Faaalia o le avea o i Tatou ma Soo e ala i le Alofa ma le Auauna Atu

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua, Aiga, Toomaga

I le taimi o Lona soifuaga faaletino, na faaalia e Iesu Keriso Lona alofa i isi e ala i le auauna atu ia i latou. Sa Ia fetalai, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35). Sa Na faatuina se faataitaiga ma e finagalo ina ia tatou “fesoasoani atu i e manaomia la [tatou] fesoasoani” (Mosaea 4:16). Na ia valaauina Ona soo latou te galulue faatasi ma Ia i Lana galuega, ma tuuina atu ia i latou le avanoa e auauna atu ai i isi ma ia avea atili e faapei o Ia.¹

O a tatou auaunaga o ni faiaoga asiasi o le a foligatutusa ma le galuega a lo tatou Faaola pe a tatou faaalia lo tatou alolofa ia i latou tatou te asia e ala i le faia o mea nei:²

Manatua o latou igoa ma igoa o tagata o o latou aiga ma faamasani ia i latou.
Alolofa ia i latou e aunoa ma le faamasinoina o i latou.
Tausia i latou ma faamalolosia lo latou faatuatua “taitoatasi,” faapei ona faia e le Faaola (3 Nifae 11:15).
Fausia ni faigauo faamaoni ma i latou ma asiasi ia i latou i o latou fale ma isi nofoaga.
Mafaufau i tuafafine taitasi. Manatua aso fanau, faauuga, faaipoipoga, papatisoga, po o nisi taimi e taua ia te ia.
Aapa atu i se tagata fou ma uso ua le toaaga mai.
Aapa atu i se ua tuua toatasi po o i latou e manaomia se faamafanafanaga.

Mai Tusitusiga Paia

3 Nifae 11; Moronae 6:4; Mataupu Faavae ma Feagaiga 20:47

Mai lo Tatou Talafaasolopito

“O loo aofia i le Feagaiga Fou ni tala o ni tamaitai, e i ai igoa pe le o ta’ua foi, o e sa faatinoina le faatuatua ia Iesu Keriso. … Na avea nei tamaitai ma soo iloga. … Sa [latou] malaga ma Iesu ma Ana Aposetolo e Toasefululua. Sa latou foaia a latou meatotino e fesoasoani ai i Lana galuega. Ina ua mavae Lona maliu ma le Toetu, sa faaauau pea ona avea i [latou] ma soo faamaoni.”³

Na tusi foi Paulo e uiga i se tamaitai e igoa ia Fipe, o lē sa avea “o se auauna i le ekalesia” (Roma 16:1). Sa ia talosagaina ia tagata ina ia “fesoasoani ia te ia i se mea a outou e aoga ia te ia: aua foi ua toatele ua ia fesoasoani i ai” (Roma 16:2). “O le ituaiga o auaunaga na tuuina atu e Fipe ma isi tamaitai maoae o le Feagaiga Fou, o loo faaauau pea i le taimi nei e taitai o le Aualofa—faiaoga asiasi, tina, ma isi—o e ua avea ma fesoasoani, po o lagolago, i le toatele.”⁴