Mataupu 4

O Muai Mataupu Faavae ma Sauniga o le Talalelei

E mafai faapefea ona tatou saga ola faamaoni i le usiusitai i muai mataupu faavae ma sauniga o le talalelei ma tumau ai e oo i le iuga?

Faatomuaga

O le mama atoatoa ma paia i le olaga ma uiga, o le faanaunauga lea o tagata faamaoni o le Au Paia o Aso e Gata Ai. Sa aoao mai e Peresitene Harold B. Lee, o le ala i le faamamaina ma le faapaiaina o le taliaina lea o muai mataupu faavae e fa, ma sauniga o le Talalelei—faatuatua i le Alii o Iesu Keriso, salamo, papatisoga, ma le mauaina o le meaalofa o le Agaga Paia—ona tumau lea seia oo i le iuga i le tausia o poloaiga uma a le Atua. Na ia faapea mai:

“O tulafono a le Atua ua aumaia i tagata o loo aafia i totonu o le fuafuaga o le talalelei, ma ua i ai i le Ekalesia a Iesu Keriso le matafaioi mo le aoaoina o nei tulafono le lalolagi. E tasi lava le faamoemoega natuuina mai ai e le Tama Faalelagi, o oe lena ua pulea e le tulafono e faasaoina foi e le tulafono ma faaatoatoaina ma faamamaina ai, po o le faapaiaina ai foi (Tagai MFF 88:34). O le meaalofa sili o meaalofa uma ua tuuina mai e le Atua ia i tatou, o le meaalofa lea o le faaolataga i Lona malo.”¹

Sa Ia aoao mai foi, “O le malamalama i le Atua ma Iesu, Lona Alo, e matua manaomia lea mo le ola e faavavau, ae o le tausia o poloaiga a le Atua e tatau ona muamua i le mauaina o lena malamalama poo le atamai.”²

O lenei mataupu o le a talanoaina ai pe faapefea e muai mataupu faavae muamua e fa ma sauniga o le talalelei, ma le tumau seia oo i le iuga i le amiotonu ona taitaiina atu ai i tatou i le ola e faavavau.

Aoaoga a Harold B. Lee

O le a le faatuatua, ma pe faapefea ona faatonutonuina a tatou taumafaiga ina ia maua le ola e faavavau?

O le faatatauina o le faatuatua i le talitonuga faalelotu, o lona mataupu faavae autu lea ma o le puna moni lea o le amiotonu uma e taitaiina ai le tagata i ana taumafaiga ia maua le ola e faavavau i le lalolagi a sau. E totonugalemu i le Atua, o ia lea e ala i le faatuatua ua lauiloa o le puna lea o mana uma, ma le poto uma i le vanimonimo, ma o ia o le Malamalama faatonutonu i “mea uma ua vaaia poo le le vaaia foi e faailoa mai ai lona poto.” O lona uiga, e ala foi i le faatuatua i le Atua, e mafai ai foi … e oe, ona felata’i ma Lē soifua pea lava, ma o le mana ma le poto e te maua mai i lou Tama Faalelagi e faaaoga ai mana o le vanimonimo e fesoasoani ai ia te oe i le itula e manaomia ai fofo o faafitauli ua lē gafatia ona foia e lou malosi po o lou atamai faaletagata soifua.

