Aoaoga a Peresitene
Mataupu 24: O Iesu Keriso o le Alo o le Atua Soifua

Mataupu 24

O Iesu Keriso o le Alo o le Atua Soifua

O Iesu Keriso o le Alo moni o le Atua, o le Togiola o tagata uma, ma o le faaao soifua o le Ekalesia a Iesu Keriso o le Au Paia o Aso e Gata Ai.

Mai le Soifuaga o Heber J. Grant

Na saunoa mai Peresitene Heber J. Grant e faapea, “E leai se mea e sili atu ona pele i le loto o le tagata e pei o le molimau ia Iesu Keriso.”1 Na matuai popole lava Peresitene Grant ia i latou o e na le maua ni molimau mautinoa o le Faaola. Sa ia folafola mai, “o le mea e sili atu ona manaomia e le lalolagi i aso nei nai lo se isi lava mea, o se faatuatua maumaututu i le Atua, lo tatou Tama, ma Iesu Keriso, Lona Alo, o le Togiola o le lalolagi.”2 Sa ia vaaia lenei manaoga tele a o ia malaga atu i le lalolagi e talai atu le talalelei ma fetaiai ai ma aoaoga sese e uiga i le soifuaga ma le misiona a Iesu Keriso. Sa faanoanoa o ia i le mea sa ia faatatau i ai o le “le lava o le talitonuga i le Atua, ma le paia o Iesu Keriso.” Mo se faataitaiga, sa ia faamatala e uiga i se tusitusiga a se nusipepa sa fautuaina ai e se tagata ina ia “lafoai e tagata lea manatu “faavalevalea” o Iesu Keriso o le Atua o le lalolagi ma le Togiola o le lalolagi.” Sa vave lava ona saunoa atu Peresitene Grant e tetee atu i lenei manatu ma tuuina atu lana molimau e puipuia ai le upumoni. Sa ia saunoa mai:

“Soo se taimi lava ou te faitauina ai lena faamatalaga—ma e tele nofoaga ua ou faitauina ai—Ou te faia lava se taumafaiga e tau atu ai i tagata i nofoaga eseese sa ou talai ai, le tulaga o le Au Paia o Aso e Gata, i le talalelei lea tatou te talitonu i ai.

“Sa ou faalauiloa atu i na fonotaga, o nisi o nei fonotaga o le toatele o le faapotopotoga o ni tagata e le auai i le Ekalesia, o tagata uma o le Au Paia o Aso e Gata Ai, e tatau ona talitonu i le aoaoga faavae, o le Atua lava Ia na asiasi mai i le taulealea o Iosefa Samita, ma o le Atua lava Ia sa faailoa mai i le taulealea, o Iesu Keriso o Lona Alo pele.”3

O upu uma sa saunoa ai Peresitene Grant e uiga i le Faaola e faailoa ai lona alofa ma lona fiafia i le Alii. Sa ia faapea mai, “o se mea moni matagofie lenei mea, e le mafai ona tatou faitau pe faalogologo i galuega na faataunuuina e lo tatou Alii ma le Faaola o Iesu Keriso, e aunoa ma le mauaina o le fiafia, ae o le isi foi itu, e leai se mea e sili atu ona matagofie i le olaga ma le talafaasolopito o se isi lava tagata, e le mafai ona tatou fiu e faalogologo i ai, pe a tatou saga faalogologo pea pe faitau pea lava pea i ai. O le tala ia Iesu le Keriso o se tala mai anamua lea e avea pea ma se tala fou. O le tele lava o taimi ou te faitau ai e uiga i Lona soifuaga ma ana galuega, o le faateleina foi lea o le olioli, le filemu, le fiafia, ma le faamalieina e faatumuina ai lou agaga. E i ai lava se fiafiaga fou e oo mai ia te au pe a mafaufau atu i Ana afioga ma le ata o le olaga ma le faaolataga lea sa Ia aoaoina atu i tagata i le taimi o Lona soifuaga i luga o le fogaeleele.”4

