Mataupu 19

O Tatalo Faatauanau, Faamaoni ma le Loto I Ai

Tatou te mauaina le tele o faamanuiaga pe a faia ma le filiga tatalo a le tagata lava ia faapea foi ma tatalo faaleaiga.

Mai le Soifuaga o Heber J. Grant

Ao avea Heber J. Grant ma se tamaitiiti laitiiti, e masani lava ona asiasi atu o ia i le aiga o Peresitene Polika Iaga. Afai e i ai Heber iina i le taimi o faigalotu, e valaaulia o ia e tootutuli faatasi ma le aiga ma auai i le tatalo faaleaiga. O na tatalo na i ai se aafiaga tumau ia Heber. Sa ia tomanatu i se taimi mulimuli ane faapea, “E silia i le faatasi le taimi, ona o le musumusuga a le Alii ia Polika Iaga a o ole atu o ia i le Atua mo se taitaiga, na ea ae ai lo’u ulu ou te tilotilo pe le o i ai le Alii i le mea la e tatalo ai Polika Iaga. Sa foliga mai ia te au sa talanoa o ia i le Alii e pei ona talanoa le tasi tagata i le isi.”¹

E tele mea na tutupu i le soifuaga o Peresitene Heber J. Grant e fai ma faataitaiga o lona faalagolago atu i lona Tama Faalelagi ma lona faatuatua i le mana o le tatalo. Mo se faataitaiga, a o mai tigaina lona faletua toetoe a maliu, na matuai le fiafia ma le mautonu lona afafine matua. Sa ia tatalo faatauanau ina ia mafai e lona afafine ona taliaina le maliu o lona tina (tagai itulau 48–49 o le tusi lenei). O isi mea na tutupu, na tatalo Peresitene Grant e fesoasoani ai i lona uso o le na se ese mai le ekalesia (tagai itulau 11 ma le 13) ma na aioi atu i le Alii ina ia faamaloloina se teineitiiti na mai tigaina i le mai lili (tagai itulau 105).

I ana saunoaga i le Au Paia, e masani ona faasafua mai ai e Peresitene Grant tatalo o lona loto. E saunoa mai e uiga i lona faamoemoe o le a taitaiina e le Alii taitai o malo i a latou matafaioi.² Na te faailoa mai ana tatalo “lilo ma le faamaoni” ina ia mafai e le Alii ona faamanuia i fitafita ma o latou aiga i taimi o taua.³ Sa ia faapea mai, e tatalo o ia i taimi uma “mo i latou uma ua mautofi i le Ekalesia, po o le Perisitua po o vaega i ausilali.”⁴ E ole atu foi o ia i le Atua ina ia fesoasoani i le Au Paia ia ola i le talalelei ma taitaiina mai isi i le malamalama o le upumoni.⁵ Ma na te fetufaai mai foi ana tatalo mo lona lava manuia: “O lau tatalo faifai pea ma le faamaoni … ia aua lava nei pogisa lou mafaufau, ina ia aua nei ou alu ese mai le ala tonu ma le sao, ma a o faasolo ina matua lou olaga, ia faateleina lou malamalama, ia mumu pea le malamalama ma musumusuga a le Agaga o le Atua i totonu o lou loto ma faasusuluina ai lou malamalama ma faamalosia au, ma ia ou faamaoni e auauna atu i lou Tama Faalelagi.”⁶

Aoaoga a Heber J. Grant

E tatau ona tatou tatalo mo mea uma tatou te faia.

Ia tootutuli o outou tulivae ma tatalo atu i le Atua ina ia taitaiina outou i mea uma tou te faia.⁷

O le taimi lava e tuu ai e se tagata le talosagaina o le Atua mo lona agaga ma lana taitaiga, o le taimi lava lea e amata ai ona avea lea tagata ma tagata ese ia te ia ma lana galuega. Pe a le toe tatalo atu tagata mo le Agaga o le Atua, o lona uiga ua latou tuu atu o latou talitonuga i o latou faamoemoega fai toatasi, ma amata malie ai lava ona aveesea mai le Agaga o le Atua, ma taumamao ai ma a latou uo pele, e ala i le le tusitusi atu pe asiasi atu foi o le tasi i le isi, ma o le a avea ai ma tagata ese. E tatau ona tatou tatalo atu i le Atua ina ia aua nei tuua na o i tatou mo se taimi e aunoa ma lona agaga e fesoasoani ia i tatou ia tetee atu i agasala ma faaosoosoga.⁸

Ia faia e tagata talavou a latou tatalo faalilolilo ma ole atu i le Atua, i le po ma le ao, mo le taitaiga a Lona Agaga Paia.⁹

I taimi filemu, i taimi o faigata, ma taimi o gaogaosa o le aso, i taimi o faaosoosoga, o faanoanoaga, o le toafilemu ma faamanuiaga, ia tatou tatalo e le aunoa, i taimi na o i tatou, ma taimi e potopoto faatasi ai le aiga, faatasi ma le agaga faafetai mo faamanuiaga o le olaga, mo le malamalama i faafitauli, ma le malosi e tumau ai e oo i le iuga.

