O Keriso o loo Folafola Atu i le Lalolagi o Agaga, saunia e Robert T. Barrett

25 Novema–1 Tesema

1 ma le 2 Peteru

“Olioli ma le Fiafia e le Matalatalaina e Silisili Ese Lava”

Amata lau suesuega o le 1 ma le 2 Peteru i se tatalo. Manatua o lau tapenapenaga aupito sili lava e aoao atu o le a maua i aafiaga o au suesuega patino ma suesuega faaleaiga.

Tusifaamaumau Ou Lagona Uunai

Valaaulia le Fefaasoaai

Faaali atu le ata o loo maua i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e faamatala atu ia te oe se mea ua latou iloa e uiga ia Peteru. Faamanatu atu ia i latou o Peteru o le taitai o le Ekalesia ina ua mavae le toetu mai o Iesu, ma faamalamalama atu o le1 Peteru ma le 2 Peteru o tusi mai ia te ia i tagata o le Ekalesia i ona taimi.

Aoao atu Aoaoga Faavae

Tamaiti Laiti Ifo

1 Peteru 1:6–7; 3:14

E mafai ona ou fiafia e oo lava i taimi faigata.

Mafaufau pe mafai faapefea ona e aoao atu nei fuaiupu i se ala o le a fesoasoani ai i tamaiti e liliu atu i le Faaola pe a latou feagai ma puapuaga.

Gaoioiga e Mafai Ona Fai

• Valaaulia ia tamaiti e faasoa mai ni mea faigata sa onosaia e Iesu, e pei o le faasatauroina. Faamalamalama atu o le a iai taimi faigata i o tatou olaga. Faitau faatasi le 1 Peteru 1:6–7; 3:14 ma faasoa atu se aafiaga na e feagai ai ma se “tofotofoga o lou faatuatua.” Pe e mafai foi ona e faasoa atu le tatalo a le Perofeta o Iosefa Samita i le Falepuipui o Liperate ma le faamafanafanaga na tuu atu e le Atua ia te ia (tagai MF&F 121:1–8; 123:17). E faapefea i le i ai o le faatuatua ia Iesu ona fesoasoani ia i tatou e maua ai le olioli i taimi faigata?

  

  Iosefa Samita i le Falepuipui i Liperate, saunia e Greg K. Olsen

• Usu faatasi se pese o aoao mai ai pe faapefea ona maua le fiafia, e pei o le “O Le a Ou Mulimuli I Le Fuafuaga a le Atua” (Tusipese a Tamaiti, 86-87).

1 Peteru 2:9–12

E finagalo le Tama Faalelagi ia avea au o se faataitaiga i isi.

Na aoao mai e Peteru e faapea o i tatou o le “nuu o le Atua” ma o a latou galuega lelei e mafai ona “vivii atu ai i le Atua.”

Gaoioiga e Mafai Ona Fai

• Faamatala ia mea e tulagaese mai o latou siosiomaga, pe faaali ni ata o na mea. Mo se faataitaiga, e tulaga ese se malumalu mai fale e siomia ai pe e tulai mai foi se mauga i luga ae o se vanu. Faamalamalama atu a tatou tausia ia poloaiga, tatou te tulaga ese lava ma e mafai e isi tagata ona vaavaai mai i a tatou faataitaiga. Talanoa i ni nai “galuega lelei” ua e vaai o fai e tamaiti. Faamalamalama atu o galuega lelei e pei o na e “viia ai le Atua”---e fesoasoani ai e lagonaina e isi le alofa atili mo le Atua ma le manao e auauna atu ia te Ia.

• Faamaea ma tamaiti le itulau o gaoioiga. O faapefea e tagata na latou maua i le ata ona vivii atu i le Atua?

1 Peteru 3:18–20; 4:6

E aoao e Agaga i le lalolagi o agaga le talalelei.

Ina ua mavae Lona maliu, sa afio atu Iesu i le lalolagi o agaga ma auina atu ia agaga amiotonu e aoao isi agaga o e sa lei taliaina le talalelei.

Gaoioiga e Mafai Ona Fai

• Faamatala i tamaiti e uiga i se tasi e te iloa ua oti. Faamalamalama atu a oti ia tagata, e tuua e o latou agaga o latou tino ae o i le lalolagi o agaga. Faitau le 1 Peteru 3:19 ma faamalamalama atu ina ua maliu Iesu, sa asiasi o Ia i le lalolagi o agaga. O iina, sa Ia faatonuina ai agaga amiotonu e aoao atu le talalelei i isi agaga o e sa lei taliaina lava le talalelei (tagai MF&F 138:30).

• Tuu se atu nofoa i le ogatotonu o le potu e fai ma papupuni. Fai i nisi o tamaiti e tutu i le tasi itu e faatusa i agaga i le lalolagi o agaga, o e sa lei papatisoina i le taimi na ola ai i le lalolagi. Tuu atu i se tasi o isi tamaiti se ki pepa tele e tusi ai le “papatisoga mo e ua maliliu”, ma fai atu ia te ia e aveese le papupuni. Ona faamalamalama atu lea o tagata o le Ekalesia ua tai 12 tausaga ma matutua atu, e mafai ona o i le malumalu ma papatiso ai mo o latou augatama o e e lei papatiso ao iai i le lalolagi. Ona mafai lea e nei augatama ona talia le talalelei i le lalolagi o agaga.