O le uiga na tulaga ese ai Peresitene Grant sa faamatalaina i lana molimau e uiga i le Faaola ma le talalelei toefuataiina. Na tusia e Elder John A. Widtsoe, o le sa faauuina o se Aposetolo e Peresitene Grant, e faapea: “O tagata o e latou te maua le lelei moni sili atu e ola ma le faaeteete i mataupu faavae autu ma mataupu faavae taiala. E matuai moni lenei manatu i le soifuaga o Peresitene Grant. O le faatuatua i le Atua ma lona Alo, o Iesu Keriso, faapea foi ma le talalelei toefuataiina, na taitaiina ai o ia mai lava i le taimi a o avea ma se tamaitiiti. E fai si faigata ona malamalama i lana matafaioi faapitoa sei iloga e te mafaufau i le mana taitaiina o lona faatuatua. … O lana molimau i le paia o Iesu Keriso faapea foi i le talalelei toefuataiina ua ati atu i agaga lona faamaoni aiai.”5

Aoaoga a Heber J. Grant

O Iesu Keriso o le Alo Moni o le Atua.

Matou te matuai talitonu o Iesu Keriso o le Alo o le Atua, na fanaua e le Atua, o le ulumatua i le agaga ma le alo pele e toatasi na fanaua i le tino; o Ia o le Alo o le Atua e pei lava o le avea o oe ma au o atalii a o tatou tama.6

Ou te olioli i le faatuina o le Ekalesia a Iesu Keriso e ala mai i le uluai faaaliga matagofie sa maua e le tamaitiiti o Iosefa Samita i le silia i le selau tausaga ua mavae. Sa ia tautino mai ai sa ia vaaia ni Tagata Faalelagi se toalua, o lo laua mamalu ma lo laua pupula, sa le mafai e se tagata ona faamatalaina, ma sa fetalai mai le tasi o i laua ia te ia ma tusi lona aao i le isi ma fetalai mai: “O lou Atalii pele lenei, faalogo ia te Ia.” [Tagai Talafaasolopito— Iosefa Samita 1:17.] E le tatau ona i ai se faaluafesasi i loto o tagata o le Au Paia o Aso e Gata Ai, e uiga ia Iesu Keriso o le Alo o le Atua soifua, aua o le Atua lava Ia na faailoaina atu o Ia ia Iosefa Samita.7

Na faapea mai Ponotio Pilato, o le pule o Iutaia, “Faauta i le tagata! Ao faapaleina Iesu i le pale tuitui ma amusia a o faaofuina o ia i se ofu pauli, sa tulai o ia i luma o tagata leaga o e na alalaga mai, “Ina faasatauro ia, faasatauro ia!“ [Ioane 19:5–6.]

Sa faatauasoina i le faamaualuga, faailoga tagata, ma le lotoleaga, sa vaai atu le motu o tagata i le tagata na teenaina ua na o se tagata solitulafono, o se tagata faatupu vevesi i tulafono faaleaganuu, o se tagata taufaifai; o se tasi ua latou matuai tausalaina ma le le tonu i le satauro. Ua na o se vaega toaitiiti o alii ma tamaitai na latou vaai atu ia te Ia o Ia moni o le—Alo o le Atua, le Togiola o tagata uma!

Ua sefuluiva seneturi talu ona faamanatuina e malo ua latou taua i latou o Kerisiano, le soifua mai o Keriso. E taitasi i le tausaga ona tataina logo, usuina musika, ma le alaga o siufofoga ua faatasia i le toe folafolaina atu o le savali faaagelu “o le manuia i le lalolagi, ma le finagalo alofa i tagata.” [Luka 2:14.]