“Ia tatalo pea, ina ia mafai ona e manumalo; ioe, ina ia mafai ona e manumalo ia Satani, ina ia mafai ona e sao mai lima o auauna a Satani.” (Mataupu Faavae ma Feagaiga 10:5.)

“Ia tatalo e le aunoa, ina ia outou le vaivai, seia ou alu atu.” (Mataupu Faavae ma Feagaiga 88:126.)¹⁰

Ma ou te toe tatalo atu i tagata ina ia o ifo i o latou tulivae ma fesili atu i le Atua ina ia taitaiina i latou i gaoioiga uma o le olaga, ma afai latou te maua le Agaga o le Atua o le a latou lagonaina le fiafia ma le faamalieina i mea latou te faia. Aua nei outou faia se mea e le mafai ona e talosaga atu i le Atua e fesoasoani atu ia te oe e faia. Ia ola i le susulu ma le malamalama o le Talalelei, ma i le avea ai o au o se auauna a le Atua, ou te folafola atu ia te outou le filemu ma le olioli ma le fiafia, i le suafa o lo tatou Togiola.¹¹

E taua le tatalo mo lo tatou tuputupu ae faaleagaga.

Matou te molimau atu o le Atua o se Atua soifua, … o loo soifua o Ia ma e alofa i Lana fanau; e faafofoga mai o Ia ma tali mai i tatalo; Na te le tuua lava ia se tasi o Ana fanau i le pouliuli ma le agasala e aunoa ma se malamalama; lea e tatau ona maua e tagata uma lea malamalama e taitaiina ai ona laasaga i le olaga; ma i se lalolagi fesuisuiai, o le a mafai pea e Ana fanau ona o mai ia te Ia ma o le a Ia fetalai atu ia i latou i le susulu malamalama o le aso po o itula filemu foi o le po, i se gagana o le a latou malamalama i ai, pe afai o le a latou ola e tusa ai ma Lona agaga.¹²

Soo se mea lava ua oo atu i ai le talalelei a Keriso, o alii ma tamaitai e faitau selau ma faitau afe ua latou taliaina le talalelei ma ola ai, ma ua mafai ona latou molimau taitoatasi mai, ua latou maua se molimau i le faavavau o le galuega lea tatou te faataunuuina i le avea ai o i tatou ma ni tagata o le Au Paia o Aso e Gata Ai, pe a maea ona tatou ole atu i le Atua mo se molimau. O lenei molimau e lei oo mai ona o a latou lava suesuega, pe na ala mai foi i le atamai faalelalolagi lea na tuuina atu e le Atua ia i latou, ae ona o tatalo faatauanau ma le faamaoni, na faia i le suafa o Iesu Keriso lo tatou Togiola, mo le malamalama ma le atamai e uiga i le faavavau o lenei galuega.¹³

O le faamoemoega o le tagata o le lalolagi o le avea lea ma tagata faafefeteina i le faamaualuga o lona loto, [manatu faapito], ia faagalo le Atua; ae e manaomia e le Talalelei lo tatou tatalo i aso uma i o tatou olaga, e le gata ina tatalo faatasi ma o tatou aiga, ae ia tatalo faalilolilo foi. O lenei manaoga e taofia mai ai i tatou mai le avea ma tagata [manatu faapito]; aua e faapei ai i tatou o tamaiti, i le punonou atu ma tatalo i le Atua mo le malamalama ma musumusuga a Lona Agaga Paia.¹⁴

E mautu lou talitonuga, e leai se tagata e tatalo atu ma le faamaoni i aso uma o lona olaga ma ole atu i le Atua ma le faamaoni mo le malamalama o Lona Agaga Paia e taitaiina o ia, o le a faamaualuga ma faasausili. Nai lo le na, o le a faatumuina lona loto i le agamalu, lotomaualalo ma avea faapei o se tamaitiiti.¹⁵

E laitiiti pe leai foi sou popole mo le tamaitiiti po o le teineitiiti, le alii talavou po o le tamaitai talavou, e ole atu ma le faamaoni ma le faaeteete i le Atua e faalua i le aso mo le taitaiga a Lona Agaga. Ou te mautinoa pe a oo mai faaosoosoga o le a latou maua le malosi e faatoilalo ai e ala i musumusuga o le a tuuina atu ia i latou. O le ole atu i le Alii mo le taitaiga a Lona agaga e tuuina mai ai ia i tatou se puipuiga, ma afai tatou te saili atu ma le naunautai ma le faamaoni mo le taitaiga a le Agaga o le Alii, ou te faamautinoa atu ia te outou o le a tatou mauaina.¹⁶

