Mataupu 34
O Le Tamaitiiti ua i ai le Agaga Leaga
Na aioi atu se tagata i le Faaola i se tasi aso ia fesoasoani atu i lona atalii. Sa i ai i le tamaitiiti se agaga leaga. Ua uma ona taumafai le au soo e faamalolo lona atalii, peitai sa le mafai ona latou faia.
Sa fai atu Iesu i le tamaloa e aumai lona atalii ia te Ia. Ina ua oo mai le tamaitiiti, sa faapau o ia e le agaga leaga i lalo.
Sa fesili le Faaola po o le a le umi na i ai le agaga leaga i le tamaitiiti. Fai mai le tamā sa i ai ia te ia talu mai lona laitiiti.
Na fai atu Iesu e mafai ona Ia faamalolo le tamaitiiti pe a i ai i le tamā le faatuatua. Sa amata ona tagi le tamā. Na fai atu o ia e i ai lona faatuatua. Peitai sa ia aioi atu ia Iesu ia fesoasoani atu ia te ia e faateleina lona faatuatua.
Sa faatonu e Iesu le agaga leaga e alu ese mai le tamaitiiti ma aua nei toe alu atu ia te ia. Sa ita le agaga leaga. Sa ia toe faatiga i le tamaitiiti. Ona ia usitai lea ia Iesu ma alu ese.
Sa matuā le pisa le tamaitiiti ma sa fai mai le tele o tagata ua oti o ia. Peitai sa tago atu Iesu i lona lima ma fesoasoani e faatu o ia i luga. Sa manuia le tamaitiiti. Ua alu ese le agaga leaga.
I se taimi mulimuli ane na fesili le au soo ia Iesu pe aisea na le mafai ai e i latou ona tuliese le agaga leaga mai le tamaitiiti. Sa fai atu Iesu ia i latou o nisi tami e manaomia ona latou tatalo ma anapogi ina ia mafai ai ona faamalolo se tagata.