Mataupu 20

Ola i le Tulafono o le Lēgaviā

O le a se mea e mafai ona tatou faia e puipuia ai lo tatou lava lēgaviā po o le tatou ola mama faapea foi i o tatou aiga?

Faatomuaga

“Afai e te manao ia i ai faamanuiaga a le Agaga o le Alii ia te oe, e ao ona e tausia lou tino, o le malumalu o le Atua, ia mama ma lē ponā,” o le saunoaga le a Peresitene Harold B. Lee.¹

Na ia faaaogaina se tusi faanoanoa mai se tagata na solia le tulafono o le lēgavia e faamanino ai le taua o lenei apoapoaiga: “Ina o o’u fiafia ma olioli i le Agaga o le Alii ma ola ai i le talalelei, e matalatala mai itulau o tusitusiga paia ma se malamalama fou ia te a’u ma vave ona oso mai i lo’u agaga uiga o itulau o mau. O le taimi nei, talu ai lo’u faasalaga ua tapē lo’u igoa mai le ekalesia, ua ou lē toe faitau ma le malamalama; ua ou faitauina ma le masalosalo palakalafa sa ou manatu muamua sa ou malamalama lelei ai. Sa ou fiafia i le taimi ua fano e faia sauniga o le talalelei mo la’u fanau, faamanuia a’u pepe, papatiso i latou, faauu i latou pe a mama’i. O le taimi nei ua na o lo’u tutu i tafatafa ma molimauina se isi tagata o faia na sauniaga. Sa masani ona ou fiafia e alu i le malumalu, ae o le taimi nei ua tapunia faitotoa o le malumalu ia te a’u. Sa masani ona ou fai sina o’u tomumu e uiga i saofaga o loo talosagaina e le Ekalesia, totogi sefuluai, totogi taulaga anapogi, fai atu le sao i lea mea ma le sao i lena mea, ma i le avea ai ne ma tagata ua tapē le igoa, ua lē faatagaina a’u ona toe totogi se sefuluai; a o lea ua tapunia nei le lagi mo a’u aua ua le mafai ona ou totogiina se sefuluai. Ou te lē toe tomumu lava pe faitio i talosaga a le Ekalesia ina ia taulagaina a’u mea e maua. E ese le agalelei o la’u fanau ia te au, ae ou te iloa, o le ta’ele o o latou loto, o loo mamā ma maasiasi i latou i lo latou tamā lea o loo latou tauaveina lona igoa.”²

Na saunoa mai Peresitene Lee, “O lena alii po o lena tamaitai ua tulimata’i atu lana vaai i lena sini faavavau o le ola e faavavau, ua mauoa lava o ia, auā ua si’oina lona loto atoa i se afi lea e oo mai i lē na te tausisia le agavaa o lona olaga.”³

Aoaoga a Harold B. Lee

Aisea e tatau ai ona usitai i le tulafono o le lēgaviā?

O le i’uga ina ia mafai ona tuufaatasia le tane ma le fafine i lenei sootaga paia o le faaipoipoga, ina ia saunia ai tino faaleolaga nei e fai ma mea mau ai agaga faalelagi, o lea ua tuuina ai e le Alii i fatafata o alii talavou uma faapea foi tamaitai talavou se faanaunauga e fegalegalea’i ai o le tasi ma le isi. O ni uunaiga sā ma paia ae matua uiga ese le mamana. Ina ia lē manatu māmā i le ola pe faaaogaina sese nei āga o le olaga e tau ina faamalie ai lagona malolosi faaletagata, o lea ua tuuina ai e le Atua i se tulaga faamuamua i le vaega o solitulafono matuiā ia ua lapata’ia ai i tatou i Tulafono e Sefulu, muamua, fasioti tagata, ma le lona lua, feusua’iga lē mama. “Aua e te fasioti tagata! Aua e te mulilua!” (Tagai Esoto 20:13–14.)…Ua apoapoai mai le Ekalesia ia te outou ina ia fai faalelei lavalava ma ou uiga ina ia lē faatagaina ai e mafaufauga leaga ona uuna’ia lou gutu e tautala i mea leaga ma leaga ai ma lē tusa ai lau amio. Ina ia maua le fiafiaga aupito sili i le faaipoipoga paia, o lea e tatau ai ona tausisia le mama atoatoa o punavai o le ola.⁴

Ia amioatua. O se tasi lenei o tulafono aupito sili.

