Mataupu 7

Molimau Tumau a le Tagata Lava Ia

A o tatou ola ai i le talalelei a Iesu Keriso, tatou te tuputupu ae i lo tatou malamalama i le mea moni ma lo tatou tulaga e gafatia ai ona auauna atu i le Alii.

Mai le Soifuaga o Heber J. Grant

Na amata ona atiina’e le molimau a Heber J. Grant i le talalelei toefuataiina a o itiiti o ia. I se taimi mulimuli ane i lona olaga, na ia faaalia so’o ai lona agaga faafetai mo faiaoga ma taitai o e na fesoasoani i le atiina’eina o lana molimau. Na faapitoa lana faafetai i lona tina. “Ou te tulai atu iinei i lenei aso, o le peresitene o le Ekalesia, ” na ia saunoa ai i se taimi ua tuanai, “ona sa ou mulimuli i le fautuaga ma le apoapoaiga ma le molimau mumu o le paia o le galuega a le Atua, na o’o mai ia te a’u mai lo’u tina.”¹

A o tuputupu a’e o ia, sa tupu tele foi lana molimau. Na ia faamatalaina se molimau na ia maua a o suesueina le Tusi a Mamona: “A o ou talavou pe tusa ua 15 o’u tausaga, sa ou faitau ma le faaeteete ma le agaga tatalo, le Tusi a Mamona, ma na o’o mai ai i lo- ’u loto se molimau tumau ma le malosi i lona paia ma le moni. Mai lena aso e oo mai i lenei taimi, ua avea ana aoaoga matagofie ma faamafanafanaga, o se faamanuiaga, ma se taiala ia te au.”²

Na faaauau e Peresitene Grant ona faafaileleina lana molimau i lona soifuaga atoa, ma sa ia tatalo faatauanau ina ia tumau lona faamaoni i le faatuatuaga.³ Ina ua 80 tausaga o lona soifua, sa ia tautino mai: “Ua le mafai ona ou maua ni upu e faaali atu ai le agaga faafetai ua faatumulia ai lo’u loto ona o se molimau tumau, i le ta’ele o lo’u agaga, e uiga i le paia o lenei galuega. I le gasologa o tausaga, ua ou mauaina ai le tele o faamaoniga maumaututu ma le malolosi, e faatatau i le paia o lenei galuega, ua ou le mau upu foi e faaali atu ai lou agaga faafetai; ma ou te le’i tau foi i se mea na faitiitia ai lo’u faatuatua.”⁴

O Aoaoga a Heber J. Grant

E o’o mai le molimau o se faaaliga mo le tagata lava ia mai le Atua e ala i le Agaga Paia.

Ua tuuina atu e le Atua i alii ma tamaitai i le lalolagi atoa, o e ua saili atu mo le malamalama o Lona Agaga, ni tali e tusa ma tatalo i le agaga o le lotomaulalo, se molimau ma se malamalamaaga, o lenei Talalelei ua tonu e pei ona taua mai—e moni lea, o le a tumau e faavavau, ma o i latou o e ola i le talalelei o le a faaeaina e faavavau faatasi ma lo tatou Tama oi le Lagi, ma Lona Alo, lo tatou Togiola.⁵

