Mataupu 22

O Le Aoaoina o Fanau i Aoaiga ma Apoapoaiga o le Talalelei

O matua, faatasi ai ma le fesoasoaniga a taitai o le Ekalesia ma faiaoga, e tatau ona galulue ma le filiga ma le le faavaivai i le aoaoina o fanau i le talalelei.

Mai le Soifuaga o Heber J. Grant

Etele mea ua tauina mai e uiga i le filifiliga ma le usiusitai o Peresitene Heber J. Grant. Peitai i lona mauaina o le tele o faamanuiaga ona o le taunuuga o lona lava faatuatua ma le galue malosi, sa vave ona ia faailoa mai ai lona nofo aitalafu ia i latou o e sa aoaoina atu ia te ia le talalelei a o tamaitiiti.

E masani ona ia tuuina atu se faaaloaloga i lona tina. Sa ia saunoa mai, “O le mea mautinoa lava, o au lava ia, ou te nofo aitalafu i mea uma i lou tina, aua na maliu lou tama ae faatoa iva aso o lou matua; ma o aoaoga ofoofogia, o le faatuatua, o le faamaoni o lou tina sa avea ma musumusuga ia te au.”¹ Sa ia saunoa mai e uiga i lana filifiliga e faaipoipo i le malumalu e faapea: “Sa ou faafetai tele i musumusuga ma faanaunauga sa ou maua e tatau ona ou amataina sao le olaga. Aisea na oo mai ai nei musumusuga ma naunautaiga ia te au? Na oo mai ia te au aua sa talitonu lou tina i le talalelei, sa ia aoao mai ia te au le taua o le talalelei, sa ia tuuina mai ia te au se naunautai ina ia ou mauaina uma faamanuiaga o le amataina sao o le olaga ma le faia o mea e ogatasi ma aoaoga o le talalelei.”²

Sa faapea foi ona faailoa mai e Peresitene Grant lana faafetai i faiaoga o le Aoga Sa ma i latou na taitaiina o ia i aso o tamaitiiti. Sa ia saunoa mai, “Ou te matua faafetai tele e oo atu i le faavavau i nei alii mo aafiaga ua latou faia ia te au.”³

O lona mulimuli atu i faataitaiga a faiaoga taua i lona soifuaga, sa galue ai ma le filiga Peresitene Grant i le aoaoina atu o le upumoni i lana lava fanau. Sa faamatala e lona alo tamaitai o Frances Grant Bennett e uiga i ana auala malu e fesoasoani ai ia te ia ma nai ona tei ia ola i le talalelei: “O ni mea e itiiti le taua, e seasea lava fai mai tama ‘Leai’ ia te i matou. Ae peitai, pe a faapea mai o ia ‘Leai, ’ matou te iloa o lona loto lea. O ana faataitaiga na mafai ai ona matou faia a matou lava filifiliga i soo se mea e talafeagai ai. Na te faamalamalama mai ma le onosai le mafuaaga na te manatu ai e le lelei sea fuafuaga i lona faapea mai, ‘O lo’u manatu lena, ae o le mea moni, e tatau ona e filifili mo oe lava.’ O le taunuuga, o a matou filifiliga e masani lava ona tutusa ma lana filifiliga. Sa mafai ona ia uunaia i matou ia matou mananao e faia le mea lelei nai lo le faamalosia ia faia.”⁴

E le mafai ona vaivai Peresitene Grant i ana taumafaiga e aoao lana fanau, e tusa lava pe o le toatele o i latou ua matutua. I le 52 o tausaga o lona soifuaga, a o avea o ia ma se tasi o le Korama a Aposetolo e Toasefululua, sa faafofoga atu o ia ma le totoa i se lauga o le konafesi aoao lea na uunaia ai e Peresitene Iosefa F. Samita tagata o le Ekalesia ina ia “faaali atu lo latou faatuatua, lo latou gauai ma le alofa i mataupu faavae o le talalelei, i le ala latou te tausia ai a latou fanau ma faafaileleina i latou i le faatuatua.”⁵ Sa tulai Elder Grant i luga o le pulelaa i se taimi mulimuli ane o lena aso ma saunoa mai:

