Mataupu 12

O le Faamoemoega Paia o le Faaipoipoga

O le a se mea e mafai ona tatou faia e faamalolosia ai faaipoipoga e faavavau ma saunia ai tupulaga talavou e faaipoipo i totonu o le malumalu?

Faatomuaga

Sa aoao mai e Peresitene Harold B. Lee le taua tele o le faaipoipo i totonu o le malumalu ma le galulue faatasi o tane ma ava i le olaga atoa e faamalolosia a latou faaipoipoga:

“O le faaipoipoga o se paaga. Sa maitauina e se tasi le tala i totonu o le Tusi Paia e uiga i le foafoaga o le fafine sa le fausia mai i se vaega o le ulu o le tane, o se manatu ina nei pule le fafine i le tane, sa le fausia foi o ia i lona vae ina nei solia le fafine i vae o le tane. O le fafine sa aumaia i le itu o le tane e peiseai e faamamafa mai ai le mea moni e tatau ona i ai o ia i lona itu o se paga ma se soa. I le fata faitaulaga e fai ai faaipoipoga e tautino atu ai e le tasi i le isi, e amata atu i lena aso o le a galulue faatasi oulua i le foiaina o faafitauli o le olaga. Sa apoapoai mai le Aposetolo o Paulo e faatatau i le faaipoipoga: ‘Aua tou te amo faalegatasi ma e le talitonu.’ (II Kor. 6:14.) E ui o lana apoapoaiga e faatatau tonu i tulaga e aofia ai le tutusa o manaoga faalelotu ma faanaunauga faaleagaga, ae o le faatusatusaga o loo tau mai e lana faamatalaga ia aua nei faagaloina. E faapei o le amo a asini e tosoina se avega i le ala, afai e tagito’ia se tasi, ua faavaivai ma ua faapaie ma faifaiaga pe saua ma loto ma’a’a, o le a malepe le avega ma o le a mulimuli mai ai le faafanoga. O pogai lava nei e tasi, e lepetia ai isi faaipoipoga pe afai o se tasi o i laua po o i laua uma foi o vaega o lena faaipoipoga ua toilalo i le faataunuuina o o laua tiutetauave o le tasi i le isi. …

“Ae o le mea aupito sili atu ona taua nai le faapea ia “amo faagatasi” i tulaga faaletino, ia lua amo faagatasi i tulaga faaleagaga. … O le mea mautinoa o soo se aiga e faavae ma le faamoemoe e galueaiina i latou e oo atu i le faavavau ma avea ma nofoaga e faafeiloaia tamaiti e pei o ‘tofi mai ia Ieova [Alii]’ [Salamo 127:3] e i ai ni avanoa sili atu e faasaoina ai ona o le paia lea e i ai i le aiga.”¹

Aoaoga a Harold B. Lee

Aisea e taua ai le faaipoipoga e faavavau mo lo tatou faaeaga?

Sei o tatou mafaufau i le uluai faaipoipoga sa faatino ina ua uma ona fausia le lalolagi, o Atamu, le uluai tagata, sa fausia e pei lava o manu vaefa ma manu felelei ma meaola uma i le lalolagi. Ona tatou maua lea o le famaumauga lenei: “E le lelei ona mau toatasi o le tagata; ou te faia sona fesoasoani e tatau ma ia.” Ina ua maea ona fausia e le Alii Eva, sa ia “aumaia o ia i a Atamu. Ona faapea ai lea o Atamu, O le ivi lava o ou ivi ma le aano o ou aano; e taua o ia o le fafine, aua na toina atu o ia ai le tane. O le mea lea e tuua ai e le tane lona tama ma lona tina, ae faatasi ma lana ava; ona avea ai lea o i laua ma tino e tasi.” (Kenese 2:18, 22–24). … I le faataunuuina o lena faaipoipoga sa poloai atu le Alii ia i laua ia “fanafanau, ma uluola, ma ia tumu ai le lalolagi, ia faatoilalo i ai. “ (Kenese 1:28)

