Mataupu 17

Avea ma Tagatanuu Faamaoni

I le avea ai ma tagata o le Au Paia o Aso e Gata Ai, ua ia i tatou se tiute o le avea ma ni tagatanuu e usiusitai i tulafono ma faia mea uma tatou te mafai e fesoasoani ai i le faagaoioia o lo tatou malo i mataupu faavae faaleatua.

Mai le Soifuaga o Heber J. Grant

Na faamanuiaina Peresitene Heber J. Grant e avea ma se Peresitene o le Ekalesia i le 1918, o le tausaga na faaiuina ai le Taua I o le Lalolagi. Sa auauna ai o ia seia oo lava i lona maliu i le 1945, i le tausaga na maea ai le Taua lona II o le Lalolagi. Sa ia taitaiina le Ekalesia i le taimi o faafitauli tau i le tamaoaiga i le vaitaimi o le Pau o le Tamaoaiga, lea na pagatia ai aiga ma alalafaga i le lalolagi atoa lava. A o ia faamalosiau ma fesoasoani atu i le Au Paia i le vaitaimi o le pau o tulaga tautupe, o taua, ma le toe tau faaleleia talu mai le taua, sa fesuisuiai faigamalo i le lalolagi atoa. O nei suiga na aafia ai matafaioi o faigamalo i olaga o tagata taitoatasi, ma na aafia ai foi lagona o tagata e uiga i a latou faigamalo.

I le taimi la o nei faigata, sa lapataia ai e Peresitene Grant ia le Au Paia ina ia malolosi faatosinaga o mea latou te fai, i le faailoaina atu o mataupu e aafia ai o latou malo i le lotoifale, risone, ma le malo atoa. Peitai sa sili atu nai lo le na o le tuuina atu o ni lapataiga; sa na ia faataunuuina lava ana matafaioi. Mo se faataitaiga, e ui lava i le pisi tele o lona olaga i le avea ai ma se Peresitene o le Ekalesia, ae sa ia galue malosi i le lagolagoina o le Tapu, o se gaoioiga i totonu o le Iunaite Setete e le faatagaina ai le gaosia, faatauina atu, ma le tufatufaina atu o mea inu malolosi.

Sa faamaoni tele Peresitene Grant i tulafono a lona lava atunuu, ma sa ia aoao mai o le Faavae o le Iunaite Setete sa faatuina e le Atua. Sa ia saunoa mai, “mai lava i aso a o ou laitiiti, sa ou malamalama tatou te talitonu o le Faavae o lo tatou atunuu o se mea faigaluega musuia ma sa taitaiina e le Atua i latou na fausia, ma i latou o e na puipuia le saolotoga o lenei malo.”¹

I le taimi o le auaunaga a Peresitene Grant i le avea ai o se Aposetolo ma se Peresitene o le Ekalesia, o le toatele o le faitau aofai o tagata o le Ekalesia, o tagata sa nonofo lava i totonu o le Iunaite Setete o Amerika. O le mea lea, o le tele o mea na ia saunoa mai ai e uiga i le malo, e faatatau lava i le Iunaite Setete. Ae peitai, o ana aoaoga o ni faamatalaga o le upumoni e mafai ona aoga i le lalolagi atoa lava.

Aoaoga a Heber J. Grant

O Tagata o le Au Paia o Aso e Gata Ai e tatau ona lagolagoina o latou taitai faalemalo ma usitaia tulafono a o latou malo.

Ua faatalitonuina au e aunoa ma se masalosalo, o le tiute o tagata uma o le Au Paia o Aso e Gata Ai, o le lagolagoina o tulafono ma ola ai.²

Ua taua i lalo le folafolaga a le Ekalesia o loo i totonu o le Mataupu 134 o le Mataupu Faavae ma Feagaiga, e faatatau i lo tatou talitonuga i faigamalo ma tulafono lautele, e pei ona taliaina aloaia e ala mai i se palota na lagolagoina uma e le faapotopotoga lautele o le Ekalesia i le silia ma le seneturi ua mavae:

“Matou te talitonu ua faatuina malo e le Atua mo le lelei o tagata, ma o loo na faia tagata e tali atu mo a latou faiga e uiga i ia malo, i le faia o tulafono atoa ma le faaaogaina, mo le lelei ma le saogalemu o tagata uma.

