Mataupu 40
O Le Leoleo Mamoe Lelei
O se leoleo mamoe na te tausia mamoe. Na te fesoasoani ia i latou e sue meaai ma vai. Na te le tuua i latou ia lavevea pe leiloloa. Na te iloa ma alofa ia i latou ma na te tuu atu lona ola e lavea’i ai i latou.
E ta’u e Iesu Keriso o Ia lava o le Leoleo Mamoe Lelei. O Ia o lo tatou leoleo mamoe. O i tatou o Ana mamoe. E alofa o Ia ia i tatou. E fesoasoani o Ia ia tatou iloa le upumoni. Na te aoao i tatou i ala e tatau ona tatou ola ai ina ia mafai ona tatou toe foi i le Tama Faalelagi. Sa Ia tuu atu Lona soifua mo i tatou.
Sa ta’u atu e le Faaola i tagata i Ierusalema e i ai foi isi Ana mamoe. Na fetalai o Ia o le a Ia asiasi i isi mamoe. Sa le’i malamalama tagata.
Ina ua mavae le toetu mai o Iesu, sa asiasi atu o Ia i Ana mamoe i Amerika. O loo faamatala mai i le Tusi a Mamona Lana asiasiga iina. Sa nofo Iesu i le tele o aso, e faamalolo i e mama’i ma famanuia i tagata. Sa Ia tuu atu ia i latou le perisitua ma faatulaga Lana Ekalesia. Sa aoao atu e Iesu i nei tagata mea foi sa ia aoao atu i tagata i Ierusalema.