“9–15 Tesema. Faaaliga 1–11: ‘Ia ia... le Tamai Mamoe ... le Viiga, ma le Malosi, e Faavavau Faaavau Lava’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“9–15 Tesema. Faaaliga 1–11,” Sau, Mulimuli Mai ia te Au—Mo Tagata Taitoatasi ma Aiga: 2019
O le Leoleo Mamoe lelei, saunia e Del Parson
9–15 Tesema
Faaaliga 1–11
“Ia ia... le Tamai Mamoe ... le Viiga, ma le Malosi, e Faavavau Faaavau Lava”
Mafaufau e tusi i lalo ni au fesili o i ai e uiga i mea na e faitau ai i le Faaaliga. Ona e sailia lea o tali i au fesili pe talanoa foi i ai ma se tagata o le aiga po o totonu o vasega o le Ekalesia.
Tusifaamaumau Lagona e Uunaia ai Oe
Pe sa i ai se taimi sa faafaigata ai ia te oe ona faaali atu i isi ou lagona i le taimi o se aafiaga mamana faaleagaga? O le gagana i aso uma e mafai ona lagona ai le le atoatoa e faamatala ai ni lagona ma ni uunaiga faaleagaga. Atonu o le pogai lea sa faaaoga ai e Ioane le faafaailoga loloto ma vaaiga faafaatusa e faamatala ai lana faaaliga mamalu. Sa mafai lava ona ia faapea mai sa vaai ia Iesu Keriso, ae ina ia fesoasoani ia tatou malamalama i lana aafiaga, sa ia faamatalaina ai le Faaola e faaaoga ai upu e pei o nei: “o lona fofoga foi e pei o le mumu o le afi,” “ua alu atu foi ai lona fofoga o le pelu e faataumaai ona itu e maamaai lava,” ma le “o ona fofoga foi e pei o le pupula o le la ina o mu totoa” (Faaaliga 1:14–16). A o e faitau i le tusi o Faaaliga, taumafai ia e iloa savali sa manao Ioane e te aoaoina ma lagonaina, e tusa pe e te le iloa le uiga o loo i tua o faafaailoga uma. Aisea ua ia faatusaina ai aulotu o le Ekalesia i tuugalamepa, Satani i le tarako, ma Iesu Keriso i se tamai mamoe? Mulimuli ane, e te le tau malamalama i faafaatusa uma i le Faaaliga ia malamalama ai i ona autu taua, e aofia ai ona autu e sili ona lauiloa: O le a manumalo Iesu Keriso ma Ona soo i malo a tagata ma Satani.
Manatu mo Suesuega Faaletagata Lava Ia o Tusitusiga Paia
Faaaliga
E mafai faapefea ona ou malamalama i le tusi o Faaaliga?
O le tusi o Faaaliga e mafai ona faigata ona malamalama i ai, ae aua le lotovaivai. O le folafolaga a Ioane e mafai ona musuia ai oe ia taumafai pea: “Amuia i latou o e faitau, ma i latou o e faalogo ma malamalama i upu o lenei valoaga, ma taofi i na mea o loo tusia ai, aua ua latalata mai le afio mai o le Alii” (Faaliliuga Iosefa Samita, Faaaliga 1:3 [i le Faaopoopoga o le Tusi Paia], ua faaopoopo le faamamafa).
O fesili ma punaoa nei e mafai ona tuuina atu ai malamalamaaga loloto ma manino ao e suesue i le Faaaliga:
-
O ai Ioane? (Tagai 1 Nifae 14:18–27; Bible Dictionary, “John.”)
-
O faapefea ona faatulaga le tusi, ma o a nisi o autu e vaavaai i ai? (Tagai Bible Dictionary, “Revelation of John.”)
-
O a mea ua faatusa i ai faafaailoga i le Faaaliga? Tagai Mataupu Faavae ma Feagaiga 77; Tusi Lesona a le Tagata Aoga o le Feagaiga Fou [tusi lesona a le Ofisa o Aoga a le Ekalesia, 2014],525–68.)
Atonu foi o le a aoga le vaavaai mo malamalamaaga loloto ma manino i le Faaliliuga a Iosefa Samita o fuaitau eseese o le Faaaliga. (Tagai i vaefaamatalaga ma le faaopoopoga i le Tusi Paia.)
Faaaliga
O le faaaliga vaaia a Ioane ua aoao mai i le auala e laveai ai e le Tama Faalelagi Ana fanau.
A o amata ona e suesue i le tusi o Faaaliga, mafaufau pe o le a le sootaga o mea e te faitauina i mea ua e iloa e uiga i le fuafuaga a le Tama Faalelagi mo le togiolaina ma le faaeaga o Ana fanau. E mafai ona e amata i le toe faamanatuina o le vaaiga aoao o le ata o le faaolataga i le Tala’i La’u Talalelei (itulau 47–59). Ma, a o e faitau i le tala a Ioane e uiga i lana faaaliga vaaia, ia fesili ifo ia te oe lava i ni fesili e pei o nei: O a ni upumoni ua ou aoaoina mai le Faaaliga e uiga i mea ua faia e le Tama Faalelagi e fesoasoani ai ia ou toe foi atu ia te Ia? E mafai faapefea ona fesoasoani lenei mea ia ou malamalama ai i le fuafuaga a le Atua mo au?
