Mataupu 9
O Le Tamaitiiti o Iesu
Na tupu ae Iesu i le nuu o Nasareta. Sa aoao e Ia mea e tele ma sa o’o ina “malosi lona loto, … sa ia te Ia foi le alofa o le Atua.”
Ina ua 12 tausaga o Iesu, na alu o Ia faatasi ma Iosefa ma Maria ma se vaega o tagata i se faafiafiaga i Ierusalema. Sa i ai latou iina mo ni nai aso.
Ina ua toe foi Iosefa ma Maria i lo latou aiga, sa manatu i la’ua ua savavali faatasi Iesu ma Ana uo e toe fo’i i Nasareta. Peitai sa nofo Iesu i Ierusalema.
Ina ua su’e e Iosefa ma Maria ia Iesu, sa la lē maua o Ia. Sa leai se tasi o la latou vaega na vaai ia te Ia. O lea na toe foi ai Iosefa ma Maria i Ierusalema. Na la su’eina Iesu mo aso e tolu. Sa faanoanoa tele i la’ua.
Mulimuli ane sa la mauaina Iesu i le malumalu, o talanoa ma nisi o aoao. Sa tali e Ia a latou fesili. Sa ofo nei aoao i le tele o mea sa iloa e Iesu.
Luka 2:46–47 (tagai vaefaamatalaga 46c)
Sa ta’u atu e Maria ia Iesu sa la popole ma Iosefa e uiga ia te Ia. Sa tali atu Iesu sa Ia faia le galuega a Lona Tama—galuega a le Atua. Sa le malamalama Iosefa ma Maria.
Sa alu Iesu faatasi ma Iosefa ma Maria i lo latou aiga i Nasareta ma sa usitai ia i la’ua.
Na aoao pea lava pea Iesu e uiga i le galuega a Lona Tama Faalelagi.
Sa tupu umi ma malosi o Ia.
Sa alolofa tagata ia te Ia. Na Ia faia le mea e manao le Atua na te faia.
Sa alofa le Atua ia te Ia.