E faapefea ona [tatou] atinaeina lea faatuatua? O le tali e ala leai i le suesue, e ala i le galue ma le tatalo. Sa fesili le Aposetolo o Paulo, “Pe faapefea ona tatou faatuatua i le ua latou le faalogo atu i ai? Ma pe faapefea foi ona latou faalogo atu pe a leai se talai atu? (Roma 10:14) E tatau ona tatou tali atu, latou te le mafai. E faatoa maua lava la le faatuatua e ala i le faalogo i le upu a le Atua mai i e talaiina le upumoni. O le talaiina o le upumoni e uiga i le Atua ma ona faamoemoega ua faatusaina lea i se fatu ua luluina, ma afai o se fatu lelei o le a amata ona totogo ma tupu i o outou loto i luga o le faia o mea nei: Muamua o le totoina lea i le eleele lelei, o le eleele malu o le loto faamaoni ma le naunautai moni, o lona lua, ia tausia lea e ala i le suesue ma le maelega ma le sailiili, ma le lona tolu, ina ia faasusuina i le sau o le agaga mafanafana ma faamafanafanaina i sulu o musumusuga e ala mai i le tatalo ma le lotomaualalo. O le seleselega mai na mea na toto, e na o le tagata e galue i luga o le upumoni, ua ia aoao ma toe faatulagaina lona olaga mai le agasala, ma ua ia faatumuina ona aso i le faamoemoe lelei e tausia poloaiga a le Atua o le ua ia faatuatua i ai, ma le auaunaga i uso a tagata.³

O le faatuatua e suia ai tulafono e sefulu mai le mauga o Sinai mai le na o se faaupuga faisoo a se tagata faifilosofia e avea ma se leo faititili o le pule mai luga, ma avea ai aoaoga a le au perofeta e faaalia ai le upu a le Atua e taitaiina ai i tatou i lo tatou aiga faaselesitila. … O le faatuatua e mafai ai ona tatou malamalama soo se mea lava e ofoina atu i lenei olaga i le tulaga faatulagaina lea a Iesu, “O lenei ia atoatoa ona lelei o la outou amio e pei o lo outou Tama o i le lagi e atoatoa ona lelei o ia”[Mataio 5:48], e mo lo lava tatou lelei ma lo tatou manuia e faavavau e ui lava atonu o lena faaleleia ma le faamamaina o loo i ai ma le aoaiga matautia a se Atua poto, “Aua o le ua alofagia e le Alii, ua aoai atu o ia ia te ia, ua sasaina foi e ia atalii uma ua talia e ia.”[Eperu 12:6.]⁴

E ao ona aoaoina e fanau uma, o le faatuatua e manaomia mo le faaatoatoaga ua na o le taulagaina e mafai ona atinaeina ai, ma afai na te le aoao ia taulagaina ona manaoga ma faanaunauga [faaletino] ina ia usiusitai ai i tulafono o le Talalelei, e le mafai ona faamamaina o ia ma faapaiaina i luma o le Alii.⁵

Aisea e manaomia ai le salamo i aso taitasi?

Ina ia fuga mai le lelei, e tatau ona atinaeina ma faagaoioia pea lava pea e le aunoa, ma ina ia amiotonu ma le faamaoni lava, e manaomia ai i aso taitasi ona teuteu ma aveese mea leaga mai o tatou olaga, e ala lea i le salamo mai a tatou agasala i aso taitasi.

O a laasaga e tatau ona faia e a’e atu ai i le ala o le salamo ina ia mafai ai ona tatou agavaa e maua le faamagaloga mai le Atua, e ala i le faaolataga o le taulaga togiola a le Matai, ma avanoa o le ola e faavavau i le olaga a sau? O se Tama e ona le poto uma lava, na ia muai iloa e pauu nisi i le agasala, ma o le a latou manaomia uma le salamo, ma ua ia saunia ai i aoaoga o le talalelei ma e ala mai i lana Ekalesia le ata o le faaolataga e faamatala manino mai ai le ala sao i le salamo.

