Ua Talosagaina e le Ekalesia Ona Tagata ina ia Malamalama i Aiaiga Faavae o Talafaasolopito o Aiga
Ua talosagaina e taitai o le Ekalesia ia Au Paia o Aso e Gata Ai ina ia aoao ma malamalama atili i aiaiga faavae a le Ekalesia mo talafaasolopito o aiga i le auina atu o igoa mo sauniga o le malumalu.
O tuutuuga mo le faaaogaina o le uepisaite o le New.FamilySearch.org ua faatulagaina “mo mafuaaga o lagona tutusa, mafuaaga o aoaoga faavae, ma mafuaaga o le faaaloalogia,” na saunoa mai ai Dennis C. Brimhall, o le pule faatonu o le Matagaluega o Talafaasolopito o Aiga a le Ekalesia.
Ua faigofie ma tuusao atu ia tuutuuga. “E le tatau ona auina mai e tagata o loo faaaogaina le uepisaite ni igoa o ni tagata latou te le aiga mo ni sauniga sui o le malumalu, e aofia ai ni igoa o ni tagata lauiloa pe tautaua, pe mo i latou na aumaia mai ni galuega faatino o se talatuu e lei faamaonia,” na faailoa atu ai i tuutuuga lea e ao ona taliaina e tagata uma e faaaogaina le uepisaite i soo se taimi lava latou te saini ai e o ai i totonu o le saite.
O le toe faamamafaina atu o taiala, lea o loo ta’ua foi i le Tusitaulima 2, a le Ekalesia, na mulimuli atu i le le usitaia o aiaiga faavae o sui papatisoga a le Ekalesia talu ai nei.
“O se tasi o mea e tatau ona tatou manatuaina, o le sailia o o tatou aiga ma le sauniaina o igoa mo galuega e faia i totonu o le malumalu, ioe, e le gata o se tiutetauave, ae o se faamanuiaga foi,” o le tala lea a Brother Brimhall. “Ua faalautele atu lena faamanuiaga i tagata o loo umiaina ki o le galuega. O ki mo lenei galuega o loo umiaina e le Au Peresitene Sili o le Ekalesia.”
Ua talosagaina e taitai o le Ekalesia ia au paia o e o loo auina atu igoa o i latou ua maliliu mo sui papatisoga ina ia:
-
Galulue tau lava o gafa o o latou aiga.
-
Aua nei auina atu ni igoa o ni tagata lauiloa.
-
Aua nei auina atu ni igoa mai ni vaega e le’i faatagaina, e pei o ni tagata na aafia i le Fasiotiga Tele o Tagata Iutaia.
Na tuuina atu e taitai o le Ekalesia se faamatalaga i le aso 21 Fepuari, 2012, e tali ai i fesili e uiga i le le usitaia o aiaiga faavae a le Ekalesia, lea na faavaeina i le 1995 ina ua mavae ni feutagaiga ma taitai o le faatuatuaga o Tagata Iutaia.
Ua toe ta’u mai e le faamatalaga le tautinoga mausali a le Ekalesia ia aua nei taliaina ni igoa mai ni vaega e le’i faatagaina mo papatisoga sui ma ia matau, ina ia mafai ona sao atu i ia tulaga malupuipuia ua uma ona faatulagaina, o le a faaaogaina e le tagata o loo auina atu ia faamatalaga i se tulaga o le “le faamaoni ma le taufaasese.”
O ia ituaiga gaoioiga e mafai ona taitaiina atu ai e le gata i le aveesea le tumau o lona avanoa o se tagata o le Ekalesia e alu ai i totonu o le uepisaite o le New.FamilySearch.org, ae e ono faia ai e taitai i le lotoifale ni fono aoai i nisi o tulaga.
“E ese le faigata pe a solia ma le loto i ai e se tagata ia aiaiga faavae a le Ekalesia ma o se mea e tatau ona malamalama i ai o loo avea o se taulaga o le alofa ma le faaaloalo ae ua avea o se mafuaaga o le tetee,” na fai mai ai le faamatalaga.
“O le a tatou vaai i se vaitau o aoaoga,” o le tala lea a Brother Brimhall. “O le a tatou toe faamanatuina ia i tatou lava ia aia tatau ma tiutetauave ma ki ma faamanuiaga ma po o ai e ona lenei galuega ma le auala e tatau ona faia ai ma po o ai foi o loo taitaiina le galuega. A mafai ona tatou manatuaina lena mea, ou te manatu o le a lelei mea uma. … E mafai ona tatou faaleleia le polokalama mo tagata uma.”
Ua talosagaina e taitai o le Ekalesia ia au paia o e o loo auina atu ni igoa mo papatisoga mo e ua maliliu ina ia galulue i gafa o o latou lava aiga, ae aua nei auina atu ni igoa o ni tagata lauiloa, ma aua nei auina atu ni igoa mai ni vaega e le’i faatagaina, e pei o le Fasiotiga Tele o Tagata Iutaia.