Mataupu 15

Galulue mo le Fiafia o Isi

Pe a tatou fesoasoani ma faamalosi atu i isi, ona tatou maua lea o le ki moni o le fiafia i lenei olaga.

Mai le Soifuaga o Heber J. Grant

Eseasea lava ona talanoa Peresitene Heber J. Grant e faatatau i lana tautua po o ana galuega auauna atu, ae e i ai taimi sa faamatala ai e nisi ia galuega lelei sa latou vaai o ia faia. O tagata o lona aiga o molimau muamua ia, ma o tagata muamua foi ia na faamanuiaina i lana auaunaga. Sa faamatala e lona afafine o Lusi Grant Cannon lona loto alofa ma le agalelei i lana fanau ma fanau a ana fanau:

“E tulaga ese lava le faamaoni o lo’u tama i lona aiga. E faaalia soo lava lona sagisagi fiafia ia i latou ma o latou fale ma aiga. Sa fesoasoani o ia ia te i latou e tusa lava po o le a le tele o le osigataulaga. E masani lava ona ia faapea mai, ‘Ia fesoasoai i le tamai laau; o laau matutua ma laau malolosi e mafai e i latou uma ona vaaia i latou lava.’

“I aso fanau taitasi o tamaiti uma, ma fanau a fanau e auina mai ai ia i latou siaki ma tusi, a le tiliva mai e lafo mai i le meli. O Kerisimasi ma Tausaga Fou uma, ma le tele foi o isi taimi, e taunuu mai ai tusi ma siaki, o ata po o nisi meaalofa laiti. O lona alofa ma faamanuiaga e o mai faatasi lava ma meaalofa ma e o’o mai e pei o se tatalo faamanuia i o matou luga.”¹

Na taua e Lusi le lelei o le tausiga a lona tama i le taimi a o tigaina o ia i se mai pipisi matautia:

“E o’o lava ina mavae le fasefulutolu tausaga, a ou tusitusi, e maligi lava o’u loimata ona o le agaga faafetai ma le vivii ae pe a mafaufau i lana tausiga alofa ia te au i taimi pe a ou mai. E pei lava o le toatele ua faalogo ia te ia o faamatala, na maua au i se mai tigaina a o sefululua tausaga o lou matua; a o matou i ai i Uosigitone, D. C., i lea taimi. A na le faauuina au e auauna a le Alii ma le mana o le Atua na latou saili atu i ai mo au, semanu ou te oti lava. I na vaiaso a o ou mai tigaina, e ui lava sa i ai ni o matou tausimai pasi se toalua, ae sa tau le alu ese tama mai le potu i le po ma le ao. A o faasolosolo ina ou manuia, sa uumi ni taimi na ia faitau mai ai ni tusi mo au. Na ia aumai ia te au o meaalofa ma meaai faapitoa a o mafai ona ou faaaogaina ma le fiafia ia mea ma, i le tele o auala matagofie sa ia faia ai mea lelei uma e mafai ona fai e se tina agalelei.

“Sa ou vaivai lava i le taimi na matou tuua ai Uosigitone. Sa sii atu au e lo’u tama i le nofoa afi ma sa ia tausia ma vaavaaia lelei au a o matou malaga atu i lo matou aiga. Pe ana o ia o se tausimai pasi, semanu e le sili atu lana tausiga ma le faaeteete ma le manatu alofa, nai lo [lana tausiga o au] i le taimi lenei. Sa fetaui tonu lava le taimi na matou taunuu ai i Sate Leki mo le faapaiaga o le malumalu. E tele taimi sa ia siiina ai au i le malumalu. O vaiaso na mulimuli ane ai ina ua ou taunuu i lo matou aiga, a o tau faasolosolo malie mai lo’u malosi, ma e ui lava foi ina sa mananao le aiga atoa e vaai ma tausi au, ae sa ou manao lava ia latalata mai [lo’u tama] ma sa naunau foi o ia ma te faatasi. O lenei mea ua ou faamatalaina, e moni lava, ma o le mea foi lea e tasi e tupu i ou uso uma i le taimi e mamai ai foi i latou.”²