Muamua, e tatau ia i latou ua agasala ona ta’uta’u atu a latou agasala. “Tou te iloa faapea se ua salamo i ana agasala faauta, na te ta’uta’u atu ma lafoaia.”(MFF 58:43) O lena ta’uta’u atu [o agasala] e tatau ona faia muamua i lē ua sili ona ta’useseina i au amioga. O le ta’uta’u atu ma le agaga faamaoni e le na o se ioeina lea o le lagona tausalaina ina ua faailoa mai le faamaoniga. Afai ua e “faatiga faaaliali i nisi,” e tatau foi la ona aoai faaaliali oe i luma o i latou ua faatiga i ai ina ia e faailoa atu ai lou maasiasi ma lou faamaulalo ma se faanaunauga e maua mai se aoaiga e tatau ai. A fai sa faalilolilo sau amioga, ma iu ai ina manua ai oe lava ia, ae le o se isi, e tatau foi ona e tautau atu faalilolilo, o lou Tama Faalelagi foi e faafofoga i le mea lilo, na te avatu faaaliali se taui ia te oe. O amioaga e aafia ai lou tulaga i le Ekalesia, po o lau aia tatau i avanoa poo le alualu i luma i totonu o le Ekalesia e tatau ona tautau atu i le Epikopo o le ua tofia e le Alii e avea ma leoleo mamoe i le lafu ma ua tofia e avea ma faamasino o Isaraelu. E mafai ona ia faalogo atu ao tautau mai faalilolilo ma o le a ia taulimaina i se tulaga faamaoni ma le alofa, a o faagasolo nei faamasinoga. Pe a maea ona tautauina atu e tatau i se tasi ua agasala ona ia faia se faatulagana tatau i le malosi na te mafaia ina ia toefuatai ai se mea na ia aveesea, po o le toe faaleleia o le leaga na ia faia, ma lē toe foi ai e faia nei mea, e mafai ona maua e ia lena folafolaga o le faamagaloina o ana agasala, pe afai na te lei faia le agasala e lē mafamagaloina, e pei ona faailoa mai e le Perofeta o Isaia, “e ui lava e pei o ofu mumu a outou agasala, e sisina ia e pei o le kiona; e ui lava ina mumu e pei o le ie ulaula e avea e pei o fulufulu mamoe.” [Isaiah 1:18.]⁶

Tatou te ioe i lenei mea. O i tatou uma lava ua faia se mea sa le tatau ona tatou faia, po ua tatou le amanaiaina le faia o mea sa tatau ona tatou faia. O i tatou uma lava ua faia mea sese, ma e tatau foi ia i tatou uma taitoatasi ona salamo. O lena tiapolo tuai na te faatalitonu oe pe afai ua e faia se mea sese se tasi, aisea la e le faaauau ai pea le faia o mea sese? O Satani lena o loo taumafai e tau atu ia te oe e leai se avanoa e toe foi mai ai. Ae e tatau ona faasaga ae ou fofoga i le la e oso ae, ma ia liliu ese mai le mea sese na e faia e ala lea i le salamom, ma aua le toe foi i ai. Na fetalai mai le Alii, “Ina o atu ia [i o outou ala] ma aua le toe agasala, a o lē agasala (o lona uiga o le toe agasala) o le a toe foi mai ai agasala muamua, o loo faapea mai ai le Alii le Atua” (MFF 82:7).⁷

Pe afai ua outou faia ni mea sese, ia amata i le aso nei ona sui o outou olaga. Ia fulitua i le mea sese sa e faia. O le poloaiga e aupito sili ona taua a le Atua, o le poloaiga lena e tasi o loo faigata ia te oe ona tausia i le aso nei. Afai o le tasi o le le faamaoni, afai o le tasi o le le ola mama, afai o le tasi o le taufaasese, o le le tautala sa’o, o le aso lenei e te galue ai i lena mea seia iu ina mafai ona e faatoilaloina lena vaivaiga. Ia faatoilaloina lena faafitauli ona amata lea i le isi tasi lena e pito sili ona faigata ia te oe le tausiaina. O le ala lena e faapaiaina ai oe e ala i le tausiga o poloaiga a le Atua.⁸

Aisea e manaomia ai le papatisoga mo le sauniuniga e fetaiai ma le Alii?

