Mataupu 1

O le Ala i le Ola e Faavavau

E faapefea ona tatou ausia la tatou sini autu—o le toe foi atu lea i le Atua, o le na aumaia le ola ia i tatou?

Faatomuaga

Ilana auaunaga atoa, na faamamafaina mai ai e Peresitene Harold B. Lee o le faamoemoega autu o le talalelei a Iesu Keriso ia mafai ona tatou toe foi atu i le afioaga o lo tatou Tama Faalelagi. Na masani ona ia aoao mai le taua o le savavali ma le faatuatua seia oo ina tatou taunuu i la tatou sini faalelagi.

Sa fetaui tonu lava le auaunaga a Peresitene Lee ma le vaitaimi o le amataliaina o sailiiliga i le vateatea i le vaitau o le 1960 ma le amataga o le vaitau o le 1970. I se faalavelave na tupu i le 1970 na faamalosia ai le auvaa o le vaa o le vateatea o le Apolo 13 e toe vave foi mai i le laueleele mai vaega o le masina, na maofa Peresitene Lee i le malupuipuia o le taulai atu i faatonuga ma le faatinoga patino e manaomia mo le aumaia saogalemu o nei alii i le fogaeleele. Na ia faatusalia lenei mea na tupu i le faatuatua ma le usiusitai e manaomia ina ia taunuu atu ai la tatou faigamalaga mai le olaga faitino e agai atu i lo tatou aiga faalelagi. I se lauga i le konafesi aoao ia Oketopa i le 1970, na ia faaaogaina ai le tala i le vaa o le vateatea o le Apolo 13, o le Akarasi, e faaalia ai le taua o le tausisia o le ala ua fuafuaina e le Alii mo i tatou e mulimuli ai.

Sa faaauau pea ona faamamafaina i savali a Peresitene Lee o le sini autu o lenei faigamalaga i le olaga nei, o le toe foi atu lea i lo tatou Tama o i le Lagi. O nei savali e mafai ona fesoasoani ia i tatou ia iloa “o soo se mea tatou te faia i le olaga, soo se faaiuga tatou te faia, [e] fuafua faatatau lava i le atinaeina o se olaga e mafai ona faatagaina ai i tatou e ulu atu i le afioaga o le Alii lo tatou Tama Faalelagi.”¹

O lenei mataupu, o loo faataatia mai ai e Peresitene Lee le ala e mafai ai ona tatou toe foi atu ma le filemu ma le saogalemu i le afioaga o lo tatou Tama Faalelagi.

O Aoaoga a Harold B. Lee

E faapefea ona taitaiina i tatou i le saogalemu i nei taimi o faigata?

I ni nai masina talu ai, na taufai faatalitali atu ai ma le popole ma le naunautai le faitau miliona o tagata maimoa ma tagata faalogologo i le malaga matautia a le Apolo 13. E foliga mai na taufai tatalo le lalolagi atoa mo se taunuuga taua e tasi: o le taunuu saogalemu mai lea i le laueleele o alii totoa e toatolu.

Ina ua faasilasilaina mai ma le popole e se tasi o i latou se faamatalaga faateia, “Ua i ai se mea ua pa o la matou vaa!’ na saunia vave loa e le nofoaga faatonutonu i Houston i latou uma e i ai le agavaa ma le aoaoina faasaienitisi o e, i tausaga e tele, na fuafuaina ia auiliiliga uma e faatatau i lena faigamalaga.

O le saogalemu o i latou na e toatolu ua faalagolago nei i ni agavaa taua se lua: o le faamoemoe lea i le tomai ma le malamalama o le aufaigaluega i le nofoaga faatonutonu autu i Houston, ma le matua usiusitai lelei o alii o le auvaa o le Akarasi i faatonuga uma mai le aufaigaluega o e, ona o lo latou malamalama i faafitauli o le auvaa, na faaagavaa atiliina ai i latou i le mauaina o ni vaifofo taua. Na tatau ona matua sa’o atoatoa faaiuga a enisinia, semanu e faitau fia afe maila e sē ese ai le Akarasi mai le laueleele.

O lenei mea matautia na tupu e tai tutusa ma nei taimi [fesouaina] ua tatou i ai nei…E toatele o loo matatau pe a latou vaai ma faalogo i mea e faigata ona talitonuina o loo tutupu i le lalolagi atoa—o faiga masalomia faaupu fai, o taua ma fefinauaiga i soo se mea, o atugaluga o matua i le taumafai e taulimaina faafitauli faalevafealoai o loo lamatia ai le paia o le aiga, o atugaluga o le fanau ma le autalavou a o feagai ai i latou ma luitau i lo latou ola amiotonu ma lo latou ola mama.