Peitai, e tusa ai ma le mea na tupu i lena tofotofoga logologoa, i na vaitaimi, na vaavaai atu ai tagata ia te Ia mai vaaiga eseese. O nisi, o e na teenaina o Ia ma le mataua e pei o le motu o tagata na alalaga atu e faasatauroina Iesu, sa latou vaai atu ia te Ia ma Ona soo o ni “tagata na muai fausiaina se faiga Faakerisiano ua faaitiitia ma faavaivaiina ai le malosi o le lalolagi FaaEuropa i aso nei.” O isi ua i ai ni vaaiga manino atu, na latou mauaina e ala i mea na latou oo i ai, latou te vaai atu ia te Ia o le taitai o se faiga lea e “faalauiloaina ai le filiga, faamaoni, upumoni, mama atoatoa, agalelei; e lagolagoina tulafono, fiafia i le saolotoga, e taua mo le saolotoga, ma e finagalo e tuufaatasia tagata uma i se usoga tele e tasi.”

O le toatele latou te vaai atu ia te Ia o le “tagata e toatasi ua atoatoa—o le tagata lototele i le talafaasolopito, ” ae peitai latou te tetee i Lona paia.

O le faitau miliona o tagata latou te taliaina o Ia o se Faiaoga maoae, peitai o ana aoaoga e le aoga i tulaga faalauaitele i le taimi nei. E toaitiiti—O se fuainumera itiiti lava!—o tagata o loo nonofo i le kelope, latou te taliaina o Ia i Lona tulaga moni lava—“o le Toatasi na Fanaua e le Tama; na maliu mai i le lalolagi, o Iesu lava ia, ina ia faasatauroina mo le lalolagi, ma tauave agasala a le lalolagi, ma faamamaina i amioletonu uma.” [Tagai MFF 76:23, 41.]8

Na afio mai Iesu Keriso i le lalolagi ina ia togiolaina tagata uma.

I tagata uma o le Ekalesia i le lalolagi atoa, ma i latou e fiafia i le filemu i soo se mea lava, matou te faapea atu, faauta i lenei Tagata o Kalilaia, e le gata o se Faiaoga maoae, e le gata o se Taitai maoae, ae o le Aloalii o le Filemu, o le Tupuaga o le Faaolataga iinei ma le aso, e moni ma faamaoni o le Faaola ia o le Lalolagi!9

Matou te mananao ia alualu i luma tagata uma, ma matou te tatalo i le Atua ia faamanuia mai i tagata uma o loo taumafai mo le lelei sili atu, o tagata uma i soo se mea lava o loo galulue ai; ma matou te faapea atu i tagata uma o e talitonu o Iesu o le Keriso ma e o loo talaiina atu: Le Atua e, ia e faamanuia i lena tagata. … O Iesu o le Togiola o le lalolagi, o le Faaola o tagata uma, o le na afio mai i le lalolagi faatasi ma se misiona faalelagi na tofia ai, ina ia maliu mo le togiolaina o tagata uma. O Iesu Keriso o le Alo moni o le Atua, o le Toatasi na Fanaua i le tino. O Ia o lo tatou Togiola, ma tatou te tapuai ia te ia, ma tatou te viia le Atua mo tagata taitoatasi uma i luga o le fogaeleele o e tapuai i lo tatou Alii ma le Matai o le Togiola o le lalolagi.10

Pe a tatou mafaufau atu i le amataga mai o le lalolagi seia oo mai i le taimi nei, i ni taimi eseese, na folafola mai ai e le Atua lo tatou Tama, na ala mai i lona lava siufofoga ma siufofoga o ana Perofeta musuia, o le a ia auina mai i le lalolagi lona Alo pele e toatasi na fanaua, e ala atu ia te ia, e ala i le toetu, lea na avea ai lo tatou Alii ma uluai fua, ina ia mafai ona faaolaina uma tagata mai le faasalaga o le oti, o se mea e tatau ona oo uma i ai tagata, ma e ala mai i le usiusitai i le tulafono o le ola amiotonu, lea sa ia aoaoina mai ma faataitaia i lona olaga, e faamamaina ai agasala a le tagata lava ia ma avea ai ma suli i le Malo o le Lagi.11