“Ia tumu foi lou loto i le alofa atu i tagata uma, ma le aiga o le faatuatua, ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, a o lou tootoo ma too lē feliuliua’i o le amiotonu ma le upu moni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava.” (MFF 121:45–46.)

Ae e le mafai i lenei lalolagi ona tatou maua lena pule, lena mana, lena mafutaga ma le Agaga Paia sei vagana ua tatou aoao e mama i mafaufauga, i uiga masani, ma isi a tatou tāga.⁵

Ia faaofuina oe lava i le ofutau o le amiotonu. Aua lava ne’i e faamatuu atu i se taimi e vaivai ai. Ia malupuipuia lena ‘olo o le mama. O lou tino o le malumalu lea o le Agaga Paia, pe afai e te tausia mama ma atoatoa.⁶

Ia ola i le tulafono o le lēgaviā i se tulaga e sili atu ona atoatoa nai lo se isi lava taimi na i ai muamua, e ala lea i le mafaufau mama. Ia manatua le fetalaiga a le Matai, “Ua outou faalogo, na faimai i e anamua, Aua e te mulilua. A ou te fai atu a’u ia te outou, ai se vaai atu i le fafine ina ia manao i ai, ua uma ona mulilua ma ia i lona loto” (Mataio 5:27–28). O lea, e tatau ai ona mama o tatou mafaufauga. Ia faatoilalo ni uiga masani atonu o ia te oe e tau atu ai i āga lē mama, ma ia faasaina ni amioga lē mama e ono faatama’ia ai o tatou olaga.⁷

O a taunuuga o le solia o le tulafono o le lēgaviā?

E le i i ai se taimi muamua na i ai sea luitau i le aoaoga faavae o le amiotonu ma le mama atoatoa ma le lēgaviā. Ua tafiesea tulaga faatonuina o le ola mama e mana o le amioleaga. E leai se mea e sili ona taua tatou te faia nai lo le aoao atu ma le malosi i le mea tatou te mafaia, a’o tataitaiina e le Agaga o le Alii, ina ia mafai ona tatou faatauanauina o tatou tagata i le lalolagi e ola latalata i le Alii i lenei taimi o le tele naua o faaosoosoga.⁸

O le taufaamata’u aupito sili a Satani i aso nei, o le faatamaiaina lea o le aiga, ma faa’amu’amu i le tulafono o le lēgaviā ma le paia o feagaiga o le faaipoipoga.⁹

Sa tapunia se tasi o a matou konafesi faalesiteki i se taimi e le’i mamao atu i se savali matagofie. … A’o tula’i le peresitene o le siteki e tapunia le konafesi, sa ia tagatagai atu i le faapaologa sa faatumulia i fanau ma faapea mai, “O loo i ai se mea ou te fia fai atu ai ia te outou na le tupulaga talavou o loo i luga o le faapaologa. Atonu a’o avea ai a’u ma o outou peresitene faalesiteki, o le o mai ai outou uma ia te au mo se faatalanoaga—ia siitia le perisitua, po o se tofiga e tofia ai oe, po o ni pepa faataga o le malumalu—ma e aofia ai ma isi mea, o le a ou fesili atu ai ia te outou se fesili e tasi e matuā vāiliili. Pe o e ola mama ea? Afai e mafai ona e tali mai ma le faamaoni, ‘Ioe, Peresitene, o loo ou ola mama,’ o le a e fiafia. Afai e tatau ona e tali mai, ‘Leai, ou te lē o ola mama,’ o le a e faanoanoa; ma afai e te pepelo mai ia te au; o le a faatumulia lou loto i le oona matuitui i aso uma e te ola ai.”…

E i ai se aso o le a [tatou] feiloai ai ma Lē na Faia i tatou ma e faapei ona ta’ua e Moronae—ma e fai lava si malosi o lenei faaupuga, “Tou te manatu ea e mafai outou ona fiafia e nonofo faatasi ma Lē Paia o Isaraelu ma se lagona o le ta’usalaina i lo outou lava palapalā?” Ua Ia fetalai mai, “O le a sili atu lo outou fiafia e nonofo faatasi ma agaga ua faasalaina i seoli faatasi ai ma lo outou lē mama ma le palapalā o loo i o outou luga pea, nai lo le i ai i le afioaga o Lē Paia o Isaraelu.” [Tagai Mamona 9:3–4.]¹⁰

Pe a tatou solia tulafono, ona tatou faatiga ai lea ia i tatou lava atoa ma isi. O le sese e masani ona tula’i mai ai le faanoanoa, mamafa i le mafaufau, fai ma fili, po o le momotu ese mai foi, pe afai tatou te le salamo. O le mea e alia’i mai ai, tatou te faaitiitia ai lo tatou lava manatu maualuga mo i tatou lava; tatou te ta’u faatauvaaina a tatou matafaioi o ni atalii ma ni afafine o le Atua; atonu foi o le a tatou tauafai e sosola ese mai le mea tonu a’ia’i pe o ai moni lava i tatou!

