Pulu Pāsama i Kiliata, saunia e Annie Henrie

4–10 Novema

Eperu 1–6

O Iesu Keriso, “o le Tupuga o le Ola e Faavavau”

O a upumoni ua e mauaina i le Eperu 1–6 ua musuia oe e aoao atu i tamaiti? Gauai atu i uunaiga mai le Agaga ia e oo mai a o e sauniuni, ma ia mautinoa e tusi i lalo.

Tusifaamaumau Ou Lagona Uunai

Valaaulia le Fefaasoaai

Pe na talia e tamaiti le valaaulia i le faaiuga o le lesona i le vaiaso ua te’a e sue se fuaiupu o se mau e mafai ona latou faasoa maia? Afai na fai, tuu atu se taimi latou te faasoa mai ai. Afai e leai, fesoasoani ia latou mafaufau i se mea sa latou aoaoina mai tusitusiga paia talu ai nei e mafai ona latou faasoa maia.

Aoao atu Aoaoga Faavae

Tamaiti Laiti Ifo

Eperu 1:2–10; 2:8–10, 17–18

Ou te talitonu ia Iesu Keriso.

E mafai ona fesoasoani nei fuaiupu i tamaiti e aoao atili ai e uiga ia Iesu Keriso ma faamalolosia ai a latou sootaga ma Ia.

Gaoioiga e Mafai Ona Fai

• Faaaoga au lava upu, tusi i ni fasipepa upumoni e uiga ia Iesu Keriso na e maua i le Eperu 1:2–10; 2:8–10, 17–18, ma nana solo i le potu. Valaaulia ia tamaiti e sue mai fasipepa. Fesoasoani ia i latou e faitau ia upumoni o loo tusia i pepa, ma talanoa i le uiga o nei upumoni. Afai e tatau ai, faamalamalama atu ua faaigoa Iesu o le Alo o le Atua aua o le Tama Faalelagi o le tama o Lona agaga ma Lona tino.

• Pasi faataamilo se ata o le Faaola i le potu, ma tuu atu i tamaiti taitasi e faasoa mai pe aisea ua faafetai ai o ia ia Iesu Keriso a o uuina le ata.

Eperu 3:8

E finagalo le Tama Faalelagi ia “aua nei faamaaa [o tatou] loto.”

Eperu 3 o loo aumaia ai le faataitaiga o Isaraelu ua faamaaa o latou loto ma teena ia faamanuiaga a le Alii. O se lapataiga foi lea mo i tatou uma ia aua nei faamaaaina o tatou loto.

Gaoioiga e Mafai Ona Fai

• Aumai se momi (po o se fasisolo taele) ma se maa i le vasega. Valaaulia ia tamaiti e pa’i i meafaitino ma faamatala mai pe faape’i le pa’i i meafaitino. Tuu ni nai mataua o le vai i meafaitino taitasi, ma ta’u i ai e tele atu le vai e mimitia e le momi nai lo le maa. Faamalamalama atu e manaomia e o tatou loto ona malu ae le malo ina ia mafai ai ona tatou taliaina upumoni a le Tama Faalelagi i o tatou loto.

• Oti se foliga o se fatu i se mea vaivai, e pei o se fasi ie, ma se mea malo, e pei o se pepa malo. Ta’u i tamaiti a tatou faalogo ma usitai e malu o tatou loto ma a tatou le faalogo ma le usitai, e malo o tatou loto. I au lava upu, faasoa atu ni faataitaiga mai tusitusiga paia o tagata e malu o latou loto pe loto maaa foi (e pei o Nifae, Lamana, ma Lemuelu [1 Nifae 2:16–19], Paulo [Galuega 9:1–22], po o Iosefa Samita [Iosefa Samita—Talafaasolopito 1:11–20]). A o e faasoaina atu faataitaiga taitasi, valaaulia ia tamaiti e tusi i le ata o le loto malu po o le loto maaa.

Ua Valaau e Mose ia Arona mo le Galuega, saunia e Harry Anderson

Eperu 5:4

E valaauina e le Atua i latou e umia le Perisitua.

Eperu 5:4 o se fuaiupu taua aua o loo faamanino mai ai o e umia le perisitua—ma isi o e auauna atu i le Ekalesia—e tatau ona valaauina e le Atua.

Gaoioiga e Mafai Ona Fai

• Faitau le Eperu 5:4 i tamaiti. Fai i se e umia le perisitua e faamalamalama pe o le a le perisitua ma faasoa atu sona aafiaga i le mauaina o le perisitua.

• Fesoasoani i tamaiti e tauloto fasifuaitau mai le mataupu faavae e lima o le faatuatua. Tuu atu lau molimau e faapea o tagata e valaauina e faia le galuega a le Atua e valaauina e le Atua e ala i faaaliga.

Aoao atu Aoaoga Faavae

Tamaiti Matutua Atu

Eperu 1:2–10; 2:8–10, 17–18

Ou te talitonu ia Iesu Keriso.

O le Tusi i Eperu sa tusia e faamalolosia ai le faatuatua o le Au Paia i Eperu ia Iesu Keriso. E mafai foi ona faia lea lava mea e tasi mo tamaiti o loo e faiaoga ai.

