Nai Otootoga o le Lalolagi

Ua Valaaulia e le Polokalama o le toe Faaleleia o Olaga mai Mea ua Fai ma Vaisu ni Tala mai le Toe Faaleleia o Olaga ma le Faamalologa

I se tapenapenaga mo se uepisaite mo le Polokalama o le Toe Faaleleia o Olaga mai Mea ua Fai ma Vaisu (PFO) lea ua faatulaga e faalauiloa mai i le faaiuga o lenei tausaga, o loo sailia ai e le Ekalesia ni tala patino e faatatau i le faamalologa mai mea ua fai ma vaisu.

O i latou o e fuafua e faasoa mai a latou tala e tatau ona i-meli mai i le [e-mail] ma ia aofia ai ia faamatalaga nei, lea o le a le faalauaiteleina:

• Igoa atoa, tausaga o le matua, ma le itupa

• O se ata o oe lava ia (e lelei pe a maua ae le o se tulaga manaomia)

• O lou sootaga ma le Ekalesia/tulaga o le auai

• O se faamatalaga puupuu e uiga i mea ua fai ma au vaisu po o mea ua fai ma vaisu a se e pele ia te oe

• O se faailoaga o lou naunautai e faasoa mai lau tala e ala i se vitio, otio, mea tusitusia, po o mea uma na.

• O lau tala. Ia faaaofia ai taunuuga o mea sa fai ma vaisu (faamolemole aua nei e faasoaina mai ni faamatalaga auiliili le talafeagai, ae ia talanoa mai e uiga i aafiaga ua e oo i ai faapea foi ma i latou o loo siomia ai oe ona o se amioga ua fai ma vaisu); o se faamatalaga puupuu i lou olaga ina ua e iloa ua e manaomia se fesoasoani; o se faamatalaga i le auala na e maua ai le faamalologa e ala ia Keriso ma mea na e oo i ai ina ua toe maua lou faamoemoe; faapea ai ma se faamatalaga e uiga i lou olaga o i ai nei ma ni lesona ma ni faamanuiaga na e aafia ai e ala i le faamagaloga, salamo, ma le auaunaga.

Ua Saunia e Tagata o le Ekalesia i Fiti se Fesoasoani Agaalofa i Tagata na aafia i Lologa

Sa faia ia Fepuari, e ni siteki se tolu i Suva, Fiti se polokalama e ao mai meaai, mea e faaaoga i fale, ma sapalai o mea aoga mo tagata na aafia i lologa i matu ma sisifo o Fiti.

Sa lavea Fiti i ni timuga mamafa ma faifai pea i le amataga o le tausaga, ma mafua ai lologa ma soloia ai ni vaega o le laueleele i eria i sisifo ma matu. O lologa na mafua ai le maliliu o le toatele o tagata ma faamalosia ai le faitau afe o tagata e o ese faavave mai o latou fale.

A o faateleina ia lologa i vaega i sisifo ma matu o Fiti, sa vave ona tatalaina e taitai o le Ekalesia i le lotoifale ia falelotu e avea o ni nofoaga autu mo tagata na sulufai atu ona ua aafia o latou fale i lologa.

Sa amatalia e Elder Taniela Wakolo, o le Fitugafulu Eria ma o le pule o le Ofisa Autu mo Auaunaga a le Ekalesia i Fiti, lea uunaiga i le aso 6 o Fepuari, ina ua faatoa mavae le lapataia o taitai o le Ekalesia e uiga i lologa. Sa aoina mai ma faatulagaina e tagata o le ekalesia ia meaai, lavalava, ie moega ma taga aluga, mea e faaaoga i umukuka, ma sapalai o mea aoga; ona tuuina atu lea o nei mea i tagata sa manaomia.

Ina ia faitau atili i nei tala ma isi tala, asiasi ane i le news.lds.org.

I se tapenapenaga mo se uepisaite fou, ua sailia e i latou o e taitaia le Polokalama o le Toe Faaleleia o Olaga mai Mea ua Fai ma Vaisu (o loo faaalia se fonotaga iinei) ni tala patino e faatatau i le faamalologa mai mea ua fai ma vaisu.

Ata na pueina e Rick Wallace