O lea faaipoipoga na faia e le Alii i le va o ni tagata e tino ola pea, ma e le oo le oti i o la’ua tino sei vagana ua oo mai le agasala i le lalolagi. Sa ia faia i laua ia tasi, ua le gata i le mo le taimi nei, e le faatapulaaina foi se taimi patino; ae ina ia tasi e oo i tausaga o le faavavau … O le oti ia te i laua e le o se teteaga; ua na o se tuueseeseina lē tumau. O le toetu i le tino ola pea o lona uiga ia te i laua o se faatasiga ma se fusi e faavavau e le mafai ona toe vavaeina, “Aua faapei ona oti uma ia Atamu, e faapea foi ona faaolaina uma ia Keriso.” (I Korinito 15:22.)

Afai e te mulimuli ma le faaeteete i le faamalamalamaina o le uluai faaipoipoga, ua e saunia foi e malamalama i le faaaliga sa tuuina atu i le Ekalesia i lo tatou augatupulaga i upu nei:

“Afai e faaipoipo le tane i lana ava i la’u upu, o la’u tulafono lea, ma i le faaaliga fou ma le faavavau, ma ua faamaufaailogaina ai ia i laua e le Agaga Paia o le folafolaga, e le ua faauuina, ua ou tofia i lenei mana ma ki o lenei perisitua …, o le a faia ia te i laua mea uma ua tuuina atu e la’u auauana i o laua luga, i lenei olaga, e oo lava i le faavavau; o le a faataunuuina atoatoa foi pe a o ese atu i laua mai le lalolagi; e ui atu foi i laua i tala ane o agelu, ma atua, ua faatuina i lea mea e oo i lo laua faaeaga ma le mamalu i mea uma, e pei ona faamaufaailogaina i luga o o laua ulu.” (Mataupu Faavae ma Feagaiga 132. 19.) …

O le faaipoipoga mo le olaga nei ma le faavavau o le faitotoa vaapiapi ma le ala lauitiiti (e pei ona taua i tusitusiga paia) “e tau atu i le faaeaina ma le uluola pea lava pea o olaga, e toaitiiti foi e maua ai, “ae” e va tele le faitotoa, ma lautele le ala e tau atu i oti; e toatele foi e ui atu i ai.” (Mataupu Faavae ma Feagaiga 132:22, 25.) Afai e tauanau oe e Satani ma ana au e ui i le ala vatele o le faaipoipoga faalelalolagi lea e faamuta i le oti, ua ia faafaiainaina oe i lou avanoa mo le tikeri pito i maualuga o le fiafia e faavavau e ala i le faaipoipoga ma uluola ai i le faavavau atoa. Ua tatau nei ona manino ia te outou le mafuaaga na folafola mai ai e le Alii ina ia maua le tikeri pito i luga i le mamalu Selesitila, o se tasi e ao ona ulu atu i le feagaiga fou ma le faavavau. Afai foi na te le fai faapea na te le mafai ona maua (Mataupu Faavae ma Feagaiga 131:1–3.)²

O i latou e faia i latou ia agavaa ma ulu i totonu o le feagaiga fou ma le faavavau o le faaipoipoga i totonu o le malumalu mo le olaga nei ma le faavavau atoa o le a latou faataatiaina le maa tulimanu muamua mo se aiga e faavavau i le malo selesitila lea e tumau e faavavau. O lo latou taui o le maua lea o le “mamalu e faaopoopo atu i luga o o latou ulu e faavavau faavavau lava” (tagai Aperaamo: 3:26).³

O a ni mea e mafai ona faia e tane ma ava e faamalolosia ai a latou faaipoipoga faalemalumalu i taimi uma o o latou olaga?

