Tatou te Talanoa ia Keriso
O Se Vaitafe o le Filemu
E ui i lo’u faavauvau, ae sa ou agai pea i luma ma faamalosi i le faatuatua ma le faamoemoe i le Tama Faalelagi ma Iesu Keriso.
O le aso na oti ai lo ma atalii ulumatua i se faalavelave faafuasei, na tatalaina ai e le oti se manu’a tuga i lo’u agaga. Ae sa ou iloa na mafai ona ou faamoemoe atu i le mana togiola o le Faaola e fesoasoani e tauave la’u avega mamafa o le faanoanoa ma le tiga. Sa ma talosaga ma lo’u toalua i o matou faiaoga o aiga e fai ni o ma’ua faamanuiaga taitoatasi. Sa ma iloa o le a oo mai le malosi e sili atu nai lo o ma’ua lava malosi. Sa folafola mai e le Faaola e Na te le tuua i tatou o matuaoti (tagai i le Ioane 14:18). Sa ou taofimau i lena folafolaga ma molimau atu sa Ia faia lava faapea.
Sa aoao mai e Isaia e faapea, o le Faaola “o le tagata faanoanoa, ua masani foi ma le tiga” (Isaia 53:3). Afai e i ai se tasi e mafai ona fesoasoani ia i tatou, ou te iloa e mafai e Ia, i se tulaga patino lava. Ae ou te iloa foi afai Na te aveesea faafuasei mai ia i tatou o tatou faanoanoaga, o le a leai se tuputupu ae, leai sina iota o le malamalama.
E ui i le lototiga, ae sa ou aafia i se lagona o le filemu lea e oo mai mai le Faaola (tagai i le 1 Nifae 20:18). Ae maise lava o taimi, aso, po o vaiaso faigata foi, na aveesea ai e Lona toafilemu o’u faanoanoaga. Ua na o lo’u aioi atu lava i ai. E le finagalo le Tama Faalelagi tatou te ola na o i tatou i lenei olaga faitino.
Ao ou tomanatu i le faalavelave na aveesea ai le ola o la’u tama, ou te manatua ai se tala i le Feagaiga Tuai:
“Ua mafai e lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule, le tupu.
“A e peitai, a le o lea, ia e silafia e oe le tupu e, matou te le auauna i ou atua” (Tanielu 3:17–18; faaopoopo le faamamafa).
O le vaega taua o le “A e peitai, a le o lea.” E tatau ona tatou faamaoni pea e tusa lava po o le a le mea e tupu. Na mafai lava ona auina mai e le Tama Faalelagi ni agelu e aveesea mai la’u tama mai le ala o le faalavelave, peitai Na te lei faia. Na te silafia le mea e faapaiaina ai i tatou ina ia mafai ona tatou saunia e toe foi atu ia te Ia. O le a LELEI mea uma. Peitai e le faapea o le a tatou le toe faavauvau ai pe toe fetagisi. O lo tatou faavauvau o se taunuuga lea o lo tatou alofa, ae e le tatau ona atuatuvale o tatou loto.
O le meaalofa sili e mafai ona tatou avatu ia i latou o loo i itu uma o le veli o le agai lea i luma ma le malosi e ala i le faatuatua ma le faamoemoe i le Tama Faalelagi ma Iesu Keriso, e tusa lava pe o loo faia a tatou laa taitasi ma loimata o loo tafe mai o tatou mata. Aua ua folafola mai ia i tatou e faapea “ua leai se manumalo i le tuugamau, ma ua tofatumoanaina ia Keriso, le tui o le oti” (Mosaea 16:8). O le a i ai se aso “o le a soloiesea foi e le Alii o Ieova o loimata i mata uma lava” (Isaia 25:8).
Atapue © Getty Images