Mataupu 13

Mataupu Faavae o le Malupuipuia i Tulaga Tau Tupe

A tatou aloese mai aitalafu ma totogi a tatou sefuluai ma taulaga, e faamanuia i tatou e le Alii i tulaga tau tupe ma le faaleagaga ma tuuina mai ia i tatou le avanoa e atiina’e ai Lona malo.

Mai le Soifuaga o Heber J. Grant

Sa i ai se tulaga pagatia o le tamaoaiga na aafia ai le Iunaite Setete i le 1893, na tuua ai le selau ma selau o faletupe, kamupani auala nofoaafi, o ana e eli ai koale ma maa taua, ma isi pisinisi i ni tulaga ua matua leaga ai mea tau tupe. O lena faafitauli na taua o le, Popolega o le 1893, na faateia ai Elder Heber J. Grant ma le toatele o isi. O le taimi lea ua avea Elder Grant ma se tasi o le Korama a Aposetolo e Toasefululua, sa noatia ai o ia i aitalafu lea na tele tausaga na ia toe totogia ai. I se saunoaga na ia tuuina atu i lena taimi, na ia faapea mai ai: “Ou te manao e tau atu ia te outou o au, atoa ai foi ma nisi, ua sese. Aisea? Ona o lo matou naunautai e faaputu tupe o lea ua matou nofo aitalafu ai, ma o lea la ua le mafai ai ona matou vave totogia a matou aitalafu. … Ma o le taimi muamua lenei i lou olaga ua o mai ai tagata ia te au e totogi atu tupe o lo o ou aitalafu ai, ma ua ou talosaga atu i ai ina ia faaopoopo mai se taimi e totogi ai le aitalafu. Pe afai o le a faamagaloina au e le Alii i lenei taimi e tasi, ou te le toe oo lava i lenei tulaga o le le mafai ona totogi au aitalafu. Na amata ona avea au ma tagata nono tupe ina ua sefuluvalu o’u tausaga; ae maimau pe ana mafai ona ou totogiina atoa le mea o lo o ou aitalafu ai i le taimi nei, semanu ou te talitonu o le a ou maua le fiafia i faamanuiaga a le Alii, tusa lava po o le a, pe tele pe itiiti foi.”¹

Sa fautuaina e le Peresitene o le Ekalesia, o Heber J. Grant le Au Paia e uiga i le mataupu o le malupuipuia i tulaga tautupe, ma sa ia faaaogaina ona aafiaga ma le mulimuli i le faataitaiga a le na muamua atu ia te ia, lea ua ia sui tulaga ai, o Peresitene Iosefa F. Samita lea. Na tulimatai atu Peresitene Grant i mataupu faavae e lua: o le filemu e oo mai pe a tatou aloese mai aitalafu, ma faamanuiaga faaletino ma le faaleagaga tatou te maua pe a tatou totogi sefuluai ma taulaga. O Aperila 1932 sa ia aoao atu ai ia mataupu faavae i le konafesi aoao a le Aualofa. O le taimi lena ua goto ifo ai le Iunaite Setete i le atuatuvale o le Pau Tele o le Tamaoaiga, o se tulaga pagatia o le tamaoaiga ma le maualuga o le fuainumera o tagata e le faigaluega na aafia ai le lalolagi. Sa a’- oa’i e Peresitene Grant le Au Paia i le le faaaogaina o le fautuaga na latou maua mai ia Peresitene Samita:

“Pe ana faalogo tagata ua taua o le Au Paia o Aso e Gata Ai i le fautuaga na tuuina atu mai i lenei pulelaa e le ua ou sui taulaga ai, i lalo o musumusuga a le Alii, na valaau ma faamalosi atu i le Au Paia o Aso e Gata Ai ia aua lava nei nofo aitalafu, semanu e ui lava i lenei pau tele o le tamaoaiga, ae o le a itiiti se tulaga pagatia o le Au Paia o Aso e Gata Ai. … I lo’u lava manatu, o le mafuaaga autu lava o lenei mativa i le Iunaite Setete i lona aotelega, o le saisaitia o le tagata i ana lava aitalafu, ma le agaga o matematega sa i tagata.”