“Matou te talitonu e leai se malo e mafai ona tumau i le filemu, vagana ua faavaeina tulafono faapena ma faamamaluina ina ia maua ai e tagata taitoatasi le faaaogaina saoloto o le loto fuatiaifo, o le aia ma le pulea o mea totino, ma le puipuiga o le ola.

“Matou te talitonu o malo uma e tatau lava ona maua ni ofisa faalemalo ma faipule e galueaiina tulafono o i ai, ma soo se e galueaiina le tulafono i le tonu ma le sao e ao ina sailia ma lagolagoina e le filifiliga a le nuu pe afai o se malo saoloto, po o le finagalo o le tupu.

“Matou te talitonu ua faatuina le lotu e le Atua, o tagata foi e tatau ona gauai ia te ia, ma ia na o ia lava, mo le faaaogaina o le lotu, sei vagana e avea o latou taofi faalelotu ma mea e uunaiina ai i latou e faalavelave i aia ma le saolotoga o nisi; ae matou te le talitonu e i ai le pule i tulafono faaletagata e aia ai i le faavaeina o tulafono faalelotu e saisaitia ai loto fuatiaifo o tagata, pe faatonu atu i faiga o lotu mo tagata uma po o tagata taitoatasi; e tatau ona taofia e e faipule faalenuu amioleaga, a e le pulea le loto fuatiaifo; e ao ina faasalaina le solitulafono, ae le taofia le saolotoga o le agaga.

“Matou te talitonu e ao i tagata uma ona lagolagoina ma faamalosia malo o loo latou nonofo ai a o puipuia i latou i a latou aia faaletagata e le mafesuiaiina e tulafono a ia malo, ma o solitulafono ma fouvalega e le tatau ai lava mo tagata uma ua faapea ona puipuia, ma e ao ina faasalaina tatau; o malo uma foi e i ai le aia e faatuina tulafono e tatau ai e tusa ma lo latou malamalama ina ia faamautu fuafuaga faamoemoeina a tagata uma; ae ui i lea, e faamamalu pea le saolotoga o le loto fuatiaifo.

“Matou te talitonu e ao ina faaaloalogia tagata uma i lona tulaga e pei o pule ma faipule, ua tofia mo le puipuiga o e mama, ma le faasalaina o e solitulafono; o tulafono foi e tatau ona faaaloalo ma ava i ai tagata uma, aua a aunoa ma ia tulafono o le a suia le filemu ma le lotogatasi i le pule faamalosi ma le matatau; o tulafono tau tagata ua faatuina mo le aoga o le faatulagaina o o tatou faamoemoe o tagata taitoatasi ma atunuu ma le va o le tagata ma le tagata, ma tulafono paia ua tuuina mai nai le lagi, ua faavae ai tulafono i mea faaleagaga, mo le faatuatua ma le tapuaiga, o ia mea e lua e tali atu ai e le tagata i Le na faia o ia.

“Matou te talitonu e i e ua pule, setete, ma malo le aia, ma e ao lava ina faatuina tulafono mo le puipuiga o tagata uma i le faaaogaina saoloto o o latou faatuatuaga faalelotu; ae matou te le talitonu e ia i latou le aia tonu e aveese mai tagatanuu lenei aia tatau pe faasa i latou i o latou taofi, a o loo faaalia le ava ma le faaaloalo i tulafono ma o ia taofiga faalelotu e le tauamiotonuina ai fouvalega ma pulega faalilolilo.

