O Le Aai o Faavavau, saunia e Keith Larson

23–29 Tesema

Faaaliga 12–22

“O Le Manumalo e Mua e Ia Mea Uma”

A o e tapenapena e aoao atu, faaaoga ou aafiaga i le suesueina o le Faaaliga 12–22 e oe lava ia po o suesuega ma lou aiga. O le a se mea na taua ia te oe? O a ni uunaiga na e maua? Manatua o gaoioiga o loo fautua atu ii e mafai ona fetuunai mo tamaiti o soo se vaitausaga.

Tusifaamaumau Ou Lagona Uunai

Valaaulia le Fefaasoaai

Valaaulia ia tamati e faasoa mai pe aisea latou te mananao ai e toe nonof ma le Tama Faalelagi. I le lesona atoa, fesoasoani ia i latou e vaavaai mo mea e mafai ona latou fai e sauniuni ai e toe foi atu ia te Ia.

Aoao atu Aoaoga Faavae

Tamaiti Laiti Ifo

Faaaliga 12:7–11

Sa ou faaalia le faatuatua ia Iesu Keriso i le muai olaga.

I le Taua i le Lagi, sa faatoilalo ai e fanau faamaoni a le Atua ia Satani e ala i “le upu o a latou molimau” ma e ala i le faaalia o le faatuatua ia Iesu Keriso (Faaaliga 12:11).

Gaoioiga e Mafai Ona Fai

• Ina ia fesoasoani i tamaiti ia malamalama i le uiga o le mulimuli i se faataitaiga a se tasi, filifili se tamaitiiti e toatasi e fai ma “taitai,” ma fai i isi e mulimuli ia te ia e ala ile faia soo se mea na te faia. Ona tuu atu lea i isi tamaiti e taitai. Faitau le Faaaliga 12:7–11 i tamaiti ma faamalamalama atu iai ae tatou te lei fananau mai, sa tatou filifili e mulimuli ia Iesu ae le o Satani.

• Usu faatasi se pese e uiga i le muai olaga, e pei o le “I Lived in Heaven” po o le “O Le a Ou Mulimuli I Le Fuafuaga a le Atua” (Tusipese a Tamaiti, 4, 86). Fai fesili e pei, O le a le mea na tupu i le lagi ae tatou te lei fananau mai? O le a se mea na tatou filifili e fai? (Tagai foi “Folasaga: O Le Fuafuaga a lo Tatou Tama Faalelagi,” Tala o le Feagaiga Fou, 1–5, po o le vitio e o faatasi ai i luga o le LDS.org.)

Faaaliga 19:7

E mafai ona ou sauniuni mo le Afio Mai Faalua o Iesu, e ala i le filifili o le mea tonu.

E mafai faapefea ona e fesoasoani i tamaiti ia malamalama o le Afio Mai Faalua o se mea fiafia mo i tatou pe afai tatou te mulimuli i poloaiga a Iesu?

Gaoioiga e Mafai Ona Fai

• Faaali atu le ata o i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma faitau le Faaaliga 19:7. Faamalamalama atu o le “faaipoipoga a le Tamai Mamoe” e faatusa i le Afio Mai Faalua o Iesu Keriso. Aisea na “fiafia” ai tagata? Fesili i tamaiti pe ua latou o i se faaipoipoga. Na faape’ī ? Aisea na fiafia ai tagata?

• Faasoa atu i tamaiti pe aisea ua e sagisagi atu ai i le Afio Mai Faalua o Iesu? E mafai foi ona outou usuina faatasi se pese e uiga i le Afio Mai Faalua, e pei o le “Pe A Ia Toe Afio Mai” (Tusipese a Tamaiti 46).

• Valaaulia ia tamaiti e faasoa mai a latou mea e fai e sauniuni ai mo le lotu i le Aso Sa. Aisea tatou te faia ai nei mea ae tatou te lei o mai i le lotu? Aisea e tatau ai ona tatou saunia mo le toe Afio Mai Faalua o Keriso? I le itulau o gaoioiga o lenei vaiaso, tuu i tamaiti e tusi ata o mea e mafai ona latou fai e sauniuni ai mo le Afio Mai Faalua.

Faaaliga 21:1, 3–4, 22–27; 22:1–2

E mafai ona ou nofo i le malo selesitila faatasi ma leTama Faalelagi ma tagata ou te alofa iai.

I toe mataupu e lua o le Faaaliga, sa faaaoga ai e Paulo le gagana matagofie e faamatala ai le mamalu selesitila lea o le a olioli ai e faamaoni.

Gaoioiga e Mafai Ona Fai

• Tuu i tamaiti e tusi se ata o le laau o loo faamatala mai i le Faaaliga 22:2 i le laupapa. Faamalamalama atu o le laau lenei o le laau o le ola, ma o ona fua ua faatusa i le alofa o le Atua (tagai 1 Nifae 11:21–22). Avatu i tamaiti ni fasipepa e foliga i fua, ma valaaulia i latou e tusi i luga o pepa se mea e fesoasoani ia i latou e lagonaina ai le alofa o le Tama Faalelagi. Faamalamalama atu o i latou o e faamaoni o le a nonofo ma le Tama Faalelagi i le malo selesitila.

• Faasoa atu i tamaiti ni nai ata po o faamatalaga sa faaaoga e Ioane e faamatala ai le mamalu selesitila (tagai Faaaliga 21:1, 3–4, 22–27; 22:1–2), ma valaaulia ia tamaiti e tusi ia ata o mea nei.

• Usu faatasi se pese e uiga i le fuafuaga a le Atua, e pei o le “O Le a Ou Mulimuli I Le Fuafuaga a le Atua” (Tusipese a Tamaiti 86. Valaaulia ia tamaiti e faailoa mai mea e mafai ona latou fai ia toe nonofo faatasi ai ma le Tama Faalelagi.