Sa faaauau lana saunoaga, na faamamafa mai ai e Peresitene Grant le manaomia o le aloese mai le nofo aitalafu. Na ia faamalosi atu i e sa faalogologo ia te ia ina ia totogi sefuluai ma taulaga, e oo lava i taimi pagatia i mea tautupe. Sa ia taua se taimi i le tele o tausaga ua mavae talu ai, na oo ai ina nofo aitalafu o ia ona o le faatauina o ni ona sea [shares] i le Falefaafiafia i Sate Leki, ma le faamoemoe ia laveaiina mai ai le fale mai le talepeina i lalo:

“Ou te manao i tagata uma o e lagonaina mai lou leo, ina ia aoga le aafiaga na o’o ia te au i le faatauina o sea i le fale faafiafia. [Mo le] 32 tausaga o lo’u olaga, … o tupe taitasi uma na ou galue ia maua na leiloloa lava ae lei maua. O se avega mamafa tele lea, i se tala faatusa, o le i ai lea ia te oe o se solofanua ua mate, a e faapea e te tauamoina le solofanua mo le 32 tausaga ona faatoa mafai lea ona e tanuina i le laueleele. O se tulaga matautia lea, ona o le aitalafu lava. Mai lena taimi, sa ou ola lava e tusa ma tupe na ou maua, ou te le’i toe aitalafu. …

“… Afai e i ai se tagata o lo o soifua e tatau ona faapea mai, ‘Ia alo ese mai aitalafu, ’ o lona igoa o Heber J. Grant. Faafetai i le Alii na mafai ona ou totogiina [au aitalafu uma], ma totogi uma e aunoa ma le talosaga atu i se tasi e faamagalo se isi vaega. Ou te le talitonu e mafai ona ou totogia e aunoa ma lo’u faamaoni atoatoa i le Alii. Soo se tupe lava ou te maua, o le aitalafu muamua ou te totogiina o le tupe lea a le Alii, ma ou te talitonu e aunoa ma se masalosalo, ana fai e faaaoga e tagata o le Au Paia o Aso e Gata Ai le fautuaga a le Perofeta a le Alii, ma pe ana o i latou o ni tagata e atoatoa i le totogiina o sefuluai semanu latou te le oo i tulaga ua latou i ai i le aso nei. Pe ana faapea latou te malolosi ma faamaoni i le totogiina o [taulaga anapogi] semanu ua mafai ona tatou vaaia ma tausia soo se tagata e tulaga pagatia i totonu o lenei Ekalesia.”²

Sa soifua Peresitene Grant i mataupu faavae na ia aoao atu, ma sa oo ina faamanuiaina o ia i tulaga tau tupe mo ia lava faapea foi le Ekalesia. A e sa faaeteete lava o ia e faapea mai e le aunoa, o le manuia moni e le maua i le tomai e sue tupe. Na ia saunoa mai: “E le mafai ona faapea ua manuia moni le tagata ua na ona faamanuiaina i le sailia o ana ‘oa, ae ua faaitiitia ai le alofa moni i lona loto, ma aveesea ai lena alofa mai ona uso a tagata: a o le tagata e ola ina ia sili le alolofa i ai o e latou te matuai iloa lelei o ia; ma e le gata ina silafia e le Atua ana galuega, ae faapea foi lagona loloto o lona loto, ma e alofa ia te ia: ua na o le ituaiga tagata lenei—e ui lava atonu e oti mativa—ae o se upu moni lava e mafai ona faapea ane, ‘e tatau ona faapaleina o ia i le pale o le manumalo.’”³

O Aoaoga a Heber J. Grant

O le soifua ai i mea ua tatou maua, tatou te aloese mai ai i noataga o aitalafu.

