti ifo i lo lena, e mafai ona e vaai i le “Atua” po o le lelei i se tagata ma alofa ia te ia ona o le lelei o loo e vaaia ia te ia. Ia maitau lelei lena tagata e faitio ma upuleaga i le tagata o le Atua po o taitai faauuina a le Alii i lana Ekalesia. O se tagata faapena e tautala mai i se loto e lē mama.

Ae ina ia mafai ona ulufale atu i le Malo o le Lagi, e le gata ina tatau ona tatou lelei ae e manaomia foi lo tatou faia o mea lelei ma ia tatou lelei foi mo se faamoemoega. O le mea lea, afai e te manao e savali i aso taitasi i lena sini o le faaatoatoaina ma le atoaga o le olaga, e tatau ona aoaoina oe i “mataupu” e fa o loo totoe o le Faavae a le Matai mo se olaga faaatoatoaina. O faaamuia nei e faasino i fegalegaleaiga a le tagata ma isi:

Amuia e agamalu.

Amuia e alolofa atu.

Amuia e faatupuina le filemu.

Amuia e sauaina. [Tagai Mataio 5:5, 7, 9–10.]

O le agamalu

O se tagata agamalu ua faauigaina o se tasi e lē itaitagofie e lē tauimasui pe a faamanu’alia pe faaita foi. O le agamalu e lē tutusa ma le vaivai. O le tagata agamalu o le tagata malosi, o le tagata maoae, o le tagata e loto pulea a’ia’i. O ia o le tagata e i ai le loto-tele i ona talitonuga, tusa lava pe tauanau malosi e lana vaega po o le kalapu. I se feeseeseaiga, o lana faamasinoga o le faaiuga mulimuli lea i se mataupu, ma o lana faaiuga manino e faamalieina ai le valelea o tagata vevesi. O ia o se tagata lotomaualalo; e lē avaavau. “E sili ona lelei le ua gesegese i le ita i lē ua malosi.” (Faataoto 16:32.) O ia moni lava o se taitai ma e filifilia e le fita-fita ma le fuavaa, o pisinisi ma le ekalesia e avea ma taitai ina ia mulimuli i ai isi tagata. O ia o le “masima” o le lalolagi ma o le a fai foi mona tofi.

Ia alofa atu

E faalagolago lo tatou faaolataga i le alofa tatou te faaalia mo isi. O upu leaga ma le lē alofa, po o faiga faatautala i tagata po o meaola, e ui lava ina foliga mai o se mea na fai ona o se mea na manu’a ai, e lē agavaa ai lea tagata mo le alofa pe a ia manaomia le alofa mutimutivale i le aso o le faamasinoga i luma o le au faamasino i le lalolagi po o le lagi foi. E i ai se tasi e le’i faamanu’- alia i se tuua’iga sese a se tasi namanatu o sana uo? E te manatua lau tauiviga ina ia aloese mai le faasalaga? Amuia i latou uma e alolofa atu aua e alofaina mai i latou!

O le avea ma faatupu filemu

O e faatupu le filemu e ta’ua i latou o atalii o le Atua. O le faatupu faalavelave, o lē e tetee i tulafono ma poloaiga, o le taitai o tagata faatupu vevesi, o e solitulafono, e uuna’ia i faamoemoega leaga ma sei vagana ua latou aloese mai ai o le a ta’ua i latou o fanau a Satani ae le o ni fanau a le Atua. Ia taofia outou lava mai lē o le a faatupuina le fememea’i e ala lea i le ta’ufaatauvaaina o mea paia auā ua lē sailia e ia le filemu ae ua faasalalauina le fenumia’i. O lē e faamisa pe faafitauli, ma o mea e finau ai e mo nisi faamoemoega e ese mai le faia o le mea moni, ua ia solia se mataupu faavae taua ua uma ona faataatia e le Matai o se mea taua mo le fausiaiina o se ola e tumu i le tamaoaiga. “O le manuia i le lalolagi ma le finagalo alofa i tagata” o le pese lea a le agelu na tuvaoina mai le soifua mai o le Pelenise o le Filemu. [Tagai Luka 2:14.] …

