Mana i le Tatalo
Ua faamatala mai e le autalavou mai le motu o Cebu i le Atu Filipaina le mauaina o tali i a latou tatalo.
Mai le faitau fia sefulu afe o motu i le lalolagi, o se tuufaatasiga o le 7,107 o i latou ua maua ai le malo o le atumotu o Filipaina i Sautesasae o Asia. O se talasua masani ua taatele i le Atu Filipaina ua matau ai e faapea, e ui e 7,107 motu, ae e gata ai lava i le taimi e pe ai le tai. O le aofaiga o motu e pau i le 7,100 i le sua o le tai, pe a lilofia isi i lalo i le taele o le vasa. E faapefea la ona tuu e alii ma tamaitai talavou o le Atu Filipaina o latou ulu i luga ae o le vai pe a latou lagonaina le lofituina? Latou te liliu atu i le Tama Faalelagi i le tatalo.
E i ai taimi i o tatou olaga tatou te lagonaina ai le tuuatoatasi, ae afai tatou te manatuaina o loo i ai pea iina lo tatou Tama Faalelagi mo i tatou—o loo sauni i taimi uma e faafofoga ma tali a tatou tatalo—e mafai ona tatou faalagolago i lena mea moni, ma lagona ai le faamoemoe ma le talitonuga e aumai e lena malamalama.
E Aumai e le Tatalo le Talitonuga
Ua faamatala mai e Joselito B. le tofiaina o ia e auai i se tauvaga faamatalagā tala ina ua 12 ona tausaga. Sa talosagaina o ia e le faiaoga e tauloto se tala e 10 itulau lea o le a ia faatinoina i luma o le fia selau o isi tamaiti aoga ma faiaoga. E mafai ona avea lenei mea ma se galuega taufaafefe mo soo se tasi, aemaise lava mo Joselito, o lē e masani lava ona fefe i luga o le tulaga.
“O le mea muamua lava la sa ou faia o le tatalo ma ole atu mo le taitaiga,” sa fai mai ai Joselito. “I la’u tatalo sa ou ole atu ai afai e galo ia te au se vaega o le tala, ia mafai ona ou faaauau pea ma fai ni laina fou o le a fetaui mo la’u tala. Ina ua uma ona ou tatalo, sa ou manatuaina la’u mau ou te fiafia lava i ai mai le Tusi Paia i le Feagaiga Tuai. O loo i le Faataoto 3:6, lea o loo faapea mai, ‘Ia e manatua o ia i ou ala uma, ona faatonuina ai lea e ia lava ou ala.’”
Sa popole lava Joselito. Ae sa ia galue malosi i le vaiaso atoa e tauloto le tala. Ma sa ia tatalo tele i aso uma. Mulimuli ane na oo mai le aso o le tauvaga.
I le taimi o le faafeiloaiga e tatala ai le tauvaga, sa matua popole pea ia Joselito. “Ae i le taimi o le tala sa ou to’a,” na ia fai mai ai. “Sa ou faia le mea sili na ou mafai, ma sa ou iloaina e fesoasoani mai le Atua ia te au. Sa ou lotovaivai ma fefe ona sa toatele naua tamaiti aoga, ae sa tali mai le Atua i a’u tatalo.”
Sa le gata ina manatua e Joselito tusiga o lana tala, ae sa matua lelei foi lona faatinoina lea na ia maua ai le tulaga muamua i le tauvaga. Sa fai mai Joselito, “O le tatalo o le tali lea pe a leai se tasi i ou talaane e faamafanafana ia te oe. O loo i ai pea le Atua iina e fesoasoani ia te oe.”
E Aumai e le Tatalo le Malosi
A o avea ai ma se taulealea i le tuputupu ae i se aiga o le Au Paia o Aso e Gata Ai, sa le i tele lava se faafitauli o Teni G. i le tausiaina o ona tulaga maualuluga faatonuina. Ae ina ua amata lana aoga maualuga, sa amata ona faigata tulaga, ma o nisi taimi sa lagona ai e Teni le mamao ese mai le faatosinaga lelei a lona aiga—aemaise lava i le aoga.
“Sa matou vavalalata moni lava ma au uo o le aoga maualuga e ui lava e le o i latou o ni tagata o le Ekalesia,” sa fai mai ai Teni. “Sa i ai pea sa matou sootaga malosi. O le faafitauli ua amata ona latou faia ni mea e le o mulimulitaia ai tulaga faatonuina o la tatou Ekalesia.”
E leai lava se faafitauli ia Teni o le filifiliina o le mea sa’o i le fale, ae na ia fai mai a oo atu i le aoga ma ua le o toe i ai sona aiga i ona autafa e fesoasoani e taiala o ia, ona amata lea ona ia faia ni filifiliga sese. “Ou te tautino sa ou faia ni mea e le i ogatusa ma tulaga faatonuina o le Ekalesia, o lea sa ou lagonaina ai lava i le seminare e pei o au le tagata lea e talanoaina i le lesona.”
O iina sa iloa ai e Teni ua ia manao e faia se suiga, ae sa le lava lona lagonaina o le malosi e faia ai na o ia lava. “O lea sa ou faia ai se tonu e tatalo i le Atua, e aumai ia te au le malosi ma le lototele e fai atu ai leai i au uo pe a latou faia ni mea leaga,” sa ia faamatala mai ai. “Ma sa ou lagonaina na tali mai le Atua i au tatalo. Sa oo ina faigofie atu mo au ona fai atu leai i soo se taimi e fai mai ai au uo e fai se mea sese pe faaosooso foi au. Sa i ai lava ia te au le malamalama ma iloa le mea sa’o mai le mea sese. Ae, na auala mai i le tatalo, sa ou lagona ai ua ou maua le mana ma le meaalofa e fai atu ai leai, ma faia le mea sa sa’o.”
