Ofusa o le malumalu

Vaaiga Aoao

“O tagata matutua o Le Ekalesia a Iesu Keriso o le Au Paia o Aso e Gata Ai o e e maua le faaeega paia e ulufale atu i ni folafolaga paia, ua ta’ua o feagaiga, e mulimuli ai i tulaga faatonuina maualuluga o le amio sa’o ma le tuuto i le Atua. O se vaega o le ulufale atu i nei feagaiga i le malumalu, e maua ai e tagata o le Ekalesia se laei faatauvaa e pito i totonu—e masani ona ta’ua o le “ofusa o le malumalu” po o le “ofu o le perisitua.” E le pei o isi laei o sauniga e faaaogaina i le taimi o le faaeega paia, o le ofusa e ofuina i totonu o laei masani o tagata mo le taimi atoa o totoe o o latou olaga, e avea o se faamanatu faaletino i aso uma o lo latou sootaga faalefeagaiga ma le Atua.

I aso anamua, na poloaiina ai e le Alii le perofeta o Mose ia faia ni laei faapitoa mo lona uso o Arona ma isi o e o le a tautūalo i le falefetafa’i: “E te faia foi ofu sa mo lou uso o Arona e mamalu a’i ma matagofie … ina ia fai o ia ma ositaulaga ia te a’u” (Esoto 28:2–3). O lenei mea na aofia ai laei sa mafai ona vaaia e se aumata’i ma laei e ofuina i totonu o nei laei pito i fafo.

I o tatou aso, o le ofusa e uunaia ai le tauagafau, ae o lona taua e sili atu le loloto. Mo tagata o le Ekalesia o e ua mauaina le faaeega paia, o le ofusa e faamanatu ai ia i latou lo latou sootaga i le Atua, lo latou tautinoga e mulimuli i Lona finagalo, ma faamanuiaga ma le puipuiga ua folafolaina mai e le Atua i e faamaoni. Ua ta’ua e le Au Peresitene Sili o le Ekalesia e faapea, o le ala e laeiina ai le ofusa “o se faailoaga vaaia lea o se tautinoga i le loto e mulimuli i le Faaola o Iesu Keriso” (tusi a le Au Peresitene Sili, 10 Oke. 1988).

O loo ai se vitio puupuu ua tuuina atu ai anotusi faaopoopo i ofusa o le malumalu ma laei o sauniga o le malumalu.

O aoaoga faaopoopo mai perofeta ma aposetolo o onaponei ua ta’ua ai ofusa o le malumalu e mafai ona tagai i ai i le ChurchofJesusChrist.org/temples/prophetic-teachings-on-temples.

Tusifaamaumau Ou Lagona Uunai