O le tautua po o le auaunaga a Peresitene Grant sa oo i fafo atu o lona aiga. Na toe manatua e Lusi e faapea:

“Sa i ai se taimi ina ua latalata lava i le Kerisimasi a o ou saunia ni nai meaalofa mo se aiga e le tagolima, sa savali mai i totonu tama ma sa ou faaali atu i ai meaalofa, ma faamatala atu i ai le aiga lea e pei ona faamatala mai e le tina. Sa ou fai atu i ai e tatau ona ou saunia ou ofu o le malumalu; o le a ou tuuina atu i le tina lea e na te faaaogaina i le taeao e sosoo ai. I le aso na sosoo ai ina ua sau le tina e faafoi mai ou ofu, sa ia fai mai e taunuu atu i le malumalu o faatali mai ai lo’u tama i le faitotoa. E lei vaai muamua lo’u tama i le tina lea, sa na o la’u faamatalaga na ia faalogo i ai ma sa ia iloa ai, sa taofi e lo’u tama le tina lea ma tuu atu i ai se teutusi a o faamanuia atu ia maua e lo latou aiga se Kerisimasi fiafia. Sa i totonu o le teutusi le luasefulu tala.”³

E ui lava ina sa mafatia Peresitene Grant i ni gasegase oso faafuasei na pepe ai ni vaega o lona tino, ae sa faaauau pea e ia ona sailia auala e auauna atu ai. I le faaitiitia o lana gaioi, o lana gaoioiga taua lava sa fiafia ma mapu i ai, o le tietie taavale. Sa toetoe o aso taitasi e tietie taavale ai, ma e masani lava ona ia valaaulia tagata o lona aiga ma uo e latou te o faatasi. I taimi o ia tietiega taavale, e tele lava ina ia faaali atu ai lona alofa i isi i lona asiasi atu lea i falemai ma fale o aiga.⁴

I se saafiafiga mo Peresitene Grant, na tusia ai e Elder John A. Widtsoe o le Korama a le Au Aposetolo e Toasefululua e faapea: “O le mea aupito sili ona fiafia i ai o ia o le tausia lelei o tagata. O le mea sa popole i ai o ia ma taunapa i ai i lona olaga o le fanau a lona Tama faalelagi. … O lenei alofa sa faaalia e le gata i lona popole mo tagata ola uma, ae faapena foi i le manuia mo tagata taitoatasi. Sa tele ina maua e tagata matitiva ma e le tagolima lona agalelei. O le vave tali atu o lona loto alofa i e puapuaga, o se mea e tupu soo ma e iloa lelei e ana uo. Sa ia avatu tupe, ma e faapena foi le fesoasoani faaletagata lava ia, ina ia mafai e le tagata malosi ona avatu mo le ua vaivai. O le agalelei o Peresitene Grant sa toetoe ina ova atu nai lo mea e manaomia, o lona agaalofa na o’o i le mea e gata mai ai lona mafai ma lona malosi, ma o lea e tumau ai ma faamaoni o ia i ana uo ma alofa i lona aiga. E tulai o ia i lenei tofiga maualuga ma le alofa i lona loto mo tagata uma, ma sa ia uunaia ai tagata uma ina ia lafoai o latou manatu faapito.”⁵

O Aoaoga a Heber J. Grant

O lo tatou alofa i le Alii e tatau ona faaalia e ala i le tuuina atu o le auaunaga Faa-Keriso.