“Matou te talitonu e ao ina faasalaina le solitulafono e tusa ma le uiga o le agasala ua faia; o le fasioti tagata, fouvalega i le malo, gaoi, fao mea, ma le lepetia o le filemu, i itu uma, e ao lava ina faasalaina e tusa ma a latou faiga sese ma lo latou faamoemoe e faia le leaga i tagata, e tusa ma tulafono a lena malo ua faia ai le agasala; e mo le filemu ma le toafilemu foi o tagata uma e tatau i tagata uma ona tutu mai ma faaaoga lo latou malosi i le aumaia o e solitulafono i tulafono lelei ina ia faasalaina.

“Matou te le talitonu e tatau ona faatasia uunaiga faalelotu ma malo faalenuu, e faamalosia ai le tasi lotu ae faasaina le isi i ona avanoa tatau faaleagaga, ma faafitia aia tatau faalenuu mo ona tagata taitoatasi.” [MFF 134:1–9.]

Faamolemole ia manatua o lenei mea na lolomiina i le 1835, o se tulaga faatonuina o le Ekalesia, ma e lei suia lava.³

O le fonotaga a le Au Paia i lenei Konafesi Aoao [Oketopa 1940] ua maua ai o loo aafia pea le lalolagi i taua [o loo saunoa e uiga i le Taua Lona II o le Lalolagi]. O le faitau miliona o fanau a le Alii ua tigaina ma faavauvau. O loo latou lagonaina aafiaga uma o le tiga ma puapuaga e oo mai ona o ni taunuuga o le taua. …

E aafia o tatou uso ma tuafafine i soo se itu o nei taumafaiga faigata. E saisaitia i latou i itu uma i o latou atunuu e ala mai i o latou augatama, o latou aiga ma uso a tagata, ma lagona lotonuu mo o latou atunuu. …

E leai se isi mea e mafai ona fai e le Au Paia uma i soo se itu, na o le lagolago atu ma le lotonuu faamaoni i lena faigamalo. Peitai e tatau ona alu ae a latou tatalo i le ao ma le po ina ia mafai e le Atua ona faaliliu atu loto o o latou taitai i le filemu, ina ia mafai ona faamutaina le fetuu o taua.⁴

O le tulaga tatou te faaali atu ai le faaaloalo i o tatou taitai o malo o loo avea ai i tatou ma se vaega, ma puipuia ma lagolagoina le malo, o le tulaga foi lena, o i tatou o tagatanuu faamaonia faaletulafono, ma o le a faaaloalogia foi ma puipuia i tatou e o tatou malo.⁵

Pe a faatuina se tulafono i le pule tatau, ma avea o se tulafono faavae, o le a leai se tagata e mafai ona faapea mai o ia o se tagatanuu faamaoni, ae na te faaaluina ana tupe e fesoasoani ai i tagata e solia lea tulafono.⁶

Maimau pe ana mafai ona ou faamamafaina atu i loto taitoatasi o le Au Paia o Aso e Gata Ai, o e o le a mafai ona faafofoga mai i ai, lenei manatu [mai ia Aperaamo Linikone, o le Peresitene lona 16 o le Iunaite Setete, ] lea o le a ou faitauina atu:

“Ia totoina e tina uma o Amerika i a latou fanau iti e oo lava i pepe meamea o loo sii i o latou vae, le faaaloalo i tulafono ma aoaoga; ia aoao atu le faaaloalo i tulafono i totonu o aoga, i totonu o iunivesite ma kolisi; ia tusia foi i tusi o galuega po o faatonuga e faitauina ma tusi lesona a aoga amata; ia aoaoina foi e failotu i totonu o falelotu, ia folafola ma talai atu i totonu o fono faitulafono, ma ia faamamafaina i totonu o fale faamasino.” [Tagai i le “The Perpetuation of Our Political Institutions, ” sii mai i le The Speeches of Abraham Lincoln (1908), 6.]⁷

E tatau ona tatou auai i le filifiliaina o taitai lelei ma faatulagaina ni tulafono lelei.

