Mataupu 23

O Le Alualu i Luma ma le Faamoemoega o le Ekalesia a Iesu Keriso o le Au Paia o Aso e Gata Ai

O le a faataunuuina e le Ekalesia lona faamoemoega e faavavau, ma o se faamanuiaga ia i tatou le faaagavaaina o i tatou lava ina ia avea i tatou o se vaega o lenei galuega tele.

Mai le Soifuaga o Heber J. Grant

Sa soifua mai Heber J. Grant i le 1856, i le taimi o le tauiviga a le Au Paia ina ia faatuina le Ekalesia a Iesu Keriso o le Au Paia o Aso e Gata Ai i le Vanu o Sate Leki. O le taimi lea, ua 7 siteki o le Ekalesia ma e tusa ma le 64, 000 ona tagata. Sa leai ni malumalu na faaaogaina i lea taimi.

I le 1882, ina ua faauuina Heber J. Grant e avea o se Aposetolo, na faamautuina ai le faatuina o le Ekalesia i le Vanu o Sate Leki. O le toatele o tagata o le lalolagi i lena taimi sa i ai ni o latou manatu faailoga tagata ma le le sao e uiga i le Au Paia o Aso e Gata Ai, peitai sa faaauau pea ona tuputupu ae le Ekalesia. Na oo atu le faitau aofai o tagata o le Ekalesia i le 146, 000, ma na siitia le aofai o le fuainumera o siteki i le 24. O le lima o tausaga na lumanai ai, sa faapaiaina ai le Malumalu o St. George Iuta—na o le pau lea o le malumalu sa faataunuuina ai galuega i lea taimi.

I le avea ai ma se Aposetolo, o Elder Grant na avea o se molimau vavalalata o le alualu i luma o le Ekalesia. I le 1902—ina ua 4 malumalu o le Ekalesia sa faaaogaina, 50 siteki, ma le toeitiiti atoa le 300, 000 o tagata o le ekalesia—sa ia saunoa mai ai i le vaaiga lenei: “E leai se mea e tau o se tu faasasao. E le o tu faasasao le ekalesia; ua i ai ia i matou faamaoniga i le aso e faatatau i lona tuputupu ae, i le faateleina o le totogiina o sefuluai, o le taunuuga faateleina o le galuega faafaifeautalai i le lalolagi atoa, ma le faateleina o le lelei o galuega i kolisi, i iunivesite ma aoga maualuluga a le Au Paia o Aso e Gata Ai. Ua i ai foi se tuputupu ae matagofie i le fuainumera o Aoga Sa ma le aofaiga o tagata e auai atu i Aoga Sa. Ua alualu i luma le galuega a le Atua, ma ua faaitiitia le malosi ma aafiaga a le fili ma i latou o e faatautee mai ia i tatou.”¹

I le taimi o le auaunaga a Heber J. Grant i le avea ai o se Peresitene o le Ekalesia, mai ia Novema 1918 seia oo ia Me 1945, na faaauau ai pea ona amata tuputupu ae le Ekalesia. Na oo atu le faitau aofai o tagata o le Ekalesia mai le pe tusa o le 496, 000 i le silia ma le 954, 000. Na faateleina le aofai o siteki mai le 75 i le 149, ma o le aofai o malumalu na faaaogaina na faateleina mai le 4 i le 7.

E masani ona saunoa mai Peresitene Grant ua amata ona sili atu ona manaomia tagata o le Au Paia o Aso e Gata Ai. Sa ia faapea mai, “ou te talitonu ua iloa nei i tatou e tagata uma latou te iloa i tatou, o ni tagata e matatau i le Atua, o se faapotopotoga amiotonu ma faamaoni.”² I le konafesi aoao ia Oketopa 1937, i lona faatoa taliu mai se malaga taamilo i misiona i Europa, sa ia fetufaai mai ai le faataitaiga lenei:

“Ao ou i ai i Europa i le silia ma le 30 tausaga ua mavae [ao avea ai o se peresitene o le misiona, ] … i le taimi atoa o lau tolu tausaga i le Motu o Peretania, sa le faamanuiaina au e lolomiina se faamatalaga se tasi i luga o nusipepa. O nisi o taufaifaiga inosia, sili ona leaga, mataga, ma mea leaga sa lolomiina e uiga ia i tatou, ae o i latou o e pule i faasalalauga na mautinoa lava lo latou mumusu e faalogo i se faamatalaga tatou te fai atu.