Ina ua tatou ulu ifo i le vai o le papatisoga, sa tatou osi feagaiga ma le Alii o le a tatou faia mea uma tatou te mafaia e tausia poloaiga a le Atua, ma le malamalamaaga o le a tuuina mai e le Alii ana folafolaga ia i tatou ma o lona mamalu o le a faaopoopoina pea e faavavau, faavavau lava, ma o le a tatou faatulagaina o tatou olaga ina ia tatou auauna atu e avea ma molimau a le Atua i nofoaga uma seia oo i le oti [Tagai Mosaea 18:8–10.] O le feagaiga lena sa tatou osia ina ua tatou papatiso e avea ma tagata o le Ekalesia.⁹

O le papatisoga i le faatofuina mo le faamagaloina o agasala … e mo i latou ua oo i le tausaga e tatau ai, o se sauniuniga manaomia lea e fetaiai ai ma lo tatou Atua. O le ala lea e avea ai outou “o fanau a le Atua i le faatuatua ia Iesu Keriso. Aua o outou uma lava na papatisoina ia Keriso ua outou oofu ia Keriso,” (Kalatia 3:26–27) pe i se isi faaupuga e ala i le papatisoga ua maua le “mana e avea ai ma ataii ma afafine o le Atua.” [Tagai Mosaea 5:7.] O lenei fesootaiga e mafai ai ona outou faaaogaina mo outou lava le toto togiola o Keriso, ina ia outou maua le faamagaloina o a outou agasala, ma faamamaina o outou loto, (tagai Mosaea 4:2) Ina ia agavaa mo lenei faamagaloga pe a maea ona papatisoina, e tatau ona faamaulalo outou lava ma valaau atu i le Alii i aso taitasi ma savavali ma le punouai i le malamalama o aoaoga o le talalelei… ..

… E na o i latou ua salamo ma papatisoina mo le faamagaloina o a latou agasala e maua atoatoa le avanoa mo le toto faaola o lana togiola.¹⁰

Na papatisoina foi le Faaola e Ioane le Papatiso, e pei ona ia fetalai mai, “ina ia faataunuuina mea tonu uma.” (Mataio 3:15.) Afai ua faia ia te Ia, e faapefea i tatou? Na tau atu ia Nikotemo: “Afai e le fanau se tasi i le vai ma le Agaga, e le mafai ona sao o ia i le malo o le Atua.” (Ioane 3:5.) Sa lei tuua e le Matai se tulaga faaluafesasi i le pogai o le papatisoga na Ia aoaoina mai.

“E le sao atu i lona malo se mea ua le mama; o le mea lea e le sao atu ai se tasi i lona malologa, na o i latou o e ua faamamaina o latou ofu i lo’u toto, ona o lo latou faatuatua, ma le salamo i a latou agasala uma, ma lo latou faamaoni e oo i le gataaga.”(3 Nifae 27:19)

O le mafuaaga lea na apoapoai atu ai Peteru i e na faalogologo ia te ia, “Ina salamo ia ma ia taitasi ona papatisoina outou uma i le suafa o Iesu Keriso; mo le faamagaloina o agasala ; ona maua lea e outou o le mea foai fua mai o le Agaga Paia lea.” (Galuega 2:38.) Aua e ala i le papatisoina e se tasi ua i ai le pule, e mafai ai e lē ua papatisoina i se ala faatusatusa ona faamamaina ona ofu i le toto o le Alo o le Atua, o le na togiolaina mo agasala a i latou uma o e talia o Ia ma ui mai i le faitotoa o le lafu mamoe e ala i le papatisoina. “Ae peitai afai latou te le salamo,” na fetalai manino mai le Faaola, “e ao ina latou tiga e pei o au.” (MFF 19:7.)¹¹

E faapefea ona taitaiina i tatou e le Agaga Paia i le afioaga o le Alii?