Pe a tatou agasala ona faaitiitia ai lea o lo tatou aafiaga lelei i le avea ai ma nisi o le fanauga a tagata. … Atonu tatou te faaleaga i isi; atonu foi tatou te toe sasa atu i le fanauga a tagata i se isi ala, ma o lea o le a faateleina ai le pagatia o le tagata. O le lē mama o matua e mafai ona auina atu ai se tali e lē motusia e mafai ona soo ai augatupulaga, e ui lava atonu e ese le tulaga e faaalia ai le faaliliii ma le faatautee o fanau lē fiafia. O le leai o se alofa i le aiga e āfua ai uiga faaalia e aafia ai i tatou uma, e mata’utia le tau e totogiina e le tagata mo lenei ituaiga toilalo. O le a se mea e sili atu ona talafeagai ma tulaga manaomia o le fanauga a tagata nai lo avea o i tatou ma tagata e mama, ma atinae le alofa i le aiga—ae o le mea moni lava, ia tausia poloaiga uma?¹¹

E leai lava se alii po o se tamaitai e i se tulaga maualuga i lenei ekalesia e pa’ū i lalo ifo o le tulaga ua faamoemoe e ola ai, e aunoa ma lona tosoina i lalo o le toatele sa faatuatuaina o ia. Ua ia faamanu’aina o latou mafaufau; ua ia tosoina i lalo i latou e tau leai se faatuatua, ma e toatele foi i latou e mafaufau i le aso latou te le fiafia ai i lenei ekalesia pe afai e pa’ū se tasi sa latou faatuatuaina, i lalo ifo o le tulaga sa latou faamoemoeina o ia e tausisia.¹²

Ua ou ta’ua le mata’utia o le agasala; ma o le taui o le agasala o le oti ma o le togiola a le Alii o Iesu Keriso, e mafai ai e oe lena ua agasala ona maua le faamagaloga e ala i le salamo faamaoni, ma maua le ala i le olioli i lenei olaga ma le atoaga o le olaga a sau.¹³

O le a le matafaioi a i latou o umia le perisitua e faatatau i le tulafono o le lēgaviā?

Uso e, ua tatou ia i tatou lava ona toe faia se faaiuga o le a tatou tausia le tulafono o le lēgaviā: ma afai ua tatou faia ni mea sese, ia tatou amata nei ona faasa’o na mea sese. Ia tatou savavali agai atu i le malamalama, ma ou te aioi atu ia te outou uso e, aua le faaaogaina sese le avanoa matagofie ua ia te outou o ni alii, o ni ē e mafai ona soosoo lima ma le Lē Foafoa i le foafoaina o tagata, e ala lea i le au faatasi i se ituaiga o sootaga lē faatagaina lea e na o le ta’uvalea e oo i ai ma tiga ai loto o o outou taitoalua ma fanau. Uso e, matou te aioi atu ia te outou ina ia tausisia lo outou ola mama, ma savavali i le ala o le upumoni ma le amiotonu, ona pati fiafia ai lea o se Tama Faalelagi [auā] o ona atalii outou.¹⁴

Ou te fia lapata’ia lenei faalapotopotoga tele o le perisitua mai lena agasala tele a Sotoma ma Komoro, lea sa faaigoaina o se agasala e lona lua i le agasala o le fasioti tagata i lona tulaga matuiā. Ou te tautala e faatatau i le agasala o le mulilua, o lea, e pei ona outou silafia, o le igoa lea na faaaoga e le Matai ina ua Ia fetalai e faatatau i agasala faalefeusua’i e lē faatagaina o le faitaaga faapea foi ma le mulilua; ma e le gata i lena, a o le agasala e tutusa foi le matuiā o le faatauatane lea [faaulugalii o tane po o tamaitai foi], lea ua foliga mai ua maua ai lagona faaosofia i le taliaina e tagata lautele i faiga faa-Papelonia a le lalolagi, ma e lē tatau ona auai tagata o le Ekalesia.