“Sa tauina mai ia te au a o ou i ai [talu ai nei i lenei] malaga o loo i ai ni a tatou faasalalauga lelei i Siamani, Suitiselani, Siekisolovakia, i totonu o Holani ma Peleseuma. E leai se faitioga o soo se ituaiga po o se faamatalaga, ua na o faaaliga lelei e uiga ia tatou sauniga, ma o nisi tulaga o faasilasilaga i nusipepa i Motu o Peretania o ni itu, pe ana fai tatou te maua le avanoa tatou te tusia ai lava e i tatou ia mea, e leai se mea e mafai ona tatou tusia e sili atu ona faafiafiaina ai i tatou. I le lata mai e mafai ona ou faamasinoina ai, e leai se faamatalaga se tasi na tusia i le taimi atoa o la matou malaga ae na o mea sa faamoemoe e tuuina mai ai lipoti faamaoni, faamamaluina ma le matagofie o o tatou tagata. Ou te olioli i nei mea. O se suiga ofoofogia mai le agaga o le mataua ma le inosia sa ou maua i tagata fai nusipepa sa ou feiloai i ai i le silia ma le tolusefulu tausaga ua mavae.”³

E masani ona faasafua mai e Peresitene Grant ona lagona o le loto faafetai mo le alualu i luma faaletino ma le faaleagaga o le Ekalesia. I nei saunoaga o le faafetai, sa ia faailoa mai ai faamanuiaga a le Alii ma tautinoga a le Au Paia o Aso e Gata Ai e ui lava ina latou faafeagai ma le tiapolo. I taimi sili ona faigata o le Pau Tele o le Tamaoaiga, sa ia saunoa ai: “E na o lenei malamalamaaga atoatoa ua ia i tatou o ni tagata, o le a mafai ai e i tatou ona faataunuuina soo se mea ua tatou ausia. O le mafaufau atu i le taimi o nei aso o le pau o le tamaoaiga ma faigata, o loo mafai ona tatou faaaluina le fia miliona o tupe i le fausiaina o falelotu! Toeitiiti o Aso Sa uma, mo le tele o ni vaiaso, sa ou faapaiaina ai ni falelotu ma o taimi uma lava e tutumu ai falelotu ia i latou o e na auai i nei sauniga. … O loo faateleina lo tatou tuputupu ae. O loo i ai se lagona o le talitonu aiai. Tatou te le masalosalo, o le faaiuga o le galuega o le a manumalo ai le Atua.”⁴

Aoaoga a Heber J. Grant

O le Ekalesia a Iesu Keriso o le Au Paia o Aso e Gata Ai e i ai sona taunuuga paia.

Ou te molimau atu ia te outou i le aso, o Iosefa Samita o se Perofeta moni a le Atua soifua, o ia sa avea o se tufuga aao o le Atua i le toe faatuina i luga o le fogaeleele o le ata o le faaolataga, e le gata mo i latou o loo soifua ae mo i latou foi ua maliliu, ma o lenei talalelei, ua masani ona iloa o le “Mamona, ” e tagata o le lalolagi, o le ata moni lea o le olaga ma le faaolataga, le talalelei a le Alii o Iesu Keriso, o le maa na tofia i le mauga, ma o le a taavalevale atu seia tumu ai le lalolagi atoa [tagai Tanielu 2:31–45; MFF 65:2].⁵

Ua faatuina e le Alii lana Ekalesia i nei aso e gata ai, ina ia mafai ona valaau atu i tagata ia latou salamo, i le faaolataga ma le faaeaga o o latou agaga. Sa ia fetalai mai i lea taimi i lea taimi i le Perofeta o Iosefa ma i latou sa faatasi ma ia “ua matua le faatoaga ma ua saunia e selesele ai.” (MFF 4:4; 6:3; 11:3; 12:3; 14:3; 33:3, 7.) Ua Ia poloai mai pea lava pea ia i latou ia aua nei talai atu se isi mea i lenei tupulaga ae tau lava o le salamo (MFF 6:9; 11:9; 14:8) mulimuli ane, sa Ia fetalai mai ai:

“Ia e talai atu le tala fiafia, ioe, ia e faasalalau atu i luga o mauga, ma mea maualuluga uma, ma tagata uma o le a mafai ona e vaai i ai.

“Ma ia e faia ma le lotomaualalo atoa, ma le faalagolago ia te au, aua le faifai atu i e faifai mai.