O tagata uma o le Ekalesia ua papatisoina ma faaee atu i ai lima i o latou ulu, ma faapea atu toeaina ia i latou pe a maea ona faamauina o ia e avea ma se tagata o le Ekalesia, “Talia le Agaga Paia.” Ona mafai lea e i latou ona toe faia upu na fetalai i ai le Matai i ona soo ina ua Ia fetalai atu ia te i latou e uiga i le Fesoaosani po o le Agaga Paia o le a oo mai: O le a ia faamanatu ia te outou mea uma. O le a ia aoao ia te outou i mea uma. O le a ia faailoa ia te outou mea e oo mai. [Tagai Ioane 14:26;16:13.] Ma afai o le a ou faamauina oe e avea ma tagata o le Ekalesia, ou te faamauina i ou luga le meaalofa o le Agaga Paia e avea lea ma sulu i ou vae ma taitai i ou ala, o le a ia aoao ia te oe i mea uma ma faamanatu ia te oe i mea uma, ma faailoa ia te oe mea uma o le a oo mai.¹²

Sa fetalai mai le Alii: “O lau talalelei foi lenei, o le salamo ma le papatisoga i le vai, ona oo mai ai lea o le papatisoga i le afi ma le Agaga Paia, o le Fesoasoani lea, o le a faailoaina atu mea uma, ma aoao atu mataupu tau i le filemu o le malo.” (MFF 39:6.)

Pe a i ai i le tagata le mea foaifua o le Agaga Paia, ua ia te ia le mea e mafai ai ona faailoa atu ia te ia mataupu faavae uma ma sauniga o le faaolataga lea e faatatau i tagata o i le fogaeleele.¹³

O se manatu fetaui lelei lo tatou faapea ane pe a papatisoina se tasi i le vai ma maua faamanuiaga o le Agaga e ala i le faaee atu o lima, o ia o se tagata ua toe fanaufouina. O se toe fanaufouina ona ua toe aumaia o ia mai le oti faaleagaga i le mafutaga ma se tasi o le Aiga Atua, o le Agaga Paia lea. O le ala lea matou te faapea atu ai ia te outou pe a faamauina outou “Talia le Agaga Paia”. O lena meaalofa e tuuina atu lea i le ua talitonu ma ua faatuatua ma ua ola i le tulaga na te mauaina ai lena faamanuiaga, o le aia tatau e fesootai ai ma se tasi o le Aiga Atua ina ia faatoilaloina ai lenei oti faaleagaga.¹⁴

O le papatisoga i le faatofuina o le faatusa lea oti ma le tanumia o le tagata o le agasala, ma o le toe tulai mai le vai o le faatusa lea o le toetu mai o se tagata ua faafouina i le ola faaleagaga. A maea le papatisoga ona faaee atu lea o lima i luga o le ulu o le tagata faatuatua ua papatisoina, ma ua faamanuiaina ia maua le Agaga Paia. Ma afai e maua e le ua paptisoina le folafolaga poo le meaalofa o le Agaga Paia, poo le avanoa e toe aumaia ai o ia i le mafutaga ma se tasi o le Aiga Atua, e ala i le usiusitai ma lona faatuatua, o le ua faamanuiaina o le a ia maua le taitaiga ma le faasino ala o le Agaga Paia i ana talanoaga ma savaliga i aso faisoo e pei lava o Atamu sa savavali ma fetautalatalaai ma le Atua lona Tama Faalelagi i le Faatoaga o Etena. Ina ia mauaina lenei taitaiga ma lenei faasino ala mai le Agaga Paia, e tatau ona toe fanauina faaleagaga.¹⁵

I mataupu faavae o le talalelei – faatuatua, salamo, papatisoga, ma le mauaina o le meaaofa o le Agaga Paia, o le mana lea e mafai ai ona faaalia mai mea uma, o le a amata ai ona tatou malamalama e uiga i se tasi o taimi na faapea mai ai le Perofeta o Iosefa Samita ina ua fesiligia o ia pe aisea lava ua ese ai lenei Ekalesia mai isi ekalesia uma—-aua o loo ia te i matou le Agaga Paia. [Tagai Talafaasolopito o le Ekalesia, 4:42.] O le mauaina o lea mana e mafai ai ona faaalia mea uma, ma ona o lena, na mafai ai ona faatuina le atoatoaga o le Talalelei a Iesu Keriso.¹⁶

E mafai faapefea ona tatou tumau e oo i le iuga?