Afai e i ai se mea se tasi e aumaia ai le filemu ma le toamalie i le loto o le tagata, ma totonu o le aiga, o le ola ai lea e tusa ma mea ua tatou maua. Ma afai e i ai se mea e avea ma mea mamafa ma faavaivai loto, o le i ai lea o aitalafu ma tuutuuga tautupe e le mafai e se tasi ona gafatia.⁴

Ou te lapatai atu i tagata o le Au Paia o Aso e Gata Ai e faatau taavale ma mea e tatau ona ola ai pe a i ai tupe e faatau ai, ma aua tou te faanofo aitalafuina outou mo le tele o tausaga o lumanai. … Ou te fia fai atu ia te outou, o i latou e le manatunatu i lo latou lumanai, o i latou e aitalafu ona o mea masani e faaaoga i le olaga ma mea taugata o le olaga, ua latou faaee a’e avega mamafa i o latou lava luga ma o le a toe faaopoopo atu i ai ma le tului tele e tupu ai le faaletonu ma le faalumaina.⁵

Afai e umia e se tagata se meatotino ma e na te le totogia foi se tului, ma e faatoa faatau foi o ia pe a i ai tupe e faatau ai, o lona uiga o le toatele lava o tagata o le a sologa lelei o latou tulaga. … Tatou te faanofo aitalafuina i tatou lava mo le lumanai e aunoa ma le mafaufau i mea e ono tutupu mai—o ma’i, taotoga, ma isi mea faapena.⁶

E le mafai ona tatou iloa mea uma o le a oo mai i le lumanai. Ae e i ai le mea e tasi e mafai ona tatou iloa, o lenei, afai e i ai tupe i o tatou lima e faatau ai se leitio, taavale, po o se isi lava mea, ma tatou faatauina, tusa lava pe o le a le maualalo o lona taua, ae o le tatou meatotino lava.⁷

Ou te talitonu e toetoe o faafitauli ma faigata uma e o’o mai i le toatele o tagata, o le a mou atu pe afai latou te naunau e faataatia ese, mo se faataitaiga, la latou masani o le faaaoga o totigi silika [taugata], ae toe foi i le tulaga masani o le ofu i mea taugofie, ma le faigofie; aua le toe o i le iva vaesefulu o ata tifaga o loo i ai; ma ia toe foi i le faasoasoa tatau ma le pulea lelei o tupe.⁸

O le totogiina ma le faamaoni o sefuluai ma taulaga e aumaia ai faamanuiaga faaletino ma le faaleagaga.

Ou te manao e toe tau atu i le Au Paia o Aso e Gata Ai lo’u talitonuga maumaututu e fesoasoani le Atua lo tatou Tama faalelagi ma faamanuia ma tuuina atu le atamai i alii ma tamaitai, o e e matua faamaoni atoatoa ia te ia i le totogiina o a latou sefuluai. Ou te talitonu afai e oo se tagata i faigata o tulaga tau tupe, o le auala sili e tulai ese mai ai mai na faigata (ma ou te tautala atu mai mea na ou oo i ai, aua ou te talitonu e sili atu i le faatasi i lo’u olaga ona ou o’o i le loloto o tulaga ogaoga o mea tau tupe e pei foi o nisi tagata) o le matua faamaoni aiai lea i le Alii, ma aua lava nei faatagaina soo se tupe e o’o mai i o tatou lima e aunoa ma le tuuina atu i le Alii o le sefulu pasene o lena tupe.

E le manaomia e le Alii au tupe po o a’u tupe. O le usitai i le tulafono o le sefuluai ma foai mo falelotu o uarota, falelotu o siteki, o aoga, malumalusa, galuega faafaifeautalai ma o ia mea eseese, e manaomia mo lo tatou lelei. O ia mea ua na o ni lesona ua tatou aoaoina e faaagavaa ma saunia ai i tatou ia faapei o atua ma ia saunia ai mo le toe foi atu i le afioaga o lo tatou Tama faalelagi. O lesona lava ia o tulaga tautupe ua tuuina mai ia i tatou, o lesona lava ia e tasi o lo o tuuina atu i totonu o aoga i tama ma teine; o ia lesona e mo le manuia o le tama; e mo le manuia o le teine, e mo lo latou alualu i luma, e mo lo latou olioli ma le fiafia i le olaga a sau; aua o le malamalama ma faamatalaga uma tatou te maua, ma le tulaga faaleleia tatou te faia, o i tatou lava e manuia ai.

