Mataupu 20

O Le Leo Filemu ma le Itiiti o Faaaliga

A tatou ola i le talalelei, o le a tatou maua le malamalama, musumusuga, ma le taitaiga a le Agaga Paia.

Mai le Soifuaga o Heber J. Grant

Sa folafola mai e Peresitene Heber J. Grant, e faapea, “O isi mea uma lava e leai sona taua pe a faatusatusa atu i le mauaina o le agaga o le Atua e taitaiina au.”¹ Sa ia faia lenei saunoaga i le agaigai atu i le faaiuga o se olaga umi lea ua faamanuiaina ai o ia i le mafutaga a le Agaga Paia. Sa ia faapea mai i se tasi taimi, “Ou te iloa e pei ona ou iloa o loo ou ola, sa taitaiina au e le [Atua] mai lava i lo’u tamaitiiti, ma sa ia faafofoga ma tali mai i au tatalo, ma sa ou maua ni faaaliga … mai le Alii, ma ou taumafai ai e faataunuuina nei mea.”²

E faaopoopo atu i le mauaina o le taitaiga i lona olaga faaletagata lava ia, sa maua ai e Peresitene Grant faaaliga a o avea ma Peresitene o le Ekalesia e taitaiina ai le Ekalesia aoao. O le tasi o nei faaaliga na oo mai ae faatoa maea ona faamanuia lona tofiga o se Peresitene o le Ekalesia, ina ua ia saili atu mo le finagalo o le Alii i le filifilia o se sui fou o le Korama a Aposetolo e Toasefululua. A o ia mafaufau loloto i lenei matafaioi, na fefoifoiai lona mafaufau i sana uo lelei lava o Richard W. Young, o se tagata faamaoni o le Au Paia o Aso e Gata Ai, ma o se taitai aloaia. Na talanoaina e le Peresitene faatasi ma ona fesoasoani lenei faamoemoe, ma sa laua lagolagoina lana filifiliga. Ina ua ia maua mulimuli ane le lagona mautinoa i lenei mataupu, sa ia tusia loa le suafa o lana uo i luga o se fasipepa ma ia aveina atu le fasipepa i fonotaga a le malumalu i vaiaso taitasi faatasi ma le Au Peresitene Sili ma le Korama a le Toasefululua. Ae peitai, ina ua sauni o ia e tuuina atu le suafa mo le pasiaina e le Usoga, sa le mafai ona ia tuuina atu. Ma nai lo le tuuina atu o le suafa o Richard W. Young, sa ia tuuina atu le suafa o Melvin J. Ballard, o se alii na te le silafiaina lelei.3 Na faamatala mulimuli ane e Peresitene Grant le aafiaga faaleagaga o lenei mea na tupu ia te ia:³

“Sa ou lagonaina musumusuga a le Atua soifua i le taitaiina o au i lau galuega. Mai lava i le aso na ou filifilia ai se tagata ese e avea o se tasi o aposetolo, ae o lea sa i ai la’u uo mamae, sa ou iloa e pei ona ou iloa o loo ou ola, ou te agavaa mo le malamalama ma musumusuga ma le taitaiga a le Atua i le faatautaiga o Lana galuega i luga o lenei fogaeleele.”⁴

Aoaoga a Heber J. Grant

O le a avea le Agaga Paia ma a tatou aumea ma taiala i taimi uma, pe a tatou tausia poloaiga ma auauna atu i le Alii.

E tuuina mai e le Alii i le toatele o i tatou le leo itiiti ma le filemu o faaaliga. E oo mai e pei o le manino ma le malosi ua faapei o se leo maoae. E oo mai i tagata taitasi, e tusa ma lona manao ma lona faatuatua, o se taitaiga i vaega e faatatau i lona lava olaga.

O le Ekalesia i lona tulaga lautele, e oo mai ia i latou o e ua faauuina e fai ma fofoga o le Ekalesia i lona tulaga lautele. O lenei malamalama mautinoa lea ua tatou maua, o le agaga o le taitaiga a le Alii e mafai ona lagonaina i soo se tulaga lava o le olaga, e tusa ai ma o tatou manao ma lo tatou faatuatua, o le tasi lea o faamanuiaga silisili ua tuuina mai e le Atua i le tagata.⁵

Ou te fiafia… o tagata uma o le Au Paia o Aso e Gata Ai, o atalii ma afafine lotomaualalalo uma o le Atua ua latou taliaina le talalelei ma avea o se tasi o le Ekalesia a Iesu Keriso o le Au Paia o Aso e Gata Ai, ua mauaina le molimau a le Agaga Paia; o le meaalofa o le tautala i gagana, o le meaalofa o valoaga, o le faamalologa, ma isi meaalofa ma faamanuiaga, e maua i totonu o le Ekalesia, ma e le faapitoa na o alii e umia tulaga faaleautaitai i totonu o le Ekalesia. Ua ou faalogo i ni lauga e sili atu ona naunautai ma le malolosi ma nisi o lauga maoae i lou olaga, mai alii o e sa le i ai ni tofiga faaleautaitai. …