O le a le ituaiga alii ma tamaitai e tatau ona avea ai i tatou, o ni Au Paia o Aso e Gata Ai, e tusa ai ma le i ai o lea malamalama matagofie ua tatou maua, o lo o soifua le Atua, o Iesu o le Keriso, o Iosefa Samita o se perofeta a le Atua? E tatau ona avea i tatou ma tagata aupito sili ona faamaoni, sili ona amio mama, sili ona manatu alofa, ma avea ma tagata aupito sili i le lalolagi atoa.⁶

Aua nei o tatou faagaloina lo tatou tiute o le tuuina atu lea o le faamaoni e lagolagoina ai ma auauna atu i le Alii, ma o lena foi auaunaga talafeagai i le Alii, e le mafai ona tuuina atu e aunoa ma le auauna atu i o tatou uso a tagata.⁷

Matou te talosaga atu ma le naunautai i tagata uma o le Ekalesia ia alolofa i o latou uso ma tuafafine, ma tagata uma po o ai lava i latou ma po o fea foi e i ai i latou; ia faatea ese le ita mai o latou olaga, ia faatumuina o latou loto i le alofa, onosai, faapalepale, ma le faamagalo atu.⁸

O le talalelei a Keriso o se talalelei o le alofa ma le filemu, o le onosai ma le faapalepale, o le taliaina o lagona o isi ma le faamagalo atu, o le agalelei atu ma le faia o mea lelei, o le alofa mama ma le alofa faauso. O le manao lasi, o le faapito o le manao i le oa mo le tagata lava ia, faanaunauga e faia mea leaga, galala i le fia mauaina o le pule malosi, ma le pulega le tonu i o latou uso a tagata, e le tatau ona i ai se nofoaga o ia mea i loto o le Au Paia o Aso e Gata Ai ma loto o e matatau i le Atua i soo se mea.⁹

O a tatou galuega auauna atu e mafai ona siitia ai ma faamalosiau ai i isi.

Na ou faalogo i se tala i se uso (ua galo nei ia te au lona igoa) o se na auai i se fonotaga i popofou o le Ekalesia. Na talosaga Peresitene Polika Iaga mo foai e tuuina atu i le Vaitafe o Misuri e fesoasoani i le Au Paia e faapotopoto atu i Siona. Sa manao o ia i tagata uma e mafai ona gafatia e foai atu se povi po o se isi lava foai. Na oso i luga se tasi uso lelei lava ma faapea mai, “O le a ou tuuina atu se povi.” Na tulai ane se isi uso ma faapea mai, “O le a ou tuuina atu foi se povi.” O le uso muamua e lua ana povi sa i ai ma se aiga toatele; o le isi uso e ono ana povi ae toaitiiti lona aiga. Ma, sa osofaia e le agaga [o le tiapolo] le uso muamua, [ma sa ia faapea mai, ] “Ia vaai, e le mafai ona faia mea uma o lo o manaomia e lou aiga toatele; e le lava le povi e tasi e ola ai. Vaai, o le isi uso e toalaiti lona aiga ma e ono ana povi; e mafai lava ona ia tuuina atu le lua pe tolu povi ae e lava mea e tausi ai lona aiga.” Ina ua amata ona savali atu o ia i lona aiga, pe fa i le lima poloka na ia savali ai, sa amata ona vaivai lona tino ma ua fai ifo foi lona malosi. Sa ia manatu mulimuli ane, “Pei lava o le a ou le foaiina se povi, ” ona ia iloa ai lea o le eseesega o le agaga sa faaosoosoina ai o ia ma le agaga sa uunaia o ia e folafola atu i le Peresitene o le Ekalesia o le a ia foai atu se povi. Sa tau atu e lea agaga ia aua nei faataunuuina lona tiute, ia aua nei faamaoni, ia aua le faia le mea na ia folafola atu e fai. Na faafuasei ona tu o ia ae faliu ma faapea atu, “Sole Tiapolo, filemu la’ia, a leai, ou te savali atu nei loa lava i le ofisa o Uso Polika ma toe foai atu i ai le isi povi.” E le i toe faaosoosoina ai lava o ia.