Atonu e fesoasoani lou iloa i le tulaga lautele:
-
O le tele o le mataupu 12 e nafa ma mea e tutupu i le muai olaga (tagai foi “Premortality,” Gospel Topics, topics.lds.org).
-
O mataupu 6–11, 13–14, 16–19 o loo faamatala ai le olaga faitino ma mea e tutupu i le talafaasolopito o le lalolagi (tagai foi “Mortality,” Gospel Topics, topics.lds.org).
-
O mataupu 2–3, 15, 20–22 o loo faamatala ai le Faamasinoga Mulimuli ma le mamalu o loo faatalitali mai i e faamaoni i le malo e faavavau (tagai foi “Postmortality,” Gospel Topics, topics.lds.org).
E silafia patino au e lesu Keriso ma o le a fesoasoani ia te au e faatoilalo o’u luitau.
O fetalaiga a le Faaola i le Faaaliga 2–3 ua faaalia ai, e malamalama lelei o Ia i mea e manuia ai ma luitau e tulaga ese i lala taitasi o le Ekalesia i aso o Ioane. Sa ia faamautinoa atu i le Au Paia i nisi o aulotu, sa Ia silafia e uiga, faatasi ai ma isi mea, a latou “galuega,” “puapuaga,” “mativa,” ma le “alofa” (Faaaliga 2:2, 9, 19)—faatasi ai ma nisi o auala e mafai ona latou alualu ai i luma.
E mafai ona faamanatu atu e nei mataupu ia te oe, o loo malamalama le Faaola i ou malamalamaaga ma vaivaiga ma finagalo e fesoasoani ia e faatoilaloina ai ou luitau faalelalolagi. O le a le mea ua folafola mai e Iesu Keriso ia i latou o e manumalo? O a ni suiga ua e lagonaina le musuia ai o oe e fai e faatoilalo ai ou luitau?
E nao Iesu Keriso ua mafai ai le fuafuaga a le Tama Faalelagi.
E ui ina e le manatuaina, ae atonu sa e auai i mea na tutupu e pei ona faamatalaina e Ioane i le Faaaliga 5. A o e faitau e uiga i nei mea na tutupu, mafaufau pe sa faapei le taimi na tatou iloa uma o Iesu Keriso (o le ”tamai mamoe) o le a mafai ai le fuafuaga a le Tama Faalelagi (susue le tusi ma tatala faamaufaailoga e fitu). Aisea ua nao Iesu Keriso ai e mafai ona faia lenei mea?” E mafai faapefea ona e faaalia lou faatuatua ia te Ia e fai ma ou Faaola?
Tagai foi Iopu 38:4–7; “Atonement of Jesus Christ,” Gospel Topics, topics.lds.org.
O le Toefuataiga e muamua atu i le faatafunaga lea o le a tupu ao lei oo i le Afio Mai Faalua o Iesu Keriso.
Faaaliga 6–11 o loo faamatala ai mea o le a tutupu i le taimi le tumau o le i ai o le lalolagi (tagai MFF 77:6), e aofia ai le Toefuataiga o le talalelei i aso e gata ai (tagai Faaaliga 7). A o e faitau e uiga i mea na tutupu sa valoia e Ioane ma vaaia le faataunuuina o nisi o i latou, o le a se mea ua musuia oe e fai ia lelei atu e saunia ai oe lava ma lou aiga mo le Afio Mai Faalua?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Faafoliga e faapea ua talosagaina Ioane e tuuina atu se savali i lou aiga, e pei o savali sa ia tuuina atu i ekalesia i ona vaitaimi. O le a se mea o le a ia fai mai o loo sologa lelei? E faapefea ona e faaleleia?
Faaali atu le ata o le Faaola o loo tu’itu’i i le faitotoa (tagai i le ata o loo avatu faatasi ai i le otootoga lenei). Valaaulia lou aiga e faitau le Faaaliga 3:20 ma talanoa i fesili e pei o nei: Aisea e tu’itu’i ai Iesu ae le na o le alu lava i totonu? E mafai faapefea ona tatou valaaulia Ana faatosinaga i totonu o lo tatou fale?
O a mea o aoao mai e nei fuaiupu ia i tatou i le pogai tatou te laei papae ai mo sauniga o le malumalu?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Uunaia fesili. O fesili o se faailoaga ua saunia tagata o le aiga e aoao ma tuuina atu se malamalamaaga loloto ma manino i le ala o loo latou tali atu ai i mea ua aoaoina ai i latou. Aoao lou aiga i le auala e maua ai tali i tusitusiga paia. (Tagai Aoao Atu i le Ala a le Faaola, 25–26.)
Faataga o Ia i Totonu, by Greg K. Olsen