“O le tasi o naunautaiga tele o lou olaga, o le mafai lea ona ou ola agavaa mo le tama ma le tina ua ou maua; ma o le tasi foi o faanaunauga tele o lou olaga o le tausia lea o lau fanau i aoaiga ma apoapoagia o le Talalelei. O le tasi o autu sa sili ona ou fiafia e aoao atu i le Au Paia o Aso e Gata Ai, e maua mai i le faaaliga a le Alii lea sa ia fetalai mai ai ia i tatou, o lo tatou tiute le talai atu ia tatou fanau ma aoao atu ia i latou le Talalelei a Iesu Keriso, musuia i latou ia faatuatua i le Alii ma le Faaola o le lalolagi, ma aoao i latou ia tatalo ma savavali tonu i luma o le Atua [tagai MFF 68:25–28]. Ou te talitonu o lenei poloaiga ua sili ona le amanaiaina, ma ou te matuai fiafia lava i saunoaga a lo tatou Peresitene i aso nei, o le uunaiina o le Au Paia o Aso e Gata Ai e faia o latou tiute i lenei tulaga. Sa ou taumafai e faia lea mea, peitai sa ou faia se tautinoga ia ou saga faatuatua pea i le faia o lea mea i le lumanai. Ou te talitonu o loo i ai avanoa mo le alualu i luma mo i tatou uma i lenei itu.”⁶

Aoaoga a Heber J. Grant

E pau i luga o matua le aoaoina o a latou fanau i mataupu faavae o le talalelei.

Ou te talitonu o loo ou saogalemu i le faapea atu o naunautaiga sili ona faamaoni o tagata moni uma o le Au Paia o Aso e Gata Ai, o le mafai lea e a latou fanau ona ola i le aoaiga ma le apoapoaiga o le Talalelei, tausia poloaiga a le Atua, ina ia mafai ona faaolaina i latou i Lona malo. E matuai faavalevalea lava lea manatu faapea afai e i ai i se tamaitiiti se fatu sese ma le faatiapolo ua totoina i lona mafaufau i le olaga atoa, o le a outou mafaia i se taimi ona totoina i lena mafaufau se laau o le upumoni ma fua mai ai se seleselega o le upumoni. … Tatou te iloa e matuai faavalevalea lava se faifaatoaga na te tauvalaau atu i soo se tagata e ui ane i lana faatoaga e tauai atu i totonu ni fatu o vaovao, o le faia o lenei mea mo le umi e luasefulu tasi tausaga, ona faamoemoe lea e toto ai ni saito ma faamoemoe foi o le a maua mai ai se seleselega lelei.

E mafai ona ou iloa faatele fuainumera, ma e mafai foi ona iloa e lou toalua, ae e le mafai i lena tulaga ona ou faamoemoe e fananau mai lau fanau ua i ai se malamalama i faatele i o latou mafaufau. E mafai ona iloa e moni le Talalelei, ma e mafai ona iloa e lou toalua; ae le mafai ona outou mafaufau mo sina taimi e tasi e mafai e a outou fanau ona fananau mai ma lena malamalama. Tatou te maua se molimau i le Talalelei e ala i le usitaia o tulafono ma sauniga faapena; ma o le a maua e a tatou fanau lea malamalama moni i lea ala e tasi, ma afai o le a tatou le aoaoina i latou, o le a latou le savavali i le ala sao ma le vaapiapi lea e taitaiina atu ai i le ola e faavavau, o le a le mafai ona latou mauaina lenei malamalama. Ua ou faalogo ua faapea mai tagata o a latou fanau o ni suli ua fananau mai i folafolaga uma o le feagaiga fou ma le faavavau, ma ua latou tutupu ae faatasi ai ma se malamalamaaga o le Talalelei tusa lava pe o a mea latou te faia. Ou te fia fai atu ia te outou e le o se aoaoga faavae moni lena, o le faafeagai tonu lava lena o le poloaiga a lo tatou Tama Faalelagi. Ua tatou iloa ua tuuina mai e le Au Paia o Aso e Gata Ai le matafaioi, e le o se talosaga, ae o se tulafono, ma e tatau ona latou aoaoina a latou fanau:

O lenei foi, afai e maua fanau e matua i Siona, po o se siteki ua faatulagaina e le aoao atu ia te i latou ia malamalama le mataupu o le salamo, ma le faatuatua ia Keriso le Atalii o le Atua Soifua, ma le papatisoga ma le meaalofa o le Agaga Paia i le faaeeina o lima, pe a valu tausaga o lona matua o le a pau lea agasala i matua;

“Aua o le a avea lenei mataupu ma tulafono i e nonofo i Siona, po o soo se tasi o ona siteki ua faatulagaina;

“O le a papatisoina foi a latou fanaumole faamagaloina o a latou agasala pe a valu tausaga le matua, ma maua le faaeega o lima,

“O le a latou aoao atu foi i a latou fanau ia tatalo, ma savavali tonu i luma o le Alii.” [MFF 68:25–28.] …

O tama uma o e alolofa i le Talalelei ua saunia ma naunau e o atu i tuluiga o le lalolagi e talai atu, ma o se tasi o fiafiaga sili e mafai e soo se tasi ona maua o le i ai lea i le aumaia o agaga i le malamalama o le upumoni. E tatau ona avea ma se fiafiaga sili ia i tatou le aoaoina o a tatou fanau i le ata o le faaolataga.⁷

Mai nisi o Ana uluai poloaiga ia Atamu ma Eva, na fetalai atu le Alii: “Ia fanafanau ma ia uluuluola i le lalolagi.” [Kenese 1:28.] Sa ia toe aumaia foi lena poloaiga i o tatou aso. Ua toe faaalia mai foi i lenei augatupulaga mulimuli, le mataupu faavae o le faavavau o le feagaiga o le faaipoipoga. Ua ia toefuatai mai i le lalolagi le pule mo le ulufale atu i lena feagaiga, ma folafola mai, ua na o le pau lea o le ala sao ma tatau mo le tuufaatasia o le tane ma le ava, ma na o le ala foi lea e mafai ona aveina atu ai le sootaga paia o aiga i tua atu o le oti ma agai atu ai i le faavavau. Ua ia folafola mai, o lenei sootaga e faavavau na o le pau le ala e mafai ona fausia ai, o sauniga ia o loo faataunuuina i totonu o malumalu paia o le Alii. O le mea lea, e tatau ai i Ona tagata ona na o totonu lava o Lona malumalu e faaipoipo ai e tusa ai ma nei sauniga.

Ua fetalai mai le Alii ia i tatou, o se tiute o tane uma ma ava le usiusitai i le poloaiga sa tuuina atu ia Atamu, ina ia fanafanau ma faatumu ai le lalolagi, ina ia mafai e le leteona ma leteona o agaga filifilia o loo faatalitali mai mo ni o latou tino faaletino, ona o mai iinei ma agai ai i luma, i lalo o le fuafuaga a le Atua i le avea ma agaga atoatoa, aua a aunoa ma nei tino faaletino, e le mafai ona latou alualu i luma i lo latou taunuuga na fuafuaina e le Atua. O le mea lea e ao ai i tane uma ma ava ona avea ma se tama ma se tina i Isaraelu, i fanau e fananau mai i le feagaiga paia ma faavavau.

O le aumaia o nei agaga filifilia i le lalolagi, e tauave ai e tama ma tina taitasi se matafaioi sili ona paia e uiga i lenei agaga ua i ai se tino faaletino ma faia mo le Alii lava Ia, aua o le iuga o lena agaga i le faavavau a sau, e faalagolago tele i le tausiga, i aoaoga, ma faataitaiga sa tuuina atu i ai e matua.