E na o lou naunautai lava e te faalogo ma usiusitai, e pei ona sa faia e le auvaa o le Akarasi, e mafai ai ona taitaiina oe ma lou auaiga i le puipuiga aupito maualuga ma le saogalemu i le ala a le Alii lava ia. …

Mai i le mea na tupu i le Apolo 13…, o le a ou avea sina taimi e tuuina atu ai se otootoga puupuu o le fuafuaga ua matagofie lona fuafuaina e faatatau i le usiusitai lea o loo faalagolago i ai le faaolaina o agaga uma lava i lana faigamalaga i le olaga faitino e agai atu i lona taunuuga faatumutumuina—o le toe foi atu lea i lena Atua na foaiina mai ia te ia le ola. …

O a faamoemoega o le fuafuaga a lo tatou Tama Faalelagi?

O lenei fuafuaga ua iloagofie i se igoa, ma o le faamoemoega autu ua tuuina atu manino i se faasilasilaga i le Ekalesia i le amataga o lenei tisipenisione faaletalalelei.

E sili atu ma se senituri ua mavae na faailoa mai ai e le Alii:

“Ua faapea lava ona ou auina atu la’u feagaiga e faavavau i le lalolagi, e fai ma malamalama o le lalolagi ma e fai ma tagavai mo lo’u nuu, ma nuu ese e saili i ai, e avea ma avefeau mo a’u e teuteu le ala i o’u luma” (MFF 45:9.)

O lenei la fuafuaga, sa avea o se feagaiga, lea na faaalia ai se maliliega e faia i se tagata e sili atu ma le toatasi e faaaafiaina ai le sili atu i le tagata e toatasi. E tatau ona avea ma se tagavai mo e filifilia a le Alii ma mo le lalolagi atoa e manuia ai. O lona famoemoega ia taulimaina ai tulaga manaomia o tagata uma, ma saunia ai le lalolagi mo le afio faalua mai o le Alii.

O e na aofia ai i le faataatiaina o lea fuafuaga i le muai olaga i le lalolagi o agaga, o fanau agaga uma lava a lo tatou Tama Faalelagi. O a tatou tusitusiga paia aupito leva, mai lava i tusitusiga a perofeta anamua o Aperaamo ma Ieremia, o loo faamautuina ai foi o le Atua, poo Elohima, sa i ai iina; o lana Atalii Ulumatua, o Ieova; Aperaamo; Ieremia; ma isi tagata taua e toatele sa i ai foi iina.

O malamalama uma sa faatulagaina ae lei faavaeina le lalolagi, o e na avea ma agaga, sa i ai iina, e aofia ai ma le toatele o e tautaua ma le maoae o e ua faaagavaaina i latou i a latou galuega ma a latou amioga e avea ma pule ma taitai i le faataunuuina o lenei fuafuaga e faavavau. …

Na faia ma faatulagaina le lalolagi, ma mea uma o i ai, i lalo o le poloaiga a le Tama ma le taitaiga a Ieova. Sa latou “poloai” atu, “vaaia” ma “sauniuni” le fogaeleele. Na latou fono e tusa ai ma le aumaia o ituaiga uma o mea e ola i le fogaeleele ma mea uma e aofia ai le tagata, ma saunia o ia mo le faataunuuina o le fuafuaga, lea e mafai ona tatou faatusaliaina lelei i se ata faataatia o se fale, lea e mafai ona aoaoina ma faamalamalamaina ai le fanau a le Atua i mea uma e tatau ai mo le faamoemoega faalelagi o le faataunuuina lea, “i le mamalu o le Atua,” o le avanoa e mauaina ai e agaga uma “le tino ola pea ma le ola e faavavau.” O le ola e faavavau o lona uiga o le maua lea o le ola e faavavau i lena malo selesitila i le mea o loo afifio ai le Atua ma Keriso, e ala i le faia o mea uma ua poloaiina ai i tatou. (Tagai i le Aperaamo 3:25.)

O a mataupu faavae autu o le ata o le faaolataga?

Na aofia i le fuafuaga ni mataupu faavae maumaututu se tolu:

Muamua, ia maua e agaga taitasi le avanoa e filifili ai mo ia lava le “saolotoga ma le ola e faavavau” e ala i le usitaia o tulafono a le Atua poo le “faatoilaloina ma le oti” i mea faaleagaga ona o le le usiusitai. (Tagai i le 2 Nifae 2:27.)

