Mataupu 4

Tumau Mausali

O le tumau mausali i le sailia o manaoga amiotonu e mafai ona fesoasoani i le atiinae o taleni, ausia o a tatou sini faaleagaga, ma le auauna atu i isi.

Mai le Soifuaga o Heber J. Grant

I lona soifuaga atoa sa galue ai ma le filiga ia Heber J. Grant ina ia faaleleia o ia lava, i le talitonu lea “e mafai e tagata taitoatasi uma ona faaleleia mai lea aso i lea aso, mai lea tausaga i lea tausaga, ma maua le malosi tele e faia ai mea a o mavae atu tausaga.”¹ Na lauiloa o ia i lona tumau mausali, ma na taua e faatatau ia te ia e faapea “na te le faitioina lava ia vaivaiga o isi tagata ae tauivi lava o ia e aveesea ona lava vaivaiga.”² Na ia faamatalaina le tala lenei e uiga i se taimi o lona talavou sa ia faaalia ai le uiga o le tumau mausali:

“Ina ua ou auai i le kalapu peisipolo, o tamaiti o la’u tupulaga, sa fai si matutua atu nai lo au, sa taaalo i le toaiva muamua, o i latou o e laiti ifo nai lo au sa taaalo i le au lona lua e pito i ai, ae o i latou e fai si laiti mo le au lona tolu, sa matou taaalo faatasi i le au lona tolu. O se tasi o pogai o lo matou taaalo faatasi ma i latou, ona sa le mafai ona ou togia le polo mai le tasi tini i le isi tini, ma o le isi pogai, sa ou le maua se malosi ou te tamoe ai pe a ta le polo. A ou tago atu e aumai i luga le polo, e masani ona faataio mai tama ia te au, ‘Togi mai iinei le polo lou faafafine!’ E tele naua se fiafia sa maua e au uo talavou i lo latou faalilia o au, na ou tauto ai o le a ou taalo i le au peisipolo e toaiva lena o le a manumalo i le siamupini i le Teritori o Iuta.

“Sa taliaina e lo’u tina ni tagata mautotogi i lea taimi mo se tupe e tausi ai ma’ua, ma sa ou faaiilaina o latou seevae seia oo ina ua ou sefeina se tala, lea sa ou faaaoga e faatau ai se polo peisipolo. Sa ou faaaluina le tele o itula e togi ai le polo i le fale saito o se tuaoi, (o Edwin D. Woolley, ) lea na mafua ai ona ia fai mai o au o se tama e pito sili ona paie i le Uarota Sefulutolu. Sa masani ona tiga lo’u ogalima ma na tau le maua sa’u moe i le po, ae sa faataitai pea ona ou togia le polo ma na iu ina manuia au taumafaiga ma faitaulia ai au i le au toaiva lona lua a la matou kalapu. Na iu ina ua ou auai i se kalapu sa sili atu ma na oo ina ou taalo i le au toaiva lena sa manumalo i le siamupini o le Teritori. Ma na faapea ona faataunuuina ai la’u folafolaga ia te au lava ma ou litaea ai mai le peisipolo.”

Na faailoa mulimuli ane e Peresitene Grant e faapea sa ia “faama’imauina se vaega” o “itula ma aso ma vaiaso ma masina” i lona togiina o le polo peisipolo i le fale o le faatoaga a lona tuaoi. Na ia saunoa mai: “Ua faagaeetia au i le manatu e faapea ou te lei … auai i le galuega sili ona maualuga na gafatia e lo’u tagata. … Ae peitai, e tasi le mea na ausia e le tulaga na ou oo i ai o se tagata taalo peisipolo, o le faataunuuina lea o se folafolaga sa ou faia ia te au lava ia.”³

Sa tumau mausali pea le taulealea o Heber J. Grant seia oo lava ina ua iloa taalo i le malo, faaleleia lana kalama, ma ia atiinaeina se tusitusi manaia tele.