“Ma ia e le tautala atu i taofiga, ae peitai, ia e tautala atu le salamo ma le faatuatua i le Faaola, ma le faamagaloina o agasala i le papatisoga ma le afi, ioe, o le Agaga Paia lea.

“Faauta, o le poloaiga mulimuli ma le sili lenei ou te tuuina atu ia te oe e uiga i lenei mea; aua e lava lenei i lau savaliga i aso taitasi e oo lava i le iuga o lou olaga.

“Ma o le a e maua le tiga pe afai e te faatalale i nei faatonuga, ioe, e oo i le faaumatiaga o oe ma au mea.” (MFF 19:29–33.)

O nei poloaiga e tatau ona tatou usitaia ina ia mafai ai e tagata ona latou iloa le Atua ma Iesu Keriso o le na Ia auina mai, aua “o le ola faavavau lenei.” (Ioane 17:3.)

Ona o lenei mafuaaga sa faavaeina ai le Ekalesia, ua toe faaalia mai le talalelei i lona atoatoa, ua toefuataiina mai le Perisitua a le Atua, faatasi ai ma aia tatau uma, mana, ki ma galuega. O le misiona lenei a le Ekalesia. O le galuega e faavavau sa tuuina atu i aposetolo anamua (Mata. 28:19; Mareko 16:15) ua toe tuuina mai i lenei aso, ina ia alu atu le talalelei i nuu uma (MFF 38:33), i Iutaia ma Nuu Ese (MFF 18:26); e ao ona folafolaina atu i le leo o le fiafia (MFF 28:16); e taavalevale atu i tuluiga uma o le lalolagi (MFF 65:2); ma e tatau ona talaiina atu e i tatou ua tuuina mai i ai le malo. (MFF 84:76.) E leai sa tatou gaoioiga po o se gaoioiga a le Ekalesia e mafai ona faalavelave i lenei poloaiga ua tuuina mai e le Atua.⁶

O le misiona a le Ekalesia a Iesu Keriso o le Au Paia o Aso e Gata Ai o se misiona o le filemu. Ua faamoemoe e saunia ai tagata o le lalolagi mo le afio mai faalua o Keriso, ma le amataga aloaia o lena aso faamanuiaina pe a oo mai le meleniuma ma nofotupu Keriso o se Tupu o Tupu, e tu i le faaao o le lalolagi atoa o tagata.⁷

O le tuputupu ae ma le agai i luma o le Ekalesia i lona tau amataga mai ua oo mai e faataunuuina ai valoaga.

O mea ua ausia e le Au Paia o Aso e Gata Ai, ua ogatasi lelei ma valoaga na tuuina atu i le auvai i sisifo o le Vaitafe o Misisipi e le Perofeta o Iosefa Samita, e pei ona tusia i le talafaamaumau a Iosefa i le aso 6 Aokuso, 1842:

“Ou te vavalo atu e faapea, o le a faaauau pea ona mafatia le Au Paia i le tele o mafatiaga ma o le a tutuli ese atu i latou i Mauga Papa. E toatele o le a liliuese, o isi o le a fasiotia e o tatou fili po o le a maliliu foi i aafiaga o le tau po o faamai, ma nisi na fausia aai ma vaai i le Au Paia ua avea ma tagata maoae i le totonugalemu o Mauga Papa.” [History of the Church, 5:85.]

… E moni ua tatou faataunuuina lena valoaga, e ui lava o le mea moni o lenei itu i sisifo o le Iunaite Setete sa faapea e leai se aoga. Pe a e mafaufau i lenei itu matutu, pe a e mafaufau sa faapea e leai sona aoga, ona e iloa lea o mea ua ausia, e leai se masalosalo, ua tatou faataunuuina lena folafolaga.⁸

