Mataupu 18

O Le Pese a le Loto

Pe a tatou lagiina viiga o Siona i le agaga sao, tatou te ofoina atu ni tatalo i le Alii ma valaaulia musumusuga a le Agaga Paia i totonu o o tatou olaga ma olaga o isi.

Mai le Soifuaga o Heber J. Grant

Efiafia tele Peresitene Heber J. Grant e usuina viiga o Siona, e ui lava ina fai si faigata ona ia pese i nota. Ia Aperila 1900, a o auauna atu o ia o se tasi o le Korama a Aposetolo e Toasefululua, sa ia tuuina atu ai se aoaoga atoa lava i le taua o le usuina o viiga. O lenei saunoaga, sa ia saunoa ai i le konafesi aoao a le Faalapotopotoga a le Aoga Sa i Tesareta, sa ia faamatala ai ni tala e uiga i ana taumafaiga e aoao ia iloa pese:

“O aso uma o lou olaga, sa ou matuai fiafia ai lava e pese. A o avea au o se tamaitiiti e sefulu tausaga, sa ou auai i se vasega musika, ma na tau mai e le polofesa ia te au, e le mafai ona ou pese. O ni tausaga na muamua atu, sa tau mai ai [e se alii] ia te au, e mafai ona ou pese, ae sa ia faapea mai, e manao o ia, e nofo mai i se mamao e fasefulu maila, ae ou pese. …

“A o ou laitiiti, i tafatafa o lou lava tina, e leai se tamaitai sa soifua na sili atu ona fiafia ia te au, ma tuuina mai ia te au le tele o fautuaga faatina pe foliga mai sa sili atu ona alofa ia te au nai lo Tuafafine [Eliza R.] Snow. Sa ou alofa ia te ia ma lou loto atoa, ma sa ou fiafia foi i lana viiga, ‘Lou Tama.’ I le fa o masina talu ai, sa ou faapea atu ai ia Uso Horace S. Ensign ou te naunau lava e faaaluina le fa pe lima o masina o ou taimi avanoa pe a mafai, ou te aoao ai ia ou iloa usu lea lava viiga e tasi. Sa ia tau mai ia te au, e mafai lava e soo se tasi e naunautai, ona usuina. Sa ou fai atu ia te ia, afai o i ai se mea o ia te au, o le mea lena o le naunautai. O lea na ou talosaga ai ia ma nonofo i lalo ma amata loa lau lesona muamua e lua itula i lea lava pese. Sa faaauau ai pea au lesona mai lava i lena taimi. …

“Ua ou tuuina atu nei faamatalaga aua ou te lagona e tatau ona tatou uunaia o tatou tagata talavou e aoao ia iloa pepese. O le avea ai ma se tagata pese, sa faamaimauina ai le tolusefulu tolu tausaga o lou olaga. Sa tau mai ia te au ina ua sefulu ou tausaga, o le a le mafai lava ona ou pese. Sa faatoa ou aoaoina [ma iloa pese] ina ua fasefulu tolu ou tausaga, ma sa ou faaaluina masina e fa pe lima e tau aoao ai le usuina o viiga, ‘Ua Fetalai Mai Nei Iesu, ’ ma le ‘Lou Tama.’ Na ou aoaoina le tasi ona o lou mafaufau ma lou alofa i le na tusia, a o le isi ona e leai se isi viiga i totonu o viiga sa sili ona fiafia i ai le Peresitene ua tuumalo o Peresitene Uilifoti Uitilafi.”

E lei leva ona maea le tuuina atu o nei saunoaga, ae lagiina loa e Elder Grant le viiga “Lou Tama.” Ona ia saunoa mai lea: “E tasi lava lou faamoemoega i lenei po i lau lauga ma lau pese, o le uunaia lea o alii ma tamaitai talavou ina ia aua le faamaimauina le tolusefulu pe fasefulu o tausaga o o latou olaga faatoa taumafai lea e pepese. … O ni taumafaiga faifaipea, e mafai ai e se tasi ona aoao ia iloa pese, o se tasi e leai se malamalama i mea tau musika, e pei o le tulaga sa ou i ai.”¹

Aoaoga a Heber J. Grant

O le pese o le loto o le tatalo lea i le Alii.