E faitau selau ma selau, ioe, e faitau afe ma afe i latou ua tuia o latou loto, ma o musumusuga a le Agaga, ma faaaliga mai le Atua ia i latou, ua latou maua ai se malamalamaaga o le paia o le galuega o lo o tatou galulue ai. Ua latou maua le molimau a le Agaga Paia ia i latou, ua faamalieina ai o latou agaga, ua faamalieina ai i latou lava, ma ua mafua ai ona latou alalaga i le olioli ua latou iloa o lo o soifua le Atua, ua latou iloa o Iesu o le Keriso, ua latou iloa o Iosefa Samita o le Perofeta a le Atua soifua ma e moni lava ia. E leai se tasi i le lalolagi e mafai ona faapea mai ua ia iloa e le moni mea ua latou fai mai ai. Atonu e le mafai ona ia talitonu i a latou molimau, ae le mafai ona ia faoa mai ia i latou lo latou malamalamaaga. Atonu e mafai ona ou folafola atu ou te alofa i lou aiga, ma atonu e faapea mai se tagata, “Ou te le talitonu i ai, ” a e e le mafai e lena faaupuga ona suia le malamalamaaga o lo o ia te au ou te alofa ia i latou. Pe a mauaina e se tagata le molimau a le Agaga Paia, pe a mauaina e se tagata le malamalamaaga e moni le talalelei, ma ia iloaina lena mea, ma ia folafola atu ai, atonu e le mafai e le lalolagi ona talitonuina o ia ae e le mafai ona suia ai le malamalamaaga ua i ai ia te ia.⁶

Ou te faafetai i le Atua ona e i ai i le Au Paia uma le aia mo musumusuga a Lona Agaga Paia. Ou te faafetai i le Atua ona e leai se tasi o i tatou o faalagolago atu i nisi mo le molimau i le talalelei. Ou te faafetai ia te Ia ona e mafai e tagata taitoatasi ma tagata uma ona mauaina se molimau mo i latou lava.⁷

O lena malamalamaaga e patino i le tagata lava ia, le leo filemu ma le itiiti o faaaliga e oo mai i agaga tatalo ma le faamaoni taitoatasi, i le tali mai i tatalo, o lo o tuuina mai ai le mana i lenei Ekalesia. Ana le seanoa lenei molimau patino, lea e oo mai faapei foi ona maua e alii ma tamaitai i le lalolagi atoa pe a latou faalogo i lenei talalelei ma tatalo atu i le lotomaualalo i le Atua mo lona agaga, semanu e le o le mea lea tatou te i ai i le aso—o se nuu ua aufaatasi, ua tasi i le loto ma le agaga, ua tasi ma le Atua, ua tasi ma lo tatou Faaola.⁸

Ou te fia fai atu nei lava o le mana o le Atua, o le Agaga o le Atua e na te faatalitonuina tagata; ae le o le susua o upu, e le o le tulaga faaleaoaoga, e le o faaupuga matagofie, po o le auala maoae o lo o avatu ai faaupuga e mauaa ai i loto o le fanauga a tagata ma faatalitonuina ai i latou i le Upu moni.⁹

Ua ou feiloai atu i tagata e toatele ua latou fesiligia la’u molimau. Ua latou faapea mai, “Alii Grant, e le mafai ona e iloaina nei mea.” Ae ua ou sauni ma le naunautai e tuuina atu lau molimau ua ou iloa nei mea, ma ua ou iloaina nei mea e pei ona ou iloaina o le malamalama mai le pouliuli, mafanafana mai le malulu. Ua ou iloa ua ou maua mai tali ina ua mavae ona ou tatalo atu i le Alii. O lea, o lo o ia te au se malamalamaaga i nei mea, ma ua ou iloa nei mea e pei ona ou iloa ou te alofa i lou aiga ma au uo. O lenei malamalamaaga ua oo mai ia te au i se auala ua ou saunia ma le naunautai e tuuina atu le molimau i le lalolagi uma, ma ua ou iloa o le a ou tali atu e tusa ma le molimau ua ou tuuina atu. O le a ou le faamaoni ia te au lava pe afai e oo mai taimi e i ai le avanoa a e ou te le tuuina atu le molimau o mea ua ou iloa.¹⁰