Afai o le a tonu i [tagata talavou] mai le taimi o a latou faaipoipoga, e amata mai i lena taimi ma agai atu ai i luma o le a latou lotomau ma faia mea uma i lo latou mana e faafiafia ai i le tasi i mea e tonu, e oo lava i le ositaulagaina o mea latou te fiafia i ai, o o latou lava tuinanauga, o latou lava manaoga, o le faafitauli o le fetuutuunai i le olaga faaipoipo o le a faaleleia ia lava ma o latou aiga ma o le a mautinoa le fiafia. O le alofa sili e fausia i luga o le tele o osigataulaga, ma o le aiga o le nofoaga lea e faaali atu ai i aso taitasi le mataupu faavae o le ositaulaga mo le lelei o tagata taitoatasi o le aiga lea o loo i ai le alofa sili.⁴

O loo i le lumanai pea le fiafia sili ma, ioe, o i ai foi popolega sili e te lei iloaina, aua ia manatua o le alofa sili e fausia i luga o taulaga sili ma o naunautaiga i aso taitasi mo le isi e fiafia i mea e tonu o le a fausia ai se faavae mautu mo se aiga fiafia. O lena naunautaiga mo le lelei o isi e tatau ona feusiai ma aua nei pito tasi pe manatu faapito. O tane ma ava e tatau ona lagona o o la- ’ua tiutetauave ma matafaioi fai faatasi le aoao e le tasi o le isi. O mea e lua o loo taia ai le malupuipuia o aiga fou o tane fou e lē lagonaina le matafaioi atoa o le lagolagoina o se aiga, ma ava fou ua laa ese mai matafaioi taua o le tausiga o se auaiga ma le atinaeina o se aiga.⁵

O le faaipoipoga ua faatumuina i le fiafia aupito silisili ae o loo aumai ai foi ma ni matafaioi sili ona mamafa lea e mafai ona pau atu i tane ma fafine i le olaga nei. O lagona paia o loo i totonu o tane ma fafine faamaoni taitoatasi, e faaosofia ai mo se mafutaga ma le isi itupa ua fuafuaina e lo tatou Foafoa o se lagona paia mo se faamoemoega paia —ae lē ia faamalieina ai na o se manaoga faaletino po o tuinanau o le tino i ni faatasiga e faia ai feusuaiga faatautala, ae e ao ona faaleoleo e avea o se faaaliga o le alofa moni i totonu o tautinoga paia o le faaipoipoga.⁶

Ua tele taimi ou te tautala atu ai i ulugalii laiti i le fata faitaulaga e fai ai faaipoipoga: Aua lava nei lē puleaina o oulua lagona mafana o lo oulua olaga faaulugalii. Ia avea o oulua manatu e pupula e pei o le la susulu. Ia moni a oulu upu ma ia musuia ma faagaeetia a oulu fegalegaleaiga faatasi, pe afai o le a oulua faaolaolaina lagona o le alofa o le isi i le tasi i lo oulua olaga faaipoipo faatasi.⁷

O nisi taimi, pe a matou malaga atu i vaega eseese o le Ekalesia, e o mai se tane ma se ava ia i matou ma faapea mai, talu ai ona ua le ogatusa o la lagona i le la faaipoipoga—ae sa faaipoipo i le malumalu—pe lē sili ea pe a faasaoloto mai le tasi i le isi ona toe sailia lea o ni paaga e sili atu ona fetaui mo i laua. O i latou uma faapena, matou te faapea atu, o soo se taimi lava e faapea mai ai se ulugalii ua uma ona faaipoipo i le malumalu ua fiu le tasi i le isi, o se faailoga lena e ta’u mai ai e le o faamaoni se tasi po o i la’ua uma foi i a laua feagaiga. Soo se ulugalii ua faaipoipo i le malumalu ma faamaoni i a laua feagaiga o le a atili ona pele le tasi i le isi, ma o le sili atu ona loloto le uiga o le alofa i le taimi e faamanatu ai le limasefulu tausaga o la laua faaipoipoga nai lo le aso sa faaipoipo ai i le maota o le Alii. Ia aua lava nei oulua sese i lena mea.⁸

O i latou e o atu i le fata faitaulaga e fai ai faaipoipoga ma le alofa i o latou loto, e mafai ona matou faapea atu ia te i latou ma le faamaoni, afai latou te faamaoni i feagaiga ua latou osia i le malumalu, e oo atu i le limasefulu tausaga o le laua faaipoipoga o le a mafai ona faapea atu le tasi i le isi: “Atonu ta te lei iloa le uiga o le alofa moni ina ua ta faaipoipo, aua ua sili atu ona faamemelo le tasi i le isi i le aso!” Ma o le a faapea lava pe afai o le a laua mulimuli i fautuaga a o laua taitai ma usitai i faatonuga paia ma le mamalu e tuuina atu i totonu o sauniga o le malumalu; o le a faaatoatoaina lo laua tuputupu ae i le alofa e oo i le atoatoa o le alofa i le afioaga o le Alii lava Ia.⁹