O lenei, e tatau i le Au Paia o Aso e Gata Ai ona avea ma e e tuuina atu le fesoasoani a e le o le avea ma e faalagolago i isi mo le fesoasoani.¹⁰

Ou te manatua le tasi taimi a o ou nofonofo i totonu o le State Bank (Faletupe o le Setete) sa ou vaaia ai se uso matua lava o savali ane, o lona igoa o Ioane Futia. O ia o se tasi o alii na muamua papatiso i Siketinevia. A o ia savali ane i luma o le faamalama o le faletupe, na musumusu mai le Agaga ia te au “Ave se lusefulu tala i le tamaloa le la.” Sa ou alu atu i le tagata e tala mai ai tupe, i le faletupe ma tuuina atu ia te ia le pepa e tala mai ai le tupe mo le $20, ona ou savali lea i le auala ma faasili i luma o Futia i luma o le faaleoloa o le Z. C. M. I. Sa ma faatalofa ma ou tuu atu i ai le luasefulu tala i lona lima. I ni nai tausaga na mulimuli ane ai na ou iloa ai o le taeao na ma fetaui ai sa tatalo ai le Uso ia Futia ina ia lava sana tupe ia mafai ai ona alu i Logan e faia se galuega itiiti i le malumalu lena. I le taimi lena, e lei maea ona fausia le Malumalu i Sate Leki. O le luasefulu tala na matua talafeagai ma le mea na ia manaomia, ma i ni tausaga mulimuli ane ai na ia faafetai mai ai ia te au ma loimata sa tafe ifo i ona alafau, mo le tuuina atu ia te ia o lea tupe.

I se tasi aso, a o ou nofonofo i totonu o lou ofisa, na oo mai ia te au se manatu malosi ou te alu i le Tuafafine ia Emili Laaumanase ma tuuina atu ia te ia se limasefulu tala. Sa ou faia lena mea, ma iloa ai sa ia matua manaomia lava mea e tatau ai mo le tausiga o lona soifua faaletino. … E leai se mea e sili ona ou naunau tele i ai nai lo le tatalaina o lo’u mafaufau ma tali atu i nei ituaiga o uunaiga.¹¹

O upu alofa uma e te tautala ai, e te saga maua ai le tomai e tautala atu ai i isi upu alofa faaopoopo. O galuega fesoasoani uma e te tuuina atu, e ala i le malamalama ua ia te oe, e fesoasoani atu ai i se tasi o uso a tagata, e te maua ai le tomai faaopoopo e fesoasoani ai i le isi tagata o le a sosoo mai. O le naunautai o se tagata e fai galuega lelei e tupu ma faaopoopoina ai le malosi i taimi uma lava e faatinoina ai ia galuega lelei. O nisi taimi ou te manatu ai i le toatele o tagata, pe a fuafua i lo latou le manatu alofa i isi ma le leai o so latou naunau e fesoasoani atu i ai, ae manatu la faapea e tatau ona latou tautala atu i se upu lelei pe faatinoina foi se agalelei, o lona uiga o le a faatama’ia ai lo latou tulaga gafatia e faia ai se galuega alofa pe fai atu ai se upu lelei i le lumanai. Afai e i ai sou fale e teu ai saito e tumu i saito, ona e foai atu lea o se taga saito se tasi pe lua foi, ona faaitiitia ai lea o le fuainumera o taga saito i lou fale teu saito, ae a e faia se galuega agalelei pe faaopoopo atu ni upu faamalosiau i se tasi o lo o puapuagatia ma o lo o tauivi ma le olaga fesouaiina, o le a sili atu ona e gafataulimaina lenei mea i le lumanai. Aua e te ola i lenei olaga e aunoa ma le tatalaina o lou gutu [tulou] e ta’u atu upu alofa ma upu faamalosiau, aua foi le tapunia lou loto mai le faia o galuega mo isi. Ia i ai se mau tauave i lou olaga: ia taumafai e le aunoa e fesoasoani i se tasi e tauamo lana avega.¹²

O le auauna atu o le ki moni lea o le fiafia i lenei olaga.

