Malamalama i a Tatou Feagaiga ma le Atua

O Se Vaaiga Aoao i a Tatou Folafolaga E Sili ona Taua

“I le avea ai ma tagata o Le Ekalesia a Iesu Keriso o le Au Paia o Aso e Gata Ai,” na faamalamalama mai ai e Peresitene Thomas S. Monson, “e tatau lava ona faamamaluina feagaiga paia e i tatou, ma o le faamaoni i ai o se tulaga manaomia lea mo le fiafia. Ioe, ou te talanoa atu e uiga i le feagaiga o le papatisoga, le feagaiga o le perisitua, ma le feagaiga o le faaipoipoga o ni faataitaiga.”¹

I le Ekalesia, o se sauniga, o se faatinoga paia, ma le aloaia e faatinoina e ala i le pule o le perisitua. O nisi sauniga o le ute lea mo lo tatou faaolataga. Ina ia avea ai o se vaega o nei “sauniga faaola,” tatou te ulu atu ai i feagaiga paia ma le Atua.²

O se feagaiga o se folafolaga e valalua, o tuutuuga e faatulagaina e le Atua.³ A tatou ulu atu i se feagaiga ma le Atua, tatou te folafola atu e tausia na tuutuuga. E folafola mai e Ia ni faamanuiaga patino e fai ma taui.

O se feagaiga o se folafolaga e valalua. Ua folafola mai ia i tatou e le Atua ni faamanuiaga faapitoa mo lo tatou tausia o aiaiga na tatou taliaina ina ua osia le feagaiga.

A tatou mauaina nei sauniga faaola ma tausisia feagaiga e o faatasi ai, ona aoga lea o le Togiola a Iesu Keriso i o tatou olaga, ma mafai ai ona tatou maua o le faamanuiaga silisili e mafai ona tuuina mai e le Atua ia i tatou o le —ola faavavau lea (tagai MF&F 14:7).

Talu ai o le tausia o a tatou feagaiga o le ute lea i lo tatou fiafia i le taimi nei ma i’u ai ina maua le ola e faavavau, o lea e taua ai le malamalama i mea sa tatou folafola atu i lo tatou Tama Faalelagi. O se vaaiga aoao lenei o a tatou feagaiga tatou te faia e tusa ai ma sauniga faaola, ma fautuaga mo mea e mafai ona e aoao atili mai ai.

Papatisoga ma le Faamauga

O le papatisoga i le faatofuina i le vai, e faatinoina e se tasi ua i ai le pule, o le uluai sauniga faaola lea o le talalelei ma e tatau ai mo se tagata ina ia avea ai ma tagata O Le Ekalesia a Iesu Keriso o le Au Paia o Aso e Gata Ai. O lana sauniga soa e le mavavaeeseina mai le papatisoga, o le faamauga—o le faaee atu o lima mo le meaalofa a le Agaga Paia.

A papatisoina i tatou, ua tatou osi feagaiga e ave i o tatou luga le suafa o Iesu Keriso, ia manatua pea o Ia, ma tausi i Ana poloaiga. Tatou te folafola atu foi “e auauna atu ia te ia e oo i le iuga” (MF&F 20:37; tagai foi i le Mosaea 18:8–10).

O le taui, ua folafola mai e le Tama Faalelagi afai tatou te salamo i a tatou agasala, e mafai ona faamagaloina i tatou (tagai i le Alema 7:14) ma “ia maua pea Lona Agaga e faatasi ma i [tatou]” (MF&F 20:77), o se folafolaga ua mafai ona faataunuuina, e ala i le mauaina o le meaalofa o le Agaga Paia.

O sauniga o le papatisoga ma le faamauga o le faitotoa lea e ao ona ulufale atu ai i latou uma o e sailia le ola e faavavau (tagai i le Ioane 3:3–5). O le faamamaluina o a tatou feagaiga o le papatisoga e taitaiina atu ai, ma o se vaega taua o le osia o feagaiga e o faatasi ma isi sauniga faaola uma, i le ala o le ola e faavavau (tagai 2 Nifae 31:17–21).

