Ua Asiasia e Elder Oaks ia Iapani ina Ua Mavae le Tausaga e Tasi Talu le Mafuie

Na toeitiiti atoa le tasi tausaga talu ona mavae ia mafuie ma le galulolo na sosoo ai lea na faataumaoia ai Iapani, ae asia loa e Elder Dallin H. Oaks o le Korama a Aposetolo e Toasefululua ma Elder Donald L. Hallstrom o le Au Peresitene o Fitugafulu le atunuu ma tuuina atu se savali o le faamoemoe ma le alofa.

Mo le 12 aso ia Fepuari, na malaga ai Elder Oaks ma Elder Hallstrom ma o laua faletua o, Kristen Oaks ma Diane Hallstrom, i le Eria o Asia Matu, ma asia ia Kumamoto, Nagasaki, Sendai, ma Tokyo, faapea ma le tele o aai tu matafaga i le eria o Tohoku.

I se tusiga a le Church News, na faamatala ai e Elder Oaks se mafuaaga se tasi o le malaga: “Sa matou mananao e tuuina atu se faamafanafanaga ina ua mavae lea mala faigata ma le galulolo ua toeitiiti atoa le tausaga talu ona mavae atu ma ia tuuina atu ai foi le aoaoga ma le molimau lea tatou te tuuina atu pea e le aunoa pe a tatou feiloai ma faifeautalai faapea tagata o le Ekalesia.”

Sa feiloai atu Elder Oaks ma isi taitai o le Ekalesia i tagata o le Au Paia o Aso e Gata Ai, faifeautalai, faapea ma isi ma uunaia i latou ina ia “vaavaai atu i le auala o le a faapaiaina ai e le Alii o latou puapuaga mo lo latou manuia.”

Ina ia faitau e uiga i le auaunaga a isi taitai o le Ekalesia i le salafa o le lalolagi, e aofia ai Elder M. Russell Ballard i Pasila, Elder Jeffrey R. Holland i Aferika Sisifo, Elder David A. Bednar i le Atu Keripiane, Elder Quentin L. Cook i Ausetalia ma Niu Sila, Elder D. Todd Christofferson i Europa Tutotonu, ma Elder Neil L. Andersen i Pasila, asiasi i le news.lds.org ma le prophets.lds.org.

Na asiasia e Elder Dallin H. Oaks ma lona faletua o, Kristen, lē sa faamisiona i Sendai, ni tulaga ua faaleleia i Iapani talu le galulolo ma le mafuie faataumaoi ia Mati 2011.

Ata na pueina e Osamu Sekiguchi