Alofa Atoatoa, saunia e Del Parson

2–8 Tesema

1–3 Ioane; Iuta

“O Le Atua o le Alofa Lava Ia”

O Tusi a Ioane ma Iuta o loo aoao mai ai e uiga i le alofa ma le malamalama o le Tama Faalelagi. A o e suesue i lenei vaiaso, mafaufau pe aisea e manaomia ai e tamaiti o loo e faiaoga ai Lona malamalama ma le alofa i o latou olaga. Manatua e mafaufau i gaoioiga uma o i lenei otootoga, ae le na o le lisi o i lalo o le vaitausaga o loo e faiaoga ai.

Tusifaamaumau Ou Lagona Uunai

Valaaulia le Fefaasoaai

Valaaulia ia tamaiti e faasoa mai pe o faapefea ona latou lagonaina le alofa o le Tama Faalelagi po o le mafuaaga foi latou te manatu ai o le Tama Faalelagi ua pei o se malamalama.

Aoao atu Aoaoga Faavae

Tamaiti Laiti Ifo

1 Ioane 1:5–7; 2:8–11

O le mulimuli ia Iesu e aumaia ai le malamalama i lo’u olaga.

E mafai faapefea i le faatusatusaga i le malamalama faaletino ma le pouliuli ona fesoasoani e te aoao atu ai tamaiti e uiga i le malamalama e aumaia e le Tama Faalelagi i o tatou olaga?

Gaoioiga e Mafai Ona Fai

• Fai i tamaiti e ta’u mai mea e maua mai ai le malamalama. Fesoasoani ia latou malamalama i aoga o le malamalama, e faapei o le fesoasoani i laau ia ola, mafai ai ona tatou vaai, ma aumaia le mafanafana. Valaaulia ia tamaiti e feauauai e ki se moliuila i se ata o Iesu Keriso a o latou fai mai, “O le malamalama lava le Atua” (1 Ioane 1:5). Molimau atu o le Tama Faalelagi ma Iesu Keriso e aumaia le malamalama i o tatou olaga pe a tatou usitai i poloaiga.

• Faapogisa le potuaoga, ma valaaulia ia tamaiti e fautua mai ni auala e mafai ai ona maua mai le malamalama i le potu. Fesoasoani ia latou mafaufau ini auala e mafai ona tatou aumaia ai le malamalama o Iesu Keriso i o tatou olaga. A o latou faasoa mai a latou tali, ki moliuila pe tatala se faamalama e faaopoopo malie mai ai le malamalama i le potu.

1 Ioane 4:10–11, 20–21

Ou te faaalia lo’u alofa i le Atua pe a ou faaali atu le alofa i isi.

Fesoasoani i tamaiti ia iloa le sootaga i le va o le alofa latou te lagonaina mo le Tama Faalelagi ma le alofa latou te faaalia i Ana fanau.

Gaoioiga e Mafai Ona Fai

• Faitau le 1 Ioane 4:11 i tamaiti, ma usu se pese e uiga i le alofa o le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Fesili i ni nai tamaiti e faasoa mai pe faapefea ona latou iloa e alofa le Tama Faalelagi ia i latou. A uma tali taitasi, valaaulia ia tamaiti e feopoai i latou lava ma fai atu, “O le Atua o le alofa lava ia, ma e alofa le Atua ia te au.”

• Faitau le 1 Ioane 4:21 i tamaiti. Valaaulia i latou e faasoa atu pe faatino mai foi ni auala eseese e mafai ona latou faaalia ai le alofa i se uo, e pei o le opo atu i ai pe faia foi se kata. O a ni lagona o a tatou uo i nei mea? O a ni lagona o le Tama Faalelagi pe a tatou faia ni mea lelei mo isi?

1 Ioane 2:3–5; 5:3

E faaali atu lo’u alofa i le Atua pe a ou tausi i Ana poloaiga.

E mafai e tamaiti ona aoao a o laiti e faapea o “poloaiga [a le Atua] e le mamafa” ma o le mulimuli ai o se auala e faailoa atu ai le alofa ia te Ia.

Gaoioiga e Mafai Ona Fai

• Faitau le 1 Ioane 5:3, ma fai i tamaiti e faalogologo mo mea o ta’u mai i lenei fuaiupu e uiga i le ala e mafai ai ona tatou faaali atu tatou te alolofa i le Atua. Valaaulia ia tamaiti e ta’u mai ni poloaiga uma latou te mafaia. O a ni lagona o le Tama Faalelagi pe a tatou usitai i Ana poloaiga?

• Valaaulia ia tamaiti e tusi se ata e faaalia ai se tasi auala e mafai ona faaali atu ai lo latou alofa i le Tama Faalelagi. Mo se faataitaiga, e mafai ona latou tusia se ata o i latou lava o tausia se tasi o poloaiga. Usu faatasi se pese e uiga i le usitai, e pei o le “Filifili Le Ala Sa’o” (Tusipese a Tamaiti, 82). O a ni o tatou lagona pe a tatou usitai?

Aoao atu Aoaoga Faavae

Tamaiti Matutua Atu

1 Ioane 2:8–11; 4:7–8, 20–21

Ou te faaalia lo’u alofa i le Atua pe a ou faaali atu le alofa i isi.