O le soifua mai o Keriso lo tatou Alii sa sili atu nai lo se mea faigofie na tupu, o lona soifua mai o se mea maoae na tupu i le talafaasolopito o le lalolagi lea sa nofo faatalitali i ai le au Perofeta, lea na lagiina e fatusolo, ma lea foi na tuufaatasia ai e agelu o latou siufofoga faatasi ma tagata uma i viiga o le Atua. O se aso na poloaiina ma muai faauuina e lo tatou Tama i le Lagi, o le a ia faailoa mai ai o ia lava i lana fanau, o loo i lenei lalolagi, i le faatusa o Lona Alo Pele e Toatasi na Fanaua. …

Na ia afio mai ina ia mafai ona vaai ma iloa e tagata o Ia o le Atua, aua na ia molimau mai, o ai lava e vaai atu ia te ia ua vaai foi i le Tama, aua o ia o le faatusa moni o lona tagata [tagai Ioane 14:7–9; Eperu 1:3].

Sa afio mai o ia e aoao mai ia i tatou le uiga o le Atua, ma e ala i faataitaiga ma mataupu na ia faasino ai le ala, ma pe afai tatou te savavali ai, o le a toe taitaiina atu ai i tatou i lona afioaga. Na oo mai o ia e motusia noataga o le oti lea na saisaitia ai le tagata, ma ua mafai ai ona toetutu, lea ua faoa ai le manumalo o le tuugamau ma le tui o le oti.12

I le taimi o Lana talaiga faaleatua i Lona soifuaga, na talaiina ai e le Alii le Talalelei, ma i le avea ai ma se tagata faaletino, sa Ia tuuina mai ia i tatou faataitaiga o se tagata ua matua atoatoa.

O le talalelei o se fuafuaga e taialaina tagata ia latou fegalegaleaiga iinei a o avea ai ma tagata i la le tino, ma o se faasinoala i o latou olaga faaleagaga ma le faamoemoega ina ia faaolaina i latou ma faaeaina i le lalolagi a sau.13

I le vaitaimi o lana talaiga sa ia faatulagaina ai lana Ekalesia, filifilia aposetolo e toasefululua, lea na avea ai Peteru ma o latou taitai, sa ia tuuina atu ki o le perisitua, ma tuuina atu ma le manino ia te ia le faatulagaina o lana Ekalesia ma mataupu faavae o lana talalelei, e ala i le usiusitai ina ia mafai ona faaolaina ma toe foi atu tagata uma i le afioaga o le Atua.14

O le soifuaga o Iesu Keriso, na soifua mai i le fale o manu, na aui i lona moega vaovao, ma na faasatauroina o Ia i le va o ni tagata gaoi se toalua, o se tasi o tulaga aupito sili ona toilalo i manatu o tagata, ae peitai, na afio mai lo tatou Alii ma lo tatou Matai i le lalolagi ina ia aua nei faia Lona lava loto ae o le finagalo o Lona Tama, ma sa Ia faataunuuina ma le manumalo Lana misiona. Ua manumalo o Ia i le oti, seoli ma le tuugamau, ma sa ia maua lona taui i le itu taumatau o le nofoalii o Lona Tama.15

“Matou te talitonu e faaolaina tagata uma lava i le togisala a Keriso, pe a tausia poloaiga ma sauniga o le Talalelei.” [Mataupu Faavae o le Faatuatua 1:3.]

Matou te talitonu o Keriso, le alo pele e toatasi e faavavau, na soifua mai i se tina, sa soifua o Ia i se olaga faaletino, ma na faasatauroina o Ia i luga o le satauro, ma na maliu ai o Ia, na tuua e Lona agaga Lona tino, ma tanumia, ma toetu mai o Ia i le aso Tolu, na toe tuufaatasia ai Lona agaga ma Lona tino. …

Matou te molimau atu o nei alii [Iosefa Samita ma Sini Rikitone] lea na afio mai i ai Iesu a o tau faaiuiu le faatulagaina o Lana Ekalesia, na la tuuina mai lenei faamaumauga o lea faaaliga mamalu:

“A o ma manatunatu foi i nei mea, na tatalaina e le Alii mata o maua malamalamaaga ma ua faapupulaina ai, ua susulu faataaliolio foi le mamalu o le Alii.