E leai se matua e mafai ona aloese mai lena matafaioi ma lena tiutetauave, ma o le faataunuuina lelei o lena tiute, o le a matua faamasinoina ai lava i tatou e le Alii. O le tiute aupito i maualuga lenei e mafai e tagata i le lalolagi ona tauaveina i o latou luga.

Ua faapea ona avea ai le avea ma tina ma se valaauga paia, o se tautinoga paia mo le faataunuuina o le fuafuaga a le Alii, o se ositaulaga e uai atu i le tausiga ma le vaavaaiga, ma le fafagaina i le tino, mafaufau ma le agaga, o i latou o e na tausia lo latou uluai tofi ma ua o mai i lenei lalolagi mo lo latou tofi lona lua “ia iloa ai, pe latou te faia mea uma e poloaiina ai i latou e le Alii lo latou Atua.” [Aperaamo 3:25.] O le taitaiina atu o i latou ia tausia lo latou tofi lona lua o le matafaioi lena a tina, ma “o i latou foi o e e tausia lo latou tofi lona lua, o le a faaopoopoina i luga o o latou ulu le mamalu e faavavau faavavau lava.” [Aperaamo 3:26.] …

O le avea ma tina, e latalata atu i le faaleatua. O se galuega aupito maualuga, ma aupito paia lea e faia e le tagata. E tuu ai o ia, o le na te faamamaluina lona valaauga paia ma lana galuega, e pito atu i agelu. Mo outou tina o Isaraelu, matou te faapea atu, ia faamanuia outou e le Atua, ma puipuia outou, ma tuuina atu ia te outou le malosi, ma le lototele, o le faatuatua ma le atamai, o le alofa paia ma le faapaiaga i le tiute, ina ia mafai ona outou faataunuuina i le maualuga e gata ai lou valaauga paia. Mo outou tina ma i latou o le a avea ma tina i ni aso, matou te faapea atu: Ia amiotonu, nofo mama, ola amiotonu, ina ia mafai e a outou fanau i le augatupulaga mulimuli ona faafetai atu ia te outou.⁸

Ua ou faalogo o faapea mai alii ma tamaitai o le a latou tuuina atu le avanoa i o latou atalii ma afafine e tutupu ae ai ma avea ma tagata matutua, ae latou te lei taumafai e aoao atu mataupu faavae o le talalelei ia i latou, o le a latou le monotiina atu le talalelei ia i latou a o laiti, ae latou te lei mafai ona malamalama i ai. Pe a ou faalogo o faapea mai alii ma tamaitai, ou te manatu ua le ia te i tatou le tulaga e faatuatuaina ai mataupu faavae o le talalelei, ma e le o malamalama i le tulaga e tatau ai. Ua fetalai mai le Alii, o lo tatou tiute o le aoao lea o a tatou fanau a o talavou, ma e sili atu ona ou faautagia Lana afioga nai lo le mulimuli i upu a i latou o e le usiusitai i ana tulafono. O se tulaga sese le manatu faapea o le a tuputupu ae a tatou fanau ma maua le malamalama o le talalelei e aunoa ma le aoaoina. O nisi alii ma tamaitai ua finau mai, “Ia, o au o se tagata o le Au Paia o Aso e Gata Ai, sa ma faaipoipo i le malumalu, ma faamauina i maua i le fata faitaulaga e se tasi o loo i ai le Perisitua a le Atua, i le feagaiga fou ma le faavavau, ma o la ma fanau e tatau lava ona tutupu ae ma avea ma tagata lelei o le Au Paia o Aso e Gata Ai; e leai lava se isi mea e mafai ona latou faia; o la ua ia te i latou.” … Ou te fia tau atu ia te outou, o le a le mafai ona iloa e a tatou fanau e moni le talalelei, sei iloga latou te suesue i ai ma maua ai se molimau mo i latou lava. Ua faaseseina e matua i latou lava i lo latou manatu o le a fananau mai a latou fanau faatasi ma se malamalamaaga o le talalelei. E moni, o le a mafai ona latou maua faamanuiaga silisili a le Atua, ona o le fananau mai i lalo o le feagaiga fou ma le faavavau, ma o le a oo atu lava ia i latou faanatura, ona latou tuputupu ae ai lea ma faataunuu o latou tiute; ae peitai, ua iloa e le tiapolo lenei mea, o le mea lea ua taumafai malosi ai o ia ina ia taitaieseina mai a tatou fanau mai le upumoni.⁹