E mafai faapefea ona e fesoasoani i tamaiti ia malamalama o le alofa i le Atua e aofia ai le alofa ia i latou o siomia ai i tatou---e oo lava i tagata atonu e ese mai ia i tatou pe faigata ona alofa iai?

Gaoioiga e Mafai Ona Fai

• Fai i tamaiti e vaai faalemafaufau ua i ai se tagata fou ua amata ona auai atu i la latou aoga po o le uarota ae na te lei iloaina lava se tasi iina. Mata o a lagona o lenei tagata? Valaaulia se tamaitiiti e faitau le 1 Ioane 4:7–8. O le a se mea o fautua mai e lenei fuaiupu e uiga i le ala e tatau ona tatou taulima ai lenei tagata? Faasoa atu ni tulaga faapena, pe fai foi i tamaiti e mafaufau i se taimi atonu latou te maua ai avanoa e faaali atu ai le alofa.

• Fai i tamaiti e faitau le 1 Ioane 4:7–8, 20–21, ma valaaulia i latou e taitasi ma tusi se fuaiupu se tasi e aotele ai mea ua latou manatu o le lesona aupito sili ona taua i nei fuaiupu. A uma ona latou faasoa mai a latou fuaiupu, e mafai ona e faamatala atu le tala e uiga ia Chy Johnson mai le lauga a Brother David L. Beck “O Lou Tiute Paia e Auauna Atu” (Ensign po o le Liahona, Me 2013, 55). E mafai faapefea e tamaiti ona mulimuli i faataitaiga a alii talavou i le tala o e sa faaalia le alolofa mo Chy? Valaaulia ia tamaiti e faasoa mai nisi auala e mafai ona latou faaalia ai le alofa ia i latou o siomia ai i latou.

1 Ioane 2:3–6; 4:17–18; 5:2–5

E faaali atu lo’u alofa i le Atua pe a ou tausi i Ana poloaiga.

O le usitai i poloaiga e mafai ona faigofie atili pe a tatou malamalama i upumoni o loo aoao mai i le 1 Ioane 5:3. E mafai faapefea ona e fesoasoani i tamaiti ia vaai atu i poloaiga e le o se avega mamafa ae o ni avanoa e faaali atu ai lo latou alolofa mo le Atua?

Gaoioiga e Mafai Ona Fai

• Valaaulia ia tamaiti e lisi i le laupapa ni auala e mafai ona latou faaali atu ai i le Atua latou te alolofa ia te Ia. Ona faitau faatasi lea o le 1 Ioane 2:5–6; 5:2–5 mo ni manatu faaopoopo. E faapefea e le usitai i poloaiga ona faailoa atu tatou te alolofa i le Tama Faalelagi?

  

  Tusa lava pe faigata, e mafai ona tatou filifili e tausi i poloaiga.

• Faitau le 1 Ioane 4:17, ma faamalamalama atu i tamaiti o le “maua o le lototoa i le aso o le faamasinoga” o lona uiga o le iai o le talitonuga mautinoa ma le filemu pe a latou tutu atu i luma o le Atua ina ia faamasinoina. O le a se mea o aoao mai e lenei fuaiupu faapea e manaomia ona tatou faia ina ia maua ai lea talitonuga mautinoa? O a nisi o mea e mafai ona tatou faia i le taimi nei ia talitonu mautinoa ai i luma o le Atua?

Iuta 1:18–22

E mafai ona ou faamaoni tusa lava pe ulagia a’u e isi.

Atonu e amusia ia tamaiti ona o o latou talitonuga po o le ala o loo latou ola ai o ni soo o Iesu Keriso. O nei fuaiupu o loo i ai le fautuaga a Iuta ile ala e tumau faamaoni ai i ia ituaiga tulaga.

Gaoioiga e Mafai Ona Fai

• Fai i tamaiti e faasoa mai ni taimi na ulagia ai i latou ona o le faia o le mea tonu. Valaaulia ia tamaiti e faitau le Iuta 1:18–22 ma vaavaai mo auala e mafai ai ona tatou tumau faamaoni pe a amusia pe ulagia i tatou. Tusi mea latou te maua i le laupapa, ma talanoaina ni auala e mafai ona latou mulimuli ai i lenei fautuaga.

• Aotele le miti a Liae (tagai 1 Nifae 8:1–35), ma fai ini nai tamaiti e faitau ia fuaiupu mai le 1 Nifae 8:26–28, 33. Talanoaina pe faapefea e tagata i le faletele ateatea ona pei o tagata aamu o loo talanoa ai Iuta. O le a se mea e mafai ona tatou faia ia le tosina ai e i latou o e ulagia i tatou pe le ioeina foi mea ua tatou talitonu ai? (tagai 1 Nifae 8:30, 33).

Fautuaina le Aoaoina i le Aiga

Fautuaina tamaiti e fai se fuafuaga e fai se mea e faasoa atu ai lo latou malamalama i o latou aiga.

Faaleleia o Lo Tatou Aoao Atu

E tiotio tamaiti. E i ai taimi atonu e te manatu e afaina le aoaoina o tamaiti ona o lo latou malosi. Ae e mafai ona e atiae i luga o o latou natura faaalia e ala i le valaaulia o i latou e faatino mai i taga, tusi se ata, pe usu foi se pese e uiga i se mataupu faavae o le talalelei. (Tagai Aoao Atu i le Ala a le Faaola, 25–26.)