O pona ma toilalo ma le matalasi o nai faatosinaga faaletino ua o se mea noa pe a faatusatusa i le moni aiai o uiga lelei e tumau ma tuputupu ae ma le matagofie faatasi ma tausaga O oe foi, e mafai ona e ola i le tausaafia o lou aiga fiafia tusa lava pe ua leva ona mavae atu le olaga talavou pe afai e tau lava ina e saili e maua uiga taua atoatoa e pei o ni taimane i totonu o le isi lea e manaomia ai na o le faaiilaina o le manumalo ma le toilalo, taimi faigata ma le fiafia ina ia aumaia le itu pupula ma le iila lea o le a susulu ma le matagofie naua e oo lava i le po sili ona pogisa.¹⁰

O le a se fautuaga e tuuina atu ia i latou e le o i ai nei ni a latou faaipoipoga e faavavau?

O nisi o outou e le o i ai nei ni a outou soa i o outou aiga. O nisi o outou ua oti a outou ava po o tane pe e lei mauaina lava sau soa. I o outou tulaga o loo i ai ni tagata o le Ekalesia sili ona tamalii—faamaoni, loto toa, finafinau e ola i tulafono a le Alii, e fesoasoani e atiae le malo i le lalolagi, ma auauna atu i o outou uso a tagata.

E anoanoai ni mea o loo umia e le olaga mo outou. E manaomia le malosi e manumalo ai i ou luitau. E matua tele ala e maua ai le faamalieina, i le auauna atu ia i latou o e pele ia te outou, i le faia ia lelei o le galuega o i luma i a outou galuega po o totonu o lou aiga. Ua ofoina atu e le Ekalesia le tele o avanoa mo outou e fesoasoani ai i tagata, e amata atu ia te oe, ia maua le fiafia o le olaga e faavavau.

Aua e te faatagaina lou manatu alofa ia te oe lava po o le faanoanoa e taitaieseina ai oe mai le mea ua e iloa e sa’o. Ia liliu atu lou mafaufau e fesoasoani i isi. E i ai se uiga faapitoa o afioga a le Matai mo oe: “O le maua lona ola, e maumau ai ia te ia; a o le faamaumau i lona ola ona o au, e maua e ia.” (Mataio 10:39.)¹¹

E le na o a tatou amioga e faamasino ai i tatou e le Alii ae faapea foi i manatunatuga o o tatou loto. … O lea, [o tamaitai] ua faafitia ai faamanuiaga o le avea ma tina i lenei olaga—o i latou ia ua faapea ifo i o latou loto, pe ana mafai ona ou faia, semanu ou te faia, pe faapea mai foi o le a ou tuuina atu pe a na i ai ia te au, ae peitai ou te le mafai aua e le o i ai ia te au—o le a faamanuia oe e le Alii e peiseai sa e faia, ma o le lalolagi a sau o le a toe tauia ai mo i latou o e na moomoo i o latou lava loto mo faamanuiaga amiotonu sa le mafai ona latou maua ona e le faapea o latou ua mafua ai.¹²

O outou na fafine [ava] o loo moomoo ia malolosi a outou tane i le Ekalesia, ma talotalo maimau pe ana faapea o loo outou faatasi ai iinei i lenei aso nai lo le lagona ita lea o i ai pea i o latou loto, ma o loo mafaufau pea po o le a se mea e mafai ona e faia ina ia i ai se aso … tou te auai faatasi ma i latou i totonu o le malumalu o lo tatou Atua. Ma outou tane o talotalo maimau pe ana o outou i ai faatasi ma a outou ava. Matou te faapea atu ia te outou afai o le a outou faamaoni i o outou faatuatuaga, o le a outou alolofa ia outou tane ma alolofa i a outou ava, ma o le a outou tatalo e le aunoa i le taeao ma le afiafi, o le ao ma le po, o le a oo mai ia te outou o tagata o le Ekalesia e ala i le mana o le Agaga Paia, lea na papatisoina ai outou ma ua faamaoni, se aia tatau e olioli ai. O lena mana ua umia e mafai ai ona e maua le tulaga e gafatia ai ona tineia mea faafatiatamai o loo ia outou soa ma taitaiina atu ai i latou i le faatuatuaga.¹³

