Mai le Misiona
O Se Folafolaga ma se Tatalo
Ua i ai i le Tusi a Mamona le mana e fesoasoani ai i soo se tasi e manao e iloa lona moni.
O le mea ou te maofa ai e uiga i le Tusi a Mamona, o le suiga sili ma le faavavau lea e tupu i totonu o tagata e tusa pe a o le i avea i latou ma tagata o le Ekalesia. I le avea ai ma se faifeautalai i le Misiona a Mekisiko Cuernavaca, sa ou muai iloaina e au lava ia lenei suiga maoae.
Ina ua ono masina o ou i ai i la’u misiona, sa faasino mai ai e se tagata o le paranesi ia i maua ma lau soa se tamaitai e 20 tausaga le matua ma lona aiga ina ia aoaoina. Sa le i malamalama le tamaitai talavou lea i mea e talitonu i ai le Au Paia o Aso e Gata Ai ma fesili mai le tele o fesili. I le iloaina ai e tali e le Tusi a Mamona ia fesili o le agaga, sa ma tuu atu ai ia te ia le tusi ma faasoa i ai le folafolaga o loo i ai e uiga i le tatalo ma le faamaoni ia iloa ai pe moni.
E tolu vaiaso o auai o ia i le lotu, ma sa faaauau pea ona matou feiloai ma ia. Ma te lei iloaina ua maea ona ia laasia se laasaga taua: Sa ia tatalo e uiga i le Tusi a Mamona. I le taimi o se tasi o lesona patino, sa ia tau mai ai ia i maua lona aafiaga. Sa tele ona ia mafaufau i lesona sa ma faasoaina atu, ma sa ia manao ai e tatalo na o ia lava. Sa ia tootuli ma ole atu i le Atua pe moni le Tusi a Mamona. O le filemu sa ia lagonaina ina ua maea le tatalo sa uunaia ai o ia e faitau atili i le tusi. A o ia faitauina, sa ia lagonaina le Agaga o liligi ifo ia te ia.
I le toe manatuaina ai o lona aafiaga, sa ia tau mai ai ia i maua, “sa ou lagonaina ua sili atu ona faapitoa au nai lo se isi lava taimi muamua. Sa amata ona faatumuina avanoa uma sa gaogao na i ai i lou olaga, lea e leai ma se mea e mafai ona faatumuina ai. Sa matua ou lagonaina le fiafia lea na amata ai ona ou tagi. Sa ou le talitonu i le mea ua ou lagonaina, ae sa ou iloa ua tali mai lou Tama Faalelagi ia te au, Na te silafiaina au, ma ua lava Lona alofa ia te au e faafofoga mai ai ia te au ma tali mai lau tatalo.”
Sa ou matua lagonaina le olioli tele i lou loto ina ua ia faamatala mai lona aafiaga. Na ou iloa sa ou i ai i se nofoaga paia i lena taimi. Sa faamautu mai e le Agaga Paia ia te au e moni lava ana upu. Mai lana molimau sa faamanatu mai ai ia te au le alofa tele o lo tatou Tama Faalelagi mo i tatou; e alofa tele o Ia ia i tatou na Ia aumaia ai le Tusi a Mamona e fai ma meafaigaluega e iloa ai o Ia ma Lana upumoni. A tatou usiusitai i mataupu faavae o loo maua i totonu o le Tusi a Mamona, o le a suia o tatou olaga.
Ou te manatua pea le auala na faaiuina ai lena lesona. Sa fesili mai le tuafafine ia i maua, “O le a le mea e tupu nei ona o lea ua ou iloa e moni le Tusi a Mamona?”
“Ia papatiso loa,” na ma tali atu ai.
Sa faigofie lana tali mai ae na atagia mai ai le mautu ma le tuusao o lana molimau: “O le a ou papatiso la.”
Ua i ai i le Tusi a Mamona le mana e fesoasoani ai ia i tatou e saili le fiafia ma le filemu. Pe a tatou faitauina, o le a tatou atiae ai se naunautaiga mautu e ola i le talalelei a Iesu Keriso, e pei lava ona naunau lenei tuafafine e mulimuli i le faataitaiga a le Faaola i le vai o le papatisoga.
Ata na tusia e Kathleen Peterson