Ou te tatalo mo lo tatou atunuu ma ou te ole i le Alii ina ia faamanuia mai i latou o e taitai i malo; i setete, i aai, ma itumalo. Ou te tatalo i le Atua ia musuia tagata ia latou usitai i Lona finagalo, ma ia filifilia ni tagata lelei e avea ma taitai; ina ia latou faagalo o latou eseesega faapolotiki ae saili mo ni tagata lelei e avea ma taitai, ae le o ni tagata e aufaatasi ma i latou o e solia tulafono a lo tatou atunuu. O se tasi lea o Mataupu Faavae o le Faatuatua o le usitai ma lagolagoina tulafono o le laueleele [tagai Mataupu Faavae o le Faatuatua 1:12]. Tau ina ia fesoasoani mai le Atua ina ia tatou faia lea mea.⁸

E masani lava ona mumumumu solo, ma ua ou faalogo foi i le muimui i le taimi nei, fai mai o le Au Peresitene o le Ekalesia a Iesu Keriso o loo avea ma taitai o le Ekalesia ma o loo umia le Perisitua, ua mananao i lea tagata ma lea tagata po o le isi tagata, e tofi e avea ma taitai.

O le mataupu e faatatau i le palota, e faatagaina e le Au Peresitene o le Ekalesia soo se alii, tamaitai, ma tamaiti ua aulia tausaga e tatau ai ona palota, e palota le tagata e tusa ma lona lava talitonuga. Ae matou te talosaga atu ma le faamaoni i alii ma tamaitai uma, ma le iloa lelei o loo i o latou luga le matafaioi e palota ai, ina ia saili atu i le Atua lo Tatou Tama Faalelagi e taitaiina i latou i tulaga faaupufai faapea foi ma tulaga faalelotu; ma ia tutu atu e puipui le mea tonu.⁹

Ou te matua tetee malosi i le i ai o ni aafiaga i le va o le Ekalesia ma le malo i le ala ua mafaufauina e tagata o le lalolagi e uiga i tagata o le Au Paia o Aso e Gata Ai, ma ou te le teenaina mo sina taimi, afai o au o le tagata o lenei Ekalesia, e i ai sau pule po o se malosi e mafai ona ou faaaogaina e taumafai ai ia maua mai le tagata sili ona lelei e auauna atu i tagata, o le a ou faaaogaina lena pule po o le malosi i aso uma ou te ola ai.¹⁰

O polotiki e matuai faamanatu mai ai lava ia te au le mai o le misela. E le tiga tele le misela pe a e inuina sina ti po o se mea e taofiofi ai le misela ina ia aua nei leaga tele. Ae afai o le a le togafitia, o le a matuai e tigaina ai lava, o le a samasama ai lou pau ma o nisi taimi e sesepa ai lau vaai. O le mea lea ia aua nei faatagaina polotiki e fai ma ou popolega sili. Ou te matuai talitonu lava i tagata e sili ona lelei e avea ma taitai. Ou te talitonu i tagata faamaoni, amiotonu ma lelei ua filifilia e nofoia tulaga ma tofiga.¹¹

E tatau i tagata uma o le Au Paia o Aso e Gata Ai ona tatalo i aso taitasi ina ia mafai ona fesoasoani le Alii ia mafaufau lelei, ma ia mulimuli i mataupu faavae tatau ma le faamaoni e aunoa ma lona mafaufau mo sona lava lelei, tusa lava foi po o vaega laiti e mananao ia faia mea mo a latou lava vaega faaupufai.¹²

E tatau ona faavaeina ma taitaia faigamalo i mataupu faavae amiotonu.

