Mataupu 10

O le Mana o Faataitaiga

I le tauaveina atu o o tatou talitonuga ia faaaogaina i o tatou olaga i aso taitasi, ua tatou fesoasoani e faamalosia le igoa o le Ekalesia ma musuia isi ia ola i le talalelei.

Mai le Soifuaga o Heber J. Grant

I se saafiafiga ia Peresitene Heber J. Grant, na tusia ai e Elder John A. Widtsoe o le Korama a Aposetolo e Toasefululua e faapea, “O Lona Olaga o se faataitaiga mo tagata uma.”¹ Na saunoa foi Elder Samuel O. Bennion o le Au Fitugafulu i le faataitaiga na faia e Peresitene Grant: “O loo galue o ia ma le naunautai i mea lelei mo le galuega maoae a le Alii; ua na o le Atua, ua poloaiina o ia ma ua ia faia le faataitaiga lelei mo tagata, ma o le ala lea ua atili ai ona lelei ma mamalu le galuega.”²

E le gata ina faatuina e ia lava se faataitaiga amiotonu, ae na aoao mai foi e Peresitene Grant e mafai e uso taitasi o le Ekalesia ona ola i se auala e maua ai le viiga ma le mamalu o le galuega a le Alii. Na ia faapea mai, “O le aoao po o le faifeau sili ma le matagofie i le Au Paia o Aso e Gata Ai, o se alii po o se tamaitai e ola i le talalelei a le Alii o Iesu Keriso.”³

A o galue auauna atu o se tasi o le Korama a Aposetolo e Toasefululua, na maua e Elder Heber J. Grant se tusi mai se uo e le auai i le Ekalesia. I se saunoaga i le konafesi aoao, na faitau mai ai e Elder Grant ni vaega o le tusi e faamamafa mai ai le manaomia ona faia e le Au Paia o Aso e Gata Ai ni faataitaiga lelei:

“ ‘Lau Heber Pele:

“ ‘… E te silafia, e le gata ina ua leva ma mafana le ta faigauo valalata, ae e faagaeetia lava foi au i le moni ma le faamaoni o lagona faalelotu o alii ma tamaitai e tutusa o outou talitonuga. O le tele o taimi ou te faapea ai, i talanoaga, na o le pau tagata lotu ou te iloa o lo o ola e tusa ma mataupu faavae o le talalelei o lo o latou aoao mai, o Mamona o Iuta. Ma e sao lenei mea.’ ”

Ina ua uma ona faitau le vaega lea, ona faapea mai lea o le tala a Elder Grant: “Ou te matua faafetai lava ona e le o i ai i la’u uo se lisi o e le totogia ni sefuluai, … aua tailo pe mafai ona ia faapea mai ai ‘e na o le pau tagata lotu ou te iloa o lo o ola e tusa ma mataupu faavae o le talalelei o lo o latou aoaoina mai, o Mamona o Iuta.’ Ou te faafetai lava ona o Mamona na masani ma lenei alii, ua le na o ni Mamona i le igoa, ae o i latou moni lava o ni Au Paia o Aso e Gata Ai. Na ia maua lona lagona i Mamona uma mai e na latou masani; ma ou te tautala soo lava i luma o tagata ma faapea atu, o le tiute o tagata taitoatasi o le Au Paia o Aso e Gata Ai, o le faatulagaina lea o lona olaga ina ia avea lana amio ma mea e musuia ai tagata uma ia faaaloalogia o ia, ma avea lena ma mea e faatupuina ai le faaaloalo mo tagata uma lava. O lo o o gatasi lava ma aoaoga a lo tatou Faaola ina ia faapupula atu lo tatou malamalama i luma o tagata ina ia latou iloa ai a tatou galuega lelei, ma vivii atu ai i le Atua ma taitaia atu ai e taliaina le Talalelei a Iesu Keriso.”

Na faaauau le faitauina o le tusi, na faapea mai ai Elder Grant: “ ‘O le mea moni lava ona o le ola ai o tagata i lo latou talitonuga, o le mea lena o loo uunaia ai le faaaloalo. … E tauave e o outou tagata o latou talitonuga i o latou olaga i aso fai soo, ma latou faatino ai e foliga mai ua latou manatu e taua o latou talitonuga. …’”

O le toe ta’ua o le tusi a lana uo, na faapea mai ai Elder Grant:

“O le fuaiupu lenei ou te naunau ina ia faamautuina i o outou mafaufau ma ia tamau ai:

“ ‘Afai e i ai se mea (ma sa vaseina e la’u uo i le laina uliuli ia upu “se mea”) i se talitonuga e aofia ai le faavavau o le ola i le lumanai, ua i ai i lena lotu mea uma (ma sa toe vaseina foi e la- ’u uo i le laina uliuli ia upu “mea uma.”)’