O i tatou, i le avea ai ma Au Paia o Aso e Gata Ai, e tele lava mafuaaga e tatau ai ona tatou faafetaia le tele o mea ua faaalia ai le agalelei ma le alofa o lo tatou Atua. Ia tatou taumafai, i le malosi ua tatou maua, ina ia maua le malamalama talafeagai, malamalama ma le poto mai lo tatou Tama faalelagi ina ia mafai ai e i tatou ona tausisia o mea e tatau ona tatou faia. O le toatele o i tatou ua tatou lagona o lo o tatou malosi i le malamalama o le Talalelei, ma e itiiti lava se tulaga popole o lo o i ai o le a liliueseina mai i tatou mai le mea moni ona o tofotofoga o lenei olaga. I le taimi foi lea, e tatau ia i tatou ona matua i ai se malamalamaaga e leai se aso po o se itula o tatou olaga o le a tatou mafai ai ona tutoatasi ma faaauauina le molimau o le Talalelei e aunoa ma le malamalama ma le musumusuga a le Agaga o le Atua.¹¹

Tatou te maua ma faamalosia a tatou molimau e ala i le tatalo, suesue, ma le usitai i le Alii.

O le molimau aupito sili e mafai ona tatou maua o le leo o faaaliga— o musumusuga a le Agaga Paia. E le mafai e se tasi ona maua e aunoa ma le ola agavaa mo le mauaina.¹²

E le mafai ona e tuuina atu i isi se mea e te maua mo oe lava. E le mafai ona ou aveatu i se tasi se molimau o lenei talalelei e faapei foi ona le mafai ona ou ‘ai mo ia. E mafai ona ou tau atu ia te ia le auala e maua ai. E mafai ona ou tau atu ia te ia e uiga i faamanuiaga a le Atua ia te au. Ae e tatau i tagata taitoatasi ona ola i le talalelei pe afai o lo o manao o ia e maua se molimau i le paia o lenei galuega.

O le auala e maua ai se molimau (o le ola ai i le talalelei), ua uma ona suesueina i le salafa o le lalolagi e alii ma tamaitai o e na inosia ma fai faatautala ma sauaina e tagata o o latou lava aiga, ona ua latou auai i lenei Talalelei; ae i tali mai i tatalo ma le lotomaualalo, ma le faia o mea na faatonuina ai i latou e le Atua e fai, na latou maua ai le malamalama ma le atamai ma le molimau e faatatau i le paia o lenei galuega.¹³

Ou uso e, ma tuafafine, afai o le a tatou suesue i tusitusiga paia, suesue i le fuafuaga o le olaga ma le olataga, ma tausia poloaiga a le Atua, o le a faataunuuina i luga o o tatou ulu folafolaga uma ua maea ona tuuina mai. Ma o le a tatou tuputupua- ’e i le malamalama, atamai ma le poto.¹⁴

Ou te folafola atu ia te outou, i le avea ai o au ma auauna a le Atua soifua, o alii ma tamaitai uma o e usitai i tulafono a le Atua o le a manuia, ma o folafolaga uma mai le Atua o le a faataunuuina i o latou ulu, ma o le a latou tuputupua’e ma faaopoopoina lo latou poto, malamalama, malamalamaaga, atamai, ae sili atu i na mea uma, o le molimau i le Alii o Iesu Keriso.¹⁵

E tupu malosi a tatou molimau pe a tatou fetufaaia

E le mafai e se tasi ona folafola atu le talalelei i lalo o le musumusuga a le Agaga o le Atua soifua … e aunoa ma sona lagona, iloa, ma se malamalama ua faamanuiaina o ia e le Alii Silisiliese, ma ua mafai ona ia molimauina le mana o le Atua e o’o mai pe a tatou folafola atu lenei talalelei a Iesu Keriso.¹⁶

Na ou faalogo ia Peresitene [Polika] Iaga ma isi tagata ua latou fai mai i le tele o taimi, e maua e tagata talavou se molimau, i le ta’ele o o latou agaga, e uiga i le paia o lenei galuega, a o latou tutulai e [tuuina atu le molimau] e sili atu nai lo le molimau e maua a o tootutuli ma tatalo mo lena molimau; e ala mai foi i musumusuga a le Agaga o le Atua e oo mai ai ia i latou le malosi o lena Agaga, ma faatumulia ai o latou loto i le malamalama ma le poto mai le Atua e ala i le Agaga Paia. Na latou maua foi le molimau ua oo mai i o latou loto ma ua mafai ai ona latou molimau atu ua latou iloa nei le moni ua latou galulue i le ata o le ola ma le faaolataga; ua latou iloa le moni o lo o soifua le Atua, o Iesu o le Keriso, o Iosefa Samita o se perofeta a le Atua moni soifua.¹⁷

