Mataupu 18

Ua Filifilia e Iesu Ana Aposetolo

I se tasi aso na aoao atu ai e Iesu tagata mai luga o se vaa i le matafaga o le Sami o Kalilaia. O le vaa o se tagata e igoa ia Peteru.

Luka 5:1–3

Na fagogota Peteru ma ana uo i le po atoa ae leai ni i’a na maua. Ina ua uma ona aoao atu Iesu, na Ia fai atu ia Peteru e ave le vaa i le mea e loloto ai le vai. Ona Ia fai atu lea ia Peteru ma ana uo e tuu a latou upega i lalo i le vai.

Luka 5:4–5

Sa tele i’a na latou maua ma sa amata ai ona masaesae a latou upega.

Luka 5:6

Sa valaau Peteru i ana uo sa i le isi vaa e o mai e fesoasoani. Ona ua tutumu uma vaa e lua i i’a o lea sa amata ai ona gogoto.

Luka 5:7

Sa ofo Peteru ma ana uo. Sa latou iloa o Iesu na mafua ai ona tupu lenei mea.

Luka 5:8–9

Sa tootuli Peteru i tala ane o vae o Iesu. Sa ia fai mai e le agavaa o ia ona latalata atu ia Iesu. Na fai atu Iesu ia Peteru e aua le fefe.

Luka 5:8–10

O uo e toalua a Peteru, o Iakopo ma Ioane, e uso i la’ua. Na fai atu Iesu ia Peteru, Iakopo, ma Ioane e mulimuli atu ia te Ia ma avea ma “faifaiva o tagata.” Sa latou tuua a latou mea uma ae o ma Iesu. Na fetalai atu foi le Faaola i isi tagata e mulimuli atu ia te Ia.

Mataio 4:18–22; 9:9; Luka 5:10–11; Ioane 1:35–51

Na filifili e Iesu ia Aposetolo e toasefululua e taitai Lana Ekalesia. Na tatalo o Ia i le po atoa ina ia mafai ona Ia filifili tagata sa’o. O le taeao na sosoo ai na Ia filifilia ma faauuina alii e toasefululua, ma tuu atu i ai le perisitua ma le pule e avea ai ma Aposetolo.

Mareko 3:14; Luka 6:12–16; Ioane 15:16

Na feoai Aposetolo i le tele o aai. Sa latou aoao atu le talalelei ma faamalolo i tagata. Na latou toe foi mai e ta’u atu ia Iesu mea na latou faia.

Mareko 6:30; Luka 9:1–6, 10