“18-24 Novema. Iakopo: ‘Ia Fai Outou ma E Anaana i le Upu, a e Aua le Na Ona Faalogologo’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“18-24 Novema. Iakopo,” Sau, Mulimuli Mai ia te Au—Mo Tagata Taitoatasi ma Aiga: 2019
Aperaamo i Aluna o Mamere, saunia e Grant Romney Clawson.
18–24 Novema
Iakopo
“Ia Fai Outou ma E Anaana i le Upu, a e Aua le Na Ona Faalogologo”
A o e faitauina le Tusi a Iakopo, ia nofouta i fuaitau e matilatila mai ia te oe, ona tusifaamaumau lea. O faapefea ona uunaia oe ia ola i nei upumoni?
Tusifaamaumau Lagona e Uunaia ai Oe
O nisi taimi, e mafai ai ona suia le lalolagi i le tau lava o se fuaiupu se tasi o mau. O le Iakopo 1:5 e foliga mai o si fautuaga faigofie—afai e te manao i le poto, ia ole i le Atua. Ae ina ua faitau e le [taulealea] e 14 tausaga le matua o Iosefa Samita lena fuaiupu, “sa foliga ua ulu mai ma se mana tele i lagona uma o [lona] loto” (Iosefa Samita—Talafaasolopito 1:12). O le musuia ai, sa faatino ai loa e Iosefa le apoapoaiga a Iakopo ma saili le poto mai le Atua e ala i le tatalo. Ma sa tuuina mai e le Atua ma le le toe tautaua, ma tuuina atu ai ia Iosefa se tasi o asiasiga faalelagi aupito mataina i le talafaasolopito o le tagata—o le Uluai Faaaliga. O lenei faaaliga na suia ai le ala o le olaga o Iosefa ma taitai atu ai i le Toefuataiga o le Ekalesia a Iesu Keriso i luga o le fogaeleele. Ua faamanuiaina i tatou uma i le aso ona o le faitau ma le faatinoina e Iosefa Samita o le Iakopo 1:5.
O le a se mea o le a e maua ao e suesue i le Tusi a Iakopo? Atonu o le a suia oe po o se isi e te alofa i ai i se fuaiupu se tasi pe lua. E mafai ona e maua le taitaiga ao e saili e faataunuu lau misiona i le olaga. E mafai ona e maua ai le faamalosiauga e te tautala ai ma le agalelei pe faateleina ai lou onosai. Po o le a lava se mea e musuia ai oe, ia faataga nei upu e “ulu atu … i totonu o faalogona uma o [lou] loto.” Ia manatua ia “maua ma le agamalu le … upu,” e pei ona tusia e Iakopo, “o lea e mafai ai ona faaolaina o outou agaga” (Iakopo 1:21).
Manatu mo Suesuega Faaletagata Lava Ia o Tusitusiga Paia
O ai Iakopo?
O le talitonuga taatele e faapea, o le tusitala o le Tusi o Iakopo o le atalii o Maria, le tina o Iesu Keriso, ma o lona uiga o le uso o le Faaola la te tina faatasi. O Iakopo o loo taua i le Mataio 13:55; Mareko 6:3; Galuega 12:17; 15:13; 21:18; ma le Kalatia 1:19; 2:9. E foliga mai i nei mau o Iakopo sa avea ma se taitai o le Ekalesia i Ierusalema ma sa valaauina ai e avea ma se Aposetolo (tagai Kalatia 1:19).
O le tumau i le onosai e taitai atu ai i le atoatoa.
“O le faatalitali e mafai ona faigata,” na aoao mai ai Peresitene Dieter F. Uchtdorf. “Tatou te mananao i le mea tatou te mananao i ai, i le taimi lava lenei. O le mea lea, o le uiga tonu lava o le onosai e ono foliga mai e le manaia ma, o nisi taimi, e oona” (“Faaauau i le Onosai,” Ensign po o le Liahona, Me 2010, 56). A uma ona faitau le Iakopo 1:2–4; 5:7–11, o le a sau tala, o le a le savali autu a Iakopo e uiga i le onosai? O a ni ou malamalamaaga faaopoopo o i ai pe a uma ona faitau atoa le savali a Peresitene Uchtdorf? E mafai faapefea ona e faaali atu i le Alii ua e naunau e onosai?
Iakopo 1:3–8, 21–25; 2:14–26; 4:17
O le faatuatua e manaomia ai galuega.
E faapefea ona e iloa pe o i ai sou faatuatua ia Iesu Keriso? E faapefea ona fesoasoani lenei aoaoga faavae i le faateleina o lou faatuatua i le Atua? Mafaufau i fesili nei ao e suesue i aoaoga a Iakopo e uiga i le faatuatua. Atonu e manaia le faitau foi ia Aperaamo ma le Raava, o faataitaiga e lua na taua e Iakopo (tagai Kenese 22:1–12; Iosua 2). Na faapefea ona la faaalia sa i ai lo laua faatuatua i le Atua?