Aoao Atili e uiga i le Papatisoga

Tagai i le Robert D. Hales, “O Le Feagaiga o le Papatisoga: O Le I Ai i le Malo mai ni ō le Malo,” Liahona, Ian. 2001, 6; Ensign, Nov. 2000, 6

O Le Faamanatuga

O i latou ua mauaina ia sauniga faaola o le papatisoga ma le faamauga, e aai ma feinu i le faamanatuga i vaiaso taitasi e faafou ai na feagaiga. A o aai ma feinu i le areto ma le vai, tatou te manatuaina le taulaga na faia e le Faaola mo i tatou. E le gata i lea, tatou te manatunatu loloto i feagaiga na tatou faia e tauave i o tatou luga le suafa o Iesu Keriso, ma manatua pea o Ia, ma tausi Ana poloaiga. O le taui, ua tuuina mai e le Atua le folafolaga o le a i ai pea Lona Agaga e faatasi ma i tatou (tagai i le MF&F 20:77, 79).

O le sauniga o le faamanatuga o se avanoa i vaiaso taitasi e toe faafou ai feagaiga paia lea e faataga ai i tatou e aai ma feinu i le togiola alofa a le Faaola faatasi ai ma le aafiaga faamamā faaleagaga lava lea e tasi o le papatisoga ma le faamauga.

Ua aoao mai foi taitai o le Ekalesia e faapea, afai tatou te aai ma feinu i le faamanatuga, e le gata ua tatou faafouina a tatou feagaiga o le paptisoga ae “o feagaiga uma na tatou ulu atu i ai ma le Alii.”⁴

Aoao Atili e uiga i le Faamanatuga

Tagai i le Dallin H. Oaks, “Sauniga Faamanatuga ma le Faamanatuga,” Liahona, Nov. 2008, 17–20.

O Le Tautoga ma le Feagaiga o le Perisitua

Na tuuina mai e le Tama Faalelagi Lana tautoga (faamaoniga) ina ia faaee atu ia faamanuiaga faapitoa i e umia le perisitua ma tausia ia feagaiga e o faatasi ma le mauaina o le perisitua.

A ola agavaa alii ia maua le Perisitua Arona ma le Mekisateko ma “[faalautele] o latou valaauga,” ua folafola mai e le Atua o le a “faapaiaina e le Alii i le faafouina o o latou tino.” E avea i latou ma tofi o folafolaga ia na faia ia Mose, Arona, ma Aperaamo. (Tagai MF&F 84:33–34.)

O le umia o le Perisitua Mekisateko e tatau ai mo alii e agavaa ai e ulu atu i le malumalu. O iina, e maua faatasi ai e alii ma tamaitai se atoaga o faamanuiaga o le perisitua i le faaipoipoga.

O le mauaina o sauniga faaola uma o le perisitua, e mafai ai e tagata uma ona maua folafolaga o “mea uma [ua] i ai i le Tama” (tagai MF&F 84:35–38).

“E tafe mai faamanuiaga silisili mai lenei tautoga ma le feagaiga i alii, tamaitai, ma fanau agavaa i le lalolagi atoa,” na aoao mai ai Elder Russell M. Nelson o le Korama a Aposetolo e Toasefululua.⁵

Aoao Atili e uiga i le Tautoga ma le Feagaiga o le Perisitua

Tagai i le Henry B. Eyring, “Faatuatua ma le Tautoga ma le Feagaiga o le Perisitua,” Liahona, Me 2008, 61.

O Le Faaeega Paia

O le faaeega paia i le malumalu o se meaalofa lea e tuuina mai ai se vaaiga mamao ma le mana.

O le taimi o le faaeega paia o le malumalu tatou te maua ai aoaoga ma osia ai feagaiga e faatatau i lo tatou faaeaga e faavavau. O sauniga o le mulumuluga ma le faauuina ma le faaofuina i ofusa o le malumalu e avea o se faamanatu o feagaiga paia, e o faatasi ma le faaeega paia.⁶ O sauniga ma feagaiga o le malumalu e matua paia lava ma ua le mafai ona faamatalaina auiliili i fafo atu o le malumalu. Ona o lena mea, ua fautua mai ai Peresitene Boyd K. Packer, Peresitene o le Korama a Aposetolo e Toasefululua, “E taua lou faalogo totoa a o faataunuuina nei sauniga ma ia outou taumafai e manatua ia faamanuiaga folafolaina ma tulaga o le a faataunuuina ai ia faamanuiaga.”⁷