A o tatou i ai i le lalolagi, e le tatau ona avea i tatou ma ni ō le lalolagi. Soo se taumafaiga e faia e aoga po o fale faafiafia e faaalia ai ni faiga sese tau i feusuaiga, lea e leai se mea e faia ae faaosofia ai lagona e faata’ita’i, e tatau i le au perisitua o lenei ekalesia ona matua malosi ma lē faamaluelueina e [tetee] e ala atu i faiga faatulafonoina uma lava e mafai ona faaaoga.¹⁵

O se atalii o le Atua, aemaise lava se tasi e tauaveina le perisitua ma toaga i le Ekalesia, e mafaufau i ana meaalofa o mana e foafoa ai mai le Atua, faapea ua na o se mea taalo, pe faapea foi o a la fegalegaleaiga ma lana manamea ua na ona faamalie ai o ona lagona tuinanau, ua ia taalo i le taaloga a Satani, o lē ua iloaina lelei o lea amioga o le ala moni lea e faatama’ia ai le tulaga aupito sili e mafai ona maua ai le mafutaga ma le Agaga o le Alii.¹⁶

E mafai faapefea e matua ona aoao a latou fanau ia malamalama ma ola ai i le tulafono o le lēgaviā?

O le aoaoga aupito sili ona lelei i le ekalesia e faia lea i totonu o le aiga, o iina ua i ai le matafaioi i le tama ma le tina i le aiga e aoao ai a la’ua fanau a’o iti lava e uiga i mataupu faavae o le faatuatua, salamo, talitonu i le Faaola, o uluai mataupu faavae o le ola mama, amioatua, mamalu, ma isi. O le malosiaga aupito sili e mafai ona maua e fanau i le aloese mai nei mea o le lalolagi o le popole lea ina ne’i leai ni o latou nofoaga i le li’o faaleaiga e faavavau. Afai na aoaoina a’o iti ma lo latou tulaga talavou e alolofa i le aiga ma ava ma migao i le aiga, o le a latou mafaufau ma saga mafaufau ae latou te le’i mananao e faia se mea e taofia mai ai i latou mai le avea ma nisi o lena aiga e faavavau. Mo i tatou, o le faaipoipoga, o le fanauina o fanau, lēgaviā, ma le amioatua o nisi ia o upumoni aupito taua ua tatou maua—o mea e aupito sili ona taua.¹⁷

Pe ua tatou faamautinoaina ea o le atinaeina o lena tamaitiiti ua tuuina mai i la tatou tausiga, tatou te lē i tuua lava o ia e aunoa ma le aoaoina atu i ai, o le “faapefea” ona ia faia e faavae mai o tatou aafiaga? I ona tausaga na tuputupu a’e ai, pe sa tatou faataatiaina ea le faavae ma le faavaa mo se olaga malosi, faamanuiaina, ma le fiafia, pe sa tatou tuua uma lava e aoao ma le lē mautonu e foia faafitauli i soo se auala seia i’u ina maua se ala e talafeagai, ma faamoemoe o le a puipuia e le Atua la tatou tama pele a’o feagai o ia ma aafiaga?

Atonu o le a faamanino atu i se tala moni le manatu lea ou te taumafai e ta’u atu. … Sa i ai se pailate talavou sa lele na o ia i luga a’e o le malae vaalele i se taimi faaa’oa’oga. … s a faafuasei ona ‘e’ē mai le leitio o fesootaiga i le alii ofisa e faafoeina le ‘olo: “Ua lē mafai ona ou vaai! Ua ou tauaso.” Pe a na faapea e gatete foi lē na faafoeina le ‘olo faatonutonu, semanu e mautinoa lava le pagatia o le taulealea pailate faapea foi le vaalele tauagata; peitai, o le mea e laki ai, o le alii na faafoeina le ‘olo faatonutonu, o se tagata ua i ai le poto masani, ma o lē ua silafia mai lona poto masani, e i ai tulaga e mafai ai ona po le vaai a se tagata fou mo na o sina taimi ona o le popole tele. Sa talanoa filemu atu le alii ofisa lea i le taulealea sa i luga i le ea, ma faatonutonu atu i ai le faiga e faataamilomilo lemu ai i luga a’o le taimi foi lea sa faatonuina ai masini mo faalavelave faafuasei e ave ane loa lava, ne’i tupu se faalavelave. Ina ua mavae ni nai minute o le atuatuvale ma sa foliga mai i tagata uma na maimoaina e faaumiumi, sa tuu ifo e le pailate uili o lona vaalele i le malae ma sesee atu ai loa ma tu. Sa faavave atu e avetaavale o le taavale a le falemai le taulealea i le falemai o le fitafita mo togafitiga.