Ua faatuina e le Atua lo tatou Tama faalelagi ia tulafono ia alualu ai i luma ona tagata i le faaletino, o le faaleagaga, ma le atamai, ma o se tasi o tulafono aupito sili ona lelei i le lalolagi uma mo le lelei atili o Au Paia o Aso e Gata Ai, o le tulafono lea o le sefuluai. E toatele i latou o e talia ma ola ai i le talalelei ae ona o le tulaga e pei o le alii talavou ua tatou faitau ai i Tusitusiga Paia ina ua ta’u atu e le Faaola ia te ia, ina ua uma ona faapea mai le alii talavou “ua ou tausia ia mea uma, ” ia alu e faatau atu ana mea uma ma foai atu i e matitiva [tagai i le Mataio 19:16–22]. E toatele tagata e le mafai ona tumau i le talalelei ona o tulaga tau tupe ma mea o lo o manaomia mai ia i latou, ma ua latou faatagaina mea o lenei lalolagi ia ua latou taofimau i ai, e faoa mai ia i latou le mea alofa sili i lo mea alofa uma a le Atua, o le ola faavavau lea. Ou te faaviivii atu i le Au Paia o Aso e Gata Ai le tulafono o le sefuluai.⁹

O le tulafono o le manuia i tulaga tautupe mo le Au Paia o Aso e Gata Ai, i lalo o feagaiga ma le Atua, o le avea lea ma se tagata e totogi sefuluai faamaoni, ma ia le faoa mea a le Alii o sefuluai ma taulaga [tagai i le Malaki 3:8]. O le manuia e o’o mai ia i latou o e tausia le tulafono o le sefuluai. Ou te le o manatu i le manuia lea ua na o le manuia i tulaga tau tupe lava. … ae o le mea ua ou taua o le manuia moni, o se tasi o mea e aupito sili lona taua i alii ma tamaitai uma o lo o soifua, o le tuputupua’e lea i le malamalama o le Atua, ma le molimau, ma le mana e ola i le talalelei ma musuia o tatou aiga ia faia foi lea. O ituaiga manuia moni lea.¹⁰

Ou te matua talitonu lava o le faatuatua e aunoa ma galuega e mate ia, ma ou te matua talitonu lava e faamaoni le Alii i Lana fetalaiga ina ua Ia folafola mai na te toina mai pupuni o le lagi ma sasaa mai faamanuiaga ia i tatou pe afai tatou te totogi a tatou sefuluai [tagai i le Malaki 3:10].¹¹

Ou te talitonu e faamanuiaina tagata e tusa ai ma lo latou agalelei ma le limafoai. Ou te le o fai atu faapea o taimi uma lava o le a tele a latou tupe, pe a, nai lo isi tagata. Ae o se faaopoopoga o le faatuatua ma le molimau ma le malamalama i le paia o le galuega ua tatou galulue ai, o tagata ua faamaoni i le Alii i le totogiina o a latou sefuluai e sili atu lo latou tuputupua’e nai lo isi tagata, aua e le tuputupua’e lava i latou o e le faamaoni. E matua leai lava se faafesili i lou mafaufau. E le gata i lea, o lou valea ou te faapea atu ai ou te talitonu e faalauteleina e le Alii i latou o e totogi a latou sefuluai, ma e sili atu foi lo latou manuia pe a faatusatusa i lona aotelega, nai lo i latou o e le totogia ni sefuluai. Ou te talitonu o i latou o e agalelei ma limafoai [i a latou foai], e tuuina atu i ai e le Alii mafaufauga ma manatu, ma e sili atu ona saoasaoa le faatuputeleina o lo latou gafatia ma le mafai nai lo i latou o e limavale ma matauu. E ia te au lena faatuatua, ma na ia te au lea faatuatua mai lava i aso o ou laitiiti.¹²

Afai tatou te tuuina atu le vaegamea e tusa ma mea ua tatou maua, afai tatou te totogiina a tatou sefuluai, e tusa po o lea lava le itiiti o le tupe maua, … o le a faateleina e le Atua lo tatou Tama Faalelagi le iva tala mai le sefulu, po o le fasefululima sene o lo o totoe mai limafesulu sene taitasi, ma o le a lava foi ma totoe le poto e te maua e faaaogaina ai i le auala sili ina ia leai se tupe e leiloa ona o lou faamaoni.¹³