O le pese o se vaega sili lea ona maoae o le tapuaiga a le Au Paia o Aso e Gata Ai.²

O le lagiina o a tatou viiga paia, na tusia e auauna a le Atua, o loo i ai se aafiaga mamana i le faaliliuina o tagata i mataupu faavae o le talalelei ma le faalauiloaina o le filemu ma le tuputupu ae faaleagaga. O le pese o se tatalo lea i le Alii, e pei ona Ia fetalai mai: “Aua e olioli lou agaga i le pese a le loto; ioe, o le pese a e amiotonu o le tatalo lea ia te au, ma o le a tali i se faamanuiaga i o latou luga.” [MFF 25:12.]³

E olioli lava lou agaga e faalogologo i pesepesega, ou te alofa faavalea tele i ai i lou olaga atoa, ma ou te fiafia tele i le mafai ona ou tatalo atu i le Alii “i pese o le loto.” O lou manatu afai o le a manatuaina uma e i tatou le afioga a le Alii, o le pese a e amiotonu o le tatalo lea ia te ia, ma o le a tali i se faamanuiaga i o tatou luga, ma tatou tatalo atu e le aunoa i lo tatou Tama Faalelagi i pese malie a Siona, ma saga tautau atu ma le faamaoni i o tatou loto savali a a tatou viiga matagofie, o lona uiga ua tatau ona tatou maua faamanuiaga ua folafolaina mai, lea ou te uunaia le Au Paia ina ia latou taumafai ia maua.⁴

E tatau ona tatou aloese ma pese o loo aoao mai ai mataupu sese.

Sei o tatou manatuaina ituaiga o pese e fiafia i ai le Alii, o pese o loo i ai i totonu le Talalelei. Ua ou auai atu i konafesi sa ou faalogo ai i ni viiga, sa i ai ni upu e le mafai ona ou ioeina. Sa lelei ona usuina ae peitai, e le o ni aoaoga faavae lelei.⁵

O le sili atu ona matagofie o se pese lea e usuina ai ni mataupu faavae sese, o le sili atu foi lea ona tulai mai o se mea matautia. Ou te talosaga atu i le Au Paia uma o Aso e Gata Ai, ae faapitoa lava i a tatou aufaipese, ia aua lava nei usuina upu o se pese pe afai e le ogatasi lelei aoaoga ma upumoni o le talalelei, e tusa lava pe o le a le matagofie ma le musuia o se musika. …

… E le tatau i se tagata pese toatasi, pe o se faapotopotoga o ni tagata pepese i totonu o le Ekalesia, ona usuina se musika filifilia sei iloga ua ogatasi upu o le musika faatasi ma mea moni o le talalelei, ma e mafai ona tuuina mai mai le loto o le tagata pese. I se isi faaupuga, e tatau ona avea moni a tatou pese ma ni “tatalo i le Alii.” [Tagai MFF 25:12.] Afai o le a tatou faaeteete i le usuina na o nei pese, o le a mautinoa faamanuiaga na folafolaina mai e le Alii, aua o ana folafolaga e “moni ia ma faamaoni ma o le a faataunuuina uma lava.” [Tagai MFF 1:37.]⁶

O le lagiina o viiga e mafai ona aumaia ai aafiaga toafilemu ma faalelagi i o tatou olaga.

Ou te lagona le faafetai tele i le Alii mo le musumusuga a lona Agaga i le toatele o o tatou tagata na tusiaina musika matagofie ia ua tatou maua mo a tatou viiga. … Tau ina ia faamanuia e le Atua o tatou tagata fatupese ma a tatou fatusolo o e ua tuuina mai ia i tatou nei upu musuia ma nei musika musuia ma le malie.⁷

Ou te talitonu o viiga o Siona, afai e lagiina ma le agaga sao, e aumaia ai se aafiaga filemu ma le faalelagi i totonu o o tatou aiga, faapea foi i le talaiina atu o le talalelei a Iesu Keriso.⁸

E leai se mea e sili atu ona matagofie ma musuia nai lo le i ai o musika i totonu o se aiga, ma talu ai ona ua ou iloa pese, e usuina ai lava se viiga i totonu o lo matou fale i taeao taitasi i le taimi o tatalo faaleaiga. O loo i ai moni lava se aafiaga faafiafiaina i le lagiina o pese a Siona, ma o lou manatu e tatau i le Au Paia ona faia pesepesega ma se vaega o tapuaiga i o latou aiga.⁹

Aua nei galo a tatou viiga pe a tatou malaga atu i le faletatalo. Ia tuu atu i le aulotu e pepese; ma ia mautinoa, ia faamasani tagata o le aufaipese i savali matagofie o loo i ai i totonu o a tatou viiga.¹⁰