Ou te tatalo ina ia tuuina atu e le Alii i matua o le autalavou se silafia ma se malamalamaaga i mea matautia ma faaosoosoga e aafia ai a latou fanau, ina ia mafai ona taitaiina ma taialaina i latou e faamalosiau atu ia latou fanau, ia taitaiina i latou, ia aoao i latou i le ala e ola ai e pei ona finagalo ai le Alii ia latou ola ai.¹⁰

O le a le mea o loo tatou galulue i ai? Tamaoaiga? Oa? Afai ua tatou taliaina ma ola ai i le talalelei a Iesu Keriso, o lona uiga o loo tatou galulue mo le ola e faavavau. O lona uiga o loo tatou galulue mo le faasaoina o o tatou agaga. A maea le faasaoina o o tatou agaga, ona tatou galulue lea mo le faaolataga o a tatou fanau. … Ou te fia faapea atu, o le tofi sili e mafai ona tuuina atu i o outou atalii ma afafine o se molimau maumautu lea o le malo o le Atua.¹¹

O taitai ma faiaoga o le ekalesia e fesoasoani i matua i le aoaoina o a latou fanau.

O faiaoga o a tatou fanau o loo fesoasoani atu i matua i le faatulagaina lelei o olaga o a latou fanau. E maoae la latou matafaioi, faapea ma la latou tali atu, mo mea uma latou te aoaoina atu.¹²

Ua leai se faaletonu, o aoaoga e tuuina atu i loto mama o fanau laiti, atoa ma tama ma teine talavou o le a sili ona tumau i o latou olaga i le lumanai, nai lo se isi lava taimi. E pei lava o le tusiaina o se tusi i luga o se pepa paepae e aunoa ma se mea e faalavelave ai, ma o loo mama lea pepa.

E toatele lava i latou ua latou faia ni matatia matagofie i tauiviga o le olaga e ui ina sa latou faia i lo latou talavou mea e le tusa ai ma le silafaga a lo tatou Tama Faalelagi, pe mo lo latou lava foi lelei; ae e sili atu lava ona lelei pe afai e mafai ona tatou amataina tamaiti i tauiviga o le olaga e aunoa ma se mea e tusia i luga o itulau o o latou tausaga, sei vagana ai gaoioiga lelei ma manatu e faatupuina ai le faatuatua. E i ai se alagaupu faapea “A lolou le lalalaau e maau atu foi i ai ma le laau.” O outou o loo aoaoina a tatou fanau ua outou auai i le galuega o le faatulagaina o le ituaiga olaga o le a tutupu ae ai tamaiti. …

E leai se tupe maua e mafai e soo se tagata soifua ona aumaia mai oloa, po o soo se mea i le tamaoaiga o le lalolagi, e faatusaina i le malamalama i le loto o se tasi, o ia sa avea ma se tufuga aao a le Atua i le faatulagaina o se olaga mo le lelei; ma e mafai ona ou folafola atu i faiaoga amiotonu a o tatou tagata talavou, a o agai mai ma mou atu tausaga, o le a latou aoina mai tupe maua o ni faamalo ma le loto faafetai mai fanau sa avea ai i latou ma tufuga aao a le Atua i le faatulagaina mo le lelei o o latou olaga. …

Atonu tatou te manatu, o aafiaga tatou te faia atonu e le tumau, ae ou te folafola atu ia te outou e tumau. Ou te mautinoa o se molimau sa tuuina atu e se faiaoga i tamaiti laiti, i lalo o le musumusuga a le Atua, o se mea e faigata ona latou faagaloina. …