I lona aoaoina o le tumau mausali i lona talavou, sa ia faaauau pea ona faaaogaina lea mataupu faavae a o faasolo ina matua. Mo se faataitaiga, sa ia fuafua o le a aoao e pese. Na ia toe faamatalaina: “Mai le taimi sa iva ai o’u tausaga, sa ou taumafai ai ou te pese. Sa ou taumafai i lea taimi ma lea taimi ae na foliga mai lava e leai se faamanuiaina. Pe tusa o le fasefulutolu o o’u tausaga, sa i ai sa’u failautusi faapitoa e manaia lana malu. Sa ou ta’uina atu ia te ia o le a ou tuuina atu ia te ia soo se mea o i le lalolagi pe afai e mafai ona ou usuina na o sina nota lava se tasi. Sa ata o ia ma faapea mai, ‘Soo se tasi lava e i ai sona leo ma tumau mausali e mafai ona pese.’ Sa ou tofiaina loa lava o ia e avea ma o’u faiaoga o le pese.

“Sa amata ai lava ma au lesona pese i lena afiafi. I le uma ai o le lua itula o faataitaiga sa le mafai lava ona ou usuina se laina se tasi mai le pese sa ma faataitaia. Ina ua uma ona faataitaia lena pese mo le silia ma le faa-limaafe, sa matuai matautia se tulaga na oo i ai ina ua ou taumafai e usu i ni mea faitele. Sa ou toe faataitaia mo le isi ono masina. O le taimi nei ua na o ni nai itula lava e mafai ona ou aoaoina ai se pese.”⁴

Sa lelei uiga faaalia o Peresitene Grant e tusa ai ma ana tauiviga e aoao ina ia iloa pese, ma na te lei tuu atu i ana mea sese po o le talie po o faitioga a isi e faalavelave ia te ia. I se lauga i le autalavou o le Ekalesia, na ia saunoa atu ai:

“A o ou aoao ia iloa pese, … sa faasefululua ona ou faataitaia se pese [patino] i le taimi e tasi. E tolu fuaiupu e i ai; o lea sa ou usuina ai ia ni fuaiupu se tolusefuluono, ma o le faitauga sa’o lava sa ou faia ai ni mea sese se lima i se fuaiupu, lea e tusa ai ma le 180 mea sese i le faataitaiga e tasi, ma e leai ma se mea na ou iloaina. Ina ua faatoa amata ona ou aoao ina ia iloa pese, e tusa ma le tolu i le fa masina sa ou faaaluina e aoao ai ni viiga faigofie se lua. Sa na o le tolu itula sa ou aoaoina ai se viiga fou i nai vaiaso ua tuanai atu—e afa itula sa faataitai ai i afiafi uma mo aso e ono, ma sa sa’o lelei mea uma.”⁵

E masani ona sii mai e Peresitene Heber J. Grant le saunoaga lenei, lea e faatatau i nisi taimi ia Ralph Waldo Emerson: “O le mea tatou te faia soo, e oo ina avea ma mea faigofie ia i tatou; e le faapea ua suia le natura o lena mea, ae ua faateleina lo tatou poto e fai ai.”⁶ E soifua ai Peresitene Grant i lenei upumoni, aemaise lava i le tautuaina o le Alii. E ui i faigata e pei o le mativa ma le vave ona maliu o lona tama, ae sa ia tumau mausali pea i le tausiga o poloaiga, faataunuu ona valaauga o le Ekalesia, ma le faia o mea uma na ia mafaia e fausia ai le malo o le Atua i le lalolagi.

Aoaoga a Heber J. Grant

E mafai ona tatou ausia soo se sini aoga pe afai tatou te tumau mausali.

Ou te talitonu e mafai ona tatou ausia soo se mea tatou te mafaufau i ai, ma e leai se teine ma se tama e nonofo i lalo ma faapea ane, e le mafai ona latou faia ia lelei e pei o isi, o lea e le mafai ai ona latou faia se mea. Ua tuuina mai e le Atua i nisi tagata ia taleni e sefulu; o isi, na ia tuuina atu i ai le tasi; ae o i latou o e na faalauteleina le taleni e tasi o le a ola e vaai i le aso o le a sili atu ai i latou nai lo i latou o e sa i ai taleni e sefulu ae na le mafai ona faalauteleina.⁷

O le faamaoni, aua le fiu, ma le naunautai o uiga ia o le a fesoasoani ia te oe e te manumalo ai i le taua o loo tau i le olaga.⁸