“Pe talitonuina ea e le Au Paia o Aso e Gata Ai lenei mea? Pe ua tatou iloa ea le malosi o faaupuga a la’u uo? ‘Afai e i ai se mea i se talitonuga e aofia ai le faavavau o le ola i le lumanai, ua i ai i lena lotu mea uma. Pe ua tatou talitonu ea ua i ai mea uma i lenei talitonuga e aofia ai se faavavau o le ola i le lumanai? Ma pe o tatou faia ea e pei ona fai mai la tatou uo, tatou te tauave o tatou talitonuga i o tatou olaga i aso fai soo, ma tatou faatino ai e pei ona tatou manatu e taua o tatou talitonuga?”⁴

O Aoaoga a Heber J. Grant

Tatou te tauave i o tatou tauau le igoa tauleleia o le Ekalesia.

Ua iloa nei i tatou i mea nei—faamaoni, o ni tagata e matau i le Atua; ma e tusa ai ma lo tatou ola ai i le Talalelei, i le iloa e moni, o le a faaauau ona tatou taofia faamatalaga le sao, fausia le tauleleia, ma faalatalata mai ai isi tagata ia i tatou.

E oo mai lenei tulaga aua o le mea moni lava, ua ia i tatou le malamalama, ma o le toatele o o tatou tagata ua latou ola e tusa ma le malamalama ua latou maua. O o tatou tagata taitoatasi o i ai, e tauave i luga o ona tauau le igoa tauleleia o lana Ekalesia, ma a o e soifua ma ou ola ai i le Talalelei a Iesu Keriso, tatou te aumaia le faaneetaga o le galuega a le Alii lea ua toe faavaeina i luga o lenei lalolagi i lenei augatupulaga.

Ua ou matua faafetai lava aua o le tulaga lenei, ma ua faatumulia lou loto i le faafetai i le Alii mo le suiga tele ua oo mai, ma ou te faamoemoe o alii ma tamaitai uma o e ua avea ma tagata auai o lenei Ekalesia, ia mafai ona musuia ia faia lana lava faaiuga ia faia i le mea e gata mai ai lo latou iloa ma le malosi o le a latou ola ai i lenei Talalelei ina ia avea o latou soifua ma auala e aoao atu ai le moni o le talalelei.⁵

O faitioga faasaga i le Ekalesia, o le ma’ema’ea ma talapepelo e uiga i o tatou tagata i le aotelega, ua toe itiiti lava muta aua ua iloa e tagata ia naunautaiga o o tatou loto, e leai so tatou ita e oo lava i e latou te fai mai upu leaga ia i tatou. Ua tele taimi e fesoasoani mai ai le Alii ia i tatou ia faauo atu i e na avea ma o tatou fili. Ua latou iloa soo se tasi ua taua o se Au Paia o Aso e Gata Ai moni, o se auauna o ia a le Alii ua naunau ina ia iloa le mea ua finagalo le Alii na te faia, ma e ui o o latou lava manaoga atonu e tele se eseesega mai o tatou manaoga, ae ua iloa e tagata so o se tasi ua taua o se Au Paia o Aso e Gata Ai moni lava, e tatau ona faatuatuaina i mea uma lava aua ua ia naunau ia iloa le manatu ma le finagalo o le Atua. Atonu e latou te lagonaina e i ai vaivaiga faaletagata, a e ua latou iloa lo tatou faamaoni ma le amiosa’o.⁶

Alu i so o se mea e te fia alu i ai i toeaiina o Isaraelu, ia malaga mai le tasi faatausiusiuga o le Ekalesia e oo atu i le isi. Ma o le a e maua se molimau o lo o mumu pea i loto o Au Paia o Aso e Gata Ai, o lenei galuega o le galuega a le Atua Silisiliese ma o lona Alo o Iesu Keriso na faavaeina lea. E te mauaina lenei molimau, e te faalogo i le tuuina atu, a e pe o tatou ola ea o ni Au Paia o Aso E Gata Ai? Pe o tatou ola ea e tusa ai ma mea e tatau ona tatou ola ai, pe a faatusatusa i le maoae o le molimau na tuuina mai ia i tatou? Po o tatou tausia ea Ana poloaiga ia e tatau ona tatou faia? O lo o tatou tauaveina le igoa tauleleia o le Ekalesia, tatou uma lava taitoatasi.⁷