O o tatou faiaoga taitasi ua i ai le avanoa ma le mana i lalo o musumusuga a le Agaga o le Atua, e faia ai se aafiaga i luga o loto ma agaga o fanau laiti mama ma tama ma teine talavou o e ua amatalia tauiviga o le olaga. Ou te tatalo faatasi ai ma lou agaga naunautai, o le a fesoasoani mai le Atua ia te outou ia outou taumafaiga; ma ou te tautino atu ia te outou, o le a fesoasoani mai o Ia ia te outou. O le mea taua mo outou, ia outou fiafia i o outou tiute ma faia o outou tiute i lalo o le musumusuga a le Agaga o le Atua soifua.¹³

I se tasi konafesi a le Aoga Sa …, sa faia ai se tasi o sauniga sili ona mamalu ua ou auai ai. O nisi o failauga na tuuina atu i ai le tai fa minute mo i latou taitoatasi, ma o ni minute tai fa o manatu faapelepele, nei manatu uma. O le tele o saunoaga a i latou uma … o e na lauga e faatatau i le autu, “O Manaoga o a Tatou Aoga Sa, ” sa le o se manao mo ni faiga se tele, po o ni mea eseese se tele. Peitai, o le mea sili sa manaomia o le tele o le Agaga o le Alii i loto o faiaoga, ina ia tuuina atu lena agaga i tamaiti.¹⁴

E aoao mai fanau i faataitaiga a o latou matua ma faiaoga.

Pe mafai ona tatou faamoemoe e tutupu ae a tatou fanau iti e talitonu i mataupu faavae o le Talalelei e aunoa ma lo tatou aoao atu ia i latou e ala i faataitaiga? Ou te manatu tatou te le mafaia, i le na o sina faamatalaga faigofie o le faatuatua, ona faatalitonuina a tatou fanau i le upumoni o le Talalelei; e tatau ona avea o tatou olaga ma faataitaiga o mea ua tatou tautatala ai, ma mea ua tatou talitonu i ai.¹⁵

Ou te faapea atu i matua, saili mo le Agaga o le Atua. Ia faia ni aafiaga i mafaufau o a outou fanau e ala i olaga lotomaualalo, agamalu ma le tauagafau e taitaiina ai outou.¹⁶

O le faatuatua o se meaalofa a le Atua. Afai tatou te saili mo le faatuatua, e faamanuiaina i tatou e le Alii i lena faatuatua. E avea o se meaalofa mai ia te Ia, ma ua folafolaina mai ia i tatou, afai o le a tatou faia le finagalo o le Tama, o le a mafai ona tatou iloa lea mataupu [tagai Ioane 7:17]. Afai o i tatou o matua o le a faapea ona tatou faatulagaina o tatou olaga, ina ia iloa e a tatou fanau i totonu o o latou loto, o i tatou moni o ni Au Paia o Aso e Gata Ai, o loo tatou iloa moni mea o loo tatou tautatala ai, e ala i le saili atu i le Alii, o le a latou maua foi lea lava molimau e tasi.¹⁷

Ioe ou te le iloa se fautuaga ma se timaiga a se tama aua na maliu lou tama a o ou pepe lava, ae ua ou aoao e uiga i ona uiga mai isi. Ua tautino mai e tagata ia te au o Jedediah M. Grant o se tasi o alii maoae o lenei Ekalesia.

Ou te manatuaina se tasi taimi na ou talosagaina ai Kapeteni William H. Hooper e sainia se pepa faamaonia mo au, ao ou laitiiti na o le luasefulu ou tausaga ma faatoa amata foi se pisinisi.

Sa ia faapea mai: “Ou te le faia lava se mea faapena; ou te le faia lava se mea faapena.”

Faatoa ou foi atu lava i lou ofisa ae taunuu mai loa se avefeau talavou mai le faletupe ma tau mai o loo fia vaai le kapeteni ia te au.

Sa ou fai atu i ai: “Ou te le fia vaai ia te ia.”

“Sa ia auina mai au e aveatu oe i le faletupe.”