O nisi o outou atonu e filifili e faaipoipo i fafo atu o le Ekalesia ma le faamoemoega lilo e faaliliu mai a outou soa i o outou taofi faalelotu. O o outou avanoa mo le fiafia i le olaga faaipoipo, e sili atu pe a outou faia lena faaliliuga ae lei faaipoipo.¹⁴

O le a se mea e mafai ona tatou faia e fesoasoani atu ai i le autalavou ia malamalama i faamanuiaga o le faaipoipoga faalemalumalu ma sauniuni i ai?

Ioe, o le manuia o aiga o le Au Paia o Aso e Gata Ai e faalagolago, i le ituaiga faaipoipoga ua faamauina mo lena aiga. O se faaipoipoga mo na o le taimi nei o le a, popole lava tau o mea o lenei olaga. O se faaipoipoga mo le faavavau o le a ese atoa se vaaiga faalemafaufau ma le faavae. …

… Ioe, ua tatou iloa o le na o le alu lava i le malumalu e aunoa ma sauniuniga e tatau ai i soo se auala e le maua ai faamanuiaga o loo tatou sailia. O le faaipoipoga faavavau e faalagolago i luga o le faatagata matua ma tautinoga ia e—faatasi ma faaeega paia ma sauniga—e mafai ona tatalaina faitotoa o le lagi mo faa-manuiaga e tele e tafe mai ia i tatou.

… O le faaipoipoga faalemalumalu e sili atu i le na o se nofoaga e faatino ai; o se aoaoga atoa mo le olaga ma le faaipoipoga ma le aiga. O se taunuuga maualuga o le fausia o uiga faaalia i le Ekalesia, legavia, ma lo tatou va feagai ai ma le Atua—ma isi mea e tele. O lea, o le tau ina lauga atu o le faaipoipoga faalemalumalu e le lava. O a tatou afiafi faaleaiga, seminare, mataupu faalelotu ma ausilali e tatau ona galueaiina agai i lenei sini—e le gata i na o apoapoaiga—ae faapea foi i le faaali atu o talitonuga ma uiga e aofia i le faaipoipoga faalemalumalu e mafai ona aumaia le ituaiga olaga iinei ma le faavavau e sili ona manaomia e tagata mo i latou lava. A faia i le ala tonu, e mafai ona tatou faaalia le eseesega i le va o “mea paia ma mea e le paia” [tagai Esekielu 44:23] ina ia maoti lelei lagona malolosi faanatura o le faatina i totonu o le tamaitai talavou o loo faavaeluātai i le va o lagona paia ma le ala e faamalie ai le fiafia. I faamasinoga moni ma taumafaiga soo faatasi e ala i aoaoga e mafai ona tatou faailoa atu ai i alii talavou o le ala o le lalolagi—e ui i le tele o le lalelei faatosina ma le foliga poto mai o tama avi—ae o le ala o le faanoanoa; o le ala mulimuli lenei lea o le a faaleaogaina ai faanaunauga loloto o i ai ia te ia mo se aiga mo ia lava ma le olioli o le tulaga faatamā.¹⁵

E ui o faafitauli uma o le olaga e le foia i le faaipoipoga faalemalumalu, ae, o le mea moni, mo i latou uma e ulufale atu ma le agavaa, o le a avea ma sulufaiga o le saogalemu ma se taula i lena agaga pe a pesi tetele mai afa o le olaga. …