O le fua faatatau sili a le lalolagi i le manuia o le tagata o le mafai lea ona saili ma maua tupe. Ae ou te manao e tau atu ia te outou le Au Paia o Aso e Gata Ai, o le mauaina o tupe e le o le manuia moni lea. A o tuputupua’e le tagata ma faateleina i mea o lenei lalolagi, afai e le faaeteete, o le a le ia te ia le Agaga o le Alii, ma o le a tumau lona loto i mea o lenei lalolagi. Ma afai e le ia te ia le Agaga o le Alii, ma e le faamaoni i le Atua i le totogiina o ana sefuluai e pei ona ia faamaoni i le tuuina atu o mea i lana soa pe afai o la faipisinisi faapaaga, o le a faaitiitia le malosi o lena tagata, o le a faaitiitia lona mana, o le a faaitiitia le molimau a le Agaga o le Atua i totonu o lona agaga. E leai ma se masalosalo i lo’u mafaufau i lena mea.

E tatau ona tatou faamaoni i le Alii. O le faalavelave sili, o le toatele lava o tagata o e tuputupua’e ma faateleina mea i lenei lalolagi, ua tumau o latou loto i mea na, ma latou le maua ai le Agaga o le Alii. O lea, o mea ua faitauina e le lalolagi o manuia, o le toilalo lea; aua a amata ona galue se tagata mo se taui ae le mafai ona ia puipuia ae toeitiiti o lona olaga atoa na galue ai ia maua lena taui, o le mea moni, ua toilalo lona olaga. Ou te iloaina le toatele o tagata taitoatasi sa galulue ma mauaina nai tupe laiti, latou te matua faamaoni lava i le Alii, ma totogi le tasi vaesefulu o na tupe. Ae ina ua latou mauaina ni tupe tetele, sa latou totogia mai i le tasi pasene e oo atu i le lua po o le tolu pasene, ae le o le sefulu pasene. O le a le mafuaaga? Oka, e faatuputeleina le moomoo o le tagata i le tupe, e faatupula’ia ma faamalosia sei vagana ua faaeteete o ia, e pei lava o le faananau i se meainu malosi. E oo lava ina pulea o ia e le tupe, ma alofa ai o ia i le tupe nai lo lona alofa i le tupe mo na o mea lelei e mafai ona ia faaaoga i ai. Na te le mafai ona fuafuaina faalelei le taua o mea.¹⁴

O le sefuluai o le tulafono a le Atua, ma o le totogiina o sefuluai e aumaia ai le filemu ma le olioli i le Au Paia o Aso e Gata Ai o e faia lea mea. E i ai le mafanafana e o’o mai i le loto o le tagata o lo o matua faamaoni i le Alii, i lona tuuina atu lea o mea ua ia te ia mo le atiinaeina o le Ekalesia a Keriso, ma e faapena foi loto o i latou taitoatasi o e totogiina atoa sefuluai. O faamanuiaga uma taitasi o loo e olioli ai ma ou olioli ai, e mai le Atua ia. Tatou te tuuina atu ia te Ia le agaga faafetai mo le manava ola, ma ua ia tuuina mai ia i tatou mea uma ua tatou maua. Ua Ia poloaiina i tatou e faaali atu lo tatou agaga faafetai ma faailoa atu ia te Ia lona lelei e ala i le toe faafoi atu i le Ekalesia mo lona manuia ma le faalauteleina o le talalelei i nuu ma fafo atu, le tasi vaesefulu o mea tatou te maua, o ia mea uma e mai ia te Ia.

Ou te toe faapea atu, ou te matua le malamalama lava pe faapefea i se tagata e matua faamaoni i le va ma ona uso a tagata ona le manatu i se mea e pei o le le totogia o lana aitalafu i le faleoloa pe afai o lo o mafai ona ia totogiina, ona faatamala e totogi lana aitalafu i le Atua.