O lea la, o le mea e tasi e sili atu i lo isi mea uma, ou te manao e tuuina atu i loto ma agaga o le tupulaga talavou, o le tatalo lea i le Alii. Ia maua le faatuatua. Afai e te le maua le atamai, ia maua le faatuatua. Ia atiinae lena faatuatua ma o le a o oo mai lena atamai i se taimi vave pe o se taimi mulimuli ane foi.¹⁷

O le tasi o mea e manaomia ona faia e le Au Paia o Aso e Gata Ai, e tatau ona faamaoni i le faia o a latou tatalo, i a latou tatalo faalilolilo ma tatalo faaleaiga. O le faamoemoega o loo i ai i lo tatou Tama Faalelagi, ia mafai lea ona tatou fesootai atu ia te Ia, ia mafai ona i ai sa tatou sootaga ma le lagi lea e mafai ai ona tatou aumaia mo i tatou lava faamanuiaga mai luga. E leai se tagata se toatasi e lotomaualalo ma fiafia e tatalo i luma o le Atua, ma ole atu ia te Ia i aso uma mo le malamalama ma musumusuga a Lona Agaga Paia, e avea ma tagata faafefeteina ma faamaualuga lona loto, pe na te lagonaina foi o le atamai ma le poto ua ia maua o mea uma ia o le a ia manaomia. O le tagata toaga e tatalo ma lotomaualalo o le a ia iloaina i taimi uma na te faalagolago atu i le Atua mo faamanuiaga uma ua na maua, ma o lona tatalo atu i le Atua o le a le gata ina o le a ia tatalo atu ai mo le malamalama ma musumusuga a Lona Agaga Paia e taitaiina o ia, ae o le a ia lagonaina lona fia faafetai atu i le Atua mo faamanuiaga ua ia maua, aua ua ia iloa i le olaga, o le ola maloloina, o le malosi, ma le poto uma ua na maua e sau mai le Atua, o le Tupuga o lona ola.

Afai o le a tatou le faaavanoaina lenei sootaga o fesootaiga i lo tatou va ma lo tatou Tama Faalelagi, ona aveesea mai lea o le malamalama ma musumusuga a Lona Agaga mai ia i tatou, ma lena lagona o le loto faafetai lea e faatumuina ai o tatou loto ma le manao e viia le Atua mo Lona Agalelei ma lona alofa ia i tatou.

E leai se isi lava lagona e sili atu ona faaleatua nai lo le lagona o le loto faafetai i le Atua, lea e oo mai pe a tatou iloaina ma lagona ua faamanuiaina i tatou e le Atua. Ua avea lea ma molimau a i latou uma o e ua malaga ese mai ma aiga ona o le talaiina o le Talalelei, ma e ua mafai ona latou aumaia le faatalitonuina i loto o o latou uso a tagata, i le faavavau o le misiona ua latou faataunuuina, o le olioli ma le loto faafetai lea e faatumuina ai o latou loto i le avea o i latou ma tufuga aao o le Atua i le aumaia o tagata aua ua latou iloa o le fuafuaga o le ola ma le faaolataga sa sili atu nai lo le mana na latou maua e faamatalaina ai. E tatau ona tatou atiinaeina lena agaga ma lena naunautaiga ina ia faatulagaina o tatou olaga ina ia tatou maua pea se agaga o le loto faafetai i totonu o o tatou loto, ma se manao e viia le Atua ona o Lona agalelei ia i tatou. O le a le mafai ona tatou maua lenei lagona pe afai o le a tatou musua ma le magafagafa i le faataunuuina o le tiute o le tatalo atu i lo tatou Tama Faalelagi.¹⁸

Ia ola mama, tausi poloaiga a le Alii, tatalo atu ia te Ia e le aunoa ina ia tausia oe i le upumoni ma le amiotonu, ola ai e pei ona e tatalo, ma po o le a lava se mea e tupu mai ia te oe o le a faatasi pea le Alii ia te oe ma o le a leai se mea o le a tupu ia te oe o le a le avea o se faamamaluga ma le viiga o le Atua mo lou faaolataga ma le faaeaga. O le a oo atu i lou loto mai le ola ai i se olaga mama sa e tatalo atu ai, se olioli e le mafaamatalaina pe malamalama foi i ai. O le a i ai pea lava le Alii i ou tafatafa; o le a Ia faamafanafanaina oe; o le a e lagonaina Lona mafuta mai i taimi e sili ona e mafatia ai; o le a Ia leoleoina ma puipuia oe i le malosi atoa lea e i ai faatasi ma Lana fuafuaga poto.¹⁹

Ou te molimau atu ia te outou, ou te iloa o loo soifua le Atua, e faafofoga ma tali mai o ia i talosaga.²⁰

O tatalo faatauanau, faamaoni ma le loto atoa i le Atua, e sili atu ona taua ia te outou nai lo mea uma e mafai ona ou tauina atu pe tusia foi.²¹

O tatalo faaleaiga e fesoasoani ai i matua ma fanau e mafuta faatasi ai ma le Agaga o le Alii.