Ou te manatuaina se mea na tupu e faaalia ai le ala na faatoafimalieina ai e le mana o pese le lagona ita ae aumaia le fiafia i loto o tagata o e ua faatumulia i le agaga o finauga. Na tupu i le tele o ni tausaga ua mavae, i se feupuaiga i le va o se usoga matutua ma le faatuatua, o e na auai i le Ekalesia i aso o Navu. O nei alii sa faatumulia i le faamaoni ma le naunautai i le galuega a le Alii. Sa i ai i la’ua i le tele o faigata i Navu, ma na puapuagatia i le tutulieseina ma sauaga o le Au Paia, faatasi ai ma faigata o le avea ma paionia, o se vaega o e na nofoia muamua le itu i sisifo. Na finau nei alii e uiga i ni mataupu faapisinisi, ma na faia le faaiuga o le a la taumafai e aumai ia Peresitene Ioane Teila e fesoasoani atu i le foiaina o le la faafitauli.

O Ioane Teila sa avea i le taimi lea ma Peresitene o le Aufono a Aposetolo e Toasefululua. O nei alii, sa la tautino faamaoni mai o le a la taliaina ma usitaia ma le faamaoni soo se faaiuga lava o le a tuuina mai e Uso Teila. … E lei vave ona la tauina atu ia te ia lo laua faafitauli, ae sa faamalamalama atu sa leaga lava se la feupuaiga ma talosagaina ai o ia [Uso Teila] pe mafai ona ia faafofoga atu ia laua faamatalaga ma tuuina mai ai sana faaiuga. Sa finagalo malie loa i ai Peresitene Teila. Ae sa ia faapea atu: “Uso e, ae ou te lei faalogo atu ia oulua faamatalaga, ou te manao lava e usu atu se tasi o pese o Siona mo oulua.”

O Peresitene Teila o se tagata leo lelei tele i le pese, ma sa na faaliliuina ma le malie faatasi ai ma le agaga, a tatou viiga paia.

Sa ia lagiina se tasi o a tatou viiga i alii nei e toalua.

Ina ua vaaia le aafiaga o nei alii e toalua i le viiga na usuina, sa ia faapea atu loa, e leai lava se taimi ua ou faalogo ai i se pese o Siona ou te le i toe manao ai e toe faalogo i se isi pese se tasi, ma o lea sa ia fai atu ai e toe faalogologo mai se’i ona toe usuina atu se isi pese se tasi. O le mea moni, sa la malilie i ai. Na foliga mai sa laua fiafia uma i ai; ma, ina ua uma ona usuina le pese lona lua, sa saunoa atu [Peresitene Teila], sa faalogo o ia e i ai se mea lelei e tupu i numera le sogia ma faatasi ai ma se maliliega a nei alii e toalua, o lea sa ia toe usuina ai foi se isi pese. Ona ia faapea atu lea ma ona uiga malie: “Uso e, ou te le manao e faatigaina oulua, ae afai o le a oulua faamagalo mai au, ma toe faalogologo mai i se viiga se tasi lava lea, ou te folafola atu o le a uma ai loa au pese, ae ou faalogo atu loa i a oulua faamatalaga.”

E faapea le tala, ina ua uma ona lagiina e Peresitene Teila le pese lona fa, na matuai fetagisi nei alii, sa tutulai i laua i luga, lulu aao, ma talosaga atu ia Peresitene Teila ma faamaulalo atu ona o lo la oo atu ia te ia ma faoa ai lona taimi. Ona la tuua lea o le peresitene e aunoa ma lona silafiaina o lo la’ua faafitauli.

O pesepesega a Peresitene Teila na suia ai lagona o le tasi i le isi. Na oo atu le agaga o le Alii i o laua loto, ma o le mauga o feeseeseaiga na i ai i lo laua va, na toe faalaugatasia ma pei ai lava e leai se mea na tupu. Na tuputupu ae le alofa ma uiga faauso i o laua agaga. Sa le toe taua ia te i laua mea laiti na mafua ai lo laua feeseeseaiga. Sa faatumulia i laua i le loto faamagalo ma le agaga faauo o le tasi i le isi.¹¹

