Aperaamo i Aluna o Mamere, saunia e Grant Romney Clawson.

18–24 Novema

Iakopo

“E Tatau Ona Fai i Tatou ma E Anaana i le Upu ae Le Na o le Faalogo i ai”

O le Tusi a Iakopo o loo i ai le tele o upumoni e mafai ona faamanuiaina ai tamaiti o loo e faiaoga ai. Mulimuli i le Agaga e fuafua ai pe o le fea upumoni o le a e faasoa atu ia i latou. E mafai foi ona fesoasoani ia manatu o lenei otootoga.

Tusifaamaumau Ou Lagona Uunai

Valaaulia le Fefaasoaai

Valaaulia ia tamaiti e faasoa mai se mataupu faavae o le talalelei latou te manatua na aoaoina ma o latou aiga i le vaiaso ua mavae pe mai le vasega o le Peraimeri i le Aso Sa talu ai. A uma ona faasoa mai tamaiti taitasi, valaaulia se isi tamaitiiti o le vasega e aotele mai mea sa faasoa mai.

Aoao atu Aoaoga Faavae

Tamaiti Laiti Ifo

Iakopo 1:5–6

E mafai ona ou ole i le Tama Faalelagi e fesoasoani mai ia te au e aoao le mea e moni.

Fesoasoani ia malamalama tamaiti e te faiaoga ai e mafai foi ona latou liliu atu i le Tama Faalelagi mo le poto. O le faia o lena mea o le a faamanuiaina tele ai i latou pe a latou fetaiai ma fesili faigata.

Gaoioiga e Mafai Ona Fai

• Fesoasoani i tamaiti e aoao le fasifuaitau “Afai ua leai se poto i so outou, ina ole atu ia i le Atua” (Iakopo 1:5). E faapefea ona tatou fai atu fesili i le Atua? E faapefea ona Ia tali mai ia i tatou?

• Faaali atu se ata o le Uluai Faaaliga (Tusi Ata o le Talalelei, nu. 90), ma faamatala pe na faapefea i le faitauina o le Iakopo 1:5 ona uunaia ia Iosefa Samita e ole atu i le Tama e fesoasoani ia te ia i se fesili (tagai Iosefa Samita—Talafaasolopito 1:1–15). Faasoa atu lau molimau e tali mai le Atua i tatalo, ma molimau atu e mafai e tamaiti ona tatalo atu ia te Ia pe a i ai ni a latou fesili. Tuu i tamaiti e tusi a latou lava ata o Iosefa Samita la e faitau le Iakopo 1:5 ma tatalo i le Tama Faalelagi.

Iakopo 3:1–13

E mafai ona ou ta’u atu ni mea lelei.

Pei ona molimau mai Iakopo, o le aoao e ta’u atu na o ni mea lelei i isi o le a fesoasoani tatou te avea ai e faapei o Iesu Keriso (tagai Iakopo 3:2).

Gaoioiga e Mafai Ona Fai

• Aumai se mea suamalie ma se mea oona mo tamaiti e tofo ai. Fesoasoani ia latou malamalama e tatau ona tatou faaaoga o tatou laulaufaiva e tautala atu ai i mea suamalie (po o mea lelei) ae le tautala atu i mea oona (po o mea leaga) (tagai Iakopo 3:10). Fesoasoani ia latou mafaufau i ni faataitaiga o mea lelei e mafai ona tatou ta’u atu i isi.

• Tuu atu ia tofu tamaiti ma se ata faigofie o se tagata o loo tautala. Valaaulia ia tamaiti e uu i luga pe a e fai atu se mea manaia e mafai ona tatou fai i o tatou laulaufaiva (e pei o le ta’u o le mea moni, avatu faamalo, ma ofo atu le fesoasoani i se tasi) ma tuu i lalo pe a e fai atu se mea e le tatau ona tatou faia i o tatou laulaufaiva (pei o le talapelo, fai pona o isi, ma le musu e usitai i se matua).

• Toe faamalosi atu le savali o le Iakopo 3:1–13 i le usuina faatasi o se pese e uiga i le agalelei atu, e pei o le “O Le Agalelei e Amata Ia Te A’u” (Tusipese a Tamaiti, 83). Fautuaina tamaiti ia fai se “fagu agalelei” e mafai ona latou faatumuina i iliili po o isi tamai meafaitino i soo se taimi latou te ta’uatu ai se mea lelei i se tagata.

Iakopo 5:7–11

O nisi o faamanuiaga a le Atua e manaomia ai le onosai.

E le nofonofo lava le onosai ona sau lea, aemaise i tamaiti. Mafaufau pe mafai faapefea ona e faaaoga le fautuaga a Iakopo e fesoasoani ai i tamaiti o loo e faiaoga ai e aoao le onosai.

Gaoioiga e Mafai Ona Fai

• Fesoasoani i tamaiti e mafaufau i taimi na tatau ai ona latou faatalitali mo se mea sa latou matua mananao lava i ai. Faamalamalama atu o le faatalitali mo se mea tatou te mananao ai e aunoa ma le tomumumu e ta’ua o le onosai.

• Aotele le Iakopo 5:7 i au lava upu, ma faaali atu se ata o se fatu po o se tama’i laau faatoa oso se tatupu. Aisea tatou te manaomia ai le onosai pe a tatou totoina ia laau? O le a le mea e tupu pe afai tatou te taumafai e toso le tamai laau ia ola vave? Molimau atu e tele faamanuiaga a le Atua mo i tatou, ae o nisi e manaomia ai le onosai.