O le sauaina ona o le amiotonu

O le sauaina ona o le amiotonu ona o se mafuaaga tele ua lamatia ai le upumoni ma le amioatua ma le mamalu, o se tulaga faale-atua ia. Sa masani ona i ai tagata e tagatavaleina ona o mafuaaga lelei uma. O le faatama’iga tele e ono oo mai sauaga, e lē mai le sauaga lava ia ae e mai le aafiaga e ono oo i ai ē na faasauaina ma atonu o le a faalotovaiaiina ai lo latou naunau mo le amiotonu. O le tele lava o na sauaga e mafua mai i le lē lava o le malamalama, auā e ‘augofie tagata e tetee i mea latou te lē malamalama ai. O se isi vaega e mafua mai i tagata e faamoemoe i mea leaga. Ae pe o le a lava le mafuaaga, e foliga mai ua matuā faasoloatoa sauaga e faasaga ia i latou o loo punoua’i i se mafuaaga amiotonu ma o lea ua lapata’ia ai i tatou e le Matai e faapea, “Oi talofa ia te outou pe a tautala lelei tagata uma ia tte outou! auā sa faapea lava ona fai e o latou tamā i perofeta pepelo.” (Luka 6:26.)

… Ia manatua lena lapataiga pe a tauemuina ma amusia oe ona o lou musu e suia ou tulaga faatonuina o le lē inu ava oona, ti ma le kofe, o lou faamaoni ma le ola mama, ina ia patipati fiafia mai i ai tagata. Afai e te tu mausali mo le mea sa’o tusa lava pe tauemu mai tagata, pe sauaina foi oe i la le tino, o le a faapaleina lava oe i faamanuiaga o le olioli lea e faavavau. Atonu foi o le a toe tulai mai i ona po nei, o nisi o le au paia e oo lava i aposetolo, e faapei o aso ua mavae, o le a manaomia ai le tuuina atu o o latou ola mo le puipuiga o le upumoni? Afai e oo mai lena taimi, o le a lē tuuina e le Atua ia latou toilalo!

A o tatou manatunatu loloto ma le agaga tatalo i nei aoaoga uma, o le a tatou iloa ai ma le maofa, o nei mea uma, o le fua faa-tatau a le Atua i lo tatou taua i lona malo e lē o tulaga maualuluga ua tatou umia i le olaga nei i faapotopotoga po o lana Ekalesia, e lē o mamalu foi na tatou manumalo ai, ae o olaga na tatou ola ai ma mea lelei sa tatou faia, e tusa ai ma le “Faavae mo se Olaga Faaatoatoaina” lea na faaalia i le soifuaga o le Alo o le Atua.

Talosia ia outou avea ia Faaamuia ma Faavae o outou lava olaga ma ia outou maua ai faamanuiaga o loo folafola mai ai.³

Fautuaga mo Suesuega ma Talanoaga

E mafai faapefea ona tatou aoao i aso taitasi mai le “tusi lesona sili” o le soifuaga o Keriso?
A o tatou taumafai e avea e faapei o Keriso, aisea e taua ai ona tatou fesili soo ifo ia i tatou lava pe o a mea o tatou vaivai ai?
O a mea na e oo i ai ua fesoasoani e te malamalama ai, tatou te iloa aoaoga o le talalelei i lo tatou ola ai lea?
Pe a tatou iloa o loo tatou faalagolago i le Alii mo faamanuiaga uma i o tatou olaga, e aafia faapefea ai o tatou uiga faaalia ma a tatou amioga?
O a ni uiga o le saunoaga lea, “Amuia i latou e faanoanoa”?
E mafai faapefea i lo tatou fiafia i mea o le lalolagi ona faamuta lo tatou fia aai ma le fia inu i mea faaleagaga?
E fesoasoani faapefea le loto mama ia tatou iloa mea lelei i isi tagata?
E fesoasoani faapefea le agamalu ia tatou malolosi?
O a ni auala tatou te faaalia ai lo tatou alolofa i isi i aso taitasi o lo tatou ola?

O le Lauga i luga o le Mauga, na tuuina mai ai e le Faaola ia te i tatou le “faavae mo se olaga faaatoatoaina.”