Na aoao mai Elder Jeffrey R. Holland o le Korama a Aposetolo e Toasefululua e faapea, o le ki i le mauaina o le mana faalelagi e faatoilalo ai le fili ma tulei ai pea i luma le Ekalesia “o le feagaiga lea tatou te osia i le malumalu—o la tatou folafolaga e usitai ma ositaulaga, ia faapaia mo le Tama, ma Lana folafolaga e faamamanaina i tatou ‘i se faaeega maoae.’”⁸

E mafai ona e aoao atili e uiga i mataupu faavae e i tua atu o feagaiga ia tatou te osia i le faaeega paia e ala i le suesue i mea nei:

• “Usiusitai,” Mataupu Faavae o le Talalelei (2009), 221–226.

• M. Russell Ballard, “O Le Tulafono o le Taulaga,” Liahona, Mat. 2002, 10.

• I le “tulafono o [le] talalelei” (MF&F 104:18), tagai i le Mataupu Faavae ma Feagaiga 42.

• “O Le Tulafono o le Legavia,” Mataupu Faavae o le Talalelei (2009), 247–56.

• D. Todd Christofferson, “Toe Manatunatuga i se Olaga Faapaiaina,” Liahona, Nov. 2010, 16.

Aoao Atili e uiga i le Faaeega Paia

Tagai i le Saunia e Ulu Atu i le Malumalu Paia (2002), 28–35; David A. Bednar, “Taofia ma le Mamalu o se Igoa ma Tulaga,” Liahona, May 2009, 97.

O Le Faamauga

O le sauniga o le malumalu e faatatau i le “faaipoipoga faalemalumalu” po o le “ia faamauina” e fausia ai se sootaga e faavavau i le va o le tane ma le fafine e mafai ona oo i tala atu o le oti pe a faamaoni ulugalii. O sootaga foi a matua ma le atalii/afafine e mafai ona faaauau i tala atu o lenei olaga, ma faafesootai ai faatasi ia augatupulaga i sootaga faaleaiga e faavavau.

A ulu atu se tagata i le feagaiga o le faaipoipoga i le malumalu, na te osia feagaiga faatasi ma le Atua ma faatasi ai ma lona toalua. E folafola atu e ulugalii le faamaoni o le tasi i le isi ma le Atua. E folafola mai foi ia i latou le faaeaga ma e mafai ona faaauau pea a latou sootaga faaleaiga i le faavavau (tagai MF&F 132:19–20). O fanau e fananau mai i se ulugalii sa faamauina i le malumalu, po o fanau e faamauina mulimuli ane i o latou matua, e i ai le aia tatau e avea ai ma vaega o se aiga e faavavau.

E faapei foi o isi sauniga, o le faamaoni o tagata taitoatasi i a tatou feagaiga, e manaomia mo sauniga i le lalolagi ina ia faamaufaailogaina, ma ia taulia ai i le lagi, e le Agaga Paia o Folafolaga.⁹ O tagata e tausia a latou feagaiga—tusa lava pe le tausia e o latou taitoalua—e le aveesea o latou faamanuiaga na folafola atu i ai i le faamauga.

Aoao Atili e uiga i le Faamauga

Tagai i le Russell M. Nelson, “O Tupulaga e Sosoo i le Alofa,” Liahona, May 2010, 91.

Osia ma Tausia o Feagaiga Paia

A tatou ulu atu i nei feagaiga taua, e avea i tatou ma ē e mauaina faamanuiaga o le feagaiga fou ma le faavavau, “o le atoatoa lea o [le talalelei a Iesu Keriso]” (MF&F 66:2). O le feagaiga fou ma le faavavau o “le taunuuga atoa lea o feagaiga ma taumafaiga uma o le talalelei” sa tatou faia,¹⁰ ma o le taunuuga o faamanuiaga e aofia ai mea uma o loo i ai i le Tama, e aofia ai le ola e faavavau.