O a tulafono ma le ala e mafai ai ona tatou mauaina [le faamanuiaga o le mamalu faaselesitila]? O lenei, ua ia i tatou muai mataupu faavae ma sauniga o le Talalelei, faatuatua, salamo, papatisoga, ma le Agaga Paia, ma i le Malo o le Atua, o loo i ai tulafono e aoaoina mai ai le ala e tau atu i le atoatoaga. O soo se tagata lava o le Ekalesia o loo aoaoina e ola ma le atoatoa i tulafono taitasi o i lena malo, o loo ia aoaoina le auala e mafai ai ona faaatoatoaina o ia. E leai se tasi o le Ekalesia e le mafai ona ola i le tulafono, o tulafono uma o le talalelei ma le atoatoa. E mafai e i tatou uma ona aoao e talanoa ma le Atua i le tatalo. E mafai e i tatou uma ona aoao e tausia ma le atoatoa le tulafono o le Upu o le Poto. E mafai e i tatou uma ona aoao e tausia ma le atoatoa le faapaiaina o le Sapati. O outou uma lava e mafai ona aoao e tausia le tulafono o le anapogi ma le atoatoa. Ua tatou iloa tausi le tulafono o le legavia ma le atoatoa, ua ia i tatou i luga o le auala e tau atu i le faaatoatoaga.¹⁷

E mafai ona e fesili mai ia te au, e faapefea ona faapaiaina e se tasi o ia lava, ma avea o ia ma tagata paia ina ia saunia o ia e savali atu i le afioaga o le Alii? … Sa fetalai mai le Alii, “O lenei foi, e moni ou te fai atu ia te outou o le mea e pulea e le tulafono e faasaoina foi e le tulafono ma faatoatoaina ma faapaiaina ai lava.” (MFF 88:34). O a tulafono? O tulafono a le Alii o loo i le Talalelei a Iesu Keriso o le tausia o ia tulafono ma sauniga o ala ia e faamamaina, ma faapaiaina ai i tatou. O le tausia o tulafono uma na tuuina mai e le Alii ia te i tatou o se tasi lea o laasaga e sosoo ma le mauaina o le aia tatau e ulufale atu ai i se aso i le afioaga o le Alii.

Ua ia tuuina mai ia i tatou i se isi faaaliga le auala e mafai ai ona saunia i tatou lava a o faagasolo le tausaga. “E moni ua faapea mai le Alii. O le a oo i tagata taitoatasi o lē lafoai ana agasala ma sau ia te au, ma valaau mai i lo’u igoa, ma uisiusitai i lo’u leo, ma tausi mai i au poloaiga, o le a vaai i o’u mata ma iloa o loo i ai au.” (MFF 93:1). E faigofie, a ea? Ae toe faalogo foi … Pau o le mea e tatau ona e faia o le lafoai lea o au agasala, sau ia te Ia, valaau mai i Lona suafa, usiusitai i Lona siufofoga ma tausia Ana poloaiga, ona e vaai ai lea i Ona fofoga ma iloa o loo i ai o Ia.¹⁸

O le galuega lenei a le Alii ma pe a ia tuuina mai se poloaiga i le fanauga a tagata, na te saunia le ala e mafai ai ona faataunuuina lena poloaiga. Afai e faia e ana fanau mea uma latou te mafaia e fesoasoani ia i latou lava, o le a faamanuiaina e le Alii a latou taumafaiga.