E pito atu i le ola lava ia, o le filifiliga saoloto o le meaalofa aupito sili lea a le Atua i le tagata, ua aumaia ai le avanoa silisili mo le fanau a le Atua e alualu ai i luma i lenei tofi lona lua o le olaga faitino. O se taitai perofeta i lenei konetineta na ia faamalamalamaina lenei mea i lona atalii e pei ona sa tusiaina i se tusitusiga paia o anamua: ina ia faataunuuina ia mea, o faamoemoega e faavavau o le Alii, e tatau ona i ai le faafeagai, o se faatosinaga i le lelei i le tasi itu ae faapea foi i le leaga i le isi itu, pe o le faaupuina foi i le gagana o tusitusiga paia “o le laau lava ua faasaina e feagai ma le laau o le ola; e suamalie le tasi, ae oona le isi.” Sa faamalamalamaina atili mai e lenei tamā, “O le mea lea na foai mai ai e le Alii le Atua le faitalia i le tagata. O le mea lea e le mafai ai ona filifili le tagata, sei iloga ua faaosoina o ia, e le tasi po o le isi.” (2 Nifae 2:15-16.)

O le mataupu faavae maumaututu lona lua i lenei fuafuaga faalelagi na aofia ai le manaomia o le sauniaina o se faaola ma o lana togiola na avea ai ma o tatou Faaola le Alo sili ona pele o le Atua, o se “Tamai Mamoe na fasia talu ona faavaeina o le lalolagi” (Faaliga 13:8), e pei ona sa faaalia ia Ioane i le Motu o Patamo. Na faamalamalamaina mai [e le perofeta o Liae] ia le misiona a le Alo o le Atua o le “fautua…mo le fanauga uma a tagata; ma [o] i latou o e faatuatua ia te ia, e faaolaina i latou (2 Nifae 2:9.)

Tatou te faalogo soo mai i nisi e itiiti lo latou malamalamaaga e uiga i le mafai ona faaolaina o se tasi i le na’o le alofa tunoa lava. Ae peitai e manaomia le faamalamalamaga a se isi perofeta ina ia malamalama ai i le aoaoga faavae moni o le alofa tunoa a o ia faamatalaina i upu ‘anoa nei:

“Aua” na faapea mai ai lenei perofeta “ua matou galulue ma le maelega ina ia tusitusi e faaoleole i a matou fanau, atoa ma o matou uso, ia talitonu ia Keriso, ma ia lelei ma le Atua, aua ua matou iloa e faaolaina i tatou i le alofa tunoa pe a uma ona faia mea uma tatou te mafaia.” (2 Nifae 25:23.) E moni e faaolaina i tatou e ala lea i le toto togiola a le Faaola o le lalolagi, ae peitai e faalagolago lea i le mae’a ona faia e tagata taitasi o mea uma na te mafaia ina ia galue ai mo lona lava faaolataga.

O le mataupu faavae sili maumaututu lona tolu i le ata o le faaolataga o le sauniaina lea o le “faaolaina o tagata uma lava, pe a tausia poloaiga ma sauniga o le Talalelei” (Mataupu Faavae o le Faatuatua 3.) O nei tulafono faavae ma sauniga lea e oo mai ai le faaolataga o loo manino lona faataatiaina mai.

Muamua, o le faatuatua i le Alii o Iesu Keriso.

Lona lua, o le salamo mai agasala, o lona uiga o le liliuese mai agasala o le le usiusitai i tulafono a le Atua ma ia le toe foi atu lava i ai. Na fetalai manino mai le Alii e uiga i lenei mataupu. Na faapea mai o ia: “…ina o atu ia ma aua le toe agasala; a o lē agasala (o lona uiga o le toe foi i agasala ua ia salamo mai ai) o le a toe foi mai ai agasala muamua, o loo faapea mai ai le Alii lo outou Atua.” (MFF 82:7.)

Lona tolu, o le papatisoga i le vai ma le Agaga, ua na o le pau nei o sauniga, e pei ona sa aoaoina e le Matai ia Nikotemo, e mafai ai e se tasi ona vaai pe ulu atu i le malo o le Atua. (Ioane 3:45.)

