Ua Faamanuia e Mekisateko ia Aperamo, saunia e Walter Rane

11–17 Novema

Eperu 7–13

“O Se Faitaulaga Sili o Mea Lelei a Oo Mai”

A o e iloiloina ma mafaufau i lenei otootoga, gauai atu i uunaiga e te maua e uiga i tamaiti o loo e faiaoga ai. O le a fesoasoani le Agaga ia te oe e sue ia savali mo i latou i le Eperu 7–13.

Tusifaamaumau Ou Lagona Uunai

Valaaulia le Fefaasoaai

Fai i tamaiti e faasoa atu mea latou te faia ma o latou aiga e aoao ai le talalelei i le fale. Valaaulia i latou e faasoa mai ni nai aafiaga e fiafia i ai i le aoaoina faatasi ma o latou aiga ole talalelei.

Aoao atu Aoaoga Faavae

Tamaiti Laiti Ifo

Eperu 7:1–6

E tele auala e mafai ona fesoasoani ai le perisitua ia i tatou.

Eperu 7:1--6 e mafai ona maua ai se avanoa e folasia atu ai i tamaiti ia faamanuiaga o le perisitua.

Gaoioiga e Mafai Ona Fai

• Faamalamalama faapuupuu atu pe o ai Aperaamo, ona faaaoga lea ole Eperu 7:1–6 ma le Faaliliuga a Iosefa Samita, Kenese 14:36–40 (i le faaopoopoga i le Tusi Paia) e aoao atu ai faapea sa totogi atu e Aperaamo ana sefuluai ia Mekisateko. Faamalamalama atu na umia e Mekisateko le perisitua maualuga, o le mana lea o le Atua ua tuuina i alii i le lalolagi, ma sa ia faaaogaina e faamanuiaina ai ia Aperaamo. E ono fiafia tamaiti e faatino le tala i ni nai teuga faigofie, e pei o se palealii ma se teutusi mo sefuluai.

• Valaaulia se tasi e umia le Perisitua Arona ma le Perisitua Mekisateko e asiasi atu i le vasega ma faamatala i tamaiti lo la faaaogaina o le perisitua e faamanuia ai isi. Ona faaali lea i tamaiti o ata o sauniga eseese o le perisitua (mo ni faataitaiga, tagai ata 103–8 i le Tusi Ata o le Talalelei). Fesoasoani i tamaiti ia iloa pe o le fea perisitua e moomia mo sauniga taitasi ma tuu atu lena ata i le o umia le perisitua talafeagai na te uuina.

Eperu 11:1–32

O le faatuatua o le talitonuina o mea e le mavaaia.

E ui e le mafai ona latou vaai i le Tama Faalelagi ma Iesu Keriso pe ua oo uma i faamanuiaga o le talalelei, e mafai e tamaiti o loo e faiaoga ai ona atiae le faatuatua e ala i le aoao mai faataitaiga o i le Eperu 11.

Gaoioiga e Mafai Ona Fai

• Faaali atu se ata o Iesu. Tuu solo i le potu ni meafaitino e faatusa i “molimau” faapea e moni o Ia tusa lava pe le mafai ona tatou vaai ia te Ia (e pei o tusitusiga paia, se ata o le Uluai Faaaliga, ma se ata o le lalolagi). Valaaulia tamaiti e sue ia mea, ona faasoa atu lea ia i latou pe faapefea ona fesoasoani mea taitasi ia i tatou ia faatuatua o loo soifua Iesu.

• Aumai se ili, ma tuu atu e feauauai ia tamaiti ia lagonaina le feula atu e le ili o le ea i o latou mata. Aoao i latou e le mafai ona tatou vaai i le ea, ae e mafai ona tatou lagonaina. E faapena foi, e le mafai ona tatou vaai i le Tama Faalelagi ma Iesu Keriso, ae e mafai ona tatou lagonaina lo La alolofa ma faatuatua e moni i La’ua.

• Faasoa atu ni tala o se tasi po o ni tagata foi o loo ta’ua i le Eperu 11:4--32. Mafaufau e faaaoga ia Tala o le Feagaiga Tuai (tagai i mataupu 4–6, 8–10, 15–17, 23, ma le 28). O le a le mea na fai e nei tagata e faaalia ai sa latou faatuatua i se mea sa le mafai ona latou vaai i ai? Faasoa atu ni nai faamanuiaga ua e mauaina ona o lou faatuatua.

Eperu 13:5–6

O le a fesoasoani le Tama Faalelagi ma Iesu Keriso ia i tatou ma o le a le tuulafoaiina lava i tatou.

O a ni tofotofoga atonu o feagai ma tamaiti? E mafai faapefea e le savali o le Eperu 13:5--6 ona fesoasoani ia i latou?

Gaoioiga e Mafai Ona Fai

• Toe iloilo ni nai tala o le Feagaiga Fou na aoao e tamaiti i le tausaga lenei lea sa fesoasoani ai le Faaola i isi, e pei o le taimi na Ia faamalolo ai le tagata ma’i supa (tagai Luka 5:18–26) po o le fafagaina o le 5,000 (tagai Mataio 14:15–21). Fesoasoani i tamaiti e aoao le fasifuaitau “O le Alii o lo’u fesoasoani ia” (Eperu 13:6).

• Valaaulia ia tamaiti e tusi se ata o se taimi na latou lagona ai le fefefe. Faitau atu ia i latou le Eperu 13:5--6 ma molimau atu o le a fesoasoani le Tama Faalelagi ia i tatou ma e le tuulafoaiina lava i tatou. Fesoasoani i tamaiti e ‘oti’oti ni fatu pepa ia lava le lapopoa e ufiufi ai ia ata. O a ni mea e fesoasoani tatou te lagona latalata atili ai ia Tama Faalelagi? Tusi nisi o na mea i luga o fatu.