Ou te talitonu seiloga ua ia i tatou le naunautaiga e faataunuuina ai ni mea ma faia ni mea tatou te faatauaina, ae tau leai se aoga i le taua o le olaga. E leai se mea ua ou iloa i le taimi nei e foliga mai e sili ona faanoanoa ai, nai lo le iloaina lea o se aofaiga o o tatou tagata o e ua le toe i ai le faamaoni ma le naunautai ma le fiafia e faia ni mea. E foliga mai ia te au e sese uma lava. E tatau i tagata uma taitoatasi ona i ai se manao e tuputupu a’e ai ma faateleina le malosi ma le mafai ona faia ni mea. E mautinoa lava afai e na o sina taumafaiga o le loto, pe na o sina naunautaiga, e leai se mea tatou te ausia. E tatau ona tatou tuu atu i lena naunautaiga le galue ina ia faataunuuina ai mea tatou te mananao i ai. Ou te mautinoa o se alii talavou o le ua matuai atoatoa ona faamalieina i le mea o loo ia faia, e ui lava atonu e laitiiti se mea o ia faia, ma ua leai foi se nauautaiga e faia ai se isi mea e sili atu, o le a tumau ai lava i le mea e tasi. Ae ua ou talitonu e mafai e tagata taitoatasi uma ona faaleleia mai lea aso i lea aso, mai lea tausaga i lea tausaga, ma maua le malosi tele e faia ai mea a o mavae atu tausaga. Ou te talitonu i lena mea ma lo’u loto atoa.⁹

O le faatino ma le ola ai, tatou te lelei ai i soo se galuega ma soo se mea e fiafia i ai i le olaga, e tusa lava pe faalelotu pe faasalemausau.¹⁰

E leai se isi fua faatatau faigofie ua ou iloa i le faamanuiaina. Tumau mausali, tumau mausali, TUMAU MAUSALI; galue, galue, GALUE—o le mea lena e taulia i tauiviga o lenei olaga.¹¹

O le tumau mausali e moomia ina ia tumau ai i luga o le ala lea e tau atu i le ola faavavau.

Ua ou iloaina e moomia se taumafaiga faifaipea i la tatou vaega ina ia manuia ai o tatou olaga. E leai ma se taumafaiga e moomia i le taavale agai i lalo o le mapuepue, ae moomia se taumafaiga ina ia a’ea ai le tumutumu o le mapu’epu’e. E leai se taumafaiga e moomia e savalia ai le ala lautele lea e tau atu i le faaumatiaga; ae moomia se taumafaiga ina ia tumau ai pea i luga o le ala sa’o ma le vaapiapi lea e tau atu i le ola faavavau.¹²

Ou te lagona e tatau ona tatou aoao ina ia aua ne’i lotovaivai. … Ou te talitonu afai tatou te fuafua i totonu o o tatou loto faapea o faamanuiaga a le Atua lo tatou Tama Faalelagi o le a tatou ausia ai se galuega, o le a tuuina mai e le Atua le malosi tatou te faataunuuina ai lena galuega; ae pe a tatou tuu le taumafai, pe a tatou lotovaivai, pe a tatou vaai atu i luga o le tumutumu o le mauga ma faapea ifo e le mafai ona a’ea le tumutumu, ae tatou te lei faia se taumafaiga, o le a le faataunuuina lava.

Na fai atu Nifae i lona tama o le a ia alu ma faia mea ua poloaiina ai e le Atua [tagai i le 1 Nifae 3:7], ma ina ua le mafaia e ona uso ona aumaia ia papatusi ma o lea na latou toe foi mai ai ma le lotovaivai. … Sa ia faapea atu i ona uso: “O soifua le Atua, o ola foi i tatou, tatou te le o atu i lo tatou tama i le vao, seia uma ona faia e i tatou le mea ua poloaiina ai i tatou e le Atua.” [1 Nifae 3:15.] E tatau la ona manatua e i tatou o le Au Paia o Aso e Gata Ai, sa faamanuiaina ia Nifae; e tatau ona tatou manatua na ia maua mai ia papatusi e ui i faigata sa ia feagai ma mauaina mai ai ia afioga taua a le Atua; na ia mauaina mai ia talafaamaumau sa sili ona taua; sa matuai taua i e na tupuga mai ia te ia, ma ana le seanoa na talafaamaumau semanu o le a faigata mo le toatele o i latou ona maua le ala sa’o ma le vaapiapi lea e tau atu i le ola faavavau.