E le o se tofiga, e le o se tulaga faaleaoaoga na te aumaia le Agaga o le Atua; ae o le tausia o poloaiga a le Atua Silisiliese ma le mauaina o le lotomaualalo, ma le naunautai e faaaoga poloaiga a le Atua i o tatou olaga i aso taitasi ma a tatou talanoaga.⁶

Ou te talosaga atu ma le faamaoni ia te outou, au uo, ou te talosaga atu ia te outou ou uso ma tuafafine, ia te outou uma taitoatasi, ina ia tatou ola ina ia mafai e le malamalama o le agaga paia o le Atua ona avea pea ma a tatou aumea tumau, faapupulaina o outou mafaufau, faapupulaina o outou malamalamaaga, ma musuia i totonu ia te outou se naunautaiga e galue ma le mana atoa, faatasi ai ma le malosi atoa ua tuuina atu e le Atua ia te outou mo le faataunuuina o Ona faamoemoega.⁷

Ia outou saili le Alii ma o le a Ia faatasi atu ia te outou. Afai o le a tatou le saili atu i le Alii o le a leai se puipuiga mo soo se tasi o i tatou. E leai se alii po o se tamaitai e sailia le Agaga o le Atua ma mulimuli atu i ana musumusuga e mafai ona toilalo.⁸

O le faamoemoega o le toatele o tagata o le faataunuuina lea o mea uma e faamalieina ai le manao ma le tuinanau; ae peitai o tulaga moomia o le talalelei o mea ia e le faatagaina ai i tatou e faamalie i o tatou manao; e alagatatau ia i tatou ona ositaulaga le tagata mo ia lava, ia aloese ma lafoai ia manao. Pe a oo i le taimi tatou te iloiloina ai nei manaoga, e pei o le Upu o le Poto, tatou te iloaina ai, e ala i le usitaia o nei tulaga tatou te tuputupu ae ai i le malosi o le mafaufau, ma le malosi i le tino, ma o o tatou tino, o ni nofoaga malolosi faaletino mo le Agaga Paia o le Atua. O le a tatou tuputupu ae ma avea atili faapei o le Atua pe a tatou lafoai ma tuu i lalo o o tatou vae nei tuinanauga ma manaoga ia e le ogatasi ma le loto ma le finagalo o lo tatou Tama Faalelagi.⁹

Afai e le maua e se tagata le Agaga o le Atua, ia tuuina atu o ia e galue ma saili mo le alualu i luma o le malo o le Atua, ona maua ai lea e ia o le Agaga o le Atua.¹⁰

O le maualuga e te galue ai ma ou galue ai, i le tausia o poloaiga a le Atua, o le a faamanuiaina ai i tatou e ala i le malamalama ma musumusuga a le Agaga o le Atua Silisiliese.¹¹

Ua ou iloaina, pe a auauna atu tagata ia te Ia ma tausia Ana poloaiga, ma latou tuputupu ae i le malamalama o le upumoni, latou te tuputupu ae malolosi ma atamamai e ala i manuia e liligi mai e Lona Agaga Paia.¹²

Afai o le a tatou lafoai o tatou tiute, o le a tuua i tatou e le Agaga Paia, e tusa lava pe o le a le tele o le faamanuiaina o i tatou i taimi ua mavae.

E mautinoa lava, e pei lava o le tulaga a le ‘ai, o le a faavaivaia ma iu ai i le oti o tatou tino faaletino, e faapena foi o le le fafagaina o o tatou tino faaleagaga o le a oo mai ai le oti.¹³

Pe a avea le tagata ma tagata faatamala, avea ma tagata e le popole, pe a latou solia le Upu o le Poto, pe a latou le o atu i le lotu, pe a latou toilalo i le aoaoina o a latou fanau e ala i le upu ma faataitaiga o le Talalelei a le Alii o Iesu Keriso, ma latou liliuese mai le faatuatuaga, e aveesea le Agaga o le Atua mai ia i latou, ma tuua ai i latou i le pouliuli.¹⁴