O le faitauina o le Iakopo 1:3–8, 21–25; 2:14–26; 4:17 e mafai ona fesoasoani e te mafaufau ai i ni auala e avea ai oe ma se tagata lelei atu e anaana i le upu. Tusifaamaumau soo se lagona e te maua, ma fai ni fuafuaga e faatino ai.
Tagai foi Alema 34:27–29; 3 Nifae 27:21.
O upu ou te tautala ai e i ai le mana e faatiga ai pe faamanuia ai isi.
Faatasi ai ma faafaatusa loloto na faaaoga e Iakopo i lana tusi atoa, o nisi o ana gagana malolosi o loo maua lea i lana fautuaga e faatatau i le gagana. Mafaufau e fai se lisi o auala uma sa faamatalaina ai e Iakopo le laulaufaiva po o le gutu. O le a se mea o fautuaina mai e faatusatusaga po o faatusa taitasi e uiga i upu tatou te tautatala ai? Mafaufau i se mea e mafai ona e faia e faamanuia ai se tasi i au upu (tagai MFF 108:7).
I le avea ai ma se soo o Iesu Keriso, e tatau ona ou alofa i tagata uma e tusa lava po o a o latou tulaga.
Sa faapitoa ona lapataia e Iakopo le Au Paia e faasaga i le fiafia i le mauoa ae inoino i le mativa, ae o lenei lapataiga e mafai ona faatatau i soo se faaituauga po o le manatu faapito o i ai ia i tatou e uiga i isi. Atonu e faigata ona iloa auala o loo tatou faamasinoina ai male le lelei isi tagata, ae ua folafola mai e le Alii e faapea, o le a fesoasoani mai o Ia ia tatou iloa tulaga e manaomia ona tatou faaleleia (tagai Eteru 12:27). A o e suesue ma le agaga tatalo i le Iakopo 2:1–9, ia saili ifo i lou lava loto ma faalogo mo musumusuga a le Agaga Paia. O e faalogoina soo se suiga e manaomia ona e faia i le ala o loo e faia pe mafaufau ai i isi?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina e faavae i manaoga o lou aiga. O ni nai fautuaga nei:
Mafaufau e faitau le Iakopo 1:5 ma valaaulia se tagata o le aiga e otooto le tala o le Uluai Faaaliga (tagai Iosefa Samita—Talafaasolopito 1:8–13 po o le vitio “Ask of God: Joseph Smith’s First Vision” i le LDS.org). Ia valaaulia tagata o le aiga e faasoa mai a latou molimau e uiga i le Perofeta o Iosefa Samita ma ni aafiaga ina ua tali mai le Tama Faalelagi ia latou tatalo.
Mafaufau e matamata le vitio “True Christianity” (LDS.org) e fesootai ma nei fuaiupu. Ona faitau lea o le faauigaga e Iakopo o le amio Atua ma talanoa i ni auala e mafai ona faia e lou aiga ia atili mama le tou amio atua.
O le Iakopo 3 ua aofia ai le tele o faafaatusa lea e mafai ona musuia ai ni lesona faatino e manatua pea, e fesoasoani ai i lou aiga ia manatua e tautatala ma le alofa. Mo se faataitaiga, e mafai ona outou talanoaina auala e mafai ai ona amata e se aloiafi po o se afitusi laitiiti se afi tele, ma e mafai e tagata o le aiga ona mafaufau i ni taimi sa tulai ae ai se faafitauli ona o se upu faalealofa (tagai fuaiupu 5–6). Pe e mafai foi ona e lufilufiina atu se mea oona pe maatiati i totonu o se mea sa masani ona faaaoga mo meaai suamalie—e pei o le sua tipolo i totonu o se fagu hani. O lenei mea e mafai ona oo atu i se talanoaga e uiga i le ia mautinoa o a tatou upu e malu ma faagaeetia (tagai fuaiupu 9–14).
Aisea e tatau ai ona tatou “faalatalata atu i le Atua” pe a tatou fetaiai ma faaosoosoga?
Atonu o le faasoaina atu o se aafiaga patino e uiga i le mauaina o se faamanuiaga faaleperisitua, e mafai ona faamalosiauina ai tagata o le aiga e “talosaga mo se faamanuiaga faaleperisitua pe a [latou] manaomia le mana faaleagaga” (Dallin H. Oaks, “The Importance of Priesthood Blessings,” New Era, Iulai 2012, 4).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Faatino mea ua e aoaoina. A o e suesue, faalogologo i musumusuga mai le Agaga e uiga i auala e mafai ona e faaaogaina ai mea o loo e aoaoina i lou olaga. Ia tautino e mulimuli i nei musumusuga ma ia ola atoatoa atili i le talalelei. (Tagai Aoao Atu i le Ala a le Faaola, 35.)
Ina Ole Atu Ia i le Atua, saunia e John McNaughton