Malu i se Falemanu, saunia e Dan Burr

16–22 Tesema

Kerisimasi

“Tala Lelei e Olioli Tele Ai”

O lenei lesona o se avanoa lea e fesoasoani ai i tamaiti o loo e faiaoga ai e faamanatu le soifua mai o le Faaola, soifuaga, ma le misiona i Ketesemane. Teu le manatu lea i lou mafaufau a o e tapenapena e aoao atu.

Tusifaamaumau Ou Lagona Uunai

Valaaulia le Fefaasoaai

Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e faasoa mai mea ua latou iloa e uiga i le fanau mai o le Faaola.

Aoao atu Aoaoga Faavae

Tamaiti Laiti Ifo

Mataio 2:1–12; Luka 2:1--14

Na afio mai Iesu Keriso i le lalolagi o se pepe.

O le tala i le fanau mai o Iesu Keriso e tosina i ai tamaiti. O a upumoni faaleaoaoga faavae o e vaai i ai i lenei tala ua e lagona e tatau ona malamalama i ai tamaiti?

Gaoioiga e Mafai Ona Fai

• Faitau le Luka 2:1–14 i tamaiti, pe faamatala iai le mea na tupu i fuaiupu nei e ala i le faasino atu i le “Mataupu 5: Ua Fanau Mai Iesu,” Tala o le Feagaiga Fou, 13–15, po o le vitio e o faatasi ai i luga o le LDS.org. Valaaulia ia tamaiti e tusi ni ata o nei mea na tutupu ma faaaoga ia ata e faamatala mai ai e i latou lava le tala. Aisea ua e fiafia ai ina ua afio mai Iesu i le lalolagi o se pepe?

• Fai i tamaiti e faamatala atu le tala i le Au Makoi na mulimuli i le fetu e saili Iesu. Afai latou te manaomia se faamanatu o le tala, tagai Mataio 2:1–12 po o le “Mataupu 7: O Le Au Makoi,” Tala o le Feagaiga Fou, 18, po o le vitio e o faatasi ai i luga o le LDS.org. Nana se ata o Iesu i le potu. Tusi se ata pe ‘oti se fetu pepa ma tuu maualuga i luga. Valaaulia ia tamaiti e faafoliga o le au makoi o loo ave ia meaalofa, ma taitai i latou faataamilo i le potu e sue Iesu. O a ni meaalofa e mafai ona tatou avatu ia Iesu i o tatou olaga i le taimi nei?

• Usu ni nai pese o le Kerisimasi ma tamaiti, e pei o le “Le Lalolagi ia Fiafia” ma le “Po Filemu” (Viiga, nu. 113,116) po o le “O Fetu na Pupula,” “I Se Fale o Manu,” ma le “Ia Filemu Pepe” (Tusipese a Tamaiti, 24, 26, 30).

Ioane 3:16

O Iesu Keriso ua mafai ai ona ou toe mau faatasi ma le Tama Faalelagi i se aso.

Pe o malamalama tamaiti o loo e faiaoga ai i le mafuaaga na afio mai ai Iesu Keriso i le lalolagi? Faaalu se taimi e mafaufau loloto ai i le mea na faia e le Faaola mo oe lava ia ma pe mafai faapefea ona e fesoasoani ia malamalama tamaiti i le mea sa Ia faia mo i latou.

Gaoioiga e Mafai Ona Fai

• Aumai se meaalofa ua afifi i le vasega faatasi ma se ata o Iesu Keriso i totonu. Tuu ai luga se igoa o le meaalofa ma tusia ai le “Ioane 3:16” i luga, ma ta’u i tamaiti o se faaiteite lea po o le a le meaalofa. Faitau faatasi ma tamaiti le Ioane 3:16 ma valaaulia i latou e mate mai po o le a le meaalofa ma tatala. Aisea na auina mai ai e le Atua Lona Alo?

• Filifili ata mai le Tusi Ata o le Talalelei (e pei o le nu. 1, 30, 35–66, 84) ia e faapupula mai ai nisi o auala na faamanuiaina ai e Iesu isi tagata a o soifua ai o Ia i le lalolagi. Tuu atu i tamaiti e uu i luga ia ata a o e faamatalaina le tala. Atonu e te manao e filifili ia ata e o faatasi ma upu i le “Na Ia Auina Mai Lona Alo” ma le “Tau Mai Tala Ia Iesu” (Tusipese a Tamaiti, 20, 36) ma tuu i tamaiti e uu i luga ia ata a o latou usuina nei pese.