O Elder J. Golden Kimball ma Elder Charles A. Welch, e leai se tasi o i laua e lelei se leo i le pese, a o i ai i laua i le misiona i Setete i Saute. A o la sauni e faataunuuina se papatisoga o ni tagata liliu mai, na faapotopoto faatasi ni tagata faatupu faalavelave; sa logoina le au uso, afai o le a faataunuuina la latou fuafuaga o le papatisoga, o le a tauai i latou e tagata leaga i le vaitafe. Na naunau lava faifeau e faataunuu pea le papatisoga e tusa lava pe o le a le taunuuga e oo i ai. Peitai, a o lei faia le papatisoga, sa latou usuina se pese. Na foliga mai na i ai se aafiaga tele o le pese i le vaega o tagata faatupu faalavelave ma na toetoe a leai se mea na gase. Na faaauau pea ona faataunuuina e le usoga la latou papatisoga, ona latou o ese mamao atu lea mo le faataunuuina o le faamauga o e na papatisoina. Na oo mai se savali mai le taitai o tagata faatupu faalavelave ma talosaga atu ia i latou e toe o mai e usu mai lea lava pese, ma na latou malilie e faia e pei ona talosagaina. Mulimuli ane, na auai le taitai o tagata faatupu faalavelave o Joseph Jarvis, i le Ekalesia, ma na ia tau atu ia Elder Kimball, o upu o le viiga faatasi ai ma musumusuga na i ai faatasi i pesega, na faaliliuina mai ai o ia i le Talalelei. Sa manatua e Uso Kimball o lea viiga o le “Ua Toe Faaalia Mea Tonu.” [Tagai Viiga, itulau 116.]¹²

E tele se mea o loo misi mai i aiga o tagata e le usuina pese o Siona i totonu o o latou aiga. O le toatele o faifeautalai e aveesea mai le malosi ma le mana ma le tomai e mafai ona faataunuu ai mea lelei, ma le faia o ni uo, ona o le le iloa pepese. … O pese o Siona e aumaia ai se aafiaga lelei i totonu o o tatou aiga.

E le o le lelei o lau tautala, e talitonu ai loto o tagata, ae o le Agaga o le Atua Silisili Ese, lea e mu ai o outou loto, ma lou naunau mo le faaolataga o agaga. Ua saunoa mai Polika Iaga, o le Agaga o le Alii na te mafai ona faia mea e tele e faaliliuina ai tagata nai lo le lelei o le tautala a se tagata [tagai i le Deseret News, 9 Fep. 1854, 4]. Ma ou te faapea atu o le usuina o pese a Siona, e tusa lava pe sese, faatasi ai ma musumusuga a le Atua, o le a sili ona pai atu i loto o e faamaoni nai lo le lelei ona usuina ae aunoa ma le i ai le Agaga o le Atua. Ia pepese faatasi ma le Agaga o le Atua. Ia fiafia i upu e te peseina. Ou te fiafia tele i pese o Siona.¹³

Fautuaga mo Suesuega ma Talanoaga

Aisea e taua ai lo tatou usuina o viiga o le Ekalesia? Aisea e tatau ai ona tatou usuina viiga e tusa lava pe o i tatou e le o ni tagata e i ai le meaalofa o le pese?
O a ni auala e mafai ona fesoasoani ai le usuina o viiga, tatou te tapuai ai i le Alii i le aiga ma sauniga faamanatuga ma isi sauniga a le Ekalesia?
E faapefea ona avea “pese a e amiotonu” o se tatalo i le Alii?
O le a le “agaga sao” o le lagiina o viiga? Aisea e “aumaia ai e viiga o Siona se aafiaga filemu ma le faalelagi pe a lagiina ma le agaga sao”?
O a ni auala na fesoasoani ai viiga ia te oe? O a viiga e i ai ni o latou aafiaga faapitoa i lou olaga? Aisea ua faapitoa ai le taua o nei viiga ia te oe?
O a ni tulaga e lelei ai lo tatou aoaoina o viiga o le Ekalesia ia tatou te le masani i ai? Aisea e taua ai le taulotoina o upu o viiga?
Aisea e sili ai ona talafeagai viiga o le Ekalesia ma pese o le Peraimeri mo sauniga faamanatuga ma isi sauniga o le Ekalesia?
Aisea e avea ai ma mea matautia ia aoaoga sese pe a usuina i se musika matagofie? Aisea e taua ai le aloese mai musika o i ai “aoaoga [ia] e le ogatasi ma upumoni o le talalelei”?
E mafai faapefea ona fesoasoani matua ia latou fanau ia aoao ma fiafia i viiga o Siona? O a ni auala e mafai e matua ona faaaoga ai viiga ma pese o le Peraimeri i le aoaoina o le talalelei ia latou fanau?

Tabernacle Choir in 1920 — O le Aufaipese a le Tapeneko pe tusa o le 1920. Na fautuaina e Peresitene Grant le faapotopotoga ma aufaipese ina ia usuina viiga o Siona, lea e i ai “se aafiaga mamana i le faaliliuina o tagata i mataupu faavae o le talalelei ma le faalauiloaina o le filemu ma le tuputupu ae faaleagaga.”