“Na ma vaai i le mamalu o le Alo, i le itu taumatau o le Tama, na maua Lona atoatoa;

“Na ma vaaia foi agelu paia, ma e ua faapaiaina i luma o lona nofoalii, o loo tapuai atu i le Atua, ma le Tamai Mamoe, o e tapuai ia te ia e faavavau, faavavau lava.

“O lenei, ina ua uma ona faia molimau e tele e uiga ia te Ia, o le molimau tupito mulimuli lenei i mau uma lava, ma te faia ia te Ia: O loo soifua o Ia!

“Aua na ma vaaia o Ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama—

“E mai ia te Ia, ma ui mai ia te Ia, ma o Ia, na foafoaina ai lalolagi uma, o e nonofo ai foi o atalii ma afafine na fanaua e le Atua.” [MFF 76:19–24.]

… Tatou te faaopoopo atu la tatou molimau faamaualalo: o loo soifua le Atua, o Iesu o le Keriso, ma o Ia o se tagata Toetu, ma o Lana fuafuaga, o tama, tina ma fanau uma, o e na soifua mai, o le a toe tutu mai i tuugamau o ni tagata toetutu, e pei foi o Keriso o se tagata toetu, o e amiotonu o le a ola i le olioli mamalu ma le alualu i luma e faavavau.16

Ou te alaga fiafia i lou iloa o Iesu o le Togiola o le lalolagi, o lo tatou uso matua, ma o Lona suafa, na o Lona suafa lava, i lalo o le lagi e mafai ona tatou maua ai le faaolataga ma toe foi atu ai e mafuta faatasi ma lo tatou Tama Faalelagi ma lo tatou Faaola, faatasi ma i latou e pele ia i tatou ua muamua atu.17

Ua ofoina mai e le Faaola ia i tatou le filemu tumau, mafanafana, ma le olioli e ala mai i Lana Togiola.

O le ola i le Talalelei a Keriso, ma le olioli e tafe mai i le auauna atu i Lana fuafuaga, e oo mai ai le filemu e tasi lea e tuputupu pea e faavavau.

Sa fetalai atu Iesu i le motu o tagata e faapea:

“Ia outou o mai ia te au, o outou uma o e tigaina ma mafatia i avega, o au foi e malolo ai outou.

“Ia outou amoina lau amo, ma ia outou faaaoao ia te au, aua o au le agamalu ma le lotomaualalo; ona maua lea e outou o le malologa mo outou agaga.

“Aua e avegofie lau amo, o lau avega foi e mama ia.” [Mataio 11:28–30.]

O lana fetalaiga i Lona Au Aposetolo i le afeafe aupito i luga na faia ai le Paseka, sa Ia fetalai ai:

“Ou te tuuina atu ia te outou le manuia; o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.” Ioane 14:27.]

O Lona manuia o le a tuumamaina ai o tatou puapuaga, fusifusia ai o tatou loto nutimomoia, aveesea ai o tatou lagona ita, fausia i totonu ia i tatou se alofa i o tatou uso a tagata lea o le a faatumuina ai o tatou agaga i le toafilemu ma le fiafia.

O Lana savali ma le agalelei o Lana taulaga togiola e oo atu i le gataaga o le lalolagi; ua i ai foi mo le manuia o tagata uma o vasa mamao. Soo se mea lava e o i ai tagata, e mafai lava ona latou fesootai atu ia Keriso. O le mea lava e i ai o Ia, e mafai foi ona maua i ai le Agaga Paia, faatasi ma ona fua o le “alofa, olioli, filemu, onosai, agamalu, agalelei, faatuatua.” [Kalatia 5:22.]

