O le Leoleo Mamoe lelei, tusia e Del Parson

9–15 Tesema

Faaaliga 1–11

“O Le Mamalu, ma le Mana, Ia i ai … i le Tamai Mamoe e Faavavau”

O faatusa o i le Faaaliga e mafai ona faigata mo tamaiti ona malamalama ai, ae o le Faaaliga o loo i ai foi aoaoga faavae taua e matagofie ma faigofie.

Tusifaamaumau Ou Lagona Uunai

Valaaulia le Fefaasoaai

Valaaulia ia tamaiti e faasoa mai pe o a ni o latou lagona pe afai latou te vaai ia Iesu Keriso i se faaaliga. Faamalamalama atu o le tusi o Faaaliga, sa faamatalaina ai e Ioane se faaaliga vaaia lea na ia vaai ai ia Iesu ma le tele o mea taua e uiga i le taimi ua tuanai ma le lumanai.

Aoao atu Aoaoga Faavae

Tamaiti Laiti Ifo

Faaaliga 3:20

E mafai ona ou valaaulia Iesu Keriso i lo’u olaga.

O le upu valiata o Iesu o loo tu i le faitotoa ma tuitui e mafai ona fesoasoani e malamalama ai tamaiti faapea e finagalo o Ia ia latalata atu ia i latou.

Gaoioiga e Mafai Ona Fai

• Faaali atu le ata o i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ma faitau le Faaaliga 3:20. Valaaulia ia tamaiti e vaai faalemafaufau ia Iesu o loo tuitui i le faitotoa i o latou fale. Mata latou te faatagaina o Ia i totonu? O le a so latou manatu o le a Lana tala e fai po o Lana mea e fai?

• Valaaulia ia tamaiti e faamatala atu e uiga i ni taimi sa latou faatalitali ai mo se tasi e asiasi atu i lo latou fale lea sa latou naunau e vaai i ai. Na faape’i le faatalitali atu mo lena tagata e tuitui atu le faitotoa? O le a se mea e tupu pe afai latou te le’i faatagaina le tagata i totonu? Faitau le Faaaliga 3:20, ma tuu i tamaiti e feauauai e tuu le ata o Iesu ma faafoliga faapea o loo tuitui i se faitotoa. E mafai e isi tagata o le vasega ona faafoliga e tatala le faitotoa. O le a se mea e mafai ona tatou fai e aumaia ai Iesu i o tatou autafa, tusa lava pe le mafai ona tatou vaai ia te Ia? Mafaufau e avatu i tamaiti taitasi se ata o Iesu e ave i le fale.

Faaaliga 5:1–10

O Iesu Keriso ua na o le pau lea o le toatasi e agavaa e fai ma o’u Faaola.

Sa aoao e Ioane mai lenei faaaliga vaaia ua na o Iesu Keriso lava (faatusa i se tamai mamoe) e mafai ona avea ma o tatou Faaola ma faataunuuina ai le fuafuaga a le Tama (faatusa i le tusi ua faamaufaailogaina/faamauina).

Gaoioiga e Mafai Ona Fai

• A o lei amataina le vasega, sue ia ata e faatusa i faamanuiaga e maua ona o le Togiola a Iesu Keriso (e pei o le malumalu, papatisoga, ma aiga), tuu i totonu o se tusi, ma afifi le tusi i se pepa po o se manoa. I le faaaogaina o ni nai fasifuaitau autu mai le Faaaliga 5:1–10, faamatala mai le faaaliga na vaaia e Ioane. Faaali atu i tamaiti le tusi, ma ta’u atu i ai e na o le tasi lava le ala e tatala ai le tusi o le sue lea o le ata o Iesu na e nanaina i le potu. A latou maua le ata, tatala le tusi ma faasoa atu i tamaiti ia ata o i le tusi. Molimau atu o le Faaola sa na o le pau lea o le tagata e mafai ai ona fai na mea.

• Aotele le faaaliga o loo faamatala mai i le Faaaliga 5:1–10,ma valaaulia ia tamaiti e faatino mai taga pe o a lagona o Ioane ma isi i vaega eseese o le faaaliga. Mo se faataitaiga, e mafai ona latou faafoliga e fetagisi pe a leai se isi e mafai ona tatala le tusi, pe e mafai ona latou matafiafia ina ua tatala e le Faaola le tusi.

Faaaliga 7:9, 13–14

Ua fesoasoani mai Iesu Keriso ia ou mama mai a’u agasala.

Na vaai Ioane i le toatele sa oofu i ofu “ua … faasinasina i le toto o le Tamai Mamoe” (fuaiupu 14). Mafaufau pe mafai faapefea ona fesoasoani lenei faaaliga ia malamalama ai tamaiti i le taua o le faamamaina mai a tatou agasala e ala i le Togiola a Iesu Keriso.

Gaoioiga e Mafai Ona Fai

• Faaali atu i tamaiti ni ofu papatiso po o isi ofu papae ma se ata o Iesu. Faitau le Faaaliga 7:9, 13–14 i tamaiti, ma fai i ai e faasino i le ata ma ofu i taimi uma latou te faalogo ai i le upu paepae. Faamalamalama atu o ofu papae e faatusa i le mama ma e faamanatu mai ai ia i tatou o Iesu Keriso e mafai ona faamamaina i tatou mai a tatou mea sese.