O lenei lava aoaoga sa uunaia malosi mai e le Faaola toetu i le au paia i lenei konetineta, i se tulaga e foliga mai o lana saunoaga mulimuli i lona au soo. Na aoao atu le Matai i lana au paia faamaoni “E le sao atu i lona malo se mea ua le mama, o le mea lea e le sao atu ai se tasi i lona malologa, na o i latou o e ua faamamaina o latou ofu i lo’u toto, ona o lo latou faatuatua, ma le salamo i a latou agasala uma, ma lo latou faamaoni e oo i le gataaga.

“O le poloaiga lenei, ina salamo ia outou tuluiga uma o le lalolagi ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i o’u luma i le aso gataaga.

“E moni, e moni, ou te fai atu ia te outou, o la’u talalelei lenei…” (3 Nifae 27:19-21.)

O a faamanuiaga ua folafola mai mo i latou o e faamaoni?

Afai e usitaia e le fanau a le Atua, e aofia ai i latou uma i luga o lenei fogaeleele tusa lava poo le a le nuu, lanu poo le lotu, le valaau a le avefeau moni o le talalelei a Iesu Keriso, e pei ona sa faia e le auvaa e toatolu i luga o le Akarasi i alii tomai faapitoa i le Nofoaga Faatonutonu i le itula o le faalavelave, o le a i ai le taimi e vaai ai tagata taitasi i le Alii ma iloa o loo i ai o Ia, e pei ona folafola mai e le Alii. …

O lenei folafolaga o le mamalu o loo faatalitali mai mo i latou o e faamaoni e oo i le iuga sa faaalia manino i le faataoto a le Matai i le Atalii Faamaumau oa. I le atalii sa faamaoni ma na te le’i lafoaia lona tofi o le ulumatua, o le tamā, o lē o loo i le aoaoga a le Matai o lo tatou Tama ma lo tatou Atua lea, na folafolaina atu i lenei atalii faamaoni: “Tā e, ta te nonofo pea ma oe, o a’u mea uma foi o āu ia.” (Luka 15:31.)

I se faaaliga e ala mai i se perofeta o ona po nei, ua folafola mai e le Alii i e faamaoni ma e usitai i le asō: “…o le a tuuina atu ia te ia mea uma o i ai i lo’u Tama” (MFF 84:38)

Pe tatou te pei ea o i latou o e valea i luga o le vaitafe i luga ae o le Afu o Naiakara o e na agai atu i ave malolosi matautia o le vai? E ui i lapataiga a leoleo o le vaitafe ia agai atu i le mea o loo i ai le saogalemu ao lei oo i se tulaga lamatia, ma i le matua le amanaiaina lava o lapataiga, na latou taliē, na latou sisiva, na latou feinu, na latou tauemu, ma na faaumatiaina lava i latou.

Semanu e faapena foi le taunuuga o le auvaa e toatolu i luga o le Akarasi pe ana latou teenaina le usitaia o faatonuga pito sili ona itiiti mai le Nofoaga Faatonutonu i Houston. Sa faalagolago o latou lava ola i le usitaia o tulafono autu lea e puipuia ma puleaina malosiaga o le vanimonimo.

Na tutulu Iesu a o ia molimauina le lalolagi o loo siomia o ia i ona aso lea na foliga mai ua valelea ma na tauemu pea i lona faatauanau atu ina ia latou o mai ia te ia i le “ala sao ma le vaapiapi,”lea na matua manino lona faataatiaina mai i le ata o le faaolataga e faavavau a le Atua.

Oi, pe ana mafai ona tatou toe faalogo i lona faatauanau mai i le asō e pei ona sa ia aioi atu ai: “Ierusalema e, Ierusalema e, o lē fasiotia perofeta, ma fetogi i maa i e ua aauina atu ia te oe; ua tele lava o’u manao e faapotopoto i lau fanau, e pei o le moa ona ofaofatai i lana toloai i ona apaau a e lei mafafai outou! (Mataio 23:37.)

Oi, pe ana mafai ona vaai le lalolagi i se isi faataoto ia Ioane le Tali Faaaliga i foliga paia o le Matai o loo valaau mai ia i tatou e pei ona sa ia faia ia i latou o Ierusalema:

Na fetalai le Matai, “Faauta ou te tu atu i le puipui ma tu’itu’i atu, ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma au.

“O lē manumalo ou te avatua ia te ia ma te nonofo faatasi ma au i lou nofoalii, e pei o au foi ona ou manumalo, ua ma nonofo foi faatasi ma lo’u Tama i lona nofoalii.” (Faaliga 3:20–21.)