Ia faamanuia atu le Alii ia manuia tagata o Siona. Ia mafai ona tatou tausia lea i se auala ma se faatinoga e mafai ai e tagata uma i le vaai mai, i a tatou galuega lelei uma, lo tatou faamaoni, ia mafai ai ona taitai atu ia faaaloalo mai ia i tatou e tusa lava pe auai i lo tatou faatuatuaga po o le leai foi.⁸

O tagata o le Au Paia o Aso e Gata Ai e faia mea sese, e mafai ona tauvalea ai i latou lava faapea foi ma le Ekalesia o le upumoni.

Ou te faamautuina faapea, so o se Au Paia o Aso e Gata Ai e faia se mea sese, e le gata ina tietie i ona luga lena sese, ae faapena foi ona i ona luga le tauvalea na ia aumaia i le ekalesia. Afai e inu ma onā se tagata o le ekalesia, atonu e i ai se tagata e vaai i ai ma o se faataitaiga muamua foi lea o se Mamona e vaai i ai. E faasinosinomia o ia o se Mamona, ma o ana amioga foi o le a faapea ai e faapena uma foi isi Mamona. O le tagata la sa vaai i lea tagata onā o le a faapea mai, “Afai o uiga ia Faamamona, ou te le manao ai, ” ma pe a faalogo o ia o le a lauga se Mamona, o le a ia alu ese mai ai. O lona uiga, e tele agasala e fuafua e tapunia ai loto o tagata mai le Malo o le Atua.⁹

E itiiti lava se aoga o le aoao atu ma tautala atu sei vagana ua tatou ola i ni olaga ua ogatasi atoatoa ma a tatou aoaoga.¹⁰

Sa i ai se taimi, na tuuina atu ai e se tasi se lauga matagofie. Mulimuli ane na faapea mai se tasi o ana uo: “E te iloa oe, e ese le matagofie o le lauga, e matua maoae lava, ae e matua leotetele naua mea e te faatinoina, o le ala lea sa ou le lagonaina ai sau upu.”¹¹

Na ou faalogo i se tasi tagata sa auai atu i se taumafataga tele o talanoa atu i se tasi tagata e uiga i le faatuatua o le Au Paia o Aso e Gata Ai. Na ia faapea, “Oka, o tagata ‘Mamona’, e ola i aoaoga a lo latou talitonuga, latou te le faaaogaina lauti, kofe, tapaa, po o le ava malosi.” Na faapea mai le isi tagata, “Ou te le talitonu i lena mea.” Na tali atu i ai le tagata lea, “Se [o la’u tala] sa’o.”

O ia tagata e toalua e le o ni “Mamona” sa nonofo faatasi i se laulau i lea taumafataga. Sa sau loa i totonu le tagata “Mamona.” Ona faapea mai lea o le tagata na puipui i “Mamona”, “O lea ua sau le Mamona. O le a tatou nonofo faatasi. Sau ta peti, o le a ia le inuina se kofe.” Ua talia le peti. Sa inu e le “Mamona” le kofe! Ina ua agai atu i la’ua i fafo, sa faapea mai le na faiaina i le peti, “Ou te le toe talitonuina le tagata le la, sa fai mai e talitonu na tuuina mai e le Atua se faaaliga e ala mai ia Iosefa Samita, e ta’u mai ai i tagata e aua nei o latou faaaogaina nei mea, a o lea ua sau i i ma faailoa mai i luma o tagata lona le usitaia o aoaoga a lana perofeta. Sa ou talitonuina le tagata le la, a e o le a ou le toe talitonuina lava o ia.”¹²

Pe a tatou ola ai i o tatou talitonuga faalelotu, e susulu atu a tatou faataitaiga lelei e fai ma malamalama i le lalolagi

Ou te manao e fai atu i le Au Paia o Aso e Gata Ai e tatau ia i tatou, ina ua tatou mauaina se molimau e uiga i le paia o le galuega ua tatou galulue ai, ia faatulagaina o tatou olaga mai i lea aso i lea aso ina ia aumaia ai le mamalu i le galuega a le Atua e ala i mea lelei ua tatou faia, o le faasusulu atu o lo tatou malamalama, e iloa ai e tagata a tatou galuega lelei, ma viia ai le Atua [tagai i le Mataio 5:16]. E leai ni tagata i luga o le fogaeleele ua auptio sili atu ona faamanuiaina e pei o le Au Paia o Aso e Gata Ai; e leai ni tagata ua sili atu ona tele le faaalia mai i ai o le agalelei ma le alofa ma le onosai o le Atua e pei ona tuuina mai i o tatou luga, ma ou te faapea atu o i tatou, ia sili atu nai lo isi alii ma tamaitai uma i luga o le fogaeleele, e tatau ona tatou ola i ni olaga e sa’o lelei ma faapei o le Atua.¹³

