O Keriso o loo Talai Atu i le Lalolagi o Agaga, saunia e Robert T. Barrett

Novema 25–Tesema 1

1 ma le 2 Peteru

“Olioli ai ma le Fiafia e Le Matalatalaina ma le Tumu i le Mamalu”

A o e faitau i Tusi a Peteru, atonu e te maua ni uunaiga e faatino. Tusifaamaumau nei uunaiga ao e “maua pea i ai i le Agaga” (MFF 76:80) ina ia e maua lelei ai mea ua aoaoina ai oe.

Tusifaamaumau Lagona e Uunaia ai Oe

E lei leva ona mavae Lona Toetu, sa faia ai e le Faaola se valoaga lea atonu sa fai ma popolega ia Peteru. Sa fetalai o Ia, pe a toeaina Peteru, o le a aveina atu o ia “i mea e le loto [o ia] i ai ... , e faailoa atu ai le uiga o lona oti e vivii atu ai o ia i le Atua” (Ioane 21:18–19). Ina ua tusi e Peteru ana tusi, sa ia iloaina na latalata atu lenei valoiaina o le maliufasia: “E vave ona tuueseina o lo’u nei fale apitaga, faapei ona faailoa mai ia te au e lo tatou Alii o Iesu Keriso” (2 Peteru 1:14). O le mea e faanoanoa ai, o sauaga matuia faapea sa taatele mo le Au Paia i itumalo o Roma, o e na tusi atu i ai Peteru (tagai 1 Peteru 1:1). Ae ui i lea, o ana upu sa lei faatumulia i le mata’u po o le manatu o le a leaga mea uma. Nai lo o lena, sa ia aoao atu i le Au Paia ia “olioli,” e ui lava sa latou “faanoanoa ... i tofotofoga eseese.” Sa ia fautuaina i latou ia manatua “o le tofotofo foi o lo [latou] faatuatua” o le a taitai atu ai i le “viiga ma le mamalu ma le manuia pe a faaali mai Iesu Keriso” ma “i le faaolaina lea o [latou] agaga” (1 Peteru 1:6–7, 9). Atonu sa avea le faatuatua o Peteru ma faamafanafanaga ia i latou o le Au Paia anamua, e pei ona fai ma faamafanafanaga i le Au Paia i aso nei, o e foi o “tofusia ... faatasi i tiga o Keriso; ... ina ia fiafia [tatou] ma le olioli tele pe a faaalia mai lona mamalu” (1 Peteru 4:13).

Manatu mo Suesuega Faaletagata Lava Ia o Tusitusiga Paia

1 Peteru 1:3–9; 2:19–24; 3:14–17; 4:12–19

E mafai ona ou maua le olioli i taimi o tofotofoga ma mafatiaga.

O le vaaiga muamua i ai, atonu e foliga e ese lava ona sa faaaoga e Peteru upu e pei o le olioli, fiafia, mamalu, ma le olioli tele e faatatau i upu e masani ona tatou faatatauina i faafatiatamai: mamafatu, faaosoosoga, faanoanoa, tofotofoga mu, ma le puapuaga (tagai 1 Peteru 1:6; 2:19; 4:12–13). E tutusa lava le savali a Peteru i le Au Paia anamua ma le savali ua aoao mai e Peresitene Russell M. Nelson: “E mafai ona fiafia le Au Paia i lalo o tulaga uma lava. … Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ia te Ia ma ona o Ia. O Ia o le puna o le olioli uma” (“Olioli ma le Ola ai Faaleagaga,” Ensign po o le Liahona, Nov. 2016, 82).

A o e faitau i le 1 Peteru 1:3–9; 2:19–24; 3:14–17; 4:12–19, o le a le mea e tuuina atu ia te oe le faamoemoe e mafai ona e maua le olioli e ui lava i le totonugalemu o tulaga faigata?

1 Peteru 3:18–20; 4:1–6

O loo talai atu le talalelei i e ua maliliu ina ia mafai ai ona faamasinoina i latou ma le tonu.

E i ai le aso, o le a tutulai taitoatasi ai le tagata i le pa o le faamasinoga ma “tala atu le tala i le ua saunia e faamasino i e ola ma e ua oti” (1 Peteru 4:5). Atonu e tau mafaufau nisi [o tagata] pe mafai faapefea e le Atua ona faamasino tonu tagata uma ae e matuai eseese lava o latou avanoa e malamalama ma ola ai i le talalelei. Maitau le aoaoga faavae sa aoao atu e Peteru i le 1 Peteru 3:18–20; 4:6 e fesoasoani ai i le Au Paia i ona aso ia malamalama o le a tonu faamasinoga a le Atua. E faapefea ona faamalosia e nei fuaiupu lou faatuatua i le sa’o ma le fai mea tonu o le Atua?