A o tatou taumafai ina ia malamalama ma tausi a tatou feagaiga, e tatau ona tatou manatua o le tausia o a tatou feagaiga e le na o le lisiina o mea e fai ae o se tautinoga ina ia avea faapei o le Faaola.

O le tausiaina o a tatou feagaiga o se tautinoga lea ia avea faapei o le Faaola.

“O le Faamasinoga Mulimuli ua le na o se iloiloga aofai o amioga lelei ma leaga [a se tagata]—o mea sa tatou faia,” na aoao mai ai Elder Dallin H. Oaks o le Korama a Aposetolo e Toasefululua. “O le faailoaina mai o aafiaga faaiu o a tatou amioga ma mafaufauga—o a tulaga ua tatou oo i ai. E le lava i soo se tasi le na o le faia o se mea ae le o alu i ai le mafaufau. O poloaiga, o sauniga, ma feagaiga o le talalelei e le o se lisi o ni teugatupue moomia e faia i se teugatupe faalelagi. O le talalelei a Iesu Keriso o se fuafuaga ua tau mai ai ia te i tatou le ala e avea ai i tatou ma e ua finagalo ai lo tatou Tama Faalelagi.”¹¹

Faamatalaga

1. Thomas S. Monson, “Fiafia—o le Sailiga Lautele,” Liahona, Mat. 1996, 5; Ensign, Oct. 1993, 4.

2. Tusitaulima 2: Taitaiina o le Ekalesia (2010), 20.1.

3. Tagai i le Russell M. Nelson, “Feagaiga,” Liahona ma le Ensign, Nov. 2011, 86.

4. Delbert L. Stapley, i le Conference Report, Oke. 1965, 14; tagai foi i le Teachings of Gordon B. Hinckley (1997), 561; The Teachings of Spencer W. Kimball, ed. Edward L. Kimball (1982), 220.

5. Russell M. Nelson, “Feagaiga,” Liahona ma le Ensign, Nov. 2011, 88.

6. Tagai i le Russell M. Nelson, “Ia Saunia mo Faamanuiaga o le Malumalu,” Liahona, ma le Ensign, Oct. 2010, 46.

7. Boyd K. Packer, “O Mai i le Malumalu,” Liahona, Oke. 2007, 16; Ensign, Oct. 2007, 20.

8. Jeffrey R. Holland, “Tausia o Feagaiga: O Se Savali mo i Latou O Le a Auauna Atu i se Misiona,” Liahona, Ian. 2012, 50. New Era, Jan. 2012, 4.

9. Tagai i le “Agaga Paia,” Faamaoni i le Faatuatua (2004), 7; tagai foi i le MF&F 132:7, 18–19, 26.

10. Iosefa Filitia Samita, Doctrines of Salvation, lo. Bruce R. McConkie, 3 volu. (1954–56), 1:156.

11. Dallin H. Oaks, “O Le Luitau ia Avea ma se Tasi,” Liahona, Ian. 2001, 40; Ensign, Nov. 2000, 32.

Taliina o Fesili

Atonu sa mafaufau se tasi sa e fesootai atu i ai faapea, “Aisea e le tatalaina ai malumalu i tagata lautele?” E le faaaogaina malumalu o le Au Paia o Aso e Gata Ai mo a tatou tapuaiga faalevaiaso i Aso Sa, lea e talia ai tagata uma e auai. O sauniga paia e faatinoina i totonu o malumalu, ma o lea ua tatalaina malumalu i na o tagata ua papatisoina o e ua faaagavaaina i latou lava ina ia maua na sauniga.

A maea ona fausia se malumalu fou, e mafai ona maimoaina e tagata lautele i le taimi o se fale tatala. A maea ona faapaiaina le malumalu i le Alii, e mafai e tagata lautele ona asiasi i lotoa, ae ua na o i latou e i ai se pepa faataga o le malumalu o loo aoga e tatala i ai le malumalu.

Mo nisi faamatalaga, tagai i “Malumalu” i lalo o Fesili e Masani ona Fesiligia i le Mormon.org.

Itu agavale: ata na pueina e Robert Casey; taumatau: ata na pueina e Dan Carter © IRI

Ata o mama na saunia e Robert Casey; ata o le Malumalu o San Diego Kalefonia na pueina e Steve Tregeagle