Ou te talosaga atu i le Au Paia o Aso e Gata Ai ina ia outou faamaoni i le Alii ma ou te folafola atu ia i latou le filemu, manuia, ma o le a i ai le manuia i tulaga tau tupe ia i latou o e faamaoni i lo tatou Tama Faalelagi, aua ua latou faataunuuina le tulafono ma se tiute. O le a Ia faamanuiaina i latou ona o le faia o lea mea. Ma o le matua faamaoni i le Alii o le auala sili ona matagofie lea e aoao ai lau fanau i le faatuatua i le talalelei a Iesu Keriso. … Pe a tumau o tatou loto i mea o lenei lalolagi ma toilalo e matua faamaoni i le Alii, tatou te le tuputupua’e i le malamalama, ma le mana ma le malosi o le talalelei semanu tatou te maua pe ana faapea o tatou faia.¹⁵

Ou te faafetai i le Atua mo le faamanuiaga o le totogiina o le sefuluai. Ou te alagaina le fiafia ona o le i ai o le avanoa e faaali ai lo’u agaga faafetai i lo’u Tama Faalelagi mo Lona alofa mutimutivale mo au.¹⁶

E tatau ona tatou lima foai i le faaaogaina o tatou faamanuiaga tau tupe e fesoasoani ai i le fausia o le malo o le Atua i le lalolagi.

O se tasi mea tatou te mananao e aoaoina mai ona o i tatou o se Au Paia o Aso e Gata Ai—ma sa ou matua galue malosi ou te aoao mai ai—o le … ia faaitiitia mo i tatou lava tau o mea e tatau ma manaomia i le olaga, ae aua le matape’ape’a i mea e leai se aoga. Afai e i ai i a tatou mea faasili, ia faaaoga e pei o le auala ua finagalo le Atua tatou te faaaogaina ai—mo le saga faatupula’ia o Lona Malo ma le faasalalauina o le Talalelei. …

E tusa ai la ma a tatou meatotino po o mea ua i o tatou lima, e leai lava se taua mo i tatou, sei vagana ai ua tatou saunia ma naunau e faaaoga mo le faatupula’ia o le Malo o le Atua. O lo tatou tiute le saunia o mea mo o tatou aiga; ae e le o so tatou tiute le ola soona fai pe soona faaalu tupe i mea e leai se aoga. E le o so tatou tiute le galulue ia maua le tamaoaiga ina ia mafai ai ona tatou oofu i ofu taugata. …

So o se taimi tatou te aoao ai e naunau e faaaogaina mea ua tuuina mai e le Atua ia i tatou mo le faatupula’ia o Lona Malo, o le a le tele ni faafitauli tautupe o le Au Paia o Aso e Gata Ai; o le a lava ma totoe mea e faamanuiaina ai i latou e le Alii. O le mea e manaomia ona tatou faia, o le saili atu lea mo le malamalama ma musumusuga a Lona Agaga e taitaiina ai i tatou i taimi uma lava, ona Ia faaopoopo mai ai lea ia i tatou o isi mea uma o lo o tatou manaomia.¹⁷

E alofa le Alii i le tagata e foai atu ma le loto fiafia. E leai se tagata e soifua i luga o le fogaeleele e mafai ona ia foai atu mo e matitiva, totogi tupe mo le fausia o falelotu, ma malumalu sa, … faaaoga mea ua ia maua ma tuuina atu ona atalii ma afafine e folafola atu lenei talalelei, e aunoa ma le aveese mai mai lona agaga, le manatu faapito mo ia lava po o le a lava lona manatu faapito sa i ai i lona faatoa amata ona foai atu. O se tasi lena o mea aupito matagofie i le lalolagi uma mo tagata—o le o’o atu i lea tulaga o le faatoilaloina o lo latou manatu faapito ia i latou lava. Pe a aveesea mai le manatu faapito i o latou uiga faaletagata, ona latou fiafia lea ma naunau e saili avanoa e faia ai le lelei e ala i le faaaogaina o mea ua latou maua ma tuuina atu e le Alii i o latou lima, nai lo lo latou taumafai e saili ia saga tele ni mea latou te maua.¹⁸