Afai e i ai se tagata se toatasi e sili atu nai lo isi i totonu o le Tusi a Mamona lea ou te moomoo i ai ma o ana faataitaiga ou te lagona e ao ona faataitai i ai, o lea tagata o Nifae o anamua; aua ne’i lotovaivai, aua le faanoanoa, ia saunia pea, ia naunau pea e galue i le mea e sili e te mafaia mo le faataunuuina o faamoemoega o le Atua.¹³

Afai e te fia manao ia iloa pe faapefea ona faasaoina, e mafai ona ou ta’uina atu ia te oe; o le tausia lea o poloaiga a le Atua. E leai se mana o i le lalolagi, e leai se mana i lalo ifo o le lalolagi, o le a taofia oe po o au po o soo se isi o le Au Paia o Aso e Gata Ai mai le faasaoina, se’i vagana ai o i tatou lava. O i tatou o tusiata o o tatou lava olaga, e le gata i olaga iinei, ae faapea foi i olaga o le a oo mai i le faavavau. E mafaia e i tatou lava ona faataunuuina soo se tiute ma matafaioi o loo moomia mai e le Atua mai tagata. E leai se poloaiga ua tuuina mai ia i tatou e aunoa ma le tuuina mai e le Atua o le mana ia i tatou e tausia ai lena poloaiga. Afai tatou te toilalo, o i tatou, ma e na o i tatou lava, e gafa ma le toilalo, aua ua tuuina mai e le Atua i Ana auauna, mai le Peresitene o le Ekalesia e oo mai i lalo i le tagata sili ona faatauvaa, ia le malosi atoa, le malamalama atoa, le mana atoa lea e moomia, ina ia faataunuuina ai ma le faamaoni, ma le maelega ia soo se tiute ma soo se matafaioi lea ua tuuina atu i luga o i latou, ma o i tatou, e na o i tatou lava e tali atu pe afai tatou te toilalo i le faataunuuina o lenei matafaioi.¹⁴

O le faatuatua ma le malamalama e aunoa ma le faatinoina e leai se aoga. O le malamalama uma i le lalolagi o le a leai se aoga i soo se mea seiloga tatou te faaaogaina ma faatinoina lena malamalama. O i tatou o tusiata ma tagata e fauina o tatou olaga, ma afai e toilalo i tatou i le faatinoina o lo tatou malamalama ma faia ia tiute ua tuuina mai ia i tatou ua tatou fausia se olaga toilalo popo.¹⁵

O le fesoasoani a lo tatou Tama Faalelagi e le mafai ai ona leai se matafaioi po o se tulafono o le Ekalesia tatou te le mafai ona faataunuuina. O le a tuuina mai e le Alii le malosi ma le agavaa ia i tatou, e faataunuuina ai soo se tiute ma soo se galuega ua tuuina mai ia i tatou, i se tulaga e tusa ma lana silafaga. E na o le pau lava le fesili, pe o ia i tatou le naunautaiga? Sa ou faalogo ananafi i se [tagata] o le na faapea mai e le mafai ona ia tuueseina le inu kofe. Ou te le talitonu o loo ta’uina e lena tagata le mea moni. Ou te manatu e le o lava lona naunautai e taumafai ai e tuuese lena amioga.¹⁶