I le avea ai ma ni tagata o le Au Paia o Aso e Gata Ai ua i ai molimau i le Talalelei, o la tatou matafaioi le faaalualuina i luma o lenei molimau e ala i le tausia o poloaiga a le Atua; ma, ou te faapea atu ia te outou, o le tagata e tuputupu ae [i le tausia o poloaiga] i aso taitasi o lona olaga, o le tagata lea na te faataunuuina tiute mama, faigofie, i aso taitasi, lea e avea ma Ana matafaioi. E le o le molimau sa tatou maua, e le o le tele o faaaliga na oo mai ia i tatou. O lea la, o tagata e sili atu i tagata uma o e na sili ona faamanuiaina e ala i le vaai atu i agelu, e oo lava i le vaaia o le Alii ma le Faaola o Iesu Keriso, e pei o Sini Rikitone ma Oliva Kaotui—e le i mafai ona avea nei faamanuiaga ma faaaliga maoae ma mea e tutumau ai ma le le mafaagaeetia nei alii i totonu o le Ekalesia. Peitai o tagata na tausia poloaiga a le Atua, o tagata na faatuatua ia latou tatalo, o tagata na taliaina ma lagolagoina le Perisitua a le Atua i taimi uma ma tulaga uma, o tagata o e na usitai i le Upu o le Poto, o tagata o e na totogiina a latou sefuluai, sa faamaoni pea ma faatuatua i taimi uma, ma e le i aveesea mai ai lava le Agaga o le Atua. Peitai, o i latou sa i ai i tulaga faigata, sailiili masei, inu ava, ma “faatalatalanoa lava, ” ma faifai mea faatasi ma faia fonotaga faalilolilo, ua latou manatu e le o lelei le faiga o i latou ma e le o lava le faaaloalogia o i latou—o nei vaega o tagata ua aveesea mai ai le Agaga o le Atua.¹⁵

E leai lava se vaega o Toeaiina ua tutulai i luma o le pulelaa ua ou faalogo i ai ma le fiafia tele, e leai nisi ua ou maua ai ni aafiaga loloto e pei o faifeautalai faamisiona ua faamaeaina misiona. Latou te foi mai i aiga ua faatumulia i le agaga o a latou misiona, ua faatumulia i le Agaga o le Atua ma le alofa i o latou uso a tagata. … Peitai, e foliga mai o le tele o tulaga vaaia, na o sina taimi puupuu lava e foi mai ai i le aiga, ae aveesea lo latou fiafia ma pupu loa i o latou olaga o aso taitasi, ma tavavaeina ai a latou galuega mo na o a latou lava fuafuaga faavavave.

E manino ma alagatatau mo oe ma au, pe afai tatou te faamoemoe e selesele taui o le auaunaga faamaoni, ona galulue ma le filiga i lou atunuu po o fafo foi i le talaiina atu o mataupu faavae o le Talalelei. E leai se tagata e mafai ona manatu ua au malosi ma malosi lona tino sei iloga na te maua faamalositino talafeagai; ma o lea lava foi mataupu ua moni e faatatau i le soifua maloloina o o tatou faatulagaga faaleagaga. O le tagata e alu i le kolisi ma ave se kosi e aoaoina ai mataupu faaletulafono, e le gata ina filiga o ia lava a o i ai i lena tulaga ina ia mafai ona faauuina i lana galuega ua filifilia, ae e tatau foi ona faaauau pea ona faaaoga o ia lava pe a uma ona faauuina, a le o lea, o le a avea o ia ma se loia e leai pe itiiti foi sona aoga. E faapena foi i le tagata o le a alu e talai atu le Talalelei ma avea ma se faifeautalai faamanuiaina; afai e le faaauau pea ona faamasani ma fiafia ia lava i tulaga faaleagaga o ona uso a tagata, o le a le umi pe mulimuli ane foi, pe a toe foi atu o ia i le aiga, o le a aveesea ai le Agaga sa ia te ia a o i ai i le galuega faafaifeautalai.¹⁶

Ina ua ou iloa le toatele o i latou o e sa sili ona faamanuiaina e le Alii, o e ua leai so latou popolega faaleagaga mo o latou uso a tagata, e faatumuina au i le lotomaualalo. E faatumuina au i le agaga o le agamalu ma faatasi ai ma se naunautaiga faamaoni, ina ia mafai ona ou saili ia iloa le loto ma le finagalo o le Atua ma tausia Ana poloaiga nai lo le na ona faataunuuina o ou lava manao.¹⁷

Pe a tatou aoao e uiga i le finagalo o le Atua e ala mai i musumusuga a le Agaga Paia, ua i ai ia i tatou se tiute o le faataunuuina lea i o tatou olaga.