O le a avea o Ia ma o tatou faamafanafanaga ma sulufaiga, o lo tatou taiala ma le fautua, o lo tatou faaolataga ma le faaeaga, aua “e leai lava se isi igoa i lalo o le lagi ua foaiina mai i tagata e mafaia ona faaolaina ai i tatou.” [Galuega 4:12.]

O lona poto faaleatua e oo mai ai le upumoni faavavau: “Aua se a le aoga i le tagata pe afai na te maua le lalolagi uma, ae maumau ai lona ola? Se a foi se mea e avatu e le tagata e togiola ai lona ola?“ [Mataio 16:26.] Fai mai Paulo, “Aua o le malo o le Atua, e le o mea e ai ma mea e inu; a o le amiotonu ma le filemu ma le olioli i le Agaga Paia.” [Tagai Roma 14:17.]

Ao lumanai lona fofogaina o le tatalo faapuluvaga [tagai Ioane 17], na aoao atu ai Iesu i le au aposetolo e faapea: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi.” [Ioane 16:33.]18

O loo Soifua Iesu Keriso ma o loo Ia taitaiina Lana Ekalesia i aso nei.

O Iesu Keriso o le Alo o le Atua soifua. … Tatou te tautino atu i le lalolagi atoa, tatou te iloa o loo soifua o Ia.19

O lenei Ekalesia o… se galuega taua ma le ofoofogia. E leai lava se isi mea e faapei o lenei i lenei lalolagi atoa, aua o Iesu Keriso, o le Alo o le Atua, sa ia faatuina le Ekalesia, ma o Ia foi o le faaao.20

O Iesu o le Keriso, ma o ia o le maatulimanu autu o lenei galuega maoae—Na te taitaiina lenei galuega, ma o le a faaauau pea ona Ia taitaia lenei galuega. 21

Matou te molimau atu o le Atua le Tama ma Lona Alo o Iesu Keriso na faaali mai i o tatou lava taimi i le Perofeta o Iosefa Samita ina ia toe faatuina Lana Ekalesia ia le toe saeia i lalo, o lena avefeau faalelagi na toefuataiina mai Lana perisitua ma le pule mamana ua i ai.22

E sili atu lou olioli i tua atu o lou malosi e faailoa ai, i le sii ae o lou leo i le tuuina atu o lau molimau ia te i latou ou te feiloai atu i ai, i lou iloa o loo soifua le Atua, ma ou te iloa o Iesu o le Keriso, le Faaola o le lalolagi, le Togiola o tagata ola uma; ou te iloa o Iosefa Samita na avea ma se Perofeta a le Atua moni soifua, e tumau foi le molimau i lou loto o Polika Iaga o se tufuga aao filifilia a le Atua soifua, o Ioane Teila, o Uilifoti Uitilafi, o Lorenisio Sinou na avea ma tufuga aao filifilia, ma o le aso o Iosefa F. Samita o se sui o le Atua soifua, ma o le fofoga tulei o le Atua i luga o lenei fogaeleele. [Na fetufaai mai e Peresitene Grant lana molimau i le aso 4 Oketopa 1918, pe tusa o le fitu o vaiaso ao lei suitulaga o ia ia Peresitene Iosefa F. Samita o se Peresitene o le Ekalesia.]23

Matou te talosaga atu i tagata uma o le lalolagi, ia o mai ia Keriso, o ia le e oo mai ai le faaolataga ia i latou uma o e tauaveina lona suafa, ma tausia poloaiga sa ia tuuina mai. Matou te molimau atu, ua toefuataiina mai le atoaga o le talalelei, ua toe faatuina lana Ekalesia, ma o le a faaauau pea ona salalau atu seia oo ina manumalo le filemu i tagata, ma oo mai ai lona malo ma faataunuuina ai lona finagalo i luga o le lalolagi e pei ona faia i le lagi. E le Alii e, sei faavave maia lena aso mamalu.24

Fautuaga mo Suesuega ma Talanoaga

  • Aisea ua sili ai ona manaomia e le lalolagi i le taimi nei le faatuatua i le Tama Faalelagi ma Iesu Keriso nai lo se isi lava mea”? O a ni aafiaga o le lalolagi e mafai ona faavaivaia ai le faatuatua o tagata ia Iesu Keriso o le Alo o le Atua? O a ni mea e mafai ona tatou faia e faateleina ai lo tatou faatuatua i le Faaola?