I le saunoaga faamavae a Siaosi Uosigitone [o le uluai peresitene o le Iunaite Setete] i tagata o Amerika, sa ia faapea ai:

“Mai uiga ma amioga uma lava e taitaiina atu ai i le manuia faaupufai, o le lagolagosua e aupito sili ona taua, o tapuaiga ma le amio mama. O se mea faavalevalea tele i se tagata le faapea mai o ia o se toa pe a taumafai e faavaivaia pe faatamaia le mataupu faavae sili ona taua o le fiafia o le tagata soifua, lea e fausia ai le lagolago maumaututu mo tiute o tagata ma tagatanuu.

“Po o o le a lava le malamalamaaga e mafai ona fai mai e oo mai o se taunuuga o aoaoga tulaga ese i mafaufau o tagata taitoatasi, e le tatau ona avea mafaufauga ma o tatou aafiaga e faapea ai e mafai lava ona i ai le amio mama i le atunuu e aunoa ma mataupu faavae faalelotu.

“Ia tatou faaeteete pe afai tatou te manatu e mafai ona tausia le amio mama e aunoa ma tapuaiga faalelotu.” [Tagai “George Washington: Farewell Address, ” i le William Benton, pub., The Annals of America, 21 vols. (1968–87), 3:612.]¹³

Matou … te tautino atu e le fiafia le Atua i taua, ma e faataunuuina e tusa o lona finagalo, le faia o faasalaga e faavavau mo i latou o e tauina taua ma le amioletonu.

Ua matou faamaonia, e mafai ona foia feeseeseaiga faavaomalo i auala [filemu] pe afai o le a galulue malo ma le le manatu faapito ma le amiotonu ma isi. Matou te talosaga atu i taitai o malo uma ma tagata uma ina ia faaleleia ma ia foia o latou feeseeseaiga, ina ia puipuia mai ai i le toasa o le Atua, aua ua ia fetalai mai o le a liligi mai lona toasa i luga o e amioleaga.¹⁴

E le fiafia foi le Atua i taua, po o le amioleaga lea e masani ona muamua mai ai. … i malo uma, matou te faapea atu, ia faaleleia ni o outou feeseeseaiga i ala o le filemu. O le auala lena a le Alii.¹⁵

E leai se tagata e mafai ona faia se mea le faamaoni, pe solia foi tulafono a lona atunuu ma avea ma se tagata moni o le Au Paia o Aso e Gata Ai. E leai se malo ma e leai ni taitai o malo e mafai ona faia ni mea leaga, ma solia a latou tautinoga, e aunoa ma le tausalaina i luma o le Atua ma tagata, e pei foi o isi tagata o e faia mea leaga. O le a manumalo lava le upumoni. E tatau ona avea ma upu tautu a tagata o le Au Paia o Aso e Gata Ai le faaupuga lea, “ia puipui le meatonu, e tusa lava pe o le a le ogaoga ma le faigata o le tauiviga.”¹⁶

Fautuaga mo Suesuega ma Talanoaga

O a ni auala e mafai ai e tagata o le Ekalesia ona galulue ma lagolago se faigamalo lelei?
Aisea e taua ai ona tatou faaaogaina a tatou aia e palota ai pe a tatou mauaina le avanoa? Pe a tatou maua le avanoa e palota ai, o a ni mea e mafai ona tatou faia e saunia ai i tatou lava mo le faataunuuina o lea tiute?
E mafai faapefea ona tatou fesoasoani i taitai o lo tatou malo ina ia galulue e tusa ai ma mataupu faavae lelei?
O a ni auala e mafai ai e tagata taitoatasi ma aiga ona fesoasoani i le faaleleia o o latou alalafaga?
O a ni mea e mafai ona tatou faia i totonu o o tatou aiga e faamalolosia ai tagata o aiga ia faaaloalo i tulafono?

person voting — I totonu o o tatou malo ma alalafaga, e mafai ona tatou faia mea uma e mafai e filifilia ai ni taitai lelei ma faamalosia ma faataunuuina tulafono lelei.