Ou te talitonu, o le tasi o mea sili ona lelei i le lalolagi atoa e faatumauina ai se tagata ia tumau ma faamaoni i le talalelei a le Alii o Iesu Keriso, o le ole atu faalilolilo i le Atua i le suafa o Iesu Keriso, mo le taitaiga a Lona Agaga Paia. Ou te talitonu o le tasi o mea sili ona maoae e mafai ona oo mai i totonu o soo se aiga, e mafua ai ona tutupu ae tama ma teine i totonu o lena aiga i le alofa i le Atua, ma le alofa i le talalelei a Iesu Keriso, o le faia lea o tatalo faaleaiga. E le faapea na o le tama lava o le aiga e tatalo, ae o le tina ma tamaiti e mafai foi ona tatalo, ina ia mafai ona latou tofo i le agaga o le tatalo, ma ia ola, ma tumau ai, ia latou iloa le alaleo o fesootaiga, i se isi faaupuga, e fesootai ai ma le Agaga o le Alii. Ou te talitonu e toaitiiti i latou o e o ese mai, e toaitiiti i latou e lafoai lo latou faatuatuaga, o i latou sa i ai muamua le malamalama o le talalelei, ma sa le mavae a latou tatalo i totonu o aiga, ma a latou olega faalilolilo i le Atua.²²

Ua valaau mai le Alii ia i tatou ina ia tatou tatalo faatasi ma o tatou aiga, faapea ma tatalo faalilo, ina ia aua nei o tatou faagalo ai le Atua. Afai o le a tatou le faia lenei mea, o le a aveesea mai musumusuga ma mana mai le lagi; o le a avea i tatou ma tagata ese, aveesea a tatou molimau, ma o le a tatou o atu i le pouliuli.²³

E mataituina e fanau faataitaiga a o latou matua, o a latou uo, ma o latou faiaoga. I se tasi o mea na tupu, … ina ua afea e [faiaoga o aiga] se aiga o se uso ma latou faataunuuina ai ni tatalo, sa faapea atu se tamaitiiti laitiiti: “Tama, e le faia lava ni a tatou tatalo, a ea, seiloga lava e i ai ni a tatou malo?“²⁴

O le ala e aoao atu ai a tatou fanau ia tatalo o lo tatou tatalo foi lea o i tatou faalilolilo faapea ma o tatou aiga. Ua tele le faatamala o le toatele o tagata o le Au Paia o Aso e Gata Ai i fesootaiga ma le Atua. Ou te lagonaina le olioli ma le fiafia i aso uma o lou olaga i lou talanoa atu i lou Foafoa, i le suafa o le Alii o Iesu Keriso, lou Togiola. Ma o i latou e leai ni a latou alaleo o fesootaiga ma lo tatou Tama Faalelagi ma lo tatou Togiola, ua aveesea mai ai musumusuga lea e tuuina mai e le Alii.²⁵

Fautuaga mo Suesuega ma Talanoaga

E mafai faapefea ona fai tatalo a le tagata lava ia ma mea e sili atu ona aoga? E mafai faapefea ona avea le loto faafetai mo faamanuiaga a le Atua, ma mea e faateleina ai le taua o a tatou tatalo?
O a ni mea e mafai ona tatou faia e fesoasoani ai i le faia o tatalo faaleaiga o se aaifaga faaleagaga mo tagata uma o le aiga? O a ni faamanuiaga ua maua e lou aiga ona o taunuuga o le tatalo faatasi?
O a ni luitau na fetaiai ma lou aiga i le tau faatulagaina o taimi o tatalo faaleaiga? Na faapefea ona outou foia nei luitau?
E faapefea ona fesoasoani tatalo i aso uma ia i tatou ina ia tatou “tumau ma faamaoni i le talalelei a le Alii o Iesu Keriso”? E mafai faapefea ona fesoasoani le tatalo ia i tatou ina ia “faatumuina i tatou i le agamalu, lotomaualalo, ma le avea faapei o se tamaitiiti”?
O le a le uiga o le “ole atu i le Atua”?
Aisea e taua ai lo tatou ole atu i le Atua i aso uma mo le taitaiga a le Agaga Paia?

young woman praying — “Ia tootutuli o outou tulivae ma tatalo atu i le Atua ina ia taitaiina outou i mea uma tou te faia.”