O tupe e le o se faamanuiaga mai le Atua. Faatoa avea tupe o se faamanuiaga pe afai ua faamanuiaina i tatou i le malamalama, i le poto, ma le Agaga o le Atua e faaaogaina ai tupe i se auala atamai ma le faautauta, ma le faaagaiina i luma o le malo o le Atua i le lalolagi ona avea lea o tupe ma se faamanuiaga. Afai e faamanuiaina i tatou i le tele o mea o lenei lalolagi ma pe afai o le tele o ia mea o le a faatauasoina ai o tatou mata ma le iloa ai le mea e tatau ona fai … ona le avea lea ma faamanuiaga mai le Atua a e [sau] mai le fili po o le tiapolo.¹⁹

O le uiga faanatura lava ia o le tagata, e pei ona ou fai atu ai i le tele o taimi, o le manatu faapito ia te ia lava, e fai mea piopio, ma e matape’ape’a i le oa ma le tamaoaiga; e mafaufau ifo mo ia lava, ma ua na o ia lava, ma o ana fuafuaga ma galuega ua mo na o lona lava alualu i luma. A e o aoaoga uma a le Talalelei o le tuufaafeagai tonu lava o ia mea. Ua tatou iloa o tulaga manaomia mai ia i tatou o le totogi o sefuluai ma foai o taulaga anapogi … ma le foai atu o mea ua tatou maua e ave atu ai le Talalelei i atunuu uma o le lalolagi—o ia tulaga manaomia e tulieseina mai ai i loto o tagata le manatu faapito uma. Nai lo le i ai o le manatu faapito ia te ia lava, o le Au Paia o Aso e Gata Ai faamaoni, e faatumulia i le alofa o le Talalelei, e faatumulia i le naunau e foai atu taimi, o mea ua faamanuiaina ai o ia mo le faatupula’ia o le malo o le Atua. O le Talalelei, pe afai tatou te faamaoni i tulaga tau tupe o loo manaomia mai ia i tatou, e aveesea le tagata manatu faapito ma le fai mea piopio, ae suia o ia i se tagata agalelei, tamalii, ma le lima foai. … E faatumulia e le Talalelei i tatou i se faanaunauga e taatia ese mea a le lalolagi, pe afai e tatau ai, ae o atu i tuluiga o le lalolagi, e aunoa ma se tālā se tasi mo se taui, mo le manuia ma le faaolataga o o tatou uso a tagata.²⁰

Fautuaga mo Suesuega ma Talanoaga

O a ala e avea ai aitalafu ma se noataga? O a faamanuiaga e mafai ona tatou maua pe afai tatou te ola e tusa ma mea ua tatou maua? O a tu ma aga e mafai ona fesoasoani tatou te o ese mai ai i le aitalafu po o le aloese mai ai foi mai le o’o atu i le aitalafu?
O a ala e faamanuiaina ai i tatou i tulaga tautupe ma le faaleagaga pe a tatou usitai i le tulafono o le sefuluai? E mafai faapefea e matua ona aoaoina a latou fanau i mataupu faavae o le sefuluai ma taulaga?
Aisea e taua ai le faamaoni i le Alii faapea foi ma o tatou uso a tagata? O a ala e avea ai o se faamanuiaga mo fanau le i ai o matua o e matua faamaoni aiai i le Alii?
Aisea e mafai ai e le manuia faalelalolagi ona taitai i tatou i se tulaga e mou ese atu ai ma i tatou le Agaga o le Alii? O le a se mea e mafai ona tatou fai e tausisia ai le faatulagaina lelei o le manuia i tulaga tau tupe?
O a tiute tatou te maua pe a tuuina mai ia i tatou e le Atua faamanuiaga faaletino? O a manatu e taofia ai i tatou mai le faataunuuina o ia tiute?
Pe a manino la tatou vaai i tulaga tautupe, e faapefea e tupe ona aumaia le malosi tatou te faatino ai?

couple managing finances — Na saunoa mai Peresitene Heber J. Grant, e tatau i tane ma ava ona galulue faatasi i le pulea o a latou tupe. Na saunoa mai foi Peresitene Heber J. Grant, “Afai e i ai se mea se tasi e aumaia le filemu ma le toamalie i le loto o le tagata, ma totonu o le aiga, o le ola ai lea e tusa ma mea ua tatou maua.”