• Faaali i tamaiti se fasi ie paepae, ma tuu atu latou te faapalapalaina e ala i le tusitusi i se peni pe tuu ai foi i luga ni palapala. Faamalamalama atu o le agasala e faapalapala ai o tatou agaga. Faaali atu se ata o Iesu i Ketesemane (e pei o le Tusi Ata o le Talalelei, nu. 56), tuu ese le ie palapala, ae faaali atu iai se ie paepae mama. Molimau atu e ala i le Togiola a Iesu Keriso e mafai ai ona avea i tatou ma tagata mama.

• Usu se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53), ma talanoaina pe fesoasoani faapefea Iesu ia i tatou ia mama pe a tatou papatiso.

Aoao atu Aoaoga Faavae

Tamaiti Matutua Atu

Faaaliga 3:20

E mafai ona ou filifili e avea Iesu Keriso o se vaega o lo’u olaga.

E mafai faapefea ona e fesoasoani i tamaiti o loo e faiaoga ai e tatala o latou loto ma olaga i le mana ma le tosinaga a Iesu Keriso?

Gaoioiga e Mafai Ona Fai

• Valaaulia ia tamaiti e vaavaai i le ata mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga a o e faitauina le Faaaliga 3:20. Ina ia fesoasoani ia i latou e aumaia le uiga mai le ata, valaaulia i latou e galulue i paga e tali ia fesili faapea: O le a sou manatu aisea ua tuitui ai Iesu i le faitotoa? Aisea e le o i ai ai se au o le faitotoa i fafo o le faitotoa? O le a le uiga o le faataga o Iesu i o tatou olaga?

• Fai i tamaiti e tusi i le laupapa ni auala eseese e “tatala ai le faitotoa” ia Iesu. O ni nai faataitaiga e mafai ona aofia ai le auauna atu i isi, faitau o tusitusiga paia, ma le aai ma feinu i le faamanatuga.

Faaaliga 5:1–10

O Iesu Keriso ua na o le pau lea o le toatasi e agavaa e fai ma o’u Faaola.

O le faaaliga o loo faamatala mai ile Faaaliga 5 ua aoao mai ai ua na o Iesu Keriso lava e agavaa ma mafai ona faatinoina le Togiola ma laveai ai i tatou mai le agasala.

Gaoioiga e Mafai Ona Fai

• Valaaulia ia tamaiti e faamatala mai e uiga i se taimi na latou manaomia ai se tasi e faia se mea sa le mafai ona latou faia mo i latou lava. Fai i ai e faitau le Faaaliga 5:1–10 ma vaavaai mo mea e manaomia ona fai lea e na o le toatasi lava le tagata e mafai ona faia (faamalamalama atu o le Tamai Mamoe o Iesu Keriso ma o le tusi e faatusa i le fuafuaga a le Atua). O le a le mea sa fai e Iesu mo i tatou e leai se isi tagata sa mafai ona faia?

• Fai i tamaiti e vaavaai mo se viiga po o se pese a tamaiti o loo molimau atu ai ia Iesu Keriso (e pei o le “Beautiful Savior,” Children’s Songbook, 62–63). O a mea o aoao mai e upu o le pese e uiga ia Iesu Keriso? O faapefea ona pei le pese lea o le viiga o faaneetaga na lagiina e uiga ia Iesu Keriso i le Faaaliga 5:9–10?

Faaaliga 9:1–2

E mafai ona fesoasoani le talalelei ia te au e faatoilalo ai tofotofoga.

O le asu na faapouliuligia ai le ea i le Faaaliga 9:2 e mafai ona faatusa i faaosoosoga (tagai 1 Nifae 12:17).

Gaoioiga e Mafai Ona Fai

• Tusi ni ata o le la ma se ao pogisa, ma ‘oti’oti ese. Valaaulia ia tamaiti e faitau le Faaaliga 9:2 ma le 1 Nifae 12:17 ma tusi i luga o le ao pogisa mea ua faatusa i ai le asu po o puao pogisa. Tuu le ao pogisa i luga o le laupapa, ma valaaulia ia tamaiti e fai se lisi o faaosoosoga e fetaiai ma tamaiti o le latou vaitausaga. Ona tuu lea o le la i luga o le laupapa ma fai i tamaiti e fai se lisi o meafaigaluega ua tuuina mai e le Tama Faalelagi ia i tatou e faatoilalo ai le pogisa i le lalolagi.

• E mafai faapefea e tamaiti ona fesoasoani i isi o e ua i ai i le pogisa faaleagaga? Ina ia fesoasoani ia i latou e mafaufau i lenei fesili, faaali le vitio “Choose the Light” (LDS.org), ma valaaulia i latou e talanoa e uiga i le tietie uila.

Fautuaina le Aoaoina i le Aiga

Valaaulia ia tamaiti e faasoa atu i o latou aiga auala e mafai ona latou valaaulia ai le tosinaga a le Faaola i o latou fale.

Faaleleia o Lo Tatou Aoao Atu

Fautuaina le migao O se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese pe faaalia se ata o Iesu.