Na tau atu e le Faaola i e na mulimuli mai ia te ia o i latou o le masima o le lalolagi, a e pe afai e magalo le masima, e leai se mea e toe aoga i ai na ona lafoina i fafo ma solia e tagata. Na ia tau atu foi ia i latou o i latou o le malamalama o le lalolagi, e le mafai ona lilo le aai ua tu i luga o le mauga. Na ia tau atu ia i latou, e le tutuina e tagata le lamepa ma tuu i lalo o le mea e fua ai saito a e tuu i luga lava o le tuugalamepa ia pupula atu ai i e o i le fale uma. Ma na ia apoapoai atu ia i latou ia faapea ona pupula atu lo latou malamalama ina ia iloa ai e tagata la latou amio lelei ma ia viia ai le Atua. [Tagai i le Mataio 5:13–16.]

E faatatau lenei apoapoaiga ia i tatou. O i tatou o le malamalama o le lalolagi. Ua tatou maua musumusuga a le Atua Silisiliese. Ua tatou maua se molimau o le talalelei, ma ua tatou iloa o lo o soifua le Atua, o Iesu o le Keriso, o Iosefa Samita o se perofeta a le Atua. … O tagata taitoatasi ua taua o se Au Paia o Aso e Gata Ai moni o lo o i ai lea molimau o lo o ola i totonu o lona loto. O lenei la, po o tatou ola ea i se olaga, o galuega lelei o lo o tatou faia, o lo o aumai ai le viiga i le galuega a le Atua? Po o agavaa ea a tatou faataitaiga mo le mulimuli ai o tagata uma? Po o tatou faaali atu ea i a tatou faataitaiga o lo o i ai lo tatou faatuatua i le talalelei?¹⁴

Ou te faamautuina lava o le tiute aiai lava o tagata taitoatasi ma tagata uma o e ua avea ma uso o le Ekalesia a Iesu Keriso o le Au Paia o Aso e Gata Ai, o le faatulagaina lea o lona olaga ina ia agavaa ana faataitaiga e mulimuli ai tagata uma, ona aumaia ai lea o viiga ma faamanuiaga ia te ia lava ma ana fanau ma faapea ai foi ona maua uo mo le galuega a le Alii. E tatau ona avea lenei ma faamoemoega maualuga o so o se Au Paia o Aso e Gata Ai.¹⁵

Ia fesoasoani mai le Atua lo tatou Tama faalelagi ia i tatou ina ia tatou tumau ma faamaoni atu ia te ia ma ia mafai ona tatou faaali atu ai e ala i lo tatou faatuatua, lo tatou faamaoni i alii ma tamaitai, ma le ala atu i le faamaoni o tatou olaga o i tatou lava o auauna ma auauna fafine a le Atua, soifua o lo o taumafai mo le faasalalauina atu o le Talalelei a Iesu Keriso, o lau tatalo faamaoni lea.¹⁶

O a tatou faataitaiga lelei e mafai ona taitai atu ai isi e suesue le ata o le ola ma le faaolataga.

Ia mafai e Au Paia o Aso e Gata Ai taitoatasi ma i latou uma ona ola i le talalelei ina ia mafai ai ona folafola atu le upu moni e ala i lana faataitaiga.¹⁷