Ou te fiafia i le tuputupu ae ma le alualu i luma o le galuega a le Atua i lenei lalolagi. … Ou te manatuaina lou i ai faatasi ma Peresitene Uilifoti Uitilafi, i luga o se taavaletoso i Idaho, … ma talanoa atu i le toa ono pe o le sefululua foi o tagata talavou sa tutu ai iina, ma ua malosi lava [lou] manatuaina o saunoaga a le Perofeta a le Atua. … ou te manatuaina o nei tagata talavou sa foliga mai ua lagona le lotovaivai i Sand Creek, a o latou vaavaai atu i le fanua atoa e aunoa ma se laau, e aunoa ma se vao sei vagana ai vaovao, e aunoa ma se tamai fale e fai i laau. Sa saunoa atu Uso Uitilafi i tagata talavou: “Aua tou te faavaivai; aua le loto vaivai, aua ua i ai faamanuiaga a le Atua i luga o lenei laueleele. Ua na o sina taimi itiiti lava ona oo mai lea o le manuia ma le nonofo fiafia o le Au Paia o Aso e Gata Ai iinei. Ua outou lagona ua outou o ese mai ia outou uo, ua toeitiiti lava outou o ese mai ma le lalolagi, ae o le a na o sina taimi puupuu ona outou maua lea o se falelotu iinei, ma se faleaoga ma mea uma, sa outou maua i le nofoaga moni ae tou te lei o mai iinei. O le a faamanuiaina ma faateleina e le Atua le laueleele.” O le a le taunuuga i le aso? I luga o lena fasi laueleele ua tu ai le aai o Iona, o le ofisa tutotonu o se tasi o siteki o Siona, faatasi ma le pe tusa o le lima afe tagata nai lo le toa lima pe toa fitu; ua faataunuuina uma lava saunoaga a le Perofeta o Uilifoti Uitilafi.⁹

Pe a ou manatunatu i mea uma ua ausia o le galuega a le Atua, e le mafai ona ou maua ni upu e faailoa lelei atu ai mea uma ua faia.¹⁰

Ou te lagona o sauaga ma faafitauli uma lava ia ua tatou sao mai ai, e saunia ai i tatou ma aoaoina ai i tatou ma faamalolosia ai i tatou o ni tagata mo mea sili.¹¹

E pei ona saunoa mai le Perofeta o Iosefa, e moni lava o le Au Paia o Aso e Gata Ai e tatau ona avea i latou ma tagata maoae i le totonugalemu o Mauga Papa, ma o lea faatoa amata ona tatou ola ma tuputupu ae e avea ma tagata maoae, ae o le tulaga ua tatou i ai i le taimi nei, o le mea noa lea pe a faatusa atu i le mea o le a tatou oo i ai.¹²

E leai se mea e mafai ona taofia mai le Ekalesia mai le faataunuuina o ona faamoemoega.

O tausaga taitasi ma tausaga uma e malosi atu ai le Ekalesia nai lo le mea sa i ai i le tausaga ua mavae. O loo agaigai pea i luma le Ekalesia, e le o toe foi i tua. E mafai ona faia e tagata mea sese, ae mausali pea le Ekalesia.¹³

O le fili o le agaga o le tagata, o le faaumatia faatautala, o le na te faaumatia le galuega a le Atua, o ia ma ana au, ua latou manatu e ala i le fasiotiina o le Perofeta [Iosefa Samita] ma le Peteriaka [Ailama Samita] e mafai ona latou faavaivaia ai le galuega a le Atua lea ua toe faatuina i luga o le fogaeleele; ae peitai … o le tuputupu ae ma le matagofie o le Ekalesia, o le malumalu maoae o le Atua i le [Aai o Sate Leki], o la tatou tapeneko matagofie, o le fale maoae mo le [ofisa o le au taitai o le Ekalesia]…, o maafaamanatu o malumalu, mai Kanata e oo i Hawaii, ma Saint George, ma le alualu tele i luma o le galuega a le Atua, —o nei mea uma o ni aoaiga malolosi mo i latou o e manatu e mafai ona latou taofia le galuega a le Alii. O le molimau ia Iesu Keriso o loo mumu i loto o le Perofeta ma le Peteriaka, lena na laua tuuina atu ai o laua ola, e mumu pea i loto o i tatou taitoatasi o e ua faamanuiaina i le sulu, ma le malamalama, ma le molimau i le faavavau o le galuega lea ua tatou i ai.¹⁴

Ua faapea mai nisi tagata … sei iloga e tuputupu ae lenei Ekalesia, ma suia ia tutusa ma le lalolagi i aso nei, e pei o isi Ekalesia, o le a faaumatia i le toilalo. Soo se Au Paia o Aso e Gata Ai e manatu i se minute o le a faatoilaloina lenei Ekalesia, e le o ia o se tagata liua moni o le Au Paia o Aso e Gata Ai. O le a leai se faatoilaloina i lenei Ekalesia. Ua toe faavaeina mo le taimi mulimuli lava, e le toe aveina atu i nisi lava tagata ma e le toe faaumatiaina.¹⁵