• Valaaulia ia tamaiti e faasoa mai a latou tala e fiafia i ai e uiga ia Iesu. A uma ona faamatala mai tala taitasi, fesoasoani i tamaiti e faauma le fuaiupu lea: “Na afio mai Iesu Keriso i le lalolagi e .” Ona faaali lea o ata e fesootai i le taulaga togiola a le Faaola, maliu, ma le Toetu (tagai Tusi Ata o le Talalelei, nu. 56, 57, 58, 59) ma faamatala pupuu mai nei mea na tutupu. Tuu atu lau molimau na afio mai Iesu Keriso i le lalolagi e maliu mo i tatou ma ia toetu mai ina ia mafai ai ona tatou toe foi atu i le Tama Faalealgi:

  

  Ketesemane, saunia e J. Kirk Richards

Aoao atu Aoaoga Faavae

Tamaiti Matutua Atu

Mataio1:18–25; 2:1–12; Luka 1:26–38; 2:1–20

Na afio mai Iesu Keriso i le lalolagi o se pepe.

E mafai faapefea ona e fesoasoani i tamaiti e taulai atu ia Iesu Keriso i le Kerisimasi?

Gaoioiga e Mafai Ona Fai

• Valaaulia se tasi o tamaiti e faitau e uiga i mea na tutupu i le fanau mai o le Faaola i le Mataio 1:18–25; 2:1–12; Luka 1:26–38; 2:1–20. Fai i tamaiti e feauauai e tusi ia ata i le laupapa o mea o loo faamatala mai i mau. O a ni mea o loo aoao mai e nei tala e uiga ia Iesu Keriso?

• Faaali le vitio “Good Tidings of Great Joy: The Birth of Jesus Christ” (LDS.org). Fai i tamaiti e tusi i lalo soo se mea latou te faalogo i ai o le a fesoasoani ia i latou e taulai atu ai ia Iesu Keriso i le taimi o le Kerisimasi. A uma le vitio, valaaulia i latou e faasoa mai mea sa latou tusia.

• Valaaulia ia tamaiti e tusi ni fasipepa o mea e mafai ona latou fai e fesoasoani ai latou te taulai atu i le Faaola i le vaitau o le Kerisimasi. Tuu a latou pepa i taga po o nisi koneteina mo tamaiti e ave i le fale. O nisi manatu e ono aofia ai le faitau o tusiusiga paia, usuina o viiga o le Kerisimasi, ma le faia o taga faamaoni o le alofa.

• Usu pese o le Kerisimasi e uiga i le Faaola (tagai Tusipese a Tamaiti, 20-36; Viiga, nos. 113-123), ma valaaulia tamaiti e faasoa mai se laina po o se fuaiupu e fiafia iai mai i pese.

Ioane 3:16

O Iesu Keriso ua mafai ai ona ou toe mau faatasi ma le Tama Faalelagi i se aso.

E mafai faapefea ona e fesoaoani i tamaiti e toe iloilo mea sa latou aoaoina i lenei tausaga ma malamalama ai i le mafuaaga latou te manaomia ai Iesu Keriso i o latou olaga?

Gaoioiga e Mafai Ona Fai

• Faaigoa ni fasipepa se lua O ai Iesu Keriso? ma le Aisea na afio mai ai o Ia i le lalolagi? ma faapipii i puipui eseese o le potuaoga. Valaaulia ia tamaiti e faitau se tasi o mau nei: Mataio 16:15–16; Ioane 3:16; 1 Nifae 10:4; Mosaea 3:8; Alema 7:10–13; 3 Nifae 27:14–15. Fai i tamaiti e vaavaai mo tali i fesili e lua o i luga o puipui i mau sa latou faitauina. Valaaulia i latou e tusi a latou tali i ni fasipepa ma faapipii i le puipui i autafa o le fesili talafeagai. E mafai faapefea ona tatou faaalia lo tatou loto faafetai mo mea na faia e Iesu Keriso mo i tatou?

• Valaaulia ia tamaiti e lisi i le laupapa igoa uma po o suafa o Iesu e mafai ona latou mafaufauina (tagai Bible Dictionary, “Christ, names of”). O a mea o aoao mai ai i tatou i nei igoa e uiga i Lana misiona? Aisea tatou te manaomia ai Iesu Keriso i o tatou olaga? Ina ia fesoasoani e tali lenei fesili, faaali le vitio “Why We Need a Savior—A Christmas Message about Our Savior Jesus Christ” (LDS.org).

Fautuaina le Aoaoina i le Aiga

Fautuaina tamaiti e sue a itiiti o le tasi se auala e auauna atu ai i se isi tagata pe latalata atili atu ai ia Iesu Keriso i lenei Kerisimasi.

Faaleleia o Lo Tatou Aoao Atu

E fia faasoa mai e tamaiti mea ua latou aoaoina. E oo lava i tamaiti laiti e mafai ona faamalolosia tagata o o latou aiga. Fautuaina ia tamaiti e te faiaoga ai e faasoa i o latou aiga se mea sa latou aoaoina ile Peraimeri. (Tagai Aoao Atu i le Ala a le Faaola, 30