O le aoao sili ma le matagofie i le Au Paia o Aso e Gata Ai, o se alii po o se tamaitai e ola i le talalelei a le Alii o Iesu Keriso. “Faaali mai ia te au lou faatuatua e ala i au galuega” o le mea taua lea. Na faapea mai Iakopo o le a ia faaalia lona faatuatua e ala i ana galuega, ma o le faatuatua e aunoa ma galuega e mate. E pei o le tino e aunoa ma le agaga. [Tagai i le Iakopo 2:17–18, 26.] … E ala atu i la tatou galuega, o lo tatou maelega, o lo tatou faatuatua, ma lo tatou malosi, e mafai ai ona tatou aoao atu lenei talalelei. Ua amata ona iloa e tagata o le lalolagi, iloa ma malamalama o fua o le talalelei a Iesu Keriso, e pei ona aoao atu e se Au Paia o Aso e Gata Ai, o ni fua lelei. … O le tasi tulaga sili na faataatia e le Faaola o le lalolagi o le, “Tou te iloa ai i latou i o latou fua.” [Mataio 7:20.] Ou te luiina so o se tasi i le lalolagi e saili pe i ai ni tagata ua sili atu le fiafia ua i ai i totonu o o latou aiga, ua sili atu le toamalie, manuia, faamaoni i tulaga faapisinisi, ma sili le usitaia o tulafono a le Atua ma tagata, nai lo le Au Paia o Aso e Gata Ai. Ou te le o talanoa atu i le taimi nei e uiga i tagata Mamona o e le tausia poloaiga a le Atua.¹⁸

Ia faamanuia atu le Atua ia te oe ma outou uma. Ia mafai e i tatou taitoatasi ma i tatou uma o e ua i ai le molimau o le paia o le galuega ua tatou galulue ai, ona faatulaga o tatou olaga ina ia mafai e i latou e le iloa le upu moni, ona vaai i lo tatou maelega, lo tatou faatuatua, lo tatou lotomaulalo, ma lo tatou naunautai e auauna i le Atua, ona taitai mai i latou e sailiili i le upu moni ma tatou tuuina atu ia i latou. O lau tatalo ma le naunautai lea.¹⁹

O lo o soifua le Atua; O Iesu o le Keriso; O Iosefa Samita o le perofeta a le Atua soifua; o lo o ia i tatou le upu moni; ma ia mafai e i latou o e ua iloa lena, ona soifua ina ia mafai ai e i latou o e le iloa le moni ona sailiili i le ata o le ola ma le faaolataga ma maua le ola faavavau, o le meaalofa sili o meaalofa uma a le Atua i tagata.²⁰

Ou te tatalo i faamanuiaga a le Atua Silisiliese ia mafai ona tuuina atu ma tumau ai i uso uma o lenei Ekalesia, o Au Paia o Aso e Gata Ai o e faatuatua ma maelega. Ia mafai ona tatou talai atu le Talalelei a le Alii o Iesu Keriso e ala i le faamaoni, amiotonu ma le faamaoni i o tatou olaga. Afai tatou te faia lea, ona tatou mautinoa lea o le manumalo mulimuli.²¹

Ua ou faafetai e sili atu nai lo le mana uma ma le malosi ua tuuina mai e le Atua ia te au e mafai ai, ona ou faailoa atu mo se malamalamaaga o lo o soifua o ia, o le Atua o lo tatou Tama, ma o Iesu Keriso o lo tatou Togiola ma le Faaola.

Ia fesoasoani atu le Alii ia te oe ma au ma so o se agaga o e ua i ai lena malamalamaaga e galulue i le malosi uma ua ia i tatou ina ia aumaia isi i lea lava malamalamaaga e tasi, e ala i la tatou faataitaiga. E, o lou agaga faafetai i lo tatou Tama Faalelagi ina ua ia silasila i le talafeagai ona filifilia o Iosefa Samita e avea ma meafaigaluega i ona aao e toe faavaeina i le lalolagi le ata o le ola ma le faaolataga. Ia faamanuia mai le Alii ia te oe ma au ma i tatou uma, ma faamanuia so o se agaga faamaoni i le lalolagi, ma fesoasoani i so o se Au Paia o Aso e Gata Ai ina ia ola i se tulaga ia mafai ai e ana faataitaiga ona susulu atu ma fesoasoani i le aumaia o isi i le malamalama o le upu moni.²²

Fautuaga mo Suesuega ma Talanoaga

Aisea ua avea ai faataitaiga ma se aafiaga ua matua malosi?
O le a le uiga o le tauave i luga o o tatou tauau o le igoa tauleleia o le Ekalesia?
E mafai faapefea ona avea i tatou ma faataitaiga sili atu mo tagata o tatou aiga, o uarota po o tagata o paranesi, ma tuaoi?
O ai nisi tagata o a latou faataitaiga na aafia ai oe? Aisea ua avea ai nei tagata ma aafiaga malosi i lou olaga?
O a nisi o faataitaiga na avea ai galuega lelei a le Au Paia o Aso E Gata Ai na musuia ai isi e sailiili i le talalelei?

lighthouse — O faataitaiga a le Au Paia o Aso e Gata Ai, e mafai ona susulu atu e fai ma malamalama i isi.