O Le Mana o le Perisitua

Peresitene Thomas S. Monson, “Naunau ma Agavaa e Auauna Atu,” Liahona, Me 2012, 67, 68.

I le taimi o le Taua Lona Lua a le Lalolagi, i le amataga o le 1944, sa tulai mai se aafiaga sa aofia ai le perisitua [ma] sa faamatalaina e se tusitala—e le o se tagata o le Ekalesia—sa faigaluega i se nusipepa i Hawaii. … O la’ua ma lana soa sa i ai i le galufati lona lua i tua atu o le marini i le Motu Amu o Kaualeni. A o la pasi atu, sa la vaaia se marini talavou o tafetafea i le sami e u i lalo foliga, e manino lava sa matua manu’a. Sa mumu le sami papa’u sa siomia ai o ia, i lona toto. Ona la matauina lea o se isi marini o agai atu i lana uo lea e manu’a. Sa manu’a foi le marini lona lua, ma lona lima tauagavale ua le aoga sa tautau ifo i lona itu. Sa ia si’i a’e i luga le ulu o le marini lea sa tafetafea i le vai, ina ia puipuia mai le malemo. I se leo gatete sa ia tauvalaau ai mo se fesoasoani. Sa toe tilotilo atu le tusitala i le taulealea lea e siiina ma valaau atu i ai, “Atalii, e leai se mea e mafai ona ta faia i lena tama.”

“Ona sosoo lea,” sa tusia e le tusitala, “Sa ou vaai i se mea ou te lei vaai muamua lava i ai.” Sa alu atu lenei taulealea, ua matua manu’a tuga foi ia, i le matafaga faatasi ai ma le tino o lana uo marini ua foliga mai ua maliu. Na ia “tuu le ulu o lana uo i luga o lona tulivae. … Se ata ina a mata’ina—o nei taulelea uma e toalua ua manunu’a—e … mama i laua uma, ma aulelei, e ui lava i lo la tulaga mafatia. Ma sa punou ifo le tasi taulealea i luga o le isi ma fai mai, ‘Ou te poloaiina oe, i le suafa o Iesu Keriso ma i le mana o le perisitua, ia tumau lou ola seia mafai ona ou aumaia se fesoasoani faafomai.’” Sa faaiu e le tusitala lana tusiga: “O matou toatolu [marini e toalua ma a’u] o loo i ai iinei i le falemai. E le iloa e fomai [pe na faapefea ona ola i la’ua], ae ou te iloa.”

O Fesili e Manatunatu Loloto I Ai

O a faamanuiaga e oo mai i Au Paia o Aso e Gata Ai e ala mai i le mana o le perisitua?
E faapefea ona fesootai le faatuatua ma le perisitua—mo e umia le perisitua ma e mauaina ia faamanuiaga?

Mafaufau e tusi ou mafaufauga i lau api talaaga pe talanoaina foi ma isi.