O le tausia o poloaiga a le Atua e aumaia ai ia i tatou le malamalama ma musumusuga a Lona Agaga. Ma o le manao o o tatou loto o le fia iloa lea o le loto ma le finagalo o le Alii, ma o le a tatou tatalo mo le malosi ma le mafai e faataunuuina ai, o loo tatou mulimuli atu ai i tulaga aao o lo tatou Alii ma lo tatou Matai o Iesu Keriso.¹⁸

Ou te iloa e tofu i tatou uma ma vaivaiga, ma tatou te faia ma tautatala foi i le tele o mea e le tusa ai ma le silafaga a lo tatou Tama Faalelagi; ae peitai, afai na o le pau lava le mea tatou te mananao i ai nai lo mea uma o lenei lalolagi o le fiailoa lea o le loto ma le finagalo o le Atua, ma afai tatou te mananao i le malosi o le tino, afai e maea ona tatou iloaina le loto ma le finagalo o lo tatou Tama Faalelagi, ina ia mafai ona tatou faataunuuina i o tatou lava olaga, ou te iloa o le a fesoasoani mai le Atua ia i tatou, ma a o tatou tuputupu ae i le tele o tausaga, i le poto ma le malamalama o le a tatou tuputupu ae i le mana ma le tomai e faataunuuina ai Lona finagalo.¹⁹

A aunoa ma le malamalama ma le taitaiga a le Agaga o le Atua, o le a le mafai ona faamanuiaina le galuega a le Atua i luga o lenei fogaeleele; o le a solofa ma nutililiiina. Peitai o loo i ai i loto o tagata lena malamalama tumau lea e fusia ma faamalolosia faatasi ai i latou. Pe a latou faalogoina le siufofoga o le leoleo mamoe moni, latou te iloa le siufofoga, ma ua latou sauni ma naunau e mulimuli atu i ai.²⁰

E leai se isi mea o le a na aumaia lea lava olioli i soo se tagata nai lo le faia o mea ua avea ma a latou matafaioi, ma mea e talafeagai i le silafaga a le Atua. Ua tatou o mai i lenei lalolagi e faia le finagalo o le Alii, ma e tatau ia i tatou taitoatasi uma ona ola ina ia mafai ona tatou agavaa mo faaaliga a Lona Agaga, ma afai o le a tatou mauaina nei faaaliga o le a tatou maua le lototele ma le naunautai e faataunuu ai.²¹

E tatau i tagata uma o le Au Paia o Aso e Gata Ai ona saili mo lena malamalama ma musumusuga a le Agaga o le Atua, ma a uma ona tatou maua lea, ia tatou faaaogaina le malosi uma ua ia i tatou e galulue ai mo le alualu i luma o le galuega a le Atua. Aua nei faitauina i tatou i le vaega o tagata o e taumafai e vaavaai mo le itiiti o mea latou te mafai ona fai; ae e tatau ona maua i tatou i le vaega o tagata e taumafai e vaavaai pe o le a le tele o mea e mafai ona latou faia. Ia siita’i i luga ou faamoemoega.²²

Tau ina ia avea pea le malamalama ma musumusuga a le Atua ma o tatou taiala ma aumea faifaipea. Tau ina ia tatou tuputupu ae ma faatumuina i le Agaga o le Atua ma le molimau o le Talalelei, ma le mana ma le malosi e faataunuuina ai faamoemoega o lo tatou Tama Faalelagi iinei i le fogaeleele; o lau tatalo ma lou manao, tau ina ia tatou tuputupu ae i le naunautai e faia faapea.²³

Fautuaga mo Suesuega ma Talanoaga

Aisea e taua ai le malamalama o faaaliga e oo mai i tagata taitoatasi e tusa ai ma o latou manao? O a ni auala e mafai ona taitaia ai e faaaliga ia matua, faiaoga, ma taitai o le Ekalesia i a latou matafaioi patino? O le a se mea e mafai ona tupu mai pe a faapea mai tagata ua latou maua faaaliga e sili atu i a latou matafaioi?
Aisea e avea ai le usiusitai i poloaiga ma se mea e manaomia ina ia tatou maua ai le mafutaga faifai pea a le Agaga Paia? Aisea tatou te maua ai aafiaga a le Agaga pe a tatou “galulue ma saili mo le alualu i luma o le malo o le Atua”?
E mafai faapefea ona tatou iloaina “le leo filemu ma le itiiti o faaaliga” ma iloa gofie lea leo mai isi aafiaga? (Tagai MFF 6:15, 22–23; 8:2–3; 11:13–14.)
O a nisi o aafiaga e mafai ona e faasafua mai sa e mulimuli ai i musumusuga a le Agaga? Pe a e mulimuli i musumusuga a le Agaga Paia, e mafai faapefea ona e maua ai le toafilemu ma le taitaiga i lou lava olaga? i lou olaga faaleaiga? i ou tofiga i le Ekalesia? i lau galuega?

couple praying — “E leai se alii po o se tamaitai e sailia le Agaga o le Atua ma mulimuli atu i ana musumusuga e mafai ona toilalo.”