  • O le a se eseesega ua faia e lau molimau e uiga i le Faaola i lou olaga i aso taitasi? E faapefea ona avea le iloa e manumalo le Faaola i faigata uma, e tuuina atu ai ia te oe le faamoemoe e faafetaiaia ai luitau?

  • Aisea na afio mai ai Iesu Keriso i le lalolagi? E mafai faapefea ona sili atu ona tatou lagolagoina le Alii i Ona faamoemoega?

  • E faapefea ona avea le alualu i luma o le Ekalesia ma molimau i le misiona faifaipea a Iesu Keriso? E faapefea ona avea le iloaina o Keriso lava Ia o loo tu i le faaao o le Ekalesia ma mea e faateleina ai lau tautinoga e auai i le malo o le Atua?

  • E mafai faapefea e lo tatou malamalamaga e uiga i le misiona a le Faaola ona aafia ai a tatou fegalegaleaiga ma i latou e le tutusa o tatou talitonuga?

Faamatalaga

  1. I le Brian H. Stuy, tuufaatasia, Collected Discourses Delivered by President Wilford Woodruff, His Two Counselors, the Twelve Apostles, and Others, 5 vols. (1987–92), 1:183.

  2. Gospel Standards, tuufaatasia e G. Homer Durham (1941), 146.

  3. Gospel Standards, 6–7.

  4. Gospel Standards, 22.

  5. “The Living Prophet, ” Improvement Era, Nov. 1926, 4, 8; suia le faapalakalafaina.

  6. “Analysis of the Articles of Faith, ” Millennial Star, 5 Ian. 1922, 2.

  7. Gospel Standards, 23–24.

  8. I le James R. Clark, comp., Messages of the First Presidency of The Church of Jesus Christ of Latter-day Saints, 6 vols. (1965–75), 6:37–38.

  9. I le Messages of the First Presidency, 6:39.

  10. I le Conference Report, Ape. 1921, 203.

  11. Savali mai le Au Peresitene Sili, i le Conference Report, Ape. 1930, 3–4; faitauina e Peresitene Heber J. Grant.

  12. I le Messages of the First Presidency, 5:246.

  13. I le Messages of the First Presidency, 5:346.

  14. Savali mai le Au Peresitene Sili, i le Conference Report, Ape. 1930, 6; faitauina e Peresitene Heber J. Grant.

  15. “Letter from President Heber J. Grant, ” Millennial Star, 26 Fep. 1903, 131.

  16. I le Messages of the First Presidency, 6:32–35.

  17. I le Conference Report, Ape. 1916, 37.

  18. I le Messages of the First Presidency, 6:140.

  19. Gospel Standards, 164.

  20. I le Conference Report, Oke. 1924, 7.

  21. I le Conference Report, Oke. 1909, 30.

  22. I le Messages of the First Presidency, 6:34.

  23. I le Conference Report, Oke. 1918, 24–25.

  24. I le Messages of the First Presidency, 5:247–48.

Jesus rising from tomb

“Na afio mai lo tatou Alii ma lo tatou Matai i le lalolagi, ina ia aua nei faia Lona lava loto, ae o le finagalo o Lona Tama, ma sa Ia faataunuuina ma le manumalo Lana misiona. Ua manumalo o Ia i le oti, seoli ma le tuugamau, ma sa ia maua lona taui i le itu taumatau o le nofoalii o Lona Tama.”