• Faasoa atu le tala ia Iakopo, o loo ta’ua i le Iakopo 5:11 o se faataitaiga o le onosai (tagai “Mataupu 46: O Iopu,” Tala o le Feagaiga Tuai, 165–69, po o le vitio e o faatasi ai i luga o le LDS.org). Na faapefea ona onosai ia Iakopo pe faamanuiaina foi?

Aoao atu Aoaoga Faavae

Tamaiti Matutua Atu

Iakopo 1:5–6

O le a fesoasoani le Tama Faalelagi ia te au e aoao upumoni pe afai ou te saili atu i Lana fesoasoani.

E ui atonu e foliga laiti tamaiti o loo e faiaoga ai, ae ua na o ni nai tausaga e laiti teisi ai ia Iosefa Samita ina ua ia faitauina le Iakopo 1:5 ma sa musuia o ia e alu i le Tama Faalelagi i le tatalo. Mafaufau pe mafai faapefea ona e fesoasoani i tamaiti o loo e faiaoga ai e atiae lo latou faatuatua faapea o le a fesoasoani le Atua ia te i latou pe a leai so latou poto.

Gaoioiga e Mafai Ona Fai

• Fai i tamaiti e faamatala atu le tala i le Uluai Faaliga a Iosefa Samita ia latou lava upu (tagai Iosefa Samita—Talafaasolopito 1:5–19; tagai foi i le vitio “Joseph Smith’s First Vision” i luga o le LDS.org). Na faapefea ona fesoasoani le Iakopo 1:5 ia Iosefa? Fesoasoani i tamaiti e mafaufau i faataitaiga a isi tagata o i tusitusiga paia na maua se tali ia latou tatalo (pei o Nifae [1 Nifae 11:1–6] ma le uso o Iareto [Eteru 2:18–3:9]). O a ni mea e mafai ona tatou ole atu ai i le Tama Faalelagi i le tatalo?

• Faitau faatasi ma tamaiti le Iosefa Samita—Talafaasolopito 1:10–14. Valaaulia ia tamaiti e sue mai mea na faia e Iosefa ia maua ai tali i ana fesili. E mafai faapefea ona tatou mulimuli i le faataitaiga a Iosefa pe a i ai ni a tatou fesili?

Iakopo 1:22–27; 2:14–26

“E mate le faatuatua pe a aunoa ma galuega.”

E faapefea ona e fesoasoani i tamaiti ia iloa le sootaga i le va o mea latou te talitonu i ai ma mea latou te fai?

Gaoioiga e Mafai Ona Fai

• Faaali atu i tamaiti se moliuila e leai ni maa, se penitala e leai se mata, po o se isi mea e le aoga pe ua “mate.” Valaaulia tamaiti e faitau le Iakopo 2:14–17. E faapupula mai faapefea e nei meafaitino le upumoni o i nei fuaiupu?

• Valaaulia ia tamaiti e faitau le leoa le Iakopo 1:22–27; 2:14–26. Ona valaaulia lea o i latou e faasoa mai mea e mafai ona latou faia e faaalia ai o i latou o ni e e faia le upu. Mo se faataitaiga, pe latou te iloa se tasi o ma’i pe o tuulafoaiina e mafai ona latou asiasi i ai, pe mafai ona latou faia se tonu e auauna atili atu i o latou aiga? E mafai foi ona e faamanatu atu ia te i latou ia upu latou te faalogo i ai i le sauniga faamanatuga i le aso. E mafai faapefea ona avea i tatou ma e e faia nei upu?

Iakopo 3:1–13

E mafai ona ou pulea mea ou te tautala atu ai.

O upu tatou te fai atu ai e le tasi i le isi atonu e le taua, ae e pei ona molimau mai Iakopo, e mafai ona i ai se tosinaga mamana, mo le lelei poo le leaga.

Gaoioiga e Mafai Ona Fai

• Pe o i ai se tasi i le uarota, atonu o se tasi o tamaiti o loo e faiaoga ai, sa faia ni galuega mo solofanua pe na te iloa se mea e uiga i vaa? E mafai ona e valaaulia o ia e tuuina mai ni malamalamaaga e uiga i aoaoga a Iakopo i le Iakopo 3:3–4 e uiga i le faaaogaina o upu agalelei, pe avatu foi sou lava malamalamaaga. O le a se mea ua tatou aoao ai e uiga i le pulea o o tatou laulaufaiva mai nei faataitaiga?

• Valaaulia ia tamaiti e faitau le Iakopo 3:1–13 ma tusi se ata o se mea latou te maua o loo aoao mai ai e uiga i le pulea o o tatou laulaufaiva. Tuu atu se taimi latou te fefaasoaai ai a latou ata ma mea sa latou aoaoina.

• A uma ona toe iloilo faatasi le Iakopo 3:1–13 ona iloilo lea o le tulaga faatonuina mo gagana o i le Mo Le Malosi o le Autalavou (20–21). Fesoasoani i tamaiti e mafaufau i se mea e mafai ona latou faia e faaleleia atili ai le ala latou te tautatala atu ai i isi, ma faamalosiau ia i latou e faatutu ni sini faaletagata lava ia.

Fautuaina le Aoaoina i le Aiga

Valaaulia ia tamaiti e tatalo i le Tama Faalelagi ma se fesili pe taumafai ia onosai atili i le vaiaso a sau. Fai atu ia i latou e faasoa mai o latou aafiaga i le isi vasega.

Faaleleia o Lo Tatou Aoao Atu

Fesoasoani i tamaiti ia sagisagi mai. “Ao e aoaoina tamaiti, faataga i latou e fausia, tusi ata, valivali, tusitusi, ma fatufatuai. O nei mea e sili atu nai lo le na o ni gaoioiga malie—e taua i le aoaoina”(Aoao Atu i le Ala a le Alii, 25).