… E finagalo le Alii ina ia tatou faia mea uma tatou te mafaia e faasaoina ai i tatou lava, ma … pe a maea ona tatou faia mea uma tatou te mafaia e faasaoina ai i tatou lava, ona mafai lea ona tatou faalagolago i le alofa tunoa o lo tatou Tama Faalelagi. Na ia auina mai lona Alo, ma e ala i le usiusitai i tulafono ma sauniga o le talalelei e ono maua ai e i tatou lo tatou faaolataga, ae le mafai, seiloga lava ua tatou faia mea uma lava tatou te mafaia mo i tatou lava ia.¹⁹

Ua tuuina mai e le Alii ia te i tatou, e tofu le tagata ma lana lamepa e tauaveina, ae faalagolago le i ai po o le leai foi o suauu i a tatou lamepa ia i tatou lava. Pe tatou te tausia poloaiga pe leai ma saunia suauu manaomia e faamalamalama ai lo tatou ala ma taialaina ai i tatou, e faalagolago lea ia i tatou taitoatasi. E le mafai ona tatou faalagolago i lo tatou avea ai ma tagata o le Ekalesia, po o so tatou gafa sili’ilagi [e aumai ai ni suauu mo a tatou lamepa]. Pe i ai pe leai foi ni suauu o a tatou lamepa, ou te toe fai atu foi, e faalagolago lava lea i tagata taitoatasi; e fuafua i lo tatou faamaoni e tausia poloaiga a le Atua Soifua.²⁰

O mataupu faavae uma o le talalelei ma sauniga uma o le talalelei, o ni valaaulia ia i le aoaoina o le talalelei e ala i le ola ai i ana aoaoga. Ona pau lava lena—o valaaulia ina ia o mai ma ola ai ina ia mafai ai ona outou iloa. … E foliga mai ua manino ia te au, e mafai foi ona tatou faapea, tatou te le matua iloa lelei ni aoaoga o le talalelei sei vagana lava ua tatou faatinoina e ala i le ola ai ma tausia. I se isi la faaupuga, tatou te aoaoina le talalelei, e ala i le ola ai.²¹

O le savali aupito sili e mafai e se tasi i lenei tulaga ona tuuina atu i tagata o le Ekalesia, o le tausia lea o poloaiga a le Atua, aua o iina o loo i ai le saogalemu o le Ekalesia ma le saogalemu o tagata taitoatasi. Tausi poloaiga. E leai se isi mea e mafai ona ou fai atu ai e fai ma savali aupito sili ona mamana pe taua foi i le aso.²²

Fautuaga mo Suesuega ma Talanoaga

E faapefea ona tatou atinae le faatuatua sili atu i le Alii o Iesu Keriso? E faapefea ona fesoasoani mai le faatuatua ia i tatou ia ola i poloaiga, nai lo le manatu mama i ai? O anafea na mafai ai e lou faatuatua i le Atua ona fesoasoani ina ia mafai ona e taulimaina “faafitauli sili atu nai lo lou malosi po o le atamai faaletagata?
Aisea e taua ai le ta’uta’u atu [o sese po o agasala] i le faagasologa o le salamo? Aisea e tatau ai ona tatou amata nei ona salamo mai a tatou agasala ma suia o tatou olaga, nai lo o le faatalitali mo se isi aso.
E faapefea ona faamamaina o [tatou] ofu i le toto o le Alo o le Atua i se ala faatusatusa?
E tusa ma le saunoaga a Peresitene Lee e mafai faapefea e le mauaina o le meaalofa o le Agaga Paia ona fesoasoani ia i tatou e faatoilaloina le oti faaleagaga? O le a se mea e mafai ona tatou faia ina ia faaatoatoaina ai lo tatou maua o taitaiga a le Agaga Paia i a tatou “savaliga ma talanoaga i aso taitasi?”
O le a se mea o loo aoaoina mai e le MFF 93:1 e uiga i le taua o le tumau i le tausiga o poloaiga seia oo i le iuga?
E faapefea ona avea le ola i se mataupu patino o le talalelei e fesoasoani ai ia te oe ia iloa ai le moni?