Aoao atu Aoaoga Faavae

Tamaiti Matutua Atu

Faaaliga 12:7–11

Sa ou faaalia le faatuatua ia Iesu Keriso i le muai olaga.

O tamaiti o loo e faiaoga ai o loo i le lalolagi ona sa latou faatuatua ia Iesu Keriso i le muai olaga ma sa filifili e mulimuli ia te Ia.

Gaoioiga e Mafai Ona Fai

• Faitau faatasi le Faaaliga 12:7–11, ma tusi i le laupapa ia upu tarako, Taua i le Lagi, tuliesea, molimau, ma le Tamai Mamoe. Fai i tamaiti e aotele ia fuaiupu nei e faaaoga ai upu o i le laupapa. O a mea ua tatou aoaoina e uiga ia Iesu Keriso (le Tamai Mamoe) mai nei fuaiupu? O a mea ua tatou aoaoina e uiga i filifiliga sa tatou faia i le muai olaga?

• I luga o le laupapa, fai ni koluma se tolu ona faaigoa lea A o le’i i ai lenei olaga, I le olaga lenei, ma le Olaga uma e lua. Saunia ni fasipepa e ta’u mai ai upumoni e uiga i le muai olaga ma le olaga faitino, e pei o E i ai o tatou tino, E leai ni o tatou tino, Ua tatou nonofo i le afioaga o le Atua, O loo tatou tau le taua ma Satani, Ua tatou faaaoga le faatuatua ia Iesu Keriso ma le Ua tatou mulimuli i le fuafuaga a le Atua. Tuu i tamaiti e feauauai e piki se fasipepa ma filifili pe o le fea koluma e ona ia. Faamatala atu lou talitonuga mautinoa e mafai e tamaiti ona faaalia pea lava pea le faatuatua ia Keriso.

Faaaliga 19:7--8

E mafai ona ou sauniuni mo le Afio Mai Faalua o Iesu, e ala i le filifili o le mea tonu.

E mafai faapefea ona e fesoasoani i tamaiti o loo e faiaoga ai ia malamalama o le Afio Mai Faalua o Iesu Keriso o se mea fiafia o le a tupu mo e amiotonu?

Gaoioiga e Mafai Ona Fai

• Faitau faatasi le Faaaliga 19:7–8, ma fesoasoani ia malamalama ia tamaiti i faatusa o i nei fuaiupu---o le faaipoipoga o le Afio Mai Faalua o le Faaola, o le Tamai Mamoe o le Faaola, ma Lona faletua o le Ekalesia (po o i tatou uma). E faapefea ona sauniuni ia tagata mo se faaipoipoga? O a mea atonu tatou te faia e sauniuni ai mo le Faaola e toe foi mai?

• Toe iloilo faatasi ma tamaiti ma tauloto le Mataupu Faavae o le Faatuatua 1:10 . Faamalamalama atu o lenei mataupu faavae o le faatuatua o loo faamatala mai ai mea ofoofogia, ma le mamalu o le a tutupu pe a toe afio mai Iesu. Faaali le ata o le Afio Mai Faalua o Iesu o i le Sau, Mulimuli Mai ia te A’u---Mo Tagata Taitoatasi ma Aiga, ma valaaulia ia tamaiti e tusi ni ata o mea ua latou manatu o le a foliga i ai le Afio Mai Faalua o Iesu.

Faaaliga 21:1, 3–4, 22–27; 22:1–2, 17

E mafai ona ou nofo i le malo selesitila faatasi ma le Tama Faalelagi ma tagata ou te alofa i ai.

A’o e tapenapena e aoao atu e uiga i le malo selesitila, mafaufau i le uiga o le malo selesitila ia te oe. E mafai faapefea ona e faasoa atu lau molimau i tamaiti o loo e faiaoga ai?

Gaoioiga e Mafai Ona Fai

• Valaaulia ia tamaiti e saili i fuaiupu nei ni nai ata po o ni faamatalaga na faaaoga e Ioane e faamatala ai le mamalu selesitila: Faaaliga 21:1, 3–4, 22–27; 22:1–2. Tuu atu latou te filifilia se ata po o se faamatalaga latou te mananao e tusi. Ona mafai lea ona latou talanoa mai e uiga ia latou ata na tusi i le vasega. Fautuaina i latou e faasoa atu a latou ata i o latou aiga i le fale.

• Faitau faatasi le Faaaliga 22:17, ma faamalamalama atu o le faatoanofotane o le ua faapea mai “Ina sau ia” o le Ekalesia. O le a se mea tatou te mananao e valaaulia isi e “o mai” iai? O a ni auala lelei e valaaulia ai tagata e “o mai”?

Fautuaina le Aoaoina i le Aiga

Fesoasoani i tamaiti e sauniuni e faitau le Tusi a Mamona i le tausaga a sau e ala i le valaaulia o i latou e fai i se tagata o le aiga po o se uo e faasoa mai se fuaiupu e fiafia i ai po o se tala mai le Tusi a Mamona.

Faaleleia o Lo Tatou Aoao Atu

Aoao atu tamaiti ia tusifaamaumau o latou lagona uunai. Afai e mafai e tamaiti ona aoao le mausa o le tusifaamaumau o lagona uunai, o le a fesoasoani ia i latou e iloa ai ma mulimuli i le Agaga. E mafai ona tusifaamaumau e tamaiti ia lagona uunai i le makaina lea o tusitusiga paia, tusi ia ata, pe fai ni faamatalaga faigofie i a latou tusitalaaga. (Tagai Aoao Atu i le Ala a le Faaola, 30.)