O au o se aafiaga tamaoaiga, mo le tusa ma le luasefulu tausaga, i le faafiafiaina i faaiuga o vaiaso taitasi i totonu o le tele o aiga faamanuiaina o le Ekalesia, ma, i se eseesega, pe tusa o vaiaso taitasi e faatagaina au ou te vaai i nisi o le tele o aiga e le o i ai le fiafia. O nei aafiaga ou te lagona ai i lou lava mafaufau ni faaiuga mautinoa: Muamua, o o tatou aiga sili ona fiafia o aiga ia o i ai matua ua faaipoipo i totonu o le malumalu. Lona lua, o se faaipoipoga faalemalumlau e sili ona faamanuiaina pe afai sa faataunuuina e le tane ma le ava sauniga paia o le malumalu ma le mama o le tino, mafaufau ma le loto. Lona tolu, o se faaipoipoga faalemalumalu e sili ona paia pe afai sa aoaoina lelei paaga taitasi i le faamoemoega o faaeega paia ma tautinoga e mulimuli ai le tane ma le ava e o gatasi ma faatonuga sa maua i le malumalu. Lona fa, o matua latou te manatu faatauvaa i feagaiga o le malumalu, e mafai ona faamoemoe mo sina lelei sili atu itiiti mai i a latou fanau ona o a latou faataitaiga lē lelei.

I lenei vaitau, o tifiga, o le taufaasese, o mea faafoliga, ma le matagofie o le lalolagi ua faaleagaina ai le paia o mataupu o le aiga ma le faaipoipoga, e oo lava i le sauniga o le faaipoipoga lava ia. Amuia se tina poto o loo valiina se ata ola i lana tama teine o se vaaiga paia i le tulaga maoae o le matagofie, o le potu o faamauga faalelagi lea, e tapunia mai i mea faalelalolagi uma, ma i le siosiomaga o matua ma uo pele a le aiga, o se faatoafaiava ma le faatoanofotane lalelei talavou ua faatalofa o la lima i luga o le fata faitaulaga paia. Faafetai i le Atua mo lena tina ua faasino i lana tama teine o iinei, i le nofoaga i le lalolagi e latalata i le lagi, e fesootai ai loto i le loto, i se feusia’iga o le alofa e amata ai se lotogatasi e puipuia ai mai faatamaiga o faigata, loto tiga, po o faanoanoaga e faaleaga ai, ma maua ai faalaeiauga silisili mo taunuuga silisili o le olaga!¹⁶

Ia taliaina e le Atua ina ia faamanuia i aiga o le Au Paia o Aso e Gata Ai ma o le a oo mai ia te i latou le fiafia iinei ma le faavae mo le faaeaga i totonu o le malo selesitila i le lalolagi a sau.¹⁷

Fautuaga mo Suesuega ma Talanoaga

O a ni mea e mafai ona faia e ulugalii faaipoipo e faatumau ai le avea o a latou feagaiga o le faaipoipoga faavavau ma faamuamua sili i o laua olaga i aso taitasi? E aafia faapefea le faiga e taitoalua o le tasi i le isi ma a la’ua fanau pe a faaipoipo mo le faavavau?
E faapefea ona tatou aoao atu le taua o le faaipoipoga e faavavau i a tatou fanau?
Aisea o le “alofa sili … e fausia i luga o osigataulaga sili’? E faapefea e le le manatu faapito ona faamalosia se faaipoipoga?
O a ni mea e mafai ona faia e i latou e le o malolosi a latou soa i le Ekalesia e faamalolosia ai a latou faaipoipoga? E mafai faapefea e i latou e le i faaipoipo i le taimi nei ona faatumuina o latou olaga i faaaliga o le alofa ma le faataulagaina faaleatua?
O le a se uiga o lenei mea i a te oe ina ia “amo faagatasi” i le faaipoipoga?
E mafai faapefea e paaga faaipoipo ona “tuputupu ae atoatoa i le alofa e oo lava i le atoatoa o le alofa i le afioaga o le Alii”?

Sa aoao mai e Peresitene Harold B. Lee o le “alofa sili e fausia i luga o le osigataulaga sili, ma o le aiga o le nofoaga lea o loo faaali atu ai i aso taitasi le mataupu faavae o le ositaulaga mo le lelei o tagata taitoatasi, o le aiga lea o loo i ai se alofa sili.”