E lei faia lava e o tatou fili se mea e tasi ua faaleagaina ai le galuega lenei a le Atua, ma o le a latou le mafaia lava. Ou te vaavaai solo, ou te faitau, ou te manatunatu, ma ou fesili i le fesili, O fea o i ai tagata o le malosiaga, o le pule ma tulaga maualuluga, o e sa galulue e faasagatau mai i le Au Paia o Aso e Gata Ai? … O fea o i ai tagata sa faamamaluina i latou? Ua leiloloa i latou. … O fea o i ai tagata sa osofaia lenei galuega? O fea o i ai lo latou malosiaga? Ua mou malie atu e pei o le sau o le taeao pe a oso mai le la. E le tatau ona tatou matatau, o i tatou o le Au Paia o Aso e Gata Ai. O le a faaauau pea ona lagolagoina e le Atua lenei galuega; Na te lagolagoina le mea moni.¹⁶

O loo soifua le Atua, o Iesu o le Keriso, o Iosefa Samita o se Perofeta a le Atua moni soifua; ma o lenei galuega ua taua o le “Mamona” o le Talalelei a Iesu Keriso lo tatou Togiola, ma o le ata o le olaga ma le faaolataga; ma o le le talitonu uma o le lalolagi, o itu faafeagai uma o le lalolagi e le mafai ona latou taofia lea galuega, ua faavaeina e le Atua ma o le a alu pea lava pea seia oo ina faataunuuina lona faamoemoega!¹⁷

E tatau ona tatou agavaa ina ia mafai ona tatou auai i le faamoemoega o le Ekalesia.

Ua folafola mai e le Atua le tele o mea matagofie e faatatau i nei tagata. Ua i o tatou luma so tatou faamoemoega ofoofogia, ma o loo tatou sauniuni malie pea ma faaagavaaina i tatou lava mo lea faamoemoega.¹⁸

Afai e i ai soo se mea e sili atu nai lo le isi, ou te fia faailoa atu i loto o le Au Paia o Aso e Gata Ai, e tatau ona tatou taumafai moni e auauna atu i le Atua ma o tatou loto, mafaufau, ma le malosi atoa, ina ia mafai ona ogatasi lo tatou tuputupu ae ma le alualu i luma o lana galuega i luga o lenei fogaeleele.¹⁹

E maoae tele le faamoemoega o le Au Paia o Aso e Gata Ai. Ou te iloa o valoaga sa faia e faatatau i nei tagata, o le a faataunuuina uma lava. O le maa na tofia mai le mauga e aunoa ma lima ona taavalevale atu seia tumu ai le lalolagi atoa. Ou te iloa e tatau ona saunia a tatou fanau, ia agavaa, ma saunia e ala i aoaoga, i le suesue, faapea foi i le faatuatua i le Atua, lo tatou Tama Faalelagi, ma lona Alo o Iesu Keriso, pe afai latou te faataunuuina ma le manuia o latou faamoemoega. O le a faataunuuina e le Au Paia o latou faamoemoega, o le a latou ausia mea uma ua finagalo le Atua latou te ausia, e leai lava sou masalosalo. E tusa lava pe o i tatou, o ni tagata taitoatasi, e tatau ona tatou faia mea uma tatou te mafaia o le vaega lena a le tagata lava ia. E masani ona ou faapea atu i au tautalaga i le Au Paia, o i tatou taitoatasi uma lava o ni tusi ata i o tatou lava olaga; o le a faamanuiaina tele i tatou e le Atua e tusa ma lo tatou faatuatua ma le filifiliga.²⁰

E le masalosalo lou mafaufau i le mea o le a faia e le Alii e faatoateleina ai le Au Paia o Aso e Gata Ai, ma faamanuia tele ai i latou i le lumanai nai lo mea ua Ia faia i le taimi ua mavae, pe a faapea lena tatou te lotomaualalalo ma filifiliga; pe a faapea tatou te saili mo le alualu i luma o le malo o le Atua, ae le o le faia o o tatou lava manatu ma loto. Ua toefuataiina mai le talalelei a Iesu Keriso ia i tatou; ua tatou maua le ata o le olaga ma le faaolataga; ua tatou maua sauniga o le Talalelei e le gata mo e o loo soifua ae faapea foi mo e ua maliliu. Ua tatou maua mea uma e alagatatau, e le gata mo lo tatou lava faaolataga, ae ina ia avea moni i tatou ma Faaola i le Mauga o Siona, ” [tagai Opetaia 1:21] ma ulufale atu i malumalu o lo tatou Atua ma faaola o tatou augatama o e ua malilu e aunoa ma se malamalamaaga o le talalelei.²¹