A o ou pulefaamalumalu i le misiona i Europa, na ou maua le avanoa i le tele o taimi, e tuuina atu ai aoaoga i alii talavou o e na o mai iina e talai atu le talalelei—o alii talavou o e e lei aoaoina i ni aoga, o e e lei i ai se tomai faaleolaga, ma o le toatele o i latou ua tutulai atu mo le taimi muamua i o latou olaga ma tuuina atu a latou molimau i totonu o le ofisa o le misiona a Europa. Na ou tau atu ia i latou e suesue le talalelei ma ia tatalo mo musumusuga a le Agaga o le Alii; ma ou folafola atu ia i latou a fai na ona latou tatalaina lava o latou gutu ma tuuina atu le molimau o Iesu o le Keriso o le Togiola o le lalolagi, ma o Iosefa Samita o lana perofeta, o le a tuuina atu ia i latou e le Atua se mea e latou te tautatala atu ai e tusa lava pe na le’i i ai muamua se mea i o latou mafaufau. E le gata na i ai ae e toatele faifeautalai ua tuuina mai la latou molimau ia te au, sa faataunuuina lava lenei folafolaga, ma na faataunuuina lava e le Atua le faamanuiaina o i latou i taimi uma lava latou te tuuina atu ai le molimau o le paia o le misiona a Iosefa Samita, o le na faatuina (toefuataiina) le Ekalesia a Keriso i luga o le fogaeleele i lalo o le taitaiga a le Atua.¹⁸

I le faasologa mai o lou olaga, ua ou faalogo ai i le selau ma selau ma le afe ma afe o molimau a alii talavou ma tamaitai talavou o e na malaga ese atu e folafola atu lenei Talalelei, ma ua toe foi mai mai la latou galuega faafaifeautalai ma tuuina mai a latou molimau ua i ai se faaopoopoga o lo latou malamalamaaga i le paia o lenei galuega, ma ua faamalolosia a latou molimau.¹⁹

E leai se mea e tau o le tu ai i se mea e tasi i totonu o le ekalesia a le Atua; e le mafai ona tatou ola i luga o se molimau na maua i le tele o tausaga ua tuanai. Ua tatou … faalogo i se molimau a se tasi ua fitusefulu-iva tausaga o lona soifua, ae a fai e na te taofia le tuuina atu o le molimau na ia maua, o le a tuua o ia e le agaga o le Atua, aua e leai se tapulaa o le matua e mafai ona tatou malolo ai mai le galuega ma le talalelei a le Atua.²⁰

O le Molimau tatou te maua ai le tomai ma le lototele e faataunuuina ai le galuega a le Alii.

O i latou o e usitai i tulafono a le Alii, o i latou o e ola e tusa ai ma tulaga manaomia o le talalelei, latou te tuputupua’e mai lea aso i lea aso, mai lea tausaga i lea tausaga i le molimau ma le malamalamaaga o le talalelei, ma le taumafaiga e uunai isi e suesue le ata o le ola ma le faaolataga.²¹

O i tatou o ni tagata ua uma ona tatou faaali atu e moni le fetalaiga a le Faaola, e faapea, a fai e faia e se tasi le finagalo o le Tama o le a ia iloa le mataupu [tagai i le Ioane 7:17], ma ua ia i tatou le malamalamaaga atoatoa; ma o le mafuaaga lena ua tatou naunautai ai e ositaulaga mo le mea moni.²²