Ina ia suesue atili i lenei aoaoga faavae, sailiili i le Mataupu Faavae ma Feagaiga 138, o se faaaliga na maua e Peresitene Iosefa F. Samita a o ia mafaufau loloto i tusitusiga nei a Peteru. O a faamanuiaga e oo mai ia i latou o e faia sauniga o le talalelei ia maua e tagata o o latou aiga o e ua maliliu ma o loo faatalitali pea mo nei sauniga?

Tagai foi “Papatisoga mo e ua Maliliu,” Gospel Topics, topics.lds.org.

2 Peteru 1:1–11

E ala i le mana o Iesu Keriso, e mafai ai ona ou atinaeina ou natura faalelagi.

Pe e te lagona ea, o le avea e faapei o Iesu Keriso ma le atinaeina o Ona uiga auaumama e le o se mea e mafai ona faia? Sa ofoina mai e Elder Robert D. Hales le manatu faamalosiau lenei e uiga i le auala e mafai ona tatou atinaeina ai uiga auaumama faaKeriso: “O uiga paia o le Faaola … ua lalagaina faatasi, e faaopoopo atu le tasi i le isi, lea e atiinae i totonu o i tatou i ni auala fesootai. I se isi faaupuga, e le mafai ona tatou mauaina se uiga faaKeriso se tasi e aunoa ma le mauaina foi ma le uunaiaina o isi. E pei ona amata ona malosi se tasi o uiga, e faapena foi le tele o isi” (“Avea o se Soo o lo Tatou Alii o Iesu Keriso,” Ensign po o le Liahona, Me 2017, 46).

O uiga auaumama taitasi faaKeriso tatou te atinaeina e fesoasoani tatou te lalagaina ai se ie lalaga faaleagaga o le avea ma soo.

Mafaufau e faitau faatasi le 2 Peteru 1:1–11 ma le savali a Elder Hales. O a ni mea ua e aoao mai nei Aposetolo e toalua e fesoasoani i au taumafaiga e avea atili e pei o Keriso?

Tagai foi 1 Peteru 4:8; David A. Bednar, “O Mea Silisili Ese ma le Taua,” Ensign po o le Liahona, Nov. 2017, 90–93.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

1 Peteru 2:5–10

A o outou faitauina nei fuaiupu ma lou aiga, mafaufau e faaaoga ni maa e fesoasoani ai i tagata o le aiga e vaai faalemafaufau i aoaoga a Peteru e faapea, o le Faaola o lo tatou “maa tulimanu aupitoaluga.” E faapefea ona tatou pei o “[maa ola]” e faaaoga e le Atua e fausia ai Lona malo? O le a le mea ua aoao mai ia Peteru e uiga i le Faaola ma la tatou matafaioi i Lona malo? O le a le savali a Peteru i lou aiga?

1 Peteru 3:8–17

E mafai faapefea ona tatou “saunia pea lava e tali atu” ia i latou e fesili mai e uiga i la tatou tapuaiga? Atonu o le a fiafia lou aiga e faatino faataitai tulaga pe a faapea e alu atu se tasi ia i latou ma se fesili e uiga i le talalelei.

1 Peteru 3:18–20; 4:6

O a ni mea e mafai ona tatou faia o se aiga e aoao ai e uiga i tuaa ua maliliu? Atonu pe a oo i le aso fanau o se tuaa ua maliu, e mafai ona e kukaina ai se meaai e sili ona fiafia i ai lou tuaa, faaali ni ata, pe faamatala ni tala mai le olaga o lou tuaa. Afai e mafai, e mafai foi ona e fuafua e faia sauniga mo lenei tuaa i le malumalu.

2 Peteru 1:16–21

I fuaiupu nei, sa faamanatu atu ai e Peteru i le Au Paia ia lona aafiaga i luga o le Mauga o Liua (tagai foi Mataio 17:1–9). O a ni mea e mafai ona tatou aoao mai nei fuaiupu e uiga i aoaoga a perofeta? (tagai foi MFF 1:38). O le a se mea e aumai ai ia i tatou le talitonuga mautinoa e mulimuli i le tatou perofeta soifua i aso nei?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

“Ia sauni i taimi uma.” O avanoa le sasalua e aoao atu ai i le fale e vave sau ma toe mou atu, o lea e taua tele le faaaoga o na avanoa pe a oo mai. E mafai faapefea ona e taumafai “ia sauni i taimi uma” e aoao tagata o lou aiga i upumoni o le talalelei ma faasoa atu “le faamoemoe o loo ia te outou” (1 Peteru 3:15) pe a oo mai taimi e aoao atu ai? (Tagai Aoao Atu i le Ala a le Faaola, 16.)

E ui ina sa fetaiai Peteru ma le tele o sauaga ma le tetee, ae sa tumau mausali pea o ia i lana molimau ia Keriso.