O lenei la, le ata o le Faaolataga e pei ona aoaoina mai e le Ekalesia moni, o loo faavae i luga o aposetolo ma perofeta, faatasi ma Keriso, le Alii, o le maa tulimanu (Efeso 2:20), lea e na o le filemu e oo mai ai, e le pei ona aumaia e le lalolagi, ae e pei ona aumaia e na o le Alii lava, ia i latou o e faatoilaloina mea o le lalolagi, e pei ona sa faia e le Matai.

“E leai foi se tasi ua i ai le ola, e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.” (Galuega 4:12.)…

E mafai faapefea e a tatou amioga i aso taitasi ona uunaia i tatou i luma i le ola e faavavau?

I se tasi sauniga lotu talu ai nei na ou faalogo ai i se molimau faamafanafana loto a se tamaitai talavou. Na tigaina lona tama i se mai na taua e fomai o se mai ua le mafai ona togafitia. I se tasi taeao ina ua maea se po o le tiga ma le mafatia na fai atu ai ma ni lagona sili lenei tama mafatia i lona toalua, “Ou te matua faafetai lava i le asō.” “Mo le a?” o le fesili lea a lona toalua. Na ia tali mai “Mo le avanoa ua aumaia e le Atua ou te toe faatasi ai ma oe mo se isi aso e tasi.”

O le asō ou te manao ai ma lo’u loto atoa ina ia mafai e i latou uma o loo faalogo mai i le leo o lenei faasalalauga ina ia faapena ona faafetai i le Atua mo se isi aso e tasi! Mo le a? Mo le avanoa e faamaeaina ai ni feau e lei maea. E salamo ai; e faasa’o ai ni sese; e faia ai ni aafiaga lelei mo se tamaitiiti ua faalogogata; e aapa atu ai i se tasi o loo tagi mai mo le fesoasoani—pe a faapuupuuina, ia faafetai i le Atua mo se isi aso e tasi e saunia ai e fetaiai ma le Atua.

Aua nei taumafai e ola ma le manatu o loo i ai pea ni aso se tele o loo i le lumanai. Saili mo le malosi e taulimaina ai faafitauli o le asō. I lana Lauga i luga o le Mauga, na apoapoai mai ai le Matai: “O lenei, aua tou te popole i le aso a taeao; aua e popole le aso a taeao i ana lava mea. E tatau i le aso lona lava leaga.”(Mataio 6:34.)

Fai mea uma e te mafaia ae tuu mea o loo totoe i le Atua, le Tama o i tatou uma. E le lava le faapea atu, o le a ou faia le mea sili ou te mafaia, ae peitai ia faapea atu, o le a ou faia mea uma e oo i ai lo’u malosi; o le a ou faia mea uma e tatau ai.²

Fautuaga mo Suesuega ma Talanoaga

O a ala o loo faaalia ai e le ata o le faaolataga a le Tama Lona alofa tele mo i tatou?
E faapefea e se malamalamaaga i le ata o le faaolataga ona aumaia le filemu i lou olaga?
Aisea e tatau ai ona i ai le filifiliga saoloto pe afai tatou te toe foi i le Atua? Aisea e tatau ai ona i ai le Togiola? Aisea e tatau ai ona tatou usitai i mataupu faavae ma sauniga o le talalelei?
O a nisi o taunuuga o le alu ese mai le ala ua faataatia mai e le Tama Faalelagi mo i tatou e mulimuli ai?
O a ni mea e mafua ai ona le iloaina e tagata i nisi taimi le sini o le toe foi atu i le afioaga o le Tama Faalelagi? O a apoapoaiga e mafai ona tatou tuuina atu i tagata o aiga poo isi ua leiloa lo latou ala?
Aisea e taua ai le auauna atu i aso taitasi? le faaalia o le loto faafetai i aso taitasi? le salamo ma taumafai e faatoilaloina o tatou vaivaiga? E faapefea ona fesoasoani le faia o nei mea taitasi e saunia ai i tatou e fetaiai ma le Atua?

Na tofia Peteru ma Anetelea e Iesu Keriso. E manaomia le Togiola a le Faaola ina ia taunuu ai le ata o le faaolataga a le Tama. E mafai e tagata taitasi ona taunuu saogalemu atu i lana “faigamalaga mai lenei olaga e agai atu i lona taunuuga faatumutumuina—o le toe foi atu lea i lena Atua na foaiina mai ia te ia le ola,” e ala i le mulimuli i le Faaola.