E toatele tagata ua ou feiloai i ai ua faapea mai, “Lau Susuga Grant, e faapefea ona e faamatalaina le tulaga lea e faapea o le toatele o i latou o e na molimau i lo latou malamalama i le paia o le galuega ua taua o le faaMamona, ma le paia o le misiona a le Perofeta o Iosefa Samita, ae mulimuli ane ua liliuese mai le Talalelei a le Au Paia o Aso e Gata Ai ma avea ma ona fili inosia?” E faigofie lava ona ou tali atu i ai e leai se folafolaga na tuuina atu i soo se alii, tamaitai po o se tamaitiiti, e tusa lava po o le a le molimau na latou mauaina, po o le a le malamalama ma le atamai e mafai ona latou maua mai le Atua, ina ia latou tumau ma mausali ai i le ala sa’o ma le vaapiapi lea e tau atu i le ola faavavau, seiloga lava latou te tausia poloaiga a le Atua. E leai se tagata ua ou iloaina o le Au Paia o Aso e Gata Ai ua faamaoni i le auai i ana tatalo faaleaiga ma faia ana tatalo lilo, e auai i ana fonotaga faalauaitele ma fonotaga a le korama, o le ua saunia ma naunau e totogi le tasi vaesefulu o ana tupe maua i le tausaga e avea ma sefuluai i le Alii, o le ua tausia le mea ua tatou iloaina o le Upu o le Poto—ou te le iloaina lava se tagata faapena ua liliuese mai le Ekalesia. Ae ua ou iloaina le toatele o e, e ui lava i le tele o mea ofoofogia ma le maoae ua faaali atu ia i latou, ae ua se ese lava mai le ala, aua ua latou le amanaiaina ia tiute ma matafaioi ua tuuina atu ia i latou e le Au Paia o Aso e Gata Ai.¹⁷

O se tasi o mea tele e galue i ai [le tiapolo] o le manatu lea faapea o tatou uma lava o ni tagata e matitiva, vaivai ma e matuai taliaina fiafia lo tatou vaivai, ma e taumafai o ia e faaaoga lo tatou malamalama i lea tulaga e musuia ai i tatou i le manatu faapea, tatou te le lelei ma o le mea o loo tatou faia e maimau ai le taimi o loo tatou faaaluina e fai ai. Ae e mafai ona tatou mautinoa afai tatou te faamalosi i luma i nai tiute laiti ua tuu mai i o tatou luga i lea aso ma lea aso, o le a faapea foi ona tatou saunia mo isi matafaioi sili atu, ma, o le tausiga agalelei a le Alii, o le a oo mai ai galuega sili e faia mo le lelei o lana galuega.¹⁸

Ou te naunau e faatauanauina mafaufau o [tagata] talavou e faapea, talu ai ona e le i faamanuiaina i latou i le taimi ua fano, pe na faatoilaloina foi e ola i ni olaga lelei, e le tatau lava ona latou lagona faapea ua leai se faamoemoe mo i latou i le lumanai. E leai se aoaoga a lo tatou Alii ma le Matai, o Iesu Keriso, e sili atu ona manino nai lo le aoaoga lea na ia tuuina mai e faapea o le a leai ma sa tatou agasala na tatou faia i le taimi ua tuanai o le a tuuaia ai i tatou, pe afai tatou te salamo ma lafoai, i le galulue ai ma le maelega i le lumanai mo le mea tonu.¹⁹

E tatau ona tatou tumau mausali i le fesoasoani atu i isi.

E masani ona ou faamatalaina se mea na oo i ai le Fomai o Karl G. Maeser. Na ia faamatalaina le oo atu o se tina mativa ua oti lana tane ma lana tama ia te ia. Na ia faailoa atu ia Brother Maeser e faapea e na o le pau lava lenei o lana tama; ma e alu o ia e tata lavalava o isi tagata e sefe ai se tupe ina ia ave ai lana tama i le Iunivesite o Polika Iaga ma sa ia faalogo e mafaia e Brother Maeser ona faasa’osa’oina ni tamaiti faalogogata. Sa ia tauina atu ia Brother Maeser e faapea ua le mafai ona ia taulimaina le tamaitiiti, ma ua le mafaia foi e le epikopo ma ona fesoasoani ona faia se mea ia te ia ma ua latou fai mai uma lava o ia o se tamaitiiti leaga.

Na amata le aoga a le tamaitiiti ma e lei umi ae oo i ni faafitauli. Na ta’u atu e Brother Maeser le auala na ia solia ai tulafono uma a le aoga. E leai se mea e mafai e faiaoga ona fai ia te ia, ma e matuai leaga lava lona aafiaga i totonu o le aoga. Na tau le mautonu ia Brother Maeser i le tuliina o ia mai le aoga ona o lona mafaufau i lena tina mativa ua oti lana tane o loo alu atu e tata lavalava o tagata ina ia mafai ai ona sau i le aoga lana tama e toatasi; o lea sa ia onosaia ai amioga a lenei tamaitiiti le mafaufau ma le faalogogata seia oo lava ina ua le mafai ona ia toe onosaia. Ona ia tulia ai loa lea o ia mai le aoga.