• Fesoasoani i tamaiti e faatumu se laau faigofie faaleaiga (tagai i se faataitaiga o ile “Family History Coloring Pages,” LDS.org).

Aoao atu Aoaoga Faavae

Tamaiti Matutua Atu

1 Peteru 3:12–17; 4:13–14, 16

E mafai ona ou maua le olioli ma le filemu e oo lava i taimi faigata.

O tamaiti o loo e faiaoga ai atonu ua feagai ma ni ituaiga o taufaifai po o le aamu ona o mea ua latou talitonu ai. E mafai ona fesoasoani nei fuaiupu ia i latou i na taimi.

Gaoioiga e Miafai Ona Fai

• Aotele ni nai tala e uiga ia Iesu o loo sauaina, pe faitau foi e tamaiti--mo se faataitaiga, Mataio 12:9–14 po o le Luka 22:47–54. Fesili i tamaiti pe i ai se taimi na taufaifai ai pe amusia i latou ona o loo latou ola i aoaoga o le talalelei. Ona faitau faatasi lea o le 1 Peteru 3:12–14; 4:13–14, 16, ma fesili i tamaiti e vaavaai mo mea na ta’ua e Peteru e uiga i le tigaina “ona o le amiotonu.” Aisea e mafai ai ona tatou fiafia pea pe a aamu mai isi tagata i lo tatou faia o mea tonu?

• Valaaulia se tagata o le uarota e faasoa mai se aafiaga ina ua ia maua le olioli po o le filemu i se taimi o se tofofofoga, pe faasoa mai pe na faapefea e le Perofeta o Iosefa Samita ona maua le filemu ina o iai o ia i le Falepuipui o Liperate (tagai MF&F 121:1–8; 123:17). E mafai faapefea ona tatou maua le olioli ma le filemu i le taimi o o tatou tofotofoga?

1 Peteru 3:15

E tatau ona ou saunia pea lava pea e faasoa atu le talalelei.

O tamaiti o loo e faiaoga ai o le a maua avanoa e tele i o latou olaga e tali ai fesili mai isi tagata e uiga i lo latou faatuatuaga. Mafaufau po o le a se mea e mafai ona e faia e fesoasoani ai ia te i latou “saunia pea lava e tali atu.”

Gaoioiga e Mafai Ona Fai

• Faamatala se taimi na fesili atu ai se tasi se fesili ia te oe e uiga i le Ekalesia, ma faamatala atu pe na e lagona ua e saunia e tali atu. Fai i tamaiti e talanoa e uiga i soo se taimi na fesili atu ai tagata ia te i latou ni fesili e uiga i le Ekalesia. Faitau faatasi le 1 Peteru 3:15. E mafai faapefea ona tatou mulimuli i le fautuaga a Peteru i le fuaiupu lea?

• Faatasi ai ma le fesoasoani mai tamaiti, mafaufau i ni nai fesili atonu e fai atu e tagata e uiga i aoaoga a le Ekalesia. Tuu atu e feauauai ia tamaiti e faamalamalama mai pe faapefea ona latou tali atu i nei fesili ina ia mafai ai ona latou “saunia pea lava.”

1 Peteru 3:18–20; 4:6

E aoao e Agaga i le lalolagi o agaga le talalelei.

Fesoasoani ia malamalama ia tamaiti a oti e amiotonu, latou te o i le lalolagi o agaga e aoao atu le talalelei ia i latou e lei mauaina a o i ai i le lalolagi.

Gaoioiga e Mafai Ona Fai

• Tusi i luga o le laupapa se li’o ma se laina e vase i le ogatotonu. Tusi le Parataiso o Agaga i le isi afa o le li’o ma le Falepuipui o Agaga i le isi afa. Valaaulia se tasi o tamaiti e faitau mai le 1 Peteru 3:18–20; 4:6 (tagai 1 Peteru 4:6, vaefaamatalaga a, mo toefaamanatu mai le Faaliliuga a Iosefa Samita). Faamalamalama atu ina ua maliu Iesu, sa afio o Ia i le parataiso o agaga. Sa Ia faatonuina agaga amiotonu iina e aoao atu le talalelei i agaga o i le falepuipui o agaga.

• Valaaulia se matua po o se tei matua o se tasi o tamaiti e faamatala mai e uiga i le alu i le malumalu ma faamaea le galuega mo se tasi o o latou augatama.

• Valaaulia ia tamaiti e faatumu se laau faaleaiga faigofie (tagai i se faataitaiga o i le “Family History Coloring Pages,” LDS.org).

Fautuaina le Aoaoina i le Aiga

Valaaulia ia tamaiti e faasoa atu a latou laau faaleaiga i tagata o o latou aiga ma fesili atu ia i latou mo se fesoasoani e faaopoopo i ai ni igoa.

Faaleleia o Lo Tatou Aoao Atu

Saili ia malamalama i tamaiti o loo e faiaoga ai. Ua e iloa tamaiti o loo e faiaoga ai, o lea ia fesuiai manatu po o aitia i lenei otootoga pe a tatau ai e taulima ai o latou manaoga. E mafai ona e faaaoga soo se gaoioiga o fautuaina atu i lenei otootoga, ae le na o manatu ua tusia mo le vaitausaga o loo e faiaoga ai. (Tagai Aoao Atu i le Ala a le Faaola, 7