Afai tatou te faamaoni, afai tatou te amiosao, afai tatou te agavaa mo lenei talalelei, lea ua tuuina mai e le Atua ia i tatou se molimau, e leai ni mea matautia e mafai e le lalolagi ona faaleagaina ai i tatou. Ou uso e ma tuafafine, e le mafai ona faaleagaina i tatou e soo se tagata soifua, sei vagana lava o i tatou. Afai tatou te toilalo e auauna atu i le Atua, afai tatou te toilalo e fai le mea sao, ona tatou punitia lea e i tatou lava o le malosi ma le mana e tuputupu ae ai, [punitia] le faateleina o lo tatou faatuatua ma le malamalama, [punitia] foi le malosi e maua ai le mana faatasi ma le Atua ma e amiotonu.²²

E le sese le muai faailoaina atu o tagata o le Ekalesia a Iesu Keriso o le Au Paia o Aso e Gata Ai o le a faaauau pea ona tuputupu ae ma faamanuiaina, i le faaleagaga ma le faaletino, pe afai latou te (1) tausia poloaiga a le Atua ma (2) savavali i le ala o le a Ia faasino mai e ala mai i Ana auauna musuia o loo umia le Perisitua Paia. O i latou ia o ni tagata, o lo latou faatuatua, aoaoga, tamaoaiga, ma le alualu i luma faaletino ma le faaleagaga o le a avea o se faamanuiaga ma se tulaga lelei i le lalolagi atoa. O ni tagata e le tatau ona matau ai se tasi, ae ia faamanuiaina ma faafeiloaiina, aua latou te saili e faia le finagalo o le Alii, ia tausia tagata uma e tusa ai ma sauniga o le faamaoni ma le amiotonu, o i latou lava e faamaoni ma usiusitai i tulafono, e usitai i tulafono ma aiaiga o faigamalo amiotonu o le lalolagi, ma usitai i tulafono ma aiaiga o le talalelei faaola a Iesu Keriso, ua faavaeina ma fuataiina e ala i le fesoasoani a Iosefa Samita e ala i le asiasiga a le Atua ma Lona Alo, o Iesu Keriso, o le o loo tu i le faaao o le galuega tele ma le ofoofogia lenei o loo tatou i ai. O la latou upu autu o le “O le Upumoni ma le Saolotoga, ” ma o le a latou faalautele atu nei mea i tagata uma, ma faia ia maua uma e tagata aafiaga o lona filemu ma le amiotonu lea e o mai faatasi ma le talalelei moni a Iesu Keriso—na o le pau lea o le ala e mafai ai ona faatuina le filemu ma le usoga o tagata i le lalolagi atoa.²³

Fautuaga mo Suesuega ma Talanoaga

O le a le faamoemoega o le Ekalesia a Iesu Keriso o le Au Paia o Aso e Gata Ai?
O a ni faamaoniga ua i ai i aso nei o tagata o le Ekalesia a Iesu Keriso o le Au Paia o Aso e Gata Ai ua “avea ma tagata maoae”? Aisea ua iloa ai e le Ekalesia lenei tuputupu ae tele?
O a ni mea e mafai ona tatou aoaoina mai i taumafaiga a le uluai Au Paia i le foiaina o faafitauli ma le fausiaina o le malo o le Atua?
O le a le faatusatusaga o le alualu i luma o le Ekalesia i aso o Peresitene Grant ma tulaga alualu i luma ua i ai nei?
E faapefea ona fesoasoani ia te oe le iloa o le Ekalesia “ua toe faatuina mo le taimi mulimuli, e le toe aveina atu i nisi lava tagata ma e le toe faaumatiaina”?
O le a so tatou sao mo le faataunuuina o le faamoemoega o le Ekalesia? O a ni auala e mafai e matua ona fesoasoani ai ia latou fanau “ia talafeagai, agavaa, ma saunia” e faia se sao i lenei faamoemoega?

President Grant in 1945 — O Peresitene Heber J. Grant i le 1945, i le 88 o tausaga o lona soifua. Sa ia maitauina ai se tuputupu ae tele i le Ekalesia i le taimi o lona soifuaga, ma sa ia molimau mai o le galuega a le Alii “o le a alu pea lava pea seia oo ina faataunuuina lona faamoemoega.”