E le mafai e se tasi ona iloa po o le a le taunuuga o le auauna atu ma le faamaoni, e le mafai foi ona tatou iloa po o afea e toe foi mai ai ia i tatou po o isi o lo o tatou faifai mea faatasi. Atonu e le oo mai le taui i le taimi o lo o faatino ai le tautua po o le auauna atu, ae atonu e oo mai ma se faaopoopoga sili atu i se taimi mulimuli ane. Ou te talitonu e le faamativaina i tatou i lenei olaga i le tuuina atu o se auaunaga, i le ositaulaga, ma le faia o le mea sao.¹³

O le ki moni lava o le fiafia i lenei olaga o le galue mo le fiafia o isi. Ou te alofa lava i le tagata manatu faapito, o le tagata e lei iloa lava e ia le olioli e maua mai ia i latou e avatu i ai le faafetai ma le faamalo a tagata sa latou fesoasoani i ai a o feagai ma tauiviga o le olaga.¹⁴

O le mea lilo moni e maua ai le fiafia i lenei olaga ma o le auala foi lea e saunia ai i tatou mo le olaga a sau, o le auauna atu.¹⁵

Ou te matua talitonu o le auala i le filemu ma le fiafia i lenei olaga o le tautua po o le tuuina atu lea o le auaunaga. O lo’u a talitonuga, o le auauna atu o le ki moni lea i le mauaina o le fiafia, aua pe a tatou faatino galuega faapei o le galuega faafaifeautalai, e mafai ona tatou toe tepa i tua i aso uma o totoe o lo tatou olaga i mea na tatou faataunuuina i le galuega faamisiona. Pe a tatou faia ni galuega agalelei, latou te aumaia le lagona o le faamalieina ma le fiafia i o tatou loto, a o lagona tatou te mauaina mai mea fiafia o lenei olaga, e vave ona mou ese atu.¹⁶

O se tulafono mai i le Atua, e tusa ma le vaega o le auauna atu tatou te faia, e tusa foi ma le vaega tatou te faia i totonu o lenei Ekalesia ma fafo atu foi—o le mea tatou te naunau e ositaulagaina mo le Ekalesia ma i latou foi e tatau i ai lo tatou faamaoni ma le lagolago atu i ai i fafo atu o gaoioiga faale-Ekalesia—o le a tatou tuputuptu ae ai i le alofa tunoa o le Atua, o le alofa foi o le Atua, ma o le a tatou tuputupu ae i le faataunuuina o faamoemoega e tusa ai ma le tuuina mai o i tatou i lenei lalolagi.¹⁷

Ia faatasi atu le Alii ia te outou uma, ou uso e, ma tuafafine, i soo se mea o lo o outou nonofo ai. Ia i ai Lona filemu i outou loto; ia musuia outou e Lona Agaga i mea fou tou te faataunuuina ma auaunaga faaleuso ma le faaletuaoi.¹⁸

Fautuaga mo Suesuega ma Talanoaga

Aisea tatou te maua ai “le ki moni o le fiafia” pe a tatou “galulue mo le fiafia o isi”?
Aisea i nisi o taimi tatou te faalotolotolua ai e auauna atu ma le malosi i isi ? O a mea e mafai ona tatou fai e tatou te lagona ai le olioli sili pe a tatou auauna atu?
O a mea e mafai ona tatou fai e fesoasoani ai i fanau ma le autalavou ina ia i ai le naunau e auauna atu?
E mafai faapefea ona tatou faaleleia lo tatou tomai e lagona ai mea o lo o manaomia e isi?
O le a le uiga o le “avea ma e tuuina atu le fesoasoani ae le o le avea ma e faalagolago i isi mo le fesoasoani”?
O a auala e fesoasoani ai ia i tatou le auauna atu e “saunia ai i tatou mo le olaga a sau”?
O a nisi o mea patino ma faigofie e mafai ona tatou fai e mulimuli ai i le faataitaiga a Peresitene Grant i le auauna atu? E mafai faapefea ona tatou auauna atu e tusa lava po o le a le tulaga o lo o tatou i ai?