Sa fai mai Teni o le mea sili ona taua na ia aoaoina mai lenei aafiaga o le “tatalo o se faailoga o lou lotomaualalo, ona e te tautino ia te oe lava ia ua e vaivai ma ua na o le Atua lava e mafai ona fesoasoani ia te oe e toe malosi ai” (tagai i le MF&F 112:10).
E Aumai e le Tatalo ia Faamanuiaga
O nisi taimi tatou te manaomia ai e sili atu nai lo le mafanafana po o le malosi lava ia; o nisi taimi o faamanuiaga tatou te manaomia e sili ona faaletino. Sa manatua e Tania D. se taimi faapena. Sa feagai lona aiga ma se taimi sa tofotofoina faapitoa ai lava i tulaga tau tupe. “O se afiafi o se Aso Toonai, sa na o le 40 peso [pe tusa e $1 Amerika] sa totoe ia i matou mo le vaiaso, ma sa leai se matou meaai o le afiafi e oo lava i malala mo le ogaumu i le fale,” sa fai mai ai Tania. “Sa tuu mai e lou tina ia te au se lisi o mea uma sa matou manaomiaina, ma sa matou manaomia ai se 250 peso e faatau ai ia mea uma. O le mea muamua lava sa manaomia ona matou faatauina o le malala ina ia mafai ona kuka ai le meaai o le afiafi.” Sa mafai ona iloa e Tania e le o lava se tupe mo mea uma lava. Ona ia iloa lea e leai foi se tupe mo le pasese o le pasi e o ai i le lotu i le aso e sosoo ai. “Sa ou tau atu i lou tina e le o lava se tupe mo le pasese e o ai i le lotu. Ae o lou tina e matua faatuatua lava, ma sa na ona ia fai mai ia te au ‘o le a saunia e le Atua.’
“A o ou alu atu i le faleoloa sa ou tagi ona e le o lava se matou tupe mo mea uma, ma sa ou le iloa le mea e fai,” sa fai mai ai Tania. A o ia taaiina le tasi o tupe pepa 20 peso ma tuu i totonu o lana taga, sa ia faia na o le mea sa ia mafaufau e fai o le a fesoasoani ai—sa ia faia se tatalo. “Sa ou tatalo i le Tama Faalelagi ina ia mafai ona maua se auala e faafetaia’ia ai o matou manaoga.”
Ae ina ua ia taunuu atu i le faleoloa muamua, sa ia iloa ai ua sii i luga le tau o le malala mai le 5 peso i le 20 peso. “Sa ou tau musu e faatau,” sa fai mai ai Tania, “ae sa mafai ona ou lagonaina le musumusuga a le Agaga Paia ia faatau, o lea sa ou faataua ai. O lea la ua totoe nei na o le 20 peso, ae e tele lava mea ia e tatau ona ou faataua, e aofia ai ma napekini mo lo’u tuagane ma ni vaiinu mama. O lea na ou alu ai i le faleoloa na sosoo ai e faatau mai se matou meaai, ma sa taugata tele. Sa ou tago atu i lau taga lea sa ou tuu i ai le 20 peso, ma o loo i ai ni tupe pepa tai 20 peso se lima i le taaiga. Sa amata ona ou tagi i luma o le pule o le faleoloa.
“I le faaiuga sa mafai ona ou faataua mea uma sa matou manaomiaina,” sa fai mai ai Tania, “ma sa lava foi mo le pasese e o ai i le lotu i le aso na sosoo ai. Ina ua ou taunuu i le fale, sa ou alu i lou potu ma fai ai se tatalo i le Atua, e faafetai ai ia te Ia mo le faamanuiaga sa Ia tuuina mai ia te i matou. Ou te iloa o loo soifua moni lava le Atua ma tali mai i a tatou tatalo, aemaise lava i na taimi e sili ona tatou manaomiaina ai o Ia, ma tatou tuuina atu ai se tatalo faamaoni. O le a Ia tali moni mai lava i lena tatalo.”
O Le Tatalo e Faatumauina ai Lo Tatou Vavalalata ma Lo Tatou Tama Faalelagi
E ui tatou te mautinoa e faafofoga mai lo tatou Tama Faalelagi ma tali mai i a tatou tatalo, ae e manaomia ona tatou manatuaina e le faapea e vave ona taliina a tatou tatalo i taimi uma, ma e le o taimi uma foi e taliina ai i auala tatou te mananao ai. E taliina a tatou tatalo e tusa ai ma le finagalo ma le taimi a le Atua.
O talavou taitasi nei mai le motu o Cebu i Filipaina ua aoaoina e faapea, i taimi lelei ma leaga, pe a e i ai i se potopotoga o tagata pe na o oe, po o le sua o le tai pe pe foi, o loo i ai pea lo tatou Tama Faalelagi mo i tatou iina. Ma afai tatou te liliu atu ia te Ia i le tatalo faamaoni, o loo saunia pea o Ia e faamanuia i tatou.
Mai le agavale: Joselito, Joahnna, Rosa, ma Teni o loo potopoto i luma o le Malumalu o le Aai o Cebu Filipaina.
Agavale: Ata na pueina e Edwin Redrino; taumatau: Ata na pueina e le © iStockphoto.com/Hector Joseph Lumang