O le taeao na sosoo ai i le ta o le valu, o le taimi lava na taunuu ai Brother Maeser i lona ofisa, na faalogoina ai foi ma se tu- ’itu’i i lona faitotoa. Ina ua ia tatalaina le faitotoa, sa ia vaaia lenei tamaitiiti o tutu mai ai. Na saunoa mai Brother Maeser o le taimi lava na vaai atu ai i le tamaitiiti ma mafaufau i faafitauli uma sa ia faia i totonu o le aoga, sa na o le pau le lagona sa oo atu ia te ia “o le fasi, a o pupula mai ona mata.” O lona mafaufau muamua lava lena i le tamaitiiti o le na ia tulia i le aso ua tuanai.

Sa faapea atu le tamaitiiti: “Brother Maeser, toe tuu mai lava se avanoa se tasi mo au.”

[Na toe faamatalaina mulimuli ane e] Brother Maeser: “Sa ou tu iina ma le le gaoia ma mafaufau i lena tamaitiiti ma le talosaga mai mo se isi avanoa. E lei manatu o ia o le a ou toe tuuina atu ia te ia se isi avanoa; ma sa ia faapea mai: ‘Brother Maeser, Brother Maeser—toe tuu mai se isi avanoa se tasi ia te au.’ ”

Sa ootia lagona o Brother Maeser, a o faataalise atu i lima aioi o loo faaloaloa mai o le tamaitiiti ma fusi mai ia te ia ma sogi atu i ai, ma folafola atu i ai ni avanoa se selau.

“O lenei, ” o le saunoaga lea a Brother Maeser, “o le a so outou manatu—o lena tamaitiiti o loo avea ma se fesoasoani i le epikopo i le nuu lava lena sa ola a’e ai ma sa avea ai o se tagata leaga!” …

O ituaiga faamanuiaga nei e taulia—o faamanuiaga o uiga taua faaletagata. O le onosai, o le le fiu, o galuega taua tatou te faia i o tatou tagata talavou o e o loo moomia le fesoasoani, ma i latou o e ua o ese mai ia i tatou ona o nisi o mafuaaga, e masani ona toe foi mai ina ia tauia ai i tatou i se fiafia ma se lotomalie e le mafaamatalaina i tausaga a sau.

Ia tatou galulue ma le filiga, ma le onosai, ma le faamagalo atu, ma le naunautai lelei ia i latou uma o e o loo moomia la tatou fesoasoani!²⁰

Fautuaga mo Suesuega ma Talanoaga

O a ni mea na e oo i ai na faamanuia ai oe e le Alii ona o lou tumau mausali?
O le a le mea na uunaia ai oe ina ia tumau mausali i le faia o lo tatou tiute i le Alii?
O a ni faigata e tatau ona tatou saunia i ai a o tatou tumau mausali pea i le atiinaeina o a tatou taleni ma malosiaga? i le ola ai i poloaiga? i le fesoasoani atu i isi?
Aisea e taua ai le tumau mausali i le ola ai i se olaga faamanuiaina amiotonu ma le faavavau? (Tagai foi i le 1 Nifae 13:37; 3 Nifae 27:16; MFF 14:7.)
Na faamatalaina e Peresitene Grant lona faaaloalo tele mo le perofeta o Nifae. O a ni mea e tutusa ai ia Nifae ma Peresitene Grant? O le a se mea e mafai ona e faia ina ia mulimuli ai i a la faataitaiga?
O a ni auala e mafai ai ona tatou auauna atu ia i latou “o e ua o ese mai ia i tatou”?
O a ni auala ua faamanuiaina ai oe ona o taumafaiga tumau mausali a isi?

boy throwing baseball — Na atiinae e Heber J. Grant le uiga o le tumau mausali i lona talavou. Na ia saunoa mulimuli ane e faapea: “E leai se isi fua faatatau faigofie ua ou iloa i le faamanuiaina. Tumau mausali, tumau mausali, TUMAU MAUSALI; galue, galue, GALUE—o le mea lena e taulia i tauiviga o le olaga.”