• Aoao i tamaiti le fuaiupu lona lua o le “Ta’u Mai Ia Te A’u Le Alii E” (Tusipese a Tamaiti 75). E tusa ai ma le pese, o le a se fesoasoani e mafai ona tatou maua pe a latalata mai le Tama Faalelagi ma Iesu Keriso ia i tatou? Talanoa e uiga i se taimi sa latalata atu ai le Tama Faalelagi ia te oe ma fesoasoani ia te oe.

Aoao atu Aoaoga Faavae

Tamaiti Matutua Atu

Eperu 7:1–4

E mulimuli le au perisitua agavaa i le Faaola.

E mafai faapefea ona e faaaogaina nei fuaiupu e fesoasoani ai i tamaiti ia malamalama faapea o i latou o e umia le perisitua e ao ina faamaoni ma auauna atu i isi e faapei ona sa faia ai e le Faaola?

Gaoioiga e Mafai Ona Fai

• Fesoasoani i tamaiti e lisi mai mea latou te iloa e uiga i le au perisitua maoae e toalua o Aperaamo ma Mekisateko. E mafai ona latou maua se fesoasoani i le Eperu 7:1–4; Aperaamo 1:1–2; ma le Faaliliuga a Iosefa Samita, Kenese 14:25–40 (i le faaopoopoga i le Tusi Paia). O a uiga auaumama faaKeriso na i ai i nei alii na fesoasoani ia i latou e faamamalu le perisitua?

• Fai i tamaiti e faitau le Eperu 7:1--2 ma vaavaai mo igoa sa faaaoga e faamatala ai ia Mekisateko. E faapefea ona faamanatu mai e nei igoa ia i tatou ia Iesu Keriso? Fesoasoani ia latou mafaufau i ni auala sa avea ai Iesu o se “Tupu o le filemu.” Pe o latou iloaina nisi o umia le perisitua o ni faataitaiga foi o le mulimuli i le Faaola?

• Faasoa atu se aafiaga i se mea na fesoasoani ai se perisitua amiotonu ia te oe e faalatalata atili i le Faaola. Fesoasoani i tamaiti e mafaufau ini auala na faamanuiaina ai i latou i auaunaga faaleperisitua.

Eperu 11

E tauia e le Tama Faalelagi i latou o e faatuatua.

Eperu 11 o loo i ai le mau faataitaiga o tagata sa faamanuiaina ina ua latou galulue i le faatuatua. O le fea o tala o le a sili ona musuia pe fesoasoani i tamaiti o loo e faiaoga ai?

Gaoioiga e Mafai Ona Fai

• Valaaulia ia tamaiti e fai se lisi i le laupapa o mea ua latou aoaoina e uiga i le faatuatua i le Eperu 11:1–3, 6. Tuu atu i tamaiti taitasi le igoa o se tagata o loo ta’ua i le Eperu 11, ma valaaulia i latou e faitau ia fuaiupu e faatatau i le tagata. Fai atu iai e faasoa mai ni faaiteite e uiga i le tagata ina ia mafai e isi tamaiti ona mate po o ai. Na faapefea ona faaalia e nei tagata le faatuatua, ma na faapefea foi ona tauia e le Tama Faalelagi i latou? (Mo ata o nei tagata, tagai i le vaega o le Feagaiga Tuai o le Tusi Ata o le Talalelei).

• A uma ona faitau e uiga i faataitaiga faatuatua i le Eperu 11, fai i tamaiti e tusi e uiga i se tagata ua latou iloa sa faaalia le faatuatua. Valaaulia ni nai tamaiti e faasoa mai a latou faataitaiga i le vasega.

Eperu 12:5–11

E aoai e le Alii i latou e alofa i ai.

E mafai ona fesoasoani nei fuaiupu i tamaiti ia malamalama o le Tama Faalelagi, o o latou matua, ma isi e faasa’oina i latou ona e alolofa ia i latou ma e mananao ia latou aoao mai a latou mea sese.

Gaoioiga e Mafai Ona Fai

• Faitau faatasi le Eperu 12:5–11, ma fai i tamaiti e sue mai ni mafuaaga e aoai ai e le Tama Faalelagi i tatou (faasa’o pe apoapoa’ia i tatou). O le a se mea o aoao mai ai i tatou e uiga i le mafuaaga e faasa’o ai foi e matua faalelalolagi a latou fanau? E faapefea na tatou tali atu i se faasa’oga alofa?

• Faasoa atu ni faataitaiga o tagata o i tusitusiga paia o e sa a’oa’i e le Alii ma sa salamo (mo se faataitaiga, tagai 1 Nifae 16:25–27; Eteru 2:13–15). O avea faapefea i latou ma faataitaiga lelei o mataupu faavae o i le Eperu 12:5–11?

• A uma ona faitauina le Eperu 12:5–11, valaaulia ia tamaiti e tusi i lalo ni nai mea o le a latou taumafai e manatua pe a faasa’o i latou mo a latou mea sese.

Fautuaina le Aoaoina i le Aiga

Valaaulia ia tamaiti e fai se tusiga pe tusi se ata o mea latou te manatu o se mea e sili ona taua sa latou aoaoina i le vasega. Fautuaina i latou e faasoa atu i o latou aiga mea sa latou aoaoina.

Faaleleia o Lo Tatou Aoao Atu

Faaaoga itulau o gaoioiga. A maea ona faaaoga e tamaiti ia itulau o gaoioiga i le vasega, faaaoga le taimi e toe iloilo ai mataupu faavae mai le lesona.