Gaoioiga e Mafai Ona Fai

• Tofi i tamaiti taitasi ni nai fuaiupu i le Eperu 1:2–10; 2:8–10, 17–18, ma valaaulia ia tamaiti e saili i na fuaiupu mo upumoni e uiga ia Iesu Keriso. Fai atu ia i latou e faasoa mai pe tusi i le laupapa mea na latou mauaina. O a isi mea ua tatou iloa e uiga ia Iesu Keriso? Atonu e maua nisi manatu e tamaiti i totonu o pese e pei o le “Ua Ou Iloa Lo’u Faaola” (Viiga, nu. 73) po o le “Na Ia Auina Mai Lona Alo” (Tusipese a Tamaiti, 20-21).

• Fai atu i tamaiti e tusi ni ata o i latou lava ma o latou matua. Fai i ai e faasoa mai mea e tutusa ai i latou ma o latou matua. Faamalamalama atu ina ua fai mai le Eperu 1:3 o Iesu Keriso “ua matua tusa lava ma le [Atua],” o lona uiga ua i ai ia Iesu ma le Tama Faalelagi uiga auaumama ma uiga faaleatua e tutusa lelei. Molimau atu tatou te aoao e uiga i le Tama Faalelagi e ala i le aoao e uiga ia Iesu Keriso ma mulimuli i ai.

• Fesoasoani i tamaiti e mafaufau i ni tagata e mafai ona latou faasoa atu i ai a latou molimau ia Iesu Keriso. Mafaufau e valaaulia i latou e faata’ita’i ona faasoa mai mea o le a latou ta’u atu i na tagata e uiga ia Iesu.

Eperu 3:7–19

Ina ia maua le taitaiga ma faamanuiaga a le Tama Faalelagi, e “le tatau ona faamaaa [o tatou] loto.”

I le Eperu 3, o loo faaaoga ai le tala ia Isaraelu i le vao e aoao mai ai le taua o le le faamaaaina o o tatou loto. E mafai faapefea ona e faaaogaina lenei tala e aoao atu ai i tamaiti lenei mataupu faavae?

Gaoioiga e Mafai Ona Fai

• Fai i tamaiti e mafaufau i mea e malo ma vaivai. (Atonu e te manao e aumai ni nai faataitaiga e faaali atu ia i latou.) Faitau faatasi le Eperu 3:8. O le a le uiga o le i ai o se loto maaa? Aisea e finagalo ai le Atua ia malu o tatou loto?

• I au lava upu, faasoa atu le tala ia Isaraelu na faamaaaina o latou loto i le Alii i le vao (tagai Numera 14:1–12; Eperu 3:7–19). Tuu i tamaiti e faatino mai le tala. O le a le mea e tupu pe a faamaaa o tatou loto i le Alii ma Lana talalelei?

• Valaaulia ia tamaiti e faitau le Mataio 13:15; Eperu 3:15; Mosaea 11:29; ma le Mose 6:27. Fai i ai e tusi i luga o le laupapa vaega o le tino o loo ta’ua i nei fuaiupu. O le a le uiga o le i ai o taliga ua mafiafia faaleagaga, o mata ua tauaso, ma loto ua maaa? E faapefea ona tatou faamautinoa ua saunia o tatou taliga, mata, ma loto e talia faamanuiaga a le Atua?

Eperu 5:1–4

E valaauina e le Atua i latou e umia le Perisitua.

Eperu 5 o loo aumaia ai se avanoa e talanoaina ai pe o le a le perisitua—o le mana ma le pule e galue ai i le suafa o le Atua—ma pe faapefea ona maua. Atonu e faapitoa ona fesoasoani mo tamaiti o e o loo sauniuni ia faauuina i le perisitua.

Gaoioiga e Mafai Ona Fai

• Faaali atu le ata o Mose o Loo Tuuina Atu le Perisitua ia Arona (Tusi Ata o le Talalelei nu. 15) a o faitau ese tamaitiiti le Eperu 5:4. E ono fesoasoani foi le faamalamalama atu faapea ona o Arona o le uluai tagata lea na umia le Perisitua Arona, sa faaigoa ia te ia. Fesoasoani i tamaiti e mafaufau i tiute e faatino e i latou e umia le Perisitua Arona (e pei o le papatisoina, faamanuia ma tufatufa le faamanatuga, ma valaaulia isi e o mai ia Keriso).

• Fesoasoani i tamaiti e mafaufau e uiga i auala eseese e maua ai e tagata le pule. Mo se faataitaiga, e faapefea e se faiaoga, fomai, po o se taitai faaupufai ona maua le pule? E faapefea ona tuuina mai e le Atua Lana pule? Valaaulia ia tamaiti e mafaufau e uiga i le fesili lenei a o latou faitauina le Eperu 5:4 ma le mataupu faavae e lima o le faatuatua.

Fautuaina le Aoaoina i le Aiga

Valaaulia ia tamaiti e faasoa atu se mau, pese, po o se gaoioiga sa latou aoaoina i le vasega i le aso i o latou aiga mo se afiafi faaleaiga.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa po o le usu le pese e uiga ia Iesu Keriso ma Lana talalelei e mai le Agaga Paia. E mafai e nei lagona ona fausia a latou molimau.