Ou te matua faafetaia lava le Au Paia o Aso e Gata Ai i le lalolagi atoa ua i ai se molimau tumau a le tagata lava ia e uiga i le paia o le galuega ua tatou galulue ai. Ae pe ana faapea e leai lena molimau semanu e le manatunatu alii, faapea foi tamaitai, e faia osigataulaga o loo latou faia i totonu o atunuu faapea foi i fafo atu, mo le agai i luma o le galuega a le Alii. …

… Ou te matua faafetai lava pe a ou manatu ia i latou o e na faaao i lenei Ekalesia ma i latou o e na taitaiina le Ekalesia, i le tuuina atu o o latou taimi ma a latou taleni, o le ositaulaga (o lona uiga, o lo o faatatau i le ositaulagaina o mea o lenei lalolagi), ma le i ai o le malamalamaaga tumau atoatoa o lo o soifua le Atua, e na te faafofoga ma tali mai ia tatou talosaga; i le i ai o le malamalama, e aunoa ma se masalosalo na faaali le Atua ia Iosefa Samita ma na ia faailoa atu lona Alo ia te ia; i le i ai o le malamalamaaga atoatoa o le Perisitua Arona ma le Mekisateko na toefuataiina mai i le lalolagi e i latou o e na umia ki i le Vaeluaga o Aso. …

E na o lenei malamalamaaga atoatoa ua ia i tatou o ni tagata, o le a mafai ai e i tatou ona faataunuuina soo se mea ua tatou ausia.²³

Afai ou te iloa i lo’u lava loto, ou te talitonu e tumau le agaigai i luma o le Ekalesia ma le malo o le Atua. Ou te iloa e leai se mea i luga o le fogaeleele ua sili atu ona ou fiafia i ai nai lo lou fesootai atu lea i auauna tane ma auauna fafine a le Atua i totonu o le Ekalesia a Iesu Keriso; ma ou te le talitonu e i ai se aso e tea ese atu ae ou te lei faafetai i le Atua mo le toefuataiina mai o le ata o le ola ma le faaolataga, ma ua faamanuiaina au i le avea ai ma se tasi ua faaaogaina le ata o le ola ma le faaolataga. Ou te tatalo atu ia te Ia ma le naunautai ia aua lava nei faapogisaina lou mafaufau, ina ia aua nei ou tea ese mai ma le mea moni; ina ia aua lava nei ou faagaloina se feagaiga ua ou osia, ae, a o faasolo pea ina ou matua ma faateleina lo’u malamalama, ia ou tuputupua’e i se molimau o le talalelei ma ia ou naunautai—ia le na o se naunautaiga (ia galue), ae ia ou mafai ona faia lea—ia galue mo le faatupula’ia o le malo o le Atua i le lalolagi.²⁴

Fautuaga mo Suesuega ma Talanoaga

Aisea e moni ai e leai se tasi e mafai ona maua se molimau “e aunoa ma le ola ai mo lea [molimau]”?
Aisea e manaomia ai le faamalosia pea lava pea o se molimau? E mafai faapefea ona tatou tumau ma ia le vaivai i a tatou taumafaiga e faatuputeleina le molimau?
E faapefea ona fesoasoani a tatou molimau ia i tatou i taimi o tofotofoga po o puapuaga? E faapefea e a tatou molimau ona fesoasoani ia i tatou i taimi o le faigofie ma le manuia?
Aisea e faamalosi ai a tatou molimau pe a tatou fetufaaia? Pe a tatou faalogo i molimau a isi?
O a isi nofoaga e ese mai sauniga molimau e mafai ona tatou fetufaai atu ai a tatou molimau?
E mafai faapefea e matua ona fesoasoani ia latou fanau e atiina’e a latou lava molimau o le talalelei?

man studying scriptures — A o tatou suesueina tusitusiga paia ma ola e tusa ma mataupu faavae o lo o tusia ai, “o le a tatou tuputupua’e i le malamalama, atamai ma le poto.”