Folasaga

O Le Fuafuaga a lo Tatou Tama Faalelagi

Sa tatou nonofo i le lagi ma le Tama Faalelagi ae tatou te le i o mai i le lalolagi. O i tatou o Ana fanau agaga ma sa i ai o tatou tino agaga. Sa tatou alolofa ia te Ia, ma sa Alofa o Ia ia i tatou.

Aoaoga a le Perofeta o Iosefa Samita, 354

Sa aoaoina i tatou e le Tama Faalelagi e uiga i Lana fuafuaga mo i tatou. Ua faaigoa o le ata o le faaolataga. Afai tatou te mulimuli i Lana fuafuaga, e mafai ona avea i tatou e faapei o le Tama Faalelagi. O le fuafuaga e mo tatou ia o mai i le lalolagi ma maua ni tino o aano ma le toto. O le a tofotofoina i tatou e iloa ai pe o le a tatou filifili e usitai i tulafono a le Atua.

Aperaamo 3:24–25

O le ata o le faaolataga e saunia ai le ala mo i tatou tatou te toe nonofo ai faatasi ma le Tama Faalelagi. O le a manaomia lo tatou tausia o poloaiga. Peitai o le a tatou manaomia foi se fesoasoani. O le a tatou manaomia le aveesea o a tatou agasala, ma o le a tatou manaomia ni tino toetutu. Talu ai e le mafai ona tatou aveesea a tatou lava agasala pe toe faatutu mai o tatou lava tino, o lea ua tatou manaomia ai se Faaola e faia lenei mea mo i tatou.

2 Nifae 2:5–9

Na filifilia Iesu Keriso e le Tama Faalelagi e avea ma o tatou Faaola. Sa alofa Iesu i le Tama Faalelagi. Sa alofa foi Iesu ia i tatou. Sa malie o Ia e sau i le lalolagi e faaali mai ia i tatou le ala e mafai ai ona tatou amiotonu. O le a Ia saunia le ala e faaolaina ai i tatou uma. Na malie o Ia e puapuagatia mo a tatou agasala. O le a maliu foi o Ia ma toetu ina ia tatou toetutu foi.

2 Nifae 2:8–9; Mose 4:1–2

Na manao foi Satani e avea ma o tatou faaola. Peitai e le’i alofa o ia i le Tama Faalelagi. E le’i alofa o ia ia i tatou. Na manao o ia e suia le fuafuaga a le Tama Faalelagi ina ia maua e ia le mana ma le mamalu o le Tama Faalelagi.

Mose 4:1–2

O nisi o fanau agaga a le Tama Faalelagi na filifili e mulimuli ia Satani. O le mea lea sa faanoanoa tele ai le Tama Faalelagi. Na tuliese e Ia mai le lagi ia Satani ma lana au. O Satani o le tiapolo. E manao o ia ma agaga sa mulimuli ia te ia ia tatou agasala.

Mose 4:3–4

Na ta’u atu e le Tama Faalelagi ia Iesu e fai se lalolagi mo i tatou. Na faia e Iesu. Na faia e Ia le la, ma le masina, ma fetu. Na tuu e Ia o laau ma manu i le lalolagi. O lenei ua i ai le lalolagi tatou te o mai i ai ma o le a tatou maua ai tino o aano ma le toto.

Eperu 1:2; Mosaea 3:8; Aperaamo 4

E toatele tagata ua o mai e nonofo i le lalolagi. O nisi o i latou ua filifili e usitai i tulafono a le Atua; o nisi e leai. Na aoao mai e perofeta anamua ia tagata e uiga i le fuafuaga a le Tama Faalelagi ma uiga ia Iesu Keriso.

2 Nifae 2:19–21; Iakopo 7:10–11; Mose 5:13–15

Na ta’u mai e perofeta o le tamā o Iesu o le Tama Faalelagi. O Lona tina o se tamaitai lelei tele e igoa ia Maria. O le a fanau o Ia i Peteleema.

Isaia 7:14; Mika 5:2; 1 Nifae 11:18–21; Alema 7:10

Na ta’u mai e perofeta o le tele o tagata o le a le talitonu o Iesu o le Faaola. O le a foliga o Ia e pei o isi tagata ae o le a le mauoa. E toatele tagata o le a inoino ia te Ia.

Isaia 53:2–3

Na ta’u mai foi e perofeta e uiga ia Ioane le Papatiso. O le a muamua mai o ia ia Iesu e ta’u atu i tagata e uiga ia Iesu. O le a papatisoina Iesu e Ioane.

Isaia 40:3; Mataio 3:1–3; 1 Nifae 10:7–10; 11:27

Na ta’u mai e perofeta o le a agalelei Iesu ma faia ni vavega se tele. A o le’i maliu o Ia, o le a puapugatia Iesu mo agasala a tagata uma ina lē puapuagatia i latou pe afai latou te salamo.

Mosaea 3:5–8; Mataupu Faavae ma Feagaiga 19:16–18

Na iloa e le tele o perofeta o Iesu Keriso, lo tatou Faaola, o le a faasatauroina. O le a tutu’i o Ia i se satauro laau ma tuu atu Lona soifua mo i tatou.

Ioane 3:14–15; Mosaea 15:7–9

A mavae aso e tolu, o le a toetu mai o Ia. O le a toe foi mai Lona agaga i totonu o Lona tino. Ona o le a maliu ma toetu mai Iesu, o le a toetutu uma foi i tatou.

Isaia 25:8; 1 Korinito 15:22; 2 Nifae 2:8; Alema 33:21–22

O loo faailoa mai e le Feagaiga Fou e moni upu a perofeta. O le tala ia Iesu Keriso ma Ana Aposetolo. Sa nonofo i latou i le Nuu Paia. O le tele o tagata sa nonofo ai iina sa ta’u o tagata Iutaia. Sa ave faamalosi e tagata Roma le Nuu Paia, ma sa latou pulea tagata Iutaia.