Sa ou toe foi atu, ma sa ia faapea mai: “Oi sole, aumai au pepa faamaonia na.” Sa ou tuuina atu i ai, ma sa ia sainia loa. Ona ia faapea mai lea: “Ina ua e alu ese atu, sa ou liliu atu i le Susuga a Hills ma fesili i ai, ‘Lu, o ai le la tamaitiiti? Ua tele tausaga o faatalofa mai lava ia te au i le auala. Ae ou te le iloa po o ai o ia. Ou te le sainia lava se pepa faamaonia mo se tasi ou te le iloaina. O ai lea tagata?’ Sa ia tali mai, ‘Oi o le atalii le la o Jeddy Grant, o Heber J. Grant.’ ‘Se atalii o Jeddy Grant? Oi, se toe alu e aumai o ia. O le a ou sainia lena feagaiga tusa pe ou te iloa ou te toe totogia lena faaunegatupe.’”

Ua ou faamatalaina atu [lenei tala] ma le faamoemoe o le a silafia ai e matua o faataitaiga o le faamaoni, o le gauai, o le faatuatua i le Talalelei, ma le uiga o le le vaavaai masei, ae ia galue ma le filiga ma le le faavaivai mo le alualu i luma o le upumoni, o se tofi sili lea ona matagofie e tuuina atu ia latou fanau.¹⁸

Na faamatalaina e [Kapeteni Hooper] se vaega o mea na tutupu e uiga i lou tama lea na faaalia ai le alofa o le kapeteni ma lona faatuatuaina o ia.

O mea na tauina mai e le kapeteni ia te au na faatumuina ai lou loto i le agaga faafetai i le Atua mo le tuuina mai ia te au o se tama faapea, ma o faamatalaga a Kapeteni Hooper sa lei mafai ona ou faagaloina. Sa faagaeetia ai au i se naunautaiga malosi ia ou ola ma galue ina ia mafai ona faamanuiaina ai lau fanau, e tusa lava pe ou te oti ai mai lenei olaga, e ala i faataitaiga sa ou faia.¹⁹

E sili atu ona ou oti i le fiaai ae ua ou iloa e mafai ona molimau lou aiga, sa ou taumafai i le mea na gata ai lou mafai i mea na faamanuiaina ai au e le Atua, ua ou usitaia Ana tulafono ma tausia Ana poloaiga, ma na o au faataitaiga, sa talaiina atu ai le talalelei, nai lo le mauaina o le tamaoaiga uma o le lalolagi.²⁰

Fautuaga mo Suesuega ma Talanoaga

O a ni mea e mafai ona tatou faia e fai ma aafiaga amiotonu i olaga o tamaiti ma le autalavou?
O a ni mea e mafai ona faia e matua e aoao ai a latou fanau ia usitai i tulafono ma sauniga o le talalelei? O a ni mea e mafai ona faia e matua e aumaia ai faamanuiaga a lo tatou Tama Faalelagi i luga o a latou fanau?
Aisea e se ese ai nisi o fanau e ui lava i taumafaiga na faia e matua i le aoaoina o i latou i le talalelei? O a ni mea e mafai e matua ma isi tagata ona faia e fesoasoani ai i fanau o e ua se ese?
O le saunoaga a Peresitene Grant i matua, “O le tofi sili e mafai ona tuuina atu i o outou atalii ma afafine, o se molimau maumaututu lea o le malo o le Atua.” O le a le uiga o lenei mea ia te oe?
E mafai faapefea ona tatou fesoasoani atu i fanau ia latou iloa aafiaga a le Agaga?
O a ni faamanuiaga ua oo mai i lou olaga a o e aoaoina fanau ma tupulaga talavou o le Ekalesia?
Aisea e taua ai i matua ona malamalama o taitai o le Ekalesia ma faiaoga ua valaauina e na ona fesoasoani atu i le aoaoina o a latou fanau?

mother reading to child — O matua uma lava e tatau ona i ai se naunautaiga moni ina ia “ola a latou fanau i le aoaiga ma le apoapoaiga o le Talalelei, ia tausia poloaiga a le Atua, ina ia mafai ona faaolaina i latou i Lona malo.”