O le a se mea semanu e tupu pe ana popolevale le alii ofisa o le ‘olo faatonutonu pe lē faia foi lona tiute, pe lē iloa foi ona taulimaina nei ituaiga faalavelave faafuasei? O le tali, o le mea foi lava lena semanu e tupu, lea foi e mafai ona tupu [i se talavou] pe a aunoa o ia ma fautuaga poto o le poto masani pe a feagai ma faalavelave matautia e lē masani ai. O ia mea uma, o le a matua faamanu’alia ai le ola, po o le faatama’iaina foi, ma o le avanoa foi e faataunuuina ai le mea silisili o le a pagatia. …

Ma’imau e pe ana lagona e tina uma le tagi faamomoiloto ma fesili a si teineitiiti pele, o lē sa moemiti mo se faaipoipoga i le malumalu a’o talavou ma sa toetoe lava a oo i ai, a ua solia le tulafono o le lēgaviā ma o le taimi nei. … ua matua mafatia lava lona mafaufau i taimi uma. O ana fesili lava nei: “E faapefea ona ou iloa ua ou i ai i se tulaga mata’utia? Na lē ia te a’u i se ā le malosi ou te teena ai?” E faapei lava o le pailate na tauaso, sa faapena foi ona lele tauaso lea tamaitai, ae, o le mea e leaga ai, sa leai se tagata i le ‘olo faatonutonu e taialaina o ia ina ia tulaueleele saogalemu mai ona tulaga faigata. Ma’imau e pe ana mafai ona ia talanoaina ona faafitauli i se tina poto!

Pe ua pisi tele ea le tina i ana galuega faale-Ekalesia po o ana feau i le fale po o fegalegaleaiga ma isi tagata po o kalapu ua le mafai ai ona atina’e se mafutaga vavalalata e mafai ai ona talitonuina e lana tama teine o ia i nei mataupu paia faapea? Atonu foi o lea tina sa lava ia te ia le aoaoina o lana tama teine i mataupu tau i le atamai e faatatau i nei mataupu ma’ale’ale, ae e masani, ona uuna’ia ai tamaiti aoga e faata’ita’i. Atonu na te le’i iloaina, o totonu lava o lona potu malolo, i aso taitasi, e ala mai i le leitio, o mekasini, ma le televise ona oo mai manatu taufaasese o le alofa ma le olaga, ma faaipoipoga, ae ua sui foliga, ma e tele taimi e sese ai le autalavou faapea o le ala lea i le fiafia.¹⁸

Outou na tina, ia mafuta vavalalata ma a outou tama teine. I le taimi o laiti, aua nei e faatagaina se isi tagata e ta’u atu ia te i latou mea e uiga i le foafoaina o le tagata. O le taimi lava e amata ai ona tuufesili lau fanau laiti, o le fanau iti e fesili e uiga i nai mea iti, ia nofo i lalo ma talanoa i ai e uiga i mea e tusa ai ma lo latou malamalama. Ona latou faapea mai lea, “Ia Tina, ua lelei.” Ma e le umi foi pe a oo ina talavou, o le a toe o mai foi i le taimi lona lua, o le taimi lea ua fai si malamalama i mea o le lalolagi. Ona amata ai lea ona eva faamasani ma uo, ma o fea o le a o i ai mo se fautuaga? Afai na e faia lou tiute, o le a o mai ia Tina e fesili mo se fautuaga e uiga i lea mea ma lea mea, ma a oo i le po o lana faaipoipoga, o le a ia sailia foi se fautuaga mai lona tina ae lē o fafine o le aualatele.

O outou foi tamā, ia faauo ma o outou atalii. Ia aua lava ne’i e tuliesea lou atalii pe a manao o ia i sau fautuaga i mea e manao e te talanoa atu ai. O iina o i ai le saogalemu i le aiga. O iina e i ai le saogalemu o a outou tupulaga talavou. Aua nei e aveeseina mai ia i latou lena tulaga saogalemu, o outou na tamā ma tina.¹⁹

O se tasi o mea e ao ona tatou fia i le aoaoina lea o tupulaga talavou, o le faamasani lea o i latou i le ala e faafetaia’ia ai se faaosoosoga e oo mai i se taimi e le o i ai se puipuiga. …

O le tagata e i ai le matafaioi autu, o le tamā lea o le taulealea. E le faapea e tatau ona ala a’e le tamā i se taeao ona valaau lea i lona atalii e sau i tafatafa o lona moega, ona ia faamatala atu lea i ai mea uma o le olaga, i se sefululima minute. E le o le mea lena e manaomia e le taulealea. Na te manaomia se tamā e tali atu pe a manao o ia e fesili atu i ni mea e ‘anagata le uiga. O loo atugalu o ia i le fia iloa, o loo fia iloa foi e ia.

Afai e tautala sa’o ma faamaoni lona tamā, ma faamatala atu i lona atalii i le mea e gata mai ai lona atamai a’o tuputupu a’e, o lena tamā o le tagata lea o le a toe foi mai i ai le atalii mo se fautuaga i tausaga o mulimuli mai. O le a avea lena tamā ma taula o le agaga o lena taulealea, a’o aumaia e le tamā mai lana api o le poto masani ia lesona e mafai ona ia tuuina atu i lona atalii e fesoasoani ai, e pulea lelei mai avanoa e ono mafai ona pa’u atu ai i lena mailei mata’utia i se taimi e le o i ai se puipuiga.²⁰

Ma’imau e pe ana mafai ona ou uuna’ia outou i le asō, e tatau ona outou savavali ese i aso taitasi mai le alalaupapa maluelue [i luga a’e o] mea faalelalolagi ma le agasala o loo tafe e pei o tafega mamafa o i lalo ifo, ma’imau e pe ana faapea a outou fetaia’i ma le tiga o le masalosalo ma le atuatuvale ma ua mafua ai ona outou lē tatalo ma faatuatua ma alofa, ona mafai lea ona outou faalogo mai i lo’u leo o se tasi o loo tauvalaau atu ia te outou mai mea se mea mamao, “Ia faatuatua—o le ala lenei—auā o loo mafai ona mamao atu la’u vaai nai lo outou.” Ou te tatalo i le Atua ia mafai ona outou faalogoina i le aso le alofa o loo tafe atu i lo’u agaga i o outou [agaga], ma iloa lo’u alofa tele mo outou taitoatasi a’o outou fetaia’i ma faafitauli o le aso. Ua oo mai le taimi ua tatau ai ona tu le tagata i ona lava vae. Ua oo mai le taimi e lē i ai se alii po o se tamaitai e toe ola i se malamalama e nono mai se tasi. E tatau ona taialaina tagata taitoatasi i le sulu po o le malamalama o i totonu ia te ia lava. Afai e lē o ia te oe, o le a e lē tu.²¹

Fautuaga mo Suesuega ma Talanoaga

Aisea e tatau ai ona mama o tatou mafaufauga pe afai e tatau ona tatou tausia le tulafono o le lēgaviā?
O a faamanuiaga e maua e i latou e ola mama ma amioatua?
Aisea ua avea ai le ola lē mama ma ala i le faatafunaga e le gata i la le tino ae faapea foi i la le agaga? E faapefea ona avea le ola lē mama e faapei o le sola ese “mai le tulaga moni pe o ai moni lava i tatou”?
O le a le matafaioi a i latou e umia le perisitua i le puipuiga o i latou lava ma ē pele ia i latou mai tulaga matautia o le ole lē mama?
O a mea e tatau ona aoao e tama ma tina i a latou fanau e faatatau i le mama faalefeusua’i? O a mea e mafai ona fai e matua ina ia mautinoa ai ua lava le talitonuga o a latou fanau e fetufaai atu ai mea ma i latou?
O a ni aafiaga o i le lalolagi i aso nei e mafai ona faaitiitia ai lo tatou tulaga e gafatia ai ona teena faaosoosoga ina ia ola lē mama? Aisea e patino ai le fautuaga faapea “e leai se alii ma se tamaitai e toe ola i se sulu po o se malamalama e nono mai se isi” i